Ɲanmiɛn ndɛ cinnjin kpa kun

“Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.”—MATIE 24:14.

BIBLU’N i su like suanfuɛ’m be waan ndɛ mma sɔ’n ti cinnjin kpa. I cinnjin m’ɔ ti’n yɛle kɛ junman nga ndɛ mma sɔ’n kɛn i ndɛ’n, ɔ fata kɛ be di i mɛn wunmuan’n nun. Asa ekun’n, i cinnjin’n lika’n i wie yɛle kɛ ɔ kan junman ng’ɔ fata kɛ Klistfuɛ’m be di’n i ndɛ. Junman sɔ’n yɛle jasin fɛ bolɛ’n mɔ bé dún mmua bó naan sa dan kun w’a ju asiɛ wunmuan’n su’n. Zezi flɛli sa sɔ’n kɛ ‘mɛn’n i awieliɛ.’

Ɲanmiɛn i ndɛ sɔ’n su kpɛn su andɛ. Yɛ ɔ kan e wie. Afin jasin fɛ’n sɔ’n fa e ɲin sie i like nɲɔn su. Yɛle kɛ ɔ yia e kɛ e yo like kun, kpɛkun ɔ se e kɛ e nian e wun su. Ɔ fata kɛ e fa ajalɛ kun. ?É sɔ́ Ɲanmiɛn Sielɛ’n nun annzɛ é káci e sin é sí i? Ajalɛ nga é fá’n, ɔ́ káci wafa nga e fa di e mɛn’n.

Maan e nian ndɛ’n i ɲrun’n nin i sin’n. Cɛn ba nɲɔn kun ka naan b’a bobo Zezi i waka’n su’n, i sɔnnzɔnfuɛ’m be bali kɛ bé wá úsɛ i e ɲrun lɔ sa mɔ bé wá jú’n be su kosan. Be kunndɛli kɛ bé sí Ɲanmiɛn Sielɛ’n i takalɛ mɔ Zezi kɛnnin i ndɛ kpɛ sunman’n ɔ nin “mɛn’n i awieliɛ’n” be su like.—Matie 24:3.

Kɛ Zezi tɛ́ be su’n, ɔ seli kɛ alɛ dandan’m bé wá tɔ́, kpɛkun awe wá kpɛ́n yɛ tukpacɛ m’ɔ sa ndɛndɛ’n wá trú, naan asiɛ’n wá kéje dan kpa. Ɔ seli ekun kɛ sa tɛtɛ’n wá sɔ́n, yɛ be nga be tɔn be wun suɛn kɛ be ti like klefuɛ’n bé wá láka sran kpanngban. Kpɛkun bé wá kpɔ́ Klistfuɛ kpa mun yɛ bé klé be ɲrɛnnɛn. I kwlaa sɔ’n ti jasin tɛtɛ ngunmin.—Matie 24:4-13; Lik 21:11.

Sanngɛ jasin fɛ kun o lɛ. Kɛ Zezi kannin sa tɛtɛ nga bé wá jú’n be ndɛ’n, i sin’n ɔ kannin ndɛ nga e dun mmua boli su ndɛ’n i su fitilɛ nun’n. Kɛ ɔ fɛ i lɛ’n, ndɛ sɔ’n sanngannin sran wie’m be akunndan’n, yɛ ɔ cicili wie’m be wla. Kannzɛ sran’m be nuan sɛ su kɛ Zezi i ndɛ sɔ’n ti cinnjin’n, sanngɛ be nuan sɛmɛn i nun yiyilɛ’n su. ?Jasin fɛ sɔ’n yɛle benin bɔbɔ? ?Ngue yɛle Ɲanmiɛn Sielɛ’n? ?Blɛ benin nun yɛ ndɛ sɔ’n kpɛ́n su ɔ? ?Wan mun yɛ bé yó naan w’a kpɛn su ɔ? ?Kɛ be kan ‘mɛn’n i awieliɛ’ ndɛ’n i bo’n yɛle benin? Maan e nian.

[Foto, bue 2]

 Facsimile of the Washington Manuscript of Four Gospels. Be wun Matie 24:14 i kpa

[Foto cifuɛ mun, bue 2]

Ɔ fin fluwa Facsimile of the Washington Manuscript of the Four Gospels in the Freer Collection 1912 nun.