Klistfuɛ awlobofuɛ mun, “an buabua amun wun sie”

“An buabua amun wun sie, afin m bɔ n kacili Sran’n ḿ bá dɔ nga an bu-man min akunndan’n su’n.”—LIK 12:40.

1, 2. ?Ngue ti yɛ kɛ Zezi se e kɛ e ‘buabua e wun sie’n,’ ɔ fata kɛ i sɔ’n yo e cinnjin ɔn?

 ?KƐ ‘I bɔ ɔ kacili Sran’n bɔ i nyrun ti nyannyan ɔ yo sro’n ɔ́ bá’ m’ɔ́ búbú ‘nvle-nvle’m be kwlaa be nun gúa be ngunmin-ngunmin’n,’ ngue sa yɛ ɔ́ jú amun awlobo’n su ɔ? (Mat. 25:31, 32) I sɔ sa liɛ’n jú blɛ mɔ e sunnzunman’n nun. I sɔ’n ti’n, kɛ Zezi se e kɛ e ‘buabua e wun sie’n,’ ɔ fata kɛ ɔ yo e cinnjin!—Lik 12:40.

² Like suanlɛ ng’ɔ sinnin lɛ’n nun’n, e wunnin wafa nga awlobo’n nunfuɛ’m be tinuntinun be kwla nian nun yo like ng’ɔ fata kɛ be yo naan awlobo wunmuan’n w’a tran w’a minndɛ’n. Siɛn’n, maan e nian like uflɛ mɔ e kwla yo naan awlobofuɛ’m be nin Ɲanmiɛn be afiɛn’n w’a mantan kpa’n.

Maan e ɲinma’n yo “kpa” titi

3, 4. (a) ?Like benin i lika yɛ ɔ fata kɛ Klistfuɛ awlobofuɛ’m be sasa be wun ɔn? (b) ?Kɛ be se kɛ maan e ɲinma’n yo ‘kpa’n’ i bo’n yɛle benin?

³ Kɛ ɔ ko yo naan Klist i balɛ’n w’a fuman awlobofuɛ’m be nun’n, ɔ fata kɛ be nian be wun naan like wie ti’n be ɲin w’a kpaman Ɲanmiɛn sulɛ kpafuɛ’n su. Ɔ fata kɛ be sasa be wun i sɔ ninnge’m be lika. Kɛ mɔ aɲanbeun  ninnge’m be kunndɛlɛ’n sacili awlobo kpanngban’n ti’n, maan amun bu e ɲinma’n i “kpa” yolɛ’n i su ndɛ nga Zezi kannin’n i akunndan nian. (An kanngan Matie 6:22, 23 nun.) Kannin’n kpaja e bo naan y’a tɔman. Kɛ like nga e fa e ɲin e sie su’n ti sɔ wie ɔ. Sɛ é kwlá sé’n, ɔ kpaja e ɲrun naan y’a tɔman sa tɛ’n nun.—Efɛ. 1:18.

⁴ ?Kɛ be se kɛ maan e ɲinma’n yo kpa’n, i bo’n yɛle benin? I bo’n yɛle kɛ nán maan e fa e ɲin e sie i ninnge kpanngban su. E mɛn dilɛ’n nun’n, nán aɲanbeun ninnge’m be kunndɛlɛ’n, ɔ nin wafa nga e kwla nian e awlobofuɛ’m be lika’n, yɛ ɔ fata kɛ be yo e cinnjin tra like ngba ɔ. Maan Zoova i junman’n i dilɛ’n yo e cinnjin tra like kwlaa. (Mat. 6:33) Ndɛ sɔ’n i bo’n yɛle kɛ e ɲin yi like kan nga e le i’n, yɛ Ɲanmiɛn i junman’n yɛ ɔ ti e like cinnjin kpafuɛ’n niɔn.—Ebr. 13:5.

5. ?Wafa sɛ yɛ ba talua kun kleli kɛ i ɲin o Ɲanmiɛn junman’n su ɔ?

⁵ Nanwlɛ, kɛ siɛ nin niɛn’m be uka ba mun naan be ɲinma’n w’a yo kpa’n, be ɲan su ye dan! Maan e fa talua kun m’ɔ fin nvle nga be flɛ i Etiopi nun lɔ’n i ndɛ’n e nian. Junman ng’ɔ dili i suklu lɔ’n yoli kpa dan. Ɔ maan kɛ ɔ ɲannin diplɔmu nga e kwla fa sunnzun baki’n, be mɛnnin i atin kɛ ɔ di suklu wɔ i ɲrun ekun. Sanngɛ kɛ mɔ Zoova i sulɛ’n yɛ i ɲin trannin su’n ti’n, w’a kplinman su. W’a cɛman kpɛkun be wa mɛnnin i junman kun. I akatua nga bé mɛ́n i anglo kun nun’n, ɔ ka kaan sa ɔ́ jú miliɔn nɲɔn. Nanwlɛ be nvle nun’n lɔ’n i sɔ akatua’n timan aɔwi. Sanngɛ talua’n fɛli i ɲin sieli i atin bofuɛ junman’n su ɔ maan w’a kplinman su kɛ ɔ́ dí i junman sɔ’n. W’a ko usɛmɛn i si nin i nin lele naan w’a kpalo junman sɔ’n. ?Sanngɛ kɛ be tili like nga be wa’n yoli’n, ɔ yoli be sɛ? Nanwlɛ, be nin ba’n be dili aklunjuɛ kpɛkun be seli i kɛ i ajalɛ’n jɔli be klun!

6, 7. ?Like benin yɛ ɔ fata kɛ e ‘nian e wun kpa i lika’ ɔ?

⁶ Zezi i ndɛ ng’ɔ o Matie 6:22, 23 nun’n, ɔ wla e su nun wie kɛ e nian e wun aɲinkpli’n i lika. Afin ndɛ mma nga be kacili i kɛ “ti-man kpa’n,” i bo’n wie yɛle “klunwi” annzɛ “aɲinblɔɛ,” yɛle kɛ konvi kpli yolɛ nin be ɲin m’ɔ yiman like’n. ?Wafa sɛ yɛ Zoova bu aɲinkpli’n annzɛ be ɲin m’ɔ yiman like’n niɔn? Biblu’n waan: “Nán maan be ti bla nin bian kunndɛlɛ, nin sa tɛtɛ yolɛ, nin be nyin b’ɔ yi-man like’n be ndɛ fi amun nuan nun.”—Efɛ. 5:3.

⁷ Sɛ sran uflɛ yɛ ɔ yo aɲinkpli’n, i liɛ’n e wun i weiin. Sanngɛ sɛ e bɔbɔ yɛ e ɲin yiman like’n i wlɛ wunlɛ’n kwla yo kekle. I sɔ’n ti’n ɔ ti kpa kɛ e fa Zezi i afɔtuɛ yɛ’n su. I waan: “An nian amun wun kpa konvi kpli yolɛ’n i lika.” (Lik 12:15) Sɛ e waan é fá afɔtuɛ sɔ’n su’n, ɔ fata kɛ e bu e bɔbɔ e wun akunndan naan e nian like ng’ɔ o e awlɛn’n nun lɔ’n. Sika nga Klistfuɛ awlobofuɛ’m be fa yiyi be ɲin su’n, mɔ be fa toto ninnge mun’n, ɔ nin blɛ nga be fa yo i kwlaa sɔ’n, maan awlobofuɛ’m be tran ase naan be bu i akunndan kpa nian.

8. ?Ninnge’m be tolɛ’n nun’n, wafa sɛ yɛ e kwla ‘nian e wun kpa’ ɔ?

⁸ Ka naan y’a to like kun’n, nán sika nga e kwla fa to’n i ngunmin yɛ ɔ fata kɛ e nian ɔn. Maan e bu sa nga’m be akunndan. Yɛle kɛ: ‘?Sɛ n to’n, ɔ su kaman n sa nun ngbɛn? ?Ń kwlá níɛn i lika? ?Ń kwlá sí i nun ninnge mun ndɛndɛ annzɛ ɔ́ cɛ́ kpa ka?’ Gbanflɛn nin talua mun, kɛ be blɔ ninnge mun aladio nin televiziɔn nun’n, nán amun bu i ngba’n i nanwlɛ. Yɛ nán amun niɛn i sɔ’n ti’n naan amun kunndɛ kɛ be man amun tralɛ nin ngowa kanlɛ ninnge nga b’a ju su uflɛuflɛ mɔ be le gua ngbɛn’n. Amun tra amun awlɛn. Asa ekun’n, maan e usa e wun kɛ: ?Sɛ n to like ngalɛ’n, ɔ kwla yo naan i m’ɔ kacili Sran’n i balɛ’n w’a fu min awlobofuɛ’m be nun? Maan e lafi nda nga Zoova tali’n su. I waan: “N su yaci-man wɔ, n su kpɔci-man wɔ mlɔnmlɔn.”—Ebr. 13:5.

Maan amun ɲin tran Ɲanmiɛn junman’n su

9. ?Sɛ awlobofuɛ’m be ɲin tran Ɲanmiɛn junman’n i dilɛ’n su’n, wafa sɛ yɛ i sɔ’n kwla uka be ɔ?

⁹ Awlobofuɛ’m be kwla yo like kun ekun naan b’a lafi Zoova su tankaan kpa naan alaje  w’a tran be awlo’n nun. Yɛle kɛ maan be fa Ɲanmiɛn i junman wie dilɛ’n be fa sie be ɲrun, naan be mian be ɲin be di junman sɔ mun. I sɔ yolɛ’n úka be naan sɛ Zoova junman’n i dilɛ’n nun’n, be kɔ be ɲrun annzɛ be kɔman be ɲrun’n, b’a wun i wlɛ. Kpɛkun ɔ́ úka be naan b’a wun like ng’ɔ fata kɛ ɔ yo cinnjin kpa be mɛn dilɛ’n nun’n.—An kanngan Filipfuɛ Mun 1:10 nun.

10, 11. ?Ɲanmiɛn sulɛ’n nun’n, ninnge benin mun yɛ amun awlobo’n sunnzunnin kɛ ɔ́ yó mɔ amun su yiɛ i nuan ɔn? ?Yɛ benin yɛ amun kunndɛ kɛ amún yó ɔ?

¹⁰ Ɲanmiɛn sulɛ’n nun’n, sɛ ninnge kanngan nga awlobofuɛ’m be tinuntinun be kwla yo’n yɛ amun sunnzun kɛ be yo’n, be kwla ɲan su ye kpa. I wie yɛle Ɲanmiɛn Ndɛ’n nun nianlɛ cɛn kwlaa’n nin i su yalɛ kokolɛ’n. Awlobofuɛ’m be yalɛ kokolɛ’n nun’n, ndɛ nga be tinuntinun be kan’n, ɔ kwla uka awlobo kpɛn’n, naan wafa nga awlobofuɛ’m be klo Zoova nin ndɛ nanwlɛ’n, w’a wun i wlɛ. Be kwla sunnzun wie kɛ bé kánngan Biblu’n nun likawlɛ titi. I sɔ’n liɛ’n úka ba mun naan b’a si fluwa nun kanngan kpa. Yɛ ɔ́ úka be wie naan b’a wun Biblu’n nun ndɛ’n i wlɛ kpa. (Jue. 1:1, 2) Kusu ɔ fata kɛ e sunnzun kɛ é yó naan e Ɲanmiɛn srɛlɛ’n yo kpa tra laa’n. Sa nga Ɲanmiɛn wawɛ’n maan sran yo’n i wafawafa’m be nglo yilɛ kpa’n, ɔ ti like kpa mɔ e kwla sunnzun kɛ é yó ɔ. (Gal. 5:22, 23) ?Yɛ be nga e to be jasin fɛ’n bowlɛ’n nun’n nin? ?E kwla kunndɛman wafa nga e kwla si be aunnvuɛ’n? Sɛ awlobo’n nunfuɛ’m be mian be ɲin be yo sɔ’n, ɔ kwla uka ba mun naan b’a suan sran aunnvuɛ silɛ. Yɛ i sɔ’n kwla yo naan b’a kunndɛ kɛ bé yó titi atin bofuɛ annzɛ ngaliɛ difuɛ.

¹¹ Amun nin amun awlobofuɛ’m be kwla tran ase be bu ninnge nga amun kwla yo’n be akunndan. ?Blɛ nga amun fa bo jasin fɛ’n, amun kwla uka su? ?Jasin fɛ’n mɔ be bo i telefɔnu nun annzɛ akpɔ nuan’n annzɛ aata diwlɛ’m be nun’n, amun kwla mian amun ɲin be bo wie? ?Yɛ lika nga be sa mian jasin bofuɛ’m be wun lɔ’n nin? ?Amun kwla tu ajalɛ be kɔ lɔ wie? ?Amun awlobo’n nunfuɛ wie kwla suan aniɛn uflɛ naan w’a kwla bo jasin fɛ’n w’a kle be nga be ti aniɛn sɔ’n?

12. ?Ngue yɛ awlobo kpɛn’m be kwla yo naan be awlobofuɛ’m b’a ɔ be ɲrun Ɲanmiɛn sulɛ’n nun ɔn?

¹² Awlobo kpɛn mun, ninnge nga sɛ amun awlobofuɛ’m be yo ɔ be kwla kɔ be ɲrun Ɲanmiɛn sulɛ’n nun’n, maan amun sie be nzɔliɛ. Yɛ maan amun fa ninnge trele wie’m be yolɛ’n sie be ɲrun. Sanngɛ nán maan like nga amun fa sie i awlobo’n ɲrun kɛ ɔ yo’n, i yolɛ’n tra be kpɛn. (Nya. 13:12) Nanwlɛ, ninnge kpakpa nga e sunnzun kɛ é yó be’n, be yolɛ’n fa blɛ. I sɔ’n ti’n, blɛ nga e fa nian televiziɔn’n, maan e fa wie e yo Ɲanmiɛn ninnge mun. (Efɛ. 5:15, 16) Amun mian amun ɲin kpa be yo like nga amun awlobo’n sunnzunnin kɛ ɔ́ yó’n. (Gal. 6:9) Awlobo nga Ɲanmiɛn ninnge’m be yolɛ’n ti i nunfuɛ’m be cinnjin kpa’n, ‘sran kwlaa bé wún kɛ be su yo kpa trá laa’n.’—1 Tim. 4:15.

Awlobofuɛ’m be Ɲanmiɛn sulɛ’n

13. ?Le mɔcuɛ kwlaa nun aɲia’m be siesielɛ’n nun’n, ngue yɛ ɔ kacili ɔ? ?Yɛ kosan benin yɛ ɔ fata kɛ e bu be su akunndan ɔn?

¹³ Like kpa kun m’ɔ uka awlobo mun naan b’a ‘buabua be wun b’a sie’n’ naan i m’ɔ kacili sran’n i balɛ’n w’a fuman be nun’n yɛle e le mɔcuɛ kwlaa nun aɲia’m be wun ajalɛ nga be fali’n. E boli ajalɛ sɔ’n i su dilɛ afuɛ 2009, Zanvie  i le 1 su. Laa’n ɔ le asɔnun’n i fluwa nun ndɛ suanlɛ’n i cɛn liɛ’n i ngunmin. Sanngɛ siɛn’n, ɔ timan sɔ kun. Be yo aɲia sɔ’n nin Ɲanmiɛn junman dilɛ suklu nin Junman dilɛ aɲia’n i cɛn kunngba’n nun. Kɛ ɔ ko yo naan Klistfuɛ awlobo’m b’a ɲan blɛ b’a wla be wun fanngan naan be nin Ɲanmiɛn be afiɛn’n w’a mantan kpa titi’n, i ti yɛ be fɛli i sɔ ajalɛ’n niɔn. Afin be kwla fa nnɔsua kun be su Ɲanmiɛn awlo lɔ. Siɛn’n mɔ be fɛli i sɔ ajalɛ’n w’a di le nɲɔn kun’n niɔn, e kwla usa e wun kɛ: ‘?N fɛ i sɔ blɛ liɛ’n n su Ɲanmiɛn nnɔsua, annzɛ n ngunmin n fa suan Biblu’n nun like? ?N fa yo like ng’ɔ fata kɛ n fa yo’n?’

14. (a) ?Like klikli nga ti yɛ e su Ɲanmiɛn awlo lɔ titi annzɛ e ngunmin e suan Biblu’n nun like’n yɛle benin? (b) ?Ngue ti yɛ ɔ ti cinnjin kɛ e fa nnɔsua kun e suan Biblu’n nun like ɔ?

 ¹⁴ Like klikli nga ti yɛ e su Ɲanmiɛn awlo lɔ titi annzɛ e ngunmin e suan Biblu’n nun like’n, yɛle kɛ e kunndɛ kɛ e nin Ɲanmiɛn e afiɛn’n mantan kpa tra laa’n. (Zak 4:8) Kɛ e fa blɛ e suan Biblu’n nun like titi mɔ e si e Yifuɛ’n kpa’n, e nin i e afiɛn’n mantan kpa. Sɛ e nin i e afiɛn’n mantan kpa’n, ɔ́ yó maan é kúnndɛ kɛ é kló i kpa. Yɛ ‘é fá e wla’n kwlaa gúɛ i su naan e akunndan’n kwlaa trɛn i su naan y’a fa e wunmiɛn’n kwlaa y’a yo like ng’ɔ kle kɛ e klo i’n.’ (Mar. 12:30) Nanwlɛ, e wun blibli e kɛ e fa Ɲanmiɛn i ndɛ’n su naan e nian like ng’ɔ yo’n su e yo. (Efɛ. 5:1) Nnɔsua nga awlobofuɛ’m be fa su Ɲanmiɛn’n ɔ ti like cinnjin. Sɛ e yo i titi’n, e kwla fa uka e awlobofuɛ’m be ngba naan b’a ‘buabua be wun b’a sie,’ naan b’a minndɛ ‘nyrɛnnɛn dan’ ng’ɔ́ wá bá’n. (Mat. 24:21) I yɛ maan é kwlá fíte nun ɔn.

15. ?Wafa sɛ yɛ awlobofuɛ’m be Ɲanmiɛn sulɛ nnɔsua’n, ɔ yo maan wafa nga be bu be wiengu’n ɔ kaci ɔ?

¹⁵ Like kun ekun mɔ i ti yɛ be siesieli awlobofuɛ’m be Ɲanmiɛn sulɛ’n, yɛle kɛ ɔ yo maan awlobofuɛ’m be afiɛn’n mantan kpa. Kɛ awlobofuɛ’m be fa blɛ be koko Ɲanmiɛn ninnge’m be su yalɛ le mɔcuɛ kwlaa nun’n, ɔ yo maan wafa nga be bu be wiengu’n ɔ kaci. Ɲanmiɛn Ndɛ’n mɔ yasua kun nin i yi’m be suan nun like aklunjuɛ su likawlɛ’n, ɔ yo maan be afiɛn’n sɛ. (An kanngan Akunndanfuɛ’n 4:12 nun.) Siɛ nin niɛn nin ba’m nga be su Zoova likawlɛ’n, ‘be klo be wiengu.’—Kol. 3:14.

16. Kɛ aniaan bla nsan be fali nnɔsua kun be suannin Biblu’n nun like’n, wafa nga be ɲannin su ye’n, an kɛn i ndɛ.

¹⁶ Wafa nga aniaan bla nsan be ɲannin nnɔsua kun nga be sieli naan b’a fa suan Biblu’n nun like’n i su ye’n, maan e nian. Kannzɛ bɔbɔ angbeti bla kpɛnngbɛn nsan sɔ’m be timan osufuɛ’n, sanngɛ be tran klɔ kunngba’n su. Yɛ be ti janvuɛ w’a cɛ kpa. Be kunndɛli kɛ bé fá blɛ trán likawlɛ kpa ekun. Sanngɛ b’a kunndɛman kɛ bé trán bé bó nzɛmundɛ sa ngbɛn. Be waan bé fá blɛ sɔ’n súan Ɲanmiɛn su like naan b’a ɲan su ye. Ɔ maan be fali ajalɛ kɛ bé fá nnɔsua kun bé súan Biblu’n nun like. Be fali fluwa ‘ Rends pleinement témoignage au sujet du Royaume de Dieu ’ yɛ be boli like suanlɛ’n i bo ɔ. Be nun kun waan: “Kɛ e suan like’n, i fɛ m’ɔ yo e’n ti’n, titi’n e like suanlɛ’n di dɔ kun tra su. E yo kɛ, i nun mɔ sa’m bé jú e niaan Klistfuɛ klikli’m be su’n, nn e o lɔ sa. Kpɛkun sɛ i sɔ sa kunngba’n wie tɔ e su’n, like nga é yó’n e koko su yalɛ. Kpɛkun like nga e suannin’n e nian su e bo jasin fɛ’n. I sɔ’n yoli maan Ɲanmiɛn Sielɛ’n i jasin fɛ’n i bolɛ nin sran’m be like mɔ e kle naan b’a kaci Zezi i sɔnnzɔnfuɛ’n, ɔ yoli e fɛ. Kpɛkun ɔ bali nvlɛ trali laa lele.” Biblu’n nun like suanlɛ likawlɛ’n yoli maan aniaan sɔ’m be sili Ɲanmiɛn i su like kpa ekun. Sanngɛ nɛ́n i ngba ɔ. Ɔ yoli maan be afiɛn’n mantannin kpa trali laa’n. Be se kɛ: “I sɔ ajalɛ’n ti e awlɛn su like.”

17. ?Ngue yɛ maan awlobofuɛ’m be Ɲanmiɛn sulɛ’n kwla yo ye ɔ?

¹⁷ ?Yɛ e li? ?Kɛ e fali nnɔsua kun e su Ɲanmiɛn awlo lɔ’n, annzɛ e ngunmin e suan Biblu’n nun like’n, i su ye benin yɛ e su ɲɛn i ɔ? Sɛ e kpɛ e awlobofuɛ’m be Ɲanmiɛn sulɛ’n nun cɛn’n, e su ɲɛnmɛn i su ye’n. I sɔ’n ti’n kɛ i dɔ’n ko ju’n, maan awlobofuɛ’m be kwlaa be nuan yia. Nán e man ninnge nga be timan cinnjin’m be atin naan be saci blɛ sɔ’n. Asa ekun’n, like nga amun suan’n, maan ɔ yo like mɔ amun awlobofuɛ’m be kwla nanti su be mɛn dilɛ’n nun ɔn. ?Ngue yɛ amun kwla yo naan like suanlɛ’n w’a yo fɛ ɔ? Amun nian like klelɛ wafa ng’ɔ ti kpa’n su be yo. Kpɛkun maan like suanlɛ’n yo aɲinyiɛ su, yɛ nán ɔ yo sukusuku.—Zak 3:18. *

 “An tran minndɛ” yɛ “an buabua amun wun”

18, 19. ?Kɛ mɔ e si kɛ i m’ɔ kacili Sran’n i balɛ’n w’a mantan koko’n ti’n, ajalɛ benin yɛ ɔ fata kɛ e bɔbɔ nin e awlobofuɛ mun e fa ɔ?

¹⁸ Wafa nga lika’n w’a saci andɛ’n ɔ kle weiin kɛ, kɛ ɔ fin afuɛ nga be flɛ i 1914 nun’n Satan i mɛn’n o i blɛ kasiɛn’n nun. Armagedɔn alɛ’n w’a mantan koko kpa. Ɔ cɛ kaan sa’n, i m’ɔ kacili Sran’n wá bá. Yɛ be nga be buman Ɲanmiɛn wie’n, ɔ́ tú Zoova i klunngbɔ’n be su. (Jue. 37:10; Nya. 2:21, 22) ?Kɛ mɔ e si sɔ’n niɔn, ɔ fataman kɛ i sɔ’n su e bo naan e bɔbɔ nin e awlobofuɛ mun e fa ajalɛ?

¹⁹ Zezi waan maan e ɲinma’n yo “kpa.” ?E su fɛ i afɔtuɛ sɔ’n su? Andɛ mɛn nga nun’n, aɲanbeun’n nin aɲrunɲan’n nin kwlalɛ’n yɛ sran’m be ɲin o i sin ɔn. ?Yɛ e awlobofuɛ’m be li? ?Be ɲin o Ɲanmiɛn junman dilɛ’n su? ?Awlobofuɛ’m be Ɲanmiɛn sulɛ’n i wun ajalɛ nga be fali’n, ɔ su yo e ye? ?I nun like ng’ɔ fata kɛ e ɲɛn i’n, e ɲɛn i? ?Kɛ nga e fa wunnin i like suanlɛ ng’ɔ sinnin lɛ’n nun’n sa’n, like nga Biblu’n waan yasua’n nin bla’n nin ba’m be yo naan awlobo’n w’a ‘tran w’a minndɛ’n,’ e o i yolɛ’n su? (1 Tɛs. 5:6) Sɛ ɔ ti sɔ’n, é ‘búabúa e wun síe’ yɛ é mínndɛ i m’ɔ kacili Sran’n.

[Ja ngua lɛ ndɛ’n]

?Ngue yɛ amun suannin ɔn?

• ?Sɛ Klistfuɛ awlobofuɛ’m be ɲinma’n ti ‘kpa’n,’ wafa sɛ yɛ i sɔ’n kwla uka be naan b’a ‘buabua be wun b’a sie’ ɔ?

• ?Sɛ Klistfuɛ awlobofuɛ’m be ɲin o Ɲanmiɛn junman’n su naan be mian be ɲin be di’n, wafa sɛ yɛ i sɔ’n kwla uka be naan b’a ‘buabua be wun b’a sie’ ɔ?

• ?Sɛ Klistfuɛ awlobofuɛ’m be fa nnɔsua kun be su Ɲanmiɛn awlo lɔ titi’n, wafa sɛ yɛ i sɔ’n kwla uka be naan b’a ‘buabua be wun b’a sie’ ɔ?

[Kosan mun]