Klistfuɛ awlobofuɛ mun, an “tran minndɛ”

“Maan e nian e wun su e tran minndɛ i.”—1 TƐS. 5:6.

1, 2. ?Sɛ awlobo kun waan ɔ́ trán mínndɛ’n, ngue yɛ ɔ fata kɛ ɔ yo ɔ?

 KƐ AKOTO PƆLU klɛ́ Tɛsaloniki lɔ Klistfuɛ’m be fluwa’n, ɔ kannin Zoova “i cɛn dan sroesroe’n” i ndɛ. Ɔ seli be kɛ: “Aniaan mun, an ti-man kɛ sran b’ɔ o aosin nun’n sa, i sɔ’n ti, nán man cɛn sɔ’n fu amun nun kɛ awiefuɛ’n fu sran nun’n sa. Amun kwlaa an wun ase, an ti kɛ sran b’ɔ yo sa wia nun sa. E ti-man kɛ sran b’ɔ yo sa kɔnguɛ’n sa, e nun-man aosin’n nun.” Pɔlu kan guali su kɛ: “I sɔ’n ti, nán maan e lafi kɛ sran wie’m be liɛ’n sa, sanngɛ maan e nian e wun su e tran minndɛ i.”—Zoɛ. 3:4; 1 Tɛs. 5:4-6.

² Afɔtuɛ nga Pɔlu ko mannin Tɛsalonikifuɛ mun’n, ɔ ti Klistfuɛ mɔ be o “awieliɛ blɛ’n” nun’n be liɛ sɛsɛsɛ. (Dan. 12:4) Kɛ mɔ mɛn’n i awieliɛ’n w’a mantan koko’n ti’n, Satan su miɛn i ɲin kpa naan Ɲanmiɛn i sufuɛ kpa’m be yaci i sulɛ. I sɔ’n ti’n, afɔtuɛ nga Pɔlu mɛnnin i kɛ Ɲanmiɛn i sulɛ’n nun’n nán e lafi’n, maan e fa ngwlɛlɛ naan e tu e klun e fa su. Sɛ Klistfuɛ awlobo kun kunndɛ kɛ ɔ́ trán minndɛ’n, ɔ ti cinnjin kɛ awlobo sɔ’n i nunfuɛ’m be tinuntinun be yo like nga Zoova waan be yo’n. ?Sɛ ɔ ti sɔ’n niɔn, ngue yɛ yasua nin bla nin gbanflɛn nin talua’m be kwla yo naan be awlobo’n w’a “tran [w’a] minndɛ” ɔ?

Yasua mun, amun sɔnnzɔn ‘bua tafuɛ kpa’n’

3. ?Kɛ nga 1 Timote 5:8 fa kan sa’n, awlobo kpɛn junman’n m’ɔ fata kɛ yasua kun di’n, i wie yɛle benin?

³ Biblu’n waan “yasua [...] yɛ ɔ sie bla-a.” (1 Kor. 11:3) ?Awlobo kpɛn junman’n m’ɔ fata kɛ yasua kun di’n, i wie yɛle benin? Biblu’n se kɛ: “Sran ng’ɔ niɛn-mɛn i fuɛ’m be lika’n ɔ ti tɛ, nga b’ɔ ti tɛ’n tra su’n yɛlɛ sran ng’ɔ niɛn-mɛn i bɔbɔ i awlo’n i lika’n, ɔ ti-man Nyanmiɛn sufuɛ, i tɛ liɛ’n tra sran ng’ɔ lafi-man Krist su’n.” (1 Tim. 5:8) Ɔ fata kɛ yasua’n niɛn i awlobofuɛ’m be lika. Sanngɛ sɛ i waan ɔ́ úka be naan be nin Ɲanmiɛn be afiɛn’n w’a sɛ tititi’n, ɔ fataman kɛ sika ngunmin yɛ ɔ kunndɛ fa nian be lika ɔ. Ɔ fata kɛ ɔ uka be naan be kwlaa be nin Ɲanmiɛn fa afiɛn’n mantan kpa. (Nya. 24:3, 4) ?Wafa sɛ ɔ kwla yo sɔ ɔ?

4. ?Ngue yɛ yasua kun kwla yo naan w’a ukɛ i awlobofuɛ mun naan be nin Ɲanmiɛn be afiɛn w’a mantan kpa ɔ?

⁴ “Yasua yɛ ɔ ti bla i su kpɛn kɛ Krist kusu ti Asɔnun i su kpɛn’n sa” ɔ. I sɔ’n ti’n, ɔ fata kɛ yasua ng’ɔ le bla’n, ɔ bu wafa nga Zezi sie asɔnun’n i akunndan naan ɔ yo kɛ i sa wie. (Efɛ. 5:23) Maan e nian wafa nga Zezi bɔbɔ nin i sɔnnzɔnfuɛ’m be trannin’n. (An kanngan Zan 10:14, 15 nun.) ?Ngue yɛ yasua kun kwla yo naan w’a ukɛ i awlobofuɛ mun naan be nin Ɲanmiɛn be afiɛn’n w’a mantan kpa ɔ? Yɛle kɛ Zezi m’ɔ ti ‘bua tafuɛ kpa’n’ i ndɛ nga ɔ kannin’n ɔ nin i aeliɛ’n, maan ɔ suan be su like naan ɔ “nanti i ajalɛ liɛ’n su.”—1 Piɛ. 2:21.

5. ?Ngue yɛ Bua Tafuɛ Kpa’n si i asɔnun’n su ɔ?

⁵ Maan e nian wafa nga awlobo kpɛn’n kun kwla nian Klist i ajalɛ’n su’n. Ɔ ti kɛ bua tafuɛ kun nin i bua mun sa. Be nantilɛ’n nun’n sɛ é kwlá sé’n, be si be wiengu kpɛkun be lafi be wiengu su. Bua tafuɛ’n si i bua’m be kwlaa. Yɛ bua’m be kusu be si be tafuɛ’n yɛ be lafi i su. Be si i nɛn’n, kpɛkun ndɛ ng’ɔ kan’n be fa su. Zezi seli kɛ: “N si m bua mun yɛ be kusu be si min.” Zezi nianman asɔnun’n paloo sa ngbɛn. Glɛki nun ndɛ mma nga be kacili i kɛ “n si m bua  mun’n” be fa kan “like nga be si i kpa’n” i ndɛ. I sɔ’n kle kɛ Bua Tafuɛ Kpa’n si i bua mun kpa be tinuntinun. Ɔ si ninnge ng’ɔ mian be sa’n. Kpɛkun ɔ si ninnge nga be kwla yo’n ɔ nin nga be kwlá be yoman’n. E Ajalɛ Klefuɛ’n i bua’m be su like fi sa nunman lɛ m’ɔ simɛn i ɔ. Yɛ bua’m be kusu be si bua tafuɛ’n i kpa liɛ su, yɛ be lafi su kɛ ɔ kwla kle be atin.

6. ?Wafa sɛ yɛ yasua’m be kwla sɔnnzɔn Bua Tafuɛ Kpa’n niɔn?

⁶ Sɛ yasua kun waan ɔ́ nían Klist i sran sielɛ’n su’n, maan ɔ yo i wun kɛ bua tafuɛ sa. Kpɛkun maan ɔ bu be ng’ɔ nian be lika mun kɛ i bua mun sa. Ɔ fata kɛ ɔ miɛn i ɲin naan ɔ si i awlobofuɛ’m be kpa. ?Yasua kun yo sɔ ɔ, ɔ yo ye? Ɛɛn. Sanngɛ sɛ i waan ɔ́ yó sɔ’n maan ɔ nin i awlo’n nunfuɛ’m be tinuntinun be koko yalɛ naan ɔ fɛ i su sie i ndɛ ng’ɔ lo be’n i bo. Kpɛkun ninnge ng’ɔ ti mɔ awlobo’n yo i likawlɛ’n be nun o, annzɛ awlo lɔ Ɲanmiɛn sulɛ’n nun o, ɔ fata kɛ ɔ kle ajalɛ kpa. Maan ɔ yo aɲia’m be bo kɔlɛ’n nin o, jasin fɛ’n bolɛ’n nin o annzɛ be ɲin su yiyilɛ’n nin o, ɔ fata kɛ ɔ fɛ i sɔ’n i nun ta wie. Kɛ Klistfuɛ kun suan like nga Ɲanmiɛn Ndɛ’n kan’n kpa m’ɔ si i awlobofuɛ’m be kpa m’ɔ kle be ajalɛ kpa’n, ɔ ti weiin kɛ bé láfi i su. Kpɛkun ɔ́ wún kɛ be ngba be bo yo kun Ɲanmiɛn sulɛ kpafuɛ’n nun. Ɔ maan ɔ́ dí aklunjuɛ.

7, 8. ?Yasua kun i awlobofuɛ’m be klolɛ’n nun’n, wafa sɛ yɛ ɔ kwla sɔnnzɔn Bua Tafuɛ Kpa’n niɔn?

⁷ Bua tafuɛ kpa’n kusu klo i bua mun. Kɛ e suan Zezi i jasin fɛ ng’ɔ boli’n i su fluwa nga be klɛli’n nun like’n, like kun m’ɔ wluwlu e wun’n, yɛle klolɛ mɔ Zezi kloli i sɔnnzɔnfuɛ mun’n. Ɔ ‘fɛ i wun to i bua’m be ti’ bɔbɔ. Wafa nga Zezi kloli be ng’ɔ nian be lika’n, ɔ fata kɛ yasua’m be nian su be klo be fuɛ mun sɔ wie. Yasua ng’ɔ kunndɛ kɛ Ɲanmiɛn i klun jɔ i wun’n, ɔ yomɛn i yi’n i wannzo. Sanngɛ ɔ klo i titi “kɛ Krist kloli Asɔnun’n” sa. (Efɛ. 5:25) Ɔ fata kɛ ɔ kan ndɛ kle i yi klun ufue su yɛ ɔ bu i sran, afin bla’n nin i sɔ’n fata.—1 Piɛ. 3:7.

⁸ Ba’m be talɛ’n nun’n, ɔ fataman kɛ awlobo kpɛn’n fa Ɲanmiɛn mmla’n su nantilɛ’n kan ngowa. Sanngɛ kusu nán i wla fi su kɛ ɔ fata kɛ ɔ klo i mma mun. Sɛ ɔ fata kɛ ɔ tu be fɔ’n, maan ɔ yo i klolɛ su. Ba wie’m be o lɛ’n, kɛ be kan ndɛ kle be’n, be faman su be ja nun lɛ. Ɔ fata kɛ siɛ’n trɛ i awlɛn kpa i sɔfuɛ’m be lika. Kɛ yasua’m be nian Zezi i ajalɛ’n su’n, fɔundi nin alaje be tran awlo’n nun. Kpɛkun be di aklunjuɛ nga jue tofuɛ’n kɛnnin i ndɛ’n wie.—An kanngan Jue Mun 23:1-6 nun.

9. ?Kɛ Nowe sa’n, ngue yɛ ɔ fata kɛ Klistfuɛ nga be ti awlobo kpɛn’n be yo ɔ? ?Yɛ ngue yɛ ɔ́ úka be naan b’a kwla yo sɔ ɔ?

⁹ Sran kun ekun m’ɔ kleli Klistfuɛ awlobo kpɛn’m be ajalɛ kpa’n yɛle Nowe. Nowe blɛ su’n, i mɛn liɛ’n i awieliɛ’n juli. Sanngɛ Zoova maan ‘nzue’n tɔli ɔ yili dan kpa naan w’a kun sran tɛtɛ nga be o mɛn nun’n be kwlaa. Ɔ deli Noe, yɛ ɔ deli sran nso ekun.’ (2 Piɛ. 2:5) Ɔ fatali kɛ Nowe ukɛ i awlobofuɛ mun naan be fin nzue dan’n nun fite. Blɛ kasiɛn nga nun’n, i sɔ kunngba’n wie yɛ ɔ fata kɛ Klistfuɛ awlobo kpɛn’m be yo ɔ. (Mat. 24:37) Nanwlɛ, ɔ ti cinnjin kpa kɛ be suan ‘bua tafuɛ kpa’n’ i su like naan be mian be ɲin be yo kɛ i sa!

Bla mun, ‘amun siesie amun awlo’n’

10. ?Kɛ be se kɛ bla’n bu i wun’n i sran’n, i bo’n yɛle benin?

¹⁰ Akoto Pɔlu klɛli i kɛ: “Bla mun, an bu amun wun’m be sran, kɛ an bu e Min’n i sran’n sa. Nán an fa amun nyin wlawla be.” (Efɛ. 5:22) I sɔ ndɛ’n kleman kɛ bla’n leman ɲrun. Ka naan Ɲanmiɛn Kpli w’a yi Ɛvu m’ɔ ti bla klikli’n, ɔ seli kɛ: “Ɔ ti-man kpa kɛ sran ngunmin tran. Ń wá yó i ukafuɛ kun b’ɔ nin i bé kwlá trán.” (Bob. 2:18) Bla’m be ti be wun’m be “ukafuɛ” yɛ be nin ‘be kwla tran.’ Yɛle kɛ be uka be wun mun awlobo’n i lika nianlɛ’n nun. I sɔ liɛ’n ti junman nanndoliɛ.

11. ?Wafa sɛ yɛ bla ng’ɔ ti kpa’n “ɔ siesie i awlo’n” niɔn?

¹¹ Bla ng’ɔ ti kpa’n ɔ miɛn i ɲin naan awlobo’n w’a yo kpa. (An kanngan Nyanndra Mun 14:1 nun.) Bla ng’ɔ ti sinnglinfuɛ’n, i ɲin yiman awlobo’n i sielɛ’n i wun ajalɛ nga Ɲanmiɛn fali’n. Sanngɛ bla ng’ɔ si ngwlɛlɛ’n i ɲin  yi ninnge siesielɛ sɔ’n kpa. Ɲin kekle aeliɛ mɔ w’a tru mɛn’n nun’n, ɔ faman su wie. Sanngɛ ɔ lo i wun mɛn i wun’n naan ɔ sie i. (Efɛ. 2:2) Bla ng’ɔ ti sinnglinfuɛ’n, ɔ sisimɛn i bo naan w’a kɛn i wun’n i wun ndɛ tɛtɛ. Sanngɛ bla ng’ɔ si ngwlɛlɛ’n ɔ yo naan ba mun nin sran uflɛ’m be ɲin w’a yi i wun’n i kpa ekun. I sɔ bla’n ɔ jrɛnmɛn i wun su kɛ saan fii ɔ yo ninnge wie mun, yɛ ɔ fɛmɛn i ɲin wlɛwlɛmɛn i. Yɛ ɔ yoman naan i aeliɛ’n ti’n, sran uflɛ’m be ɲin w’a yimɛn i wun’n. Sika ndɛ’n o lɛ ekun. Bla ng’ɔ ti sinnglinfuɛ’n, ɔ saci awlobo’n nun sika nga be fɛli lele naan b’a ɲɛn i’n. Sanngɛ bla ng’ɔ suɛn i wun bo’n, ɔ timan sɔ. Sika ndɛ’n su ajalɛ nga i wun fa’n, ɔ suɛn i bo. Ɔ kpliman toman ninnge mun, yɛ ɔ yo sika’n i cɛcɛ. Ɔ mianman i wun’n kɛ ɔ di junman tratra su.

12. ?Ngue yɛ bla kun kwla yo naan w’a ukɛ i awlobofuɛ mun naan b’a ‘tran b’a minndɛ’ ɔ?

¹² Bla ng’ɔ ti kpa’n, ɔ ukɛ i awlobofuɛ mun naan b’a ‘tran b’a minndɛ.’ Yɛle kɛ, kɛ yasua klé ba’m be Ɲanmiɛn ndɛ’n, ɔ suɛn i bo. (Nya. 1:8) Ajalɛ nga be fɛli i kɛ nnɔsua kun nun’n, bé sú Ɲanmiɛn awlo lɔ’n, ɔ suɛn i bo. Kpɛkun kɛ i wun’n tú ba’m be fɔ’n, ɔ jrɛn i sin. Nanwlɛ ɔ le bla ng’ɔ ti kpa’n, yɛ ɔ le ng’ɔ suanman i wun’n i bo’n. Kasiɛnfuɛ’n i aeliɛ tɛ’n ti’n i mma’m be fɛ be kplo nun’n yɛ be nin Ɲanmiɛn be afiɛn’n sɛman. Bla nɲɔn sɔ’n, be timan kun kaan sa!

13. ?Kɛ yasua kun di Ɲanmiɛn junman’n, ngue ti yɛ ɔ ti cinnjin kɛ i yi’n suɛn i bo ɔ?

¹³ ?Bla ng’ɔ suɛn i wun’n i bo’n, kɛ ɔ wun kɛ i wun’n di junman asɔnun’n nun’n, i sɔ’n yo i sɛ? Nanwlɛ, i sɔ’n yo i fɛ! Maan i wun’n yo asɔnunfuɛ’m be lika nianfuɛ annzɛ asɔnun kpɛnngbɛn, annzɛ maan ɔ di Comité de Liaison Hospitalier nun junman, annzɛ ɔ nin aniaan nga be kplan asɔnun sua’m be di junman, ɔ bu i cenjele like. Ɔ maan ɔ di aklunjuɛ. Nanwlɛ, ɔ fata kɛ ɔ miɛn i ɲin kpa naan w’a suɛn i wun’n i bo. Sanngɛ ɔ si kɛ asɔnun’n nin anuannzɛ’n nun junman nga i wun’n di’n, ɔ uka awlobo wunmuan’n naan Ɲanmiɛn i sulɛ’n nun’n, b’a lafiman.

14. (a) ?Ngue ti yɛ bla kun i wun’n i bo suanlɛ’n kwla yo kekle mɛn i ɔ? ?Yɛ wafa sɛ yɛ ɔ kwla jrɛn i sɔ liɛ’n i ɲrun kekle ɔ? (b) ?Ngue yɛ bla kun kwla yo naan alaje w’a tran awlobo’n nun ɔn?

¹⁴ Sɛ bla kun i wun’n fa ajalɛ kun m’ɔ timɛn i liɛ’n su’n, i bo suanlɛ’n kwla yo kekle mɛn i. Kannzɛ ɔ ti sɔ’n, sanngɛ bla ng’ɔ ti kpa’n ɔ yi i ‘anwlɛn wɛtɛɛ’n, ɔ nin diin bɔ ɔ ti’n’ i nglo. Kpɛkun ɔ suɛn i wun’n bo naan i ajalɛ’n w’a yo ye. (1 Piɛ. 3:4) Asa ekun’n, bla ng’ɔ ti kpa’n, laa bla kɛ Sara, Riti, Abigaili, nin Zezi i nin Mali sa’n, mɔ be ɲin yili Ɲanmiɛn’n, ɔ miɛn i ɲin nian be ajalɛ’n klanman’n su. (1 Piɛ. 3:5, 6) Kpɛkun ɔ nian andɛ bla kpɛnngbɛn nga ‘be yo sa nga Nyanmiɛn sran yo’n’ be ajalɛ’n su wie. (Tit 2:3, 4) Bla’n ng’ɔ ti kpa’n ɔ klo i wun’n yɛ i ɲin yi i. Kɛ ɔ yo sɔ’n, be aja’n taka kpa kpɛkun awlobo wunmuan’n di alaje. I awlo’n nun tranlɛ’n yo fɛ. Yasua ng’ɔ klo Zoova m’ɔ miɛn i ɲin di junman mɛn i’n, sɛ ɔ ɲan bla ng’ɔ suɛn i bo’n, nn nanwlɛ, w’a ɲan like kun m’ɔ leman wunsu’n!—Nya. 18:22.

 Gbanflɛn nin talua mun, ‘amun bu ninnge nga be wun-man be’n be akunndan’

15. ?Wafa sɛ yɛ gbanflɛn nin talua’m be kwla suan be si nin be nin’m be bo, naan be awlobo’n w’a ‘tran w’a minndɛ’ ɔ?

¹⁵ ?Amun gbanflɛn nin talua mun, wafa sɛ yɛ amun kwla suan amun si nin amun nin’m be bo naan amun awlobo’n w’a ‘tran w’a minndɛ’ ɔ? Amun bu like nga Zoova waan ɔ́ mán amun’n i akunndan nian. Atrɛkpa’n, kɛ ɔ fin amun bakan nun lele’n, amun si nin amun nin’m be fali mɛn klanman’n i foto be kleli amun. Kpɛkun kɛ amún ɲín bé kɔ́’n, be fali Biblu’n nin i akua wie mun be ukali amun, naan amun a wun wafa nga mɛn klanman’n nun lɔ anannganman nguan nun tranlɛ’n fá yó’n. Sɛ amun ɲin tran Zoova i junman’n i dilɛ’n su, naan amun yo like nga amun kwla yo naan amun a di i sɔ junman’n, i sɔ’n úka amun naan amun a ‘tran b’a minndɛ.’

16, 17. ?Ngue yɛ gbanflɛn nin talua’m be kwla yo naan b’a ɲan wanndilɛ’n i akatua’n niɔn?

¹⁶ Maan akoto Pɔlu i ndɛ ng’ɔ o 1 Korɛntfuɛ Mun 9:24 nun’n ɔ yo amun cinnjin. (An kanngan nun.) Akoto Pɔlu fali junman nga e di e man Zoova’n sunnzunnin wanndilɛ. Ɔ maan kɛ amún wánndi’n, amun wanndi naan amun a kwla ɲɛn i ti akatua’n. Amun fa ajalɛ nga i agualiɛ su’n ɔ kwla man amun anannganman nguan’n. Sran sunman be ɲin w’a tranman like mɔ be kwla ɲɛn i’n su kun. Afin be fali sika kunndɛlɛ’n nin ninnge nga be kwla fa sika be to’n, be fa cicili be ti. Nanwlɛ be dili sinnzin dan! Sran nga aɲanbeun kunndɛlɛ’n yɛ ɔ ti i cinnjin’n, ɔ su diman aklunjuɛ. Ninnge nga be kwla fa sika be to’n be cɛman. I sɔ’n ti’n amun liɛ’n, amun bu “ninnge nga be wun-man be’n” be akunndan. ?Ngue ti ɔ? Afin “ninnge nga be wun-man be’n, be cɛ be saci-man le.”—2 Kor. 4:18.

¹⁷ “Ninnge nga be wun-man be’n” i wie yɛle suralɛ nga Ɲanmiɛn Sielɛ’n maan sran’m bé ɲɛ́n i’n. Amun yo like nga amun ko yo naan cɛn wie lele amun a ɲɛn i sɔ suralɛ’n wie’n. Kɛ sran kun fɛ i wun wlɛ i Zoova i junman dilɛ’n nun mlɔnmlɔn’n, yɛ ɔ kwla di aklunjuɛ kpa sa ɔ. Ɲanmiɛn Kpli i sulɛ’n nun’n, amun kwla yo ninnge wie mun koko nun wa, kpɛkun amun kwla sunnzun kɛ amún yó wie mun amun ɲrun mmua lɔ. * Sɛ amun sunnzun kɛ amún yó ninnge nga amun wunmiɛn ju be yolɛ’n nun’n, i sɔ’n úka amun naan amun ɲin w’a tran Ɲanmiɛn i sulɛ’n su. Yɛ i agualiɛ su’n amún ɲán akatua mɔ yɛle anannganman nguan’n.—1 Zan 2:17.

18, 19. ?Wafa sɛ yɛ gbanflɛn annzɛ talua kun kwla si kɛ ɔ nin Zoova be afiɛn’n w’a mantan kpa ɔ?

¹⁸ Gbanflɛn nin talua mun, like klikli nga amun kwla yo naan amun a ɲan nguan’n yɛle kɛ amun yo naan amun nin Zoova be afiɛn’n sɛ kpa. ?Amun a fɛ i sɔ ajalɛ liɛ’n? Maan amun usa amun wun kɛ: ‘?Ɲanmiɛn i ninnge’m be lo min? ?Annzɛ kɛ min si nin min nin be o lɛ’n yɛ ninnge sɔ’m be lo min ɔn? ?M mian min ɲin n yi nzuɛn nga mɔ maan Ɲanmiɛn klun kwla jɔ min wun’n be nglo? ?N yo Ɲanmiɛn sulɛ kpafuɛ’n i nun ninnge mun kpɛ sunman? ?Yɛle kɛ n srɛ Zoova titi yɛ n suan Biblu’n nun like, yɛ n tran aɲia’m be bo kpɛkun m bo jasin fɛ’n titi? ?N fa min wun n mantan Ɲanmiɛn naan e nin i e afiɛn’n w’a mantan kpa?’—Zak 4:8.

¹⁹ Maan amun bu Moizi i ajalɛ’n i akunndan. Kannzɛ Moizi ɲinnin nvle nga i nunfuɛ’m be suman Zoova’n i nun’n, sanngɛ w’a kplinman su kɛ be se kɛ ɔ ti Ezipti famiɛn’n i wa bla’n i wa. Sanngɛ ɔ kplinnin su kɛ be flɛ i Ɲanmiɛn sufuɛ.  (An kanngan Ebre Mun 11:24-27 nun.) Klistfuɛ gbanflɛn nin talua mun, ɔ fata kɛ amun kusu amun ta nda kɛ amún sú Zoova tititi. Sɛ amun yo sɔ’n, amún dí aklunjuɛ kpafuɛ’n. Kpɛkun amun mɛn dilɛ’n yó kpa andɛ, yɛ amun kwla lafi su kɛ amún ɲán ‘nguan sakpa’n.’—1 Tim. 6:19.

20. ?Wan yɛ ɔ ɲan wanndilɛ nga e wanndi naan y’a ɲan nguan’n i nun akatua’n niɔn?

²⁰ Laa’n, wanndilɛ i nun akplowa nga be si’n, sran kunngba yɛ ɔ ɲɛn i akatua’n niɔn. Sanngɛ wanndilɛ nga e wanndi naan y’a ɲan nguan’n ɔ timan sɔ. Ɲanmiɛn klo kɛ “ɔ́ dé sran’m be kwlaa naan be wun sa ng’ɔ ti nanwlɛ’n i wlɛ kpa.” (1 Tim. 2:3, 4) Ka naan amun a bo amun wanndilɛ liɛ’n i bo’n, sran wie’m be wanndili lele be ɲannin akatua’n. Dɔ nga su’n, wie’m be nin amun su wanndi. (Ebr. 12:1, 2) Be nga be sa sin w’a bubuman be’n, be yɛ bé ɲán wanndilɛ’n i akatua’n niɔn. I sɔ’n ti’n, amun ta nda kɛ amún ɲɛ́n i!

21. ?Ngue yɛ é wá wún i like suanlɛ ng’ɔ́ bá lɛ’n nun ɔn?

²¹ Ɔ lemɛn i yowlɛ, saan ‘Anannganman i cɛn dan’n jú. Cɛn sɔ’n ti sroesroe.’ (Mal. 3:23) Ɔ fataman kɛ cɛn sɔ’n i balɛ’n fu Klistfuɛ awlobofuɛ’m be nun. Maan awlobo’n nunfuɛ’m be kwlaa be yo like nga Biblu’n waan be yo’n. I sɔ’n ti wie nin nguan ndɛ. ?Kusu like uflɛ benin yɛ amun kwla yo naan Ɲanmiɛn sulɛ’n nun’n amun a lafiman naan amun nin i be afiɛn’n w’a sɛ kpa ɔ? Like suanlɛ ng’ɔ́ bá lɛ’n wá kán ninnge nsan mɔ maan awlobo wunmuan’n kwla di alaje’n be ndɛ.

[Ja ngua lɛ ndɛ’n]

?Ngue yɛ amun suannin ɔn?

• ?Ngue ti yɛ ɔ ti cinnjin kpa kɛ Klistfuɛ awlobofuɛ’m be “tran minndɛ” ɔ?

• ?Wafa sɛ yɛ yasua kun kwla sɔnnzɔn Bua Tafuɛ Kpa’n niɔn?

• ?Ngue yɛ bla ng’ɔ ti kpa’n kwla yo naan w’a suɛn i wun’n i bo ɔ?

• ?Ngue yɛ gbanflɛn nin talua’m be kwla yo naan be awlobo’n w’a ‘tran w’a minndɛ’ ɔ?

[Kosan mun]

[Foto, bue 12]

Ɲanmiɛn i sran ng’ɔ ɲan bla ng’ɔ suɛn i bo’n, ɔ le like dan kpa kun.