?Wan yɛle Zezi Klist bɔbɔ ba’n?

“Kɛ ɔ wluli Zerizalɛm klɔ nun’n, klɔ wunmuan’n kejeli, yɛ be usali kɛ: ‘?Wan-an?’ Sran nga be su i su’n be se kɛ: ‘Jésus b’ɔ ti Nyanmiɛn nuan ijɔfuɛ’n b’ɔ fin Nazarɛt Galile mɛn’n nun nin-ɔn.’”—MATIE 21:10, 11.

?NGUE ti yɛ kɛ Zezi Klist * ɔli Zerizalɛmu afuɛ 33 nun’n, klɔ wunmuan’n kejeli sɔ ɔ? Afin klɔ nunfuɛ sunman be tili Zezi nin abonuan ninnge ng’ɔ yoli’n be ngan. Ɔ maan b’a yaciman sa sɔ’m be ndɛ kanlɛ. (Zan 12:17-19) Sanngɛ sran kpanngban nga be suli Zezi su cɛn sɔ’n nun’n, be siman kɛ Zezi i dunman’n fú lele ɔ́ trú asiɛ wunmuan’n su lele andɛ bɔbɔ!

Wafa nga Zezi i ninnge yolɛ’n kannin asiɛ’n su sran wunmuan’n, maan e fa e ɲin e sie su e nian.

▪ Kananndrie nga sran sunman be di su asiɛ wunmuan’n su’n, ɔ taka afuɛ nga be bu i kɛ be wuli Zezi nun’n i su.

▪ Asiɛ’n su’n, sran kɔe akpi ngbinngbin nɲɔn be se be wun kɛ be ti Klistfuɛ.

▪ Asiɛ wunmuan’n su’n, Ɲanmiɛn flɛfuɛ mɔ be ti sran kɔe akpi ngbinngbin tra su’n, be waan Zezi ti “Ɲanmiɛn nuan ijɔfuɛ naan i dan tra Abraamu nin Nowe ɔ nin Moizi.”

▪ Zezi i ndɛ fanunfanun ng’ɔ kannin be ngwlɛlɛ su’n wluli sran’m be ijɔlɛ’n nun. Be nun wie mun yɛ:

“Sɛ a cɛ sran like’n, ɔ ti kpa tra kɛ be cɛ wɔ like’n.”—SA NGA BE YOLI’N 20:35.

“An bobo, bé tíke amun anuan.”—MATIE 7:7.

“Like kwlaa nga an klo kɛ sran yo man amun’n, an yo i kunngba sɔ’n man be.”—MATIE 7:12.

‘Tran ase bu i sika’n nian.’—LIK 14:28.

Wafa nga Zezi i ninnge yolɛ’n kannin sran wunmuan’n, be kwlá siman su akplowa lele. Sanngɛ Zezi i su akunndan nga sran’m be bu’n ti fanunfanun. I sɔ’n ti’n, atrɛkpa’n amun usa amun wun kɛ: ‘?Wan yɛle Zezi Klist bɔbɔ ba’n?’ Biblu’n kunngba cɛ yɛ ɔ kle e kɛ Zezi fin, ɔ nin wafa ng’ɔ dili i mɛn liɛ’n ɔ nin like nga ti yɛ ɔ wuli’n niɔn. Sɛ e si i su ninnge ngalɛ mun’n, ɔ kwla kaci e mɛn dilɛ’n andɛ nin ainman.

[Ja ngua lɛ ndɛ’n]