Zoova i su mɔ e lafi’n ti srɛ kunman e
Zoova i su mɔ e lafi’n ti srɛ kunman e
“Kɛ n flɛ i’n, ɔ ti.”—JUE. 4:4.
1, 2. (a) ?Sa kekle benin yɛ ɔ tɔli Davidi su ɔ? (b) ?Jue benin mun yɛ é wá kókó be su yalɛ ɔ?
FAMIƐN DAVIDI sie Izraɛli nvle’n w’a di le nɲɔn kun. Sanngɛ siɛn’n sa kekle kun o i su. I wa Absalɔm yoli naan be se kɛ i yɛ ɔ ti famiɛn’n niɔn. Ɔ maan ɔ fata kɛ Davidi tu Zerizalɛmu klɔ’n su. Asa ekun’n, i janvuɛ kpa kun jasoli i wun. Siɛn’n Davidi nin sran ba nɲɔn kun mɔ b’a kpɔcimɛn i’n yɛ be su wanndi ɔ. Kɛ ɔ́ fú Olivie Oka’n nn ɔ́ sún, yɛ ɔ nanti i ja ngbɛn. I sin’n, Simɛi m’ɔ nin Saili i osufuɛ’m be awlobo ti kun’n, ɔ toli Davidi wun yɛbuɛ yɛ ɔ truli ndutre’n guɛli i wun. Kɛ ɔ́ yó sɔ’n nn ɔ́ bó Davidi i sannzan.—2 Sam. 15:30, 31; 16:5-14.
2 ?I sɔ ɲrɛnnɛn’n liɛ’n ti’n, Davidi fá awlaboe nin i ɲrun ɲannzuɛn’n, ɔ́ wú kɔ́? Cɛcɛ, afin ɔ lafili Zoova su. E wun i sɔ liɛ’n i Jue Mun ndɛ tre 3 nga Davidi klɛli’n nun weiin. Jue sɔ’n kan wanndilɛ m’ɔ wanndili Absalɔm ɲrun’n i ndɛ. Davidi klɛli Jue Mun ndɛ tre 4 wie. Jue nɲɔn sɔ’m be kle kɛ e kwla lafi su kɛ Ɲanmiɛn fɛ i su sie e srɛlɛ’m bo yɛ ɔ tɛ be su. (Jue. 3:5; 4:4) Jue sɔ’m be cici e wla kɛ wia nun o, kɔnguɛ o, Zoova nin i sufuɛ kpa’m be o nun. Kpɛkun ɔ suan be bo maan be di fɔundi yɛ be klun titiman be. (Jue. 3:6; 4:9) Siɛn’n maan e nian wafa nga jue sɔ’m be uka e naan srɛ w’a kunman e’n, ɔ nin wafa nga be yo maan e lafi Ɲanmiɛn su’n.
Kɛ ‘be diman be nga be jaso min wun’n, be yalɛ’n’
3. ?Kɛ nga Jue Mun 3:2, 3 fa kannin’n sa’n, sa be nin yɛ ɔ tɔli Davidi su ɔ?
3 Sran kun wa seli Davidi kɛ: “Izraɛlfuɛ’m b’a sin Absalɔm sin.” (2 Sam. 15:13) Wafa nga Absalɔm kwla yoli maan sran kpanngban be sinnin i sin’n mɔ Davidi w’a wunmɛn i wlɛ’n ti’n, ɔ seli kɛ: “Ee! Anannganman, min kpɔfuɛ’m be sɔnnin o! Be nga be jaso min wun’n, be di-man be yalɛ! Sran kpanngban be kan min wun ndɛ se kɛ: ‘Nga, Nyanmiɛn su de-mɛn i!’” (Jue. 3:2, 3) Izraɛlifuɛ sunman be buli i kɛ Zoova su deman Davidi Absalɔm nin i sinfuɛ’m be sa nun.
4, 5. (a) ?Ngue su yɛ Davidi lafili kpa ɔ? (b) ?Kɛ be se kɛ ‘a yo maan n kwla man min ti’n su’n,’ i bo’n yɛle benin?
4 Sanngɛ Davidi i wun w’a usumɛn i, afin ɔ lafili Ɲanmiɛn su kpa. Ɔ to jue seli kɛ: “Sanngɛ Anannganman, a sasa min kɛ nyrɛn sa. A man min anyrunnyan, a yo maan n kwla man min ti’n su.” (Jue. 3:4) Davidi lafili su kpa kɛ Zoova sɛ́sɛ́ i kɛ nga ɲrɛn’n sasa sonja kun’n sa. I yo, famiɛn oke sɔ’n su wanndi. Kɛ ɔ́ yó sɔ’n nn ɲannzuɛn’n ti’n, i ti’n ti kluwa yɛ ɔ fa tannin kata su. Sanngɛ Ɲanmiɛn m’ɔ o like kwlaa ti su’n, ɔ́ yó maan i ɲannzuɛn’n káci aɲrunɲan. Zoova yó maan ɔ́ kwlá mɛ́n i ti’n su ekun. Davidi kpan flɛli Ɲanmiɛn, afin ɔ si kɛ ɔ́ tɛ́ i su. ?E lafi Zoova su kɛ ngalɛ’n sa wie?
5 Davidi seli kɛ: “A yo maan n kwla man min ti’n su.” Kɛ ɔ kannin sɔ’n ɔ kle kɛ ɔ si kpa kɛ Zoova úkɛ i. Biblu’n kun kacili ndɛ mma sɔ’n kɛ: “Sanngɛ wɔ, Anannganman, a sasa min blɛ kekle’n nun kɛ nyrɛn sa. A yo maan n kwla, yɛ a yo maan n yo yakpa ekun.” (Today’s English Version) Fluwa kun kannin ndɛ ‘a yo maan n kwla man min ti’n su’n’ i ndɛ. I waan: “Kɛ Ɲanmiɛn man [...] sran kun ‘ti’n’ su’n, ɔ cici sran’n i wla kpɛkun ɔ yo maan i wun usumɛn i kun.” Kɛ mɔ be fuannin Davidi Izraɛli famiɛn bia’n su’n ti’n, i wla kwla bo i wun. Sanngɛ i ti mɔ Ɲanmiɛn man su’n ti’n, ɔ yo yakpa ekun yɛ srɛ kunmɛn i kun, kpɛkun ɔ lafi Ɲanmiɛn su kpa ekun.
Zoova ‘tɛ́ min su!’
6. ?Ngue ti yɛ Davidi seli kɛ Zoova jrɛn i oka’n su lɔ yɛ ɔ tɛ i srɛlɛ’n su ɔ?
6 Kɛ mɔ Davidi lafili Zoova su m’ɔ si kɛ ɔ́ tɛ́ i srɛlɛ’n su’n ti’n, ɔ kan guali su kɛ: “Kɛ n kpan flɛ Anannganman’n, ɔ jrɛn i oka’n su lɔ ɔ tɛ min su.” (Jue. 3:5) Be fali Ɲanmiɛn i alaka’n m’ɔ kle kɛ Ɲanmiɛn bɔbɔ o lɛ’n, be sali be sin Siɔn Oka’n su lɔ kɛ nga Davidi seli be kɛ be yo’n sa. (An kanngan 2 Samiɛl 15:23-25 nun.) I ti Davidi seli kɛ Zoova jrɛn i oka’n su lɔ yɛ ɔ tɛ i srɛlɛ’n su ɔ.
7. ?Ngue ti yɛ srɛ w’a kunman Davidi kaan sa ɔ?
7 Davidi si kɛ i Ɲanmiɛn srɛlɛ’n su yoman ngbɛn. I ti’n, srɛ w’a kunmɛn i kaan sa. Ɔ maan ɔ seli kɛ:“N la n lafi cɛ, kpɛkuun n tinnge, afin Anannganman suan min bo.” (Jue. 3:6) Kɔnguɛ mɔ yɛ Davidi i kpɔfuɛ’m be kwla tɔ i su kpa’n bɔbɔ’n, srɛ kunmɛn i kɛ ɔ ko la lafi. Ɔ lafili su kɛ ɔ́ tínnge. Afin sa nga be juli i su laa ti’n ɔ si kɛ Zoova su yacimɛn i le. Sɛ e fa Zoova “i atin’n su seiin” naan y’a fɔnmɛn i wun’n, e kwla lafi i su sɔ wie.—An kanngan 2 Samiɛl 22:21, 22 nun.
8. ?Wafa sɛ yɛ Jue Mun 27:1-4 kle kɛ Davidi lafili Ɲanmiɛn su ɔ?
8 Jue kun ekun nun’n, Davidi yili i nglo kɛ i wun usumɛn i naan ɔ lafi Ɲanmiɛn su kpa. I waan: “Anannganman ti min kannin nin min defuɛ. ?Wan yɛ n tɛ sro i ekun ɔn? Anannganman ti min nguan’n i nun trafuɛ. ?Wan li wun yɛ srɛ tɛ kun min ɔn? [...] Sɛ alɛ kunfuɛ akpasua dan kun bo sin yia min kɛ be nin min kún’n, srɛ bɔ kaan sa su kun-man min. [...] Like nga n srɛ i Anannganman sa nun’n, ɔ ti kunngba cɛ. Yɛ kusu ɔ lo min kpa. Like sɔ’n yɛlɛ kɛ n klo kɛ ń trɛ́n i sua’n nun cɛn kwlaa lele min nguan’n i awieliɛ, naan ń kánnvun i bɔbɔ Anannganman, afin ɔ yo nyɛnmɛn, yɛ ń fá min wun ḿ mɛ́ntɛn i.” (Jue. 27:1-4) Sɛ i sɔ akunndan’n wie yɛ e bu’n, naan e le i wun alaje’n, é kɔ́ asɔnun aɲia’m be bo titi.—Ebr. 10:23-25.
9, 10. ?Kannzɛ bɔɔ Davidi yɛ ɔ kannin ndɛ ng’ɔ o Jue Mun 3:7, 8 nun’n, ngue ti yɛ e kwla se kɛ Davidi timan sran m’ɔ tu i klunngbɔ ɔ?
9 Kannzɛ bɔɔ Absalɔm kpɛli Davidi i bo waka naan sran kpanngban wie mun be jasoli i wun’n, sanngɛ ɔ toli jue seli kɛ: “Sran akpi-akpi nga be bo sin yia min’n, n sro-man be. Anannganman, jaso! Min Nyanmiɛn, de min! A fin min kpɔfuɛ’m be nuan’n su. A bubu klunwifuɛ’m be je’n.”—Jue. 3:7, 8.
10 Davidi timan sran m’ɔ tu i klunngbɔ ɔ. Sɛ ɔ fata kɛ ‘be fin i kpɔfuɛ’m be nuan’n su’n,’ Ɲanmiɛn bɔbɔ yɛ ɔ́ yó i sɔ ɔ. Famiɛn Davidi bɔbɔ klɛli Ɲanmiɛn i mmla’n i sa nun. Yɛ ɔ si kɛ mmla sɔ’n nun’n, Zoova seli kɛ: “M bɔbɔ ń tú n klunngbɔ’n, yɛ ń túa be kalɛ.” (Mml. 17:14, 15, 18; 32:35) Asa ekun’n, Ɲanmiɛn bɔbɔ yɛ ‘ɔ́ búbú klunwifuɛ’m be je’n’ niɔn. Be je’n i bubulɛ’n i bo’n yɛle kɛ be su ɲanman wunmiɛn be yoman sa tɛ kun. Zoova si klunwifuɛ mun afin ɔ “nian lele ju anwlɛn’n i bo lɔ.” (1 Sam. 16:7) Satan m’ɔ ti Klunwifuɛ’m be si’n, ɔ ti kɛ asɔmɔli m’ɔ kpan mɔ sanngɛ ɔ leman je’n sa. Ɔ cɛ kan’n bé wá núnnún i. Kɛ Ɲanmiɛn man e wunmiɛn naan y’a kwla jrɛn i ɲrun kekle’n ti’n, nanwlɛ é lɛ́ i ase dan!—1 Piɛ. 5:8, 9; Ngl. 20:1, 2, 7-10.
“Delɛ’n fin” Zoova
11. ?Ngue ti yɛ ɔ nin i fata kɛ e srɛ e niaan’m be ti ɔ?
11 Davidi wunnin i wlɛ kɛ delɛ ng’ɔ fɛfɛ i wun’n, ɔ́ fín Zoova kunngba cɛ. Sanngɛ Davidi bumɛn i ngunmin i wun akunndan. Ɔ buli Zoova i nvle’n nunfuɛ’m be kwlaa be akunndan wie. I sɔ’n ti’n, i ndɛ’n i atabo’n nun’n, ɔ seli kɛ: “Anannganman, delɛ’n fin wɔ. Yra ɔ nvlefuɛ’m be nguan.” (Jue. 3:9) Nanwlɛ, Davidi i su sa’m be sɔnnin, sanngɛ i wla w’a fiman Zoova i nvle’n nunfuɛ mun, yɛ ɔ lafili su kɛ Ɲanmiɛn rá be su. ?Yɛ e li? ?Ɔ nin i fataman kɛ e bu e niaan Klistfuɛ’m be akunndan wie? Kɛ é srɛ́ Ɲanmiɛn’n maan e bu be akunndan. Yɛ maan e srɛ Zoova kɛ ɔ fɛ i wawɛ’n man be, naan b’a kwla yo yakpa b’a bo jasin fɛ’n juejue su.—Efɛ. 6:17-20.
12, 13. ?Ngue sa yɛ ɔ juli Absalɔm su ɔ? ?Yɛ ngue yɛ Davidi yoli ɔ?
12 Absalɔm wuli ɲannzuɛn wie. Maan sran kwlaa ng’ɔ kle i wiengu’m be ɲrɛnnɛn’n, ɔ fa ndɛ sɔ’n tu i wun fɔ nun. I li be nga Ɲanmiɛn kpali be sieli be ngunmin kɛ Davidi sa’n, yɛ ndɛ sɔ’n wɔ be kpa ɔ. (An kanngan Nyanndra Mun 3:31-35 nun.) Kɛ alɛ’n tɔli’n, Absalɔm i alɛ kunfuɛ’m b’a ɲanman jranwlɛ. Absalɔm bɔbɔ fuli nnɛn mɔ be flɛ i milɛ’n kun su ɔli. Kpɛkun waka dan kun mɔ i sama’m be sɔtɔsɔtɔ nun’n, i timuɛn’n ko satali nun. Absalɔm sende afiɛn lɛ sa lele naan Zoabu wa fa cua nsan wa wɔ i awlɛn ba lika, naan wa kun i.—2 Sam. 18:6-17.
13 ?Kɛ Davidi tili sa nga ɔ juli i wa’n su’n, ɔ yoli i fɛ? Cɛcɛ. Ɔ sunnin, ɔ́ nánti’n, nn ɔ́ yí ngwlɛ sé kɛ: “Min wa Absalɔm ee, ɔ o min wa, min wa Absalɔm ee! ?Ɔ yo sɛ ti yɛ m bɔbɔ m’an wu-man naan w’a ka-man lɛ-ɔ? Cuekee, Absalɔm min wa, min wa.” (2 Sam. 18:24—19:1) Zoabu kunngba cɛ yɛ ɔ kannin ndɛ kleli Davidi yɛ maan ɔ jasoli awlabɔɛ dan sɔ’n nun ɔn. Nanwlɛ Absalɔm wuli ɲrɛnnɛn wie. Tutre’n ti’n ɔ nin i bɔbɔ i si’n mɔ Zoova kpali i sieli’n, be kunnin. Yɛ awieliɛ’n kusu wieli i kɛ ngalɛ sa.—2 Sam. 19:2-9; Nya. 12:21; 24:21, 22.
Davidi kle ekun kɛ ɔ lafi Ɲanmiɛn su
14. ?Jue Mun ndɛ tre 4 i klɛlɛ’n i su ndɛ benin yɛ e kwla kan ɔn?
14 Jue Mun ndɛ tre 4 ti Davidi i Ɲanmiɛn srɛlɛ’n wie kɛ i ndɛ tre 3 sa. Ɔ kle kɛ Davidi lafi Zoova su tankaan kpa. (Jue. 3:5; 4:4) Atrɛkpa’n, kɛ mɔ Zoova yoli maan like nga Absalɔm guguli kɛ ɔ́ yó’n ɔ kpili ase’n, i ti yɛ Davidi klɛli jue sɔ’n fa lali Ɲanmiɛn i ase ɔ. Annzɛ kusu, kɛ ɔ́ klɛ́’n, ɔ buli Levifuɛ mɔ be to jue’n be akunndan. I kwlaa yoli o, sɛ e bu jue sɔ’n i su akunndan’n, e Zoova i sulafilɛ’n i bo’n kwla wla ase kpa.
15. ?Ngue ti yɛ e kwla lafi su e srɛ Zoova i Wa’n i dunman nun ɔn?
15 Davidi yili i nglo ekun kɛ ɔ lafi Ɲanmiɛn su tankaan kpa, yɛ ɔ kleli kɛ ɔ lafi su kpa kɛ Ɲanmiɛn ti i srɛlɛ’n. Ɔ to jue seli kɛ: “Nyanmiɛn, wɔ bɔ a bu-man min ndɛ kwlɛ’n, sɛ n flɛ wɔ-ɔ, tɛ min su. Sɛ n wo nyrɛnnɛn nun’n, de min. Si min aunnvuɛ, tie min srɛlɛ’n.” (Jue. 4:2) Sɛ e nanti seiin’n, e kwla lafi Ɲanmiɛn su kɛ ngalɛ sa wie. Kɛ mɔ e si kɛ Zoova ‘bu-man sran ndɛ kwlɛ’n’ naan ɔ yo i sufuɛ kpa’m be ye’n, e kwla jran e ti kpɔlɛ tɛ mɔ i Wa Zezi yili’n su, e srɛ i tankaan kpa Zezi dunman nun. (Zan 3:16, 36) Nanwlɛ, i sɔ man e aklunjuɛ dan!
16. ?Ngue ti yɛ atrɛkpa’n Davidi i sa sin bubuli i ɔ?
16 Ɔ ju wie’n, sa nga be o e su’n ti’n, e sa sin kwla bubu e. Blɛ kun nun’n, ɔ yoli Davidi i sɔ kan, afin ɔ to jue seli kɛ: “?Amun klɔ sran mun, amún sáci min dunman lele jú cɛn onin? ?Amún tɔ́n min suɛn ngbɛn’n lele jú cɛn onin? [“Amun yaciman ninnge ngbɛnngbɛn’m be klolɛ,” NW] ?Like nga bɔ m’an yo-man’n bɔ amun fa sie min su’n, amún yó i sɔ lele jú cɛn onin?” (Jue. 4:3) Kɛ be se kɛ ‘amun klɔ sran mun’n,’ nán sran sɔ’m be ayɛ yilɛ ti ɔ. Davidi i kpɔfuɛ’m be ‘kloli ninnge ngbɛnngbɛn mun.’ Biblu’n kun kaci ndɛ sɔ’n i kɛ: “?Amún kló gblɛ’n lele jú cɛn benin? ?Yɛ amún kúnndɛ amuin mun lele jú cɛn onin?” (New International Version) Kannzɛ bɔbɔ ninnge nga sran uflɛ’m be yo’n ti’n e sa sin bubu e’n, sanngɛ maan e srɛ Ɲanmiɛn Kpli titi yɛ e lafi i kunngba i su.
17. Wafa nga e kwla fa Jue Mun 4:4 su’n, an yiyi nun.
17 Davidi i Ɲanmiɛn sulafilɛ’n fiteli ndɛ nga nun weiin. I waan: “Maan amun si kɛ Anannganman fali min, afin min nyin yi i. Kɛ n flɛ i’n, ɔ ti.” (Jue. 4:4) Sɛ sran kun waan ɔ nin Zoova bé nánti tititi’n, ɔ fata kɛ ɔ yo yakpafuɛ naan i ɲin yi i kpa. I wie yɛle kɛ, kɛ be tu Klistfuɛ awlobo kun i nunfuɛ kun asɔnun’n nun’n, ɔ fata kɛ be onga’m be yi nzuɛn sɔ’m be nglo. Be nga be kpɔciman Ɲanmiɛn nin i mmla mun’n, ɔ ra be su. Asa kusu’n, kɛ Zoova i sufuɛ’m be kpɔcimɛn i mɔ be lafi i su’n, ɔ yo maan be di aklunjuɛ.—Jue. 84:12, 13.
18. ?Kɛ nga Jue Mun 4:5 fa kan’n sa’n, sɛ be kan ndɛ tɛ wie kle e annzɛ be yo e tɛ’n, ngue yɛ ɔ fata kɛ e yo ɔ?
18 ?Yɛ sɛ sran kun kan ndɛ wie annzɛ ɔ yo like wie m’ɔ sanngan e akunndan’n nin? Sɛ e yo like nga Davidi waan e yo’n, e kwla di aklunjuɛ titi. I waan: “Sɛ amun fa ya’n, nán amun yo sa tɛ. Kɛ amun la amun bɛ’n su kɔnguɛ’n, amun bu akunndan. Kpɛkuun amun tran diin.” (Jue. 4:5) Sɛ sran kun kan ndɛ tɛ wie kle e annzɛ ɔ yo e tɛ’n, nán maan e yi e mɛn i naan e yo sa tɛ. (Rɔm. 12:17-19) Kɛ e la e bɛ’n su lɔ’n, e kwla koko i sɔ’n e kle Ɲanmiɛn. Sɛ e srɛ su Ɲanmiɛn’n, atrɛkpa’n wafa nga ndɛ’n yo e’n ɔ́ káci. Ɔ maan klolɛ su’n, é kwlá yáci sa sɔ’n cɛ́. (1 Piɛ. 4:8) I sɔ’n su’n, akoto Pɔlu kannin ndɛ kun m’ɔ fata kɛ e fa e ɲin e sie su ɔ. I ndɛ’n sɔ’n taka Jue Mun 4:5 su. I waan: “Sɛ an fa ya’n, nán an yo sa tɛ. Nán an fa ya sɔ’n lele maan wia’n tɔ su. Nán an man mmusu’m be si Satan’n i wluwlɛ.”—Efɛ. 4:26, 27.
19. ?Wafa sɛ yɛ Jue Mun 4:6 kwla uka e Ɲanmiɛn sulɛ’n nun ɔn?
19 Davidi i jue’n nun’n ɔ kan tinnin su kɛ ɔ fata kɛ e lafi Ɲanmiɛn su. I waan: “Amun yi sraka ng’ɔ fata’n. Yɛ amun fa amun wun wla Anannganman i sa nun.” (Jue. 4:6) Sɛ Izraɛlifuɛ’m be klun ti kpa’n, yɛ Ɲanmiɛn sɔ sraka nga be yi be mɛn i’n nun ɔn. (Eza. 1:11-17) E kusu sɛ e waan Ɲanmiɛn i klun jɔ sulɛ nga e su i’n su’n, ɔ fata kɛ e klun lɔ’n yo kpa, yɛ ɔ fata kɛ e fa e wla’n kwlaa e guɛ i su.—An kanngan Nyanndra Mun 3:5, 6 nin Ebre Mun 13:15, 16 nun.
20. ?Kɛ be se kɛ Zoova ‘titi i nyin nun weiin’n,’ i bo’n yɛle benin?
20 Davidi kɛn i ekun kɛ: “Sran sunman be se kɛ: ‘Ee! ?Wan yɛ maan é nyán ye ɔ?’ Ee! Anannganman, titi ɔ nyin nun weiin, naan yo e ye!” (Jue. 4:7) Kɛ be se kɛ Zoova ‘titi i nyin nun weiin,’ annzɛ i ‘nyrun’n ti kɛ kannin sa yɛ ɔ kpaja be nyrun’n,’ i bo’n yɛle kɛ ɔ yo be ye. (Jue. 89:16) Ɔ maan kɛ Davidi srɛ kɛ: ‘Titi ɔ nyin nun weiin’n,’ ɔ su se kɛ ‘yo e ye.’ Kɛ mɔ e lafi Zoova su’n ti’n, ɔ yo e ye, yɛ kɛ e yo i klun sa’n e di aklunjuɛ dan kpa.
21. ?Sɛ e fa e wun e wla andɛ jasin fɛ’n i bolɛ’n junman’n nun’n, ngue yɛ e kwla lafi su kpa ɔ?
21 Kɛ bé kpɛ́ fie’n su ninnge mun’n be di aklunjuɛ. Davidi buli i ɲrun lɔ aklunjuɛ m’ɔ trɛ i sɔ aklunjuɛ liɛ’n i akunndan. Ɔ to jue man Zoova kɛ: “Aklunjuɛ nga wɔ maan n nyɛn i’n, ɔ tra aklunjuɛ nga kɛ sran’m bé kpɛ́ be ble kpanngban’n be nyɛn i’n, yɛ ɔ tra aklunjuɛ nga kɛ bé yí be nzan kpanngban’n be nyɛn i’n.” (Jue. 4:8) Sɛ andɛ e tu e klun e bo jasin fɛ’n i kpa’n, e kusu e kwla lafi su kpa kɛ é dí aklunjuɛ wie. (Lik 10:2) E nin be nga be kpa be sieli be ngunmin’n mɔ be dun e ɲrun mmua’n e di aklunjuɛ, afin ‘junman difuɛ’m’ be trɛ be kɔ. ?Jasin fɛ’n i bolɛ junman m’ɔ ti aklunjuɛ like’n, e su mian e ɲin naan y’a di wie?
Maan e fa e wla’n kwlaa e gua Zoova su
22. ?Kɛ nga Jue Mun 4:9 fa kannin sa’n, kɛ Izraɛlifuɛ’m be nanti Ɲanmiɛn i mmla’n su’n, i bo’n gua sɛ man be?
22 Davidi i jue’n i atabo’n nun’n ɔ seli kɛ: “Kɛ n la’n, kpɛkuun n ka lɛ n lafi diin bɔ cɛ. Afin Anannganman, wɔ maan sa tɛ fi nyan-man min.” (Jue. 4:9) I nun mɔ Izraɛlifuɛ’m be nanti Zoova i mmla’n su’n, be nin i be afiɛn’n mantan kpɛkun be wun usuman be. I wie yɛle kɛ Salomɔn blɛ su’n, ‘Zidafuɛ mun nin Izraɛlifuɛ’m be kwlakwla be klun w’a ti-man be.’ (1 Fam. 4:25) Be nga be lafi Ɲanmiɛn su’n, kannzɛ bɔbɔ nvle nga be mantan be’n be fa be ɲin ci be’n, sanngɛ be di aklunjuɛ. Kɛ Davidi sa’n, e lafi diin bɔ cɛ, afin Ɲanmiɛn maan e klun titiman e.
23. ?Sɛ e lafi Ɲanmiɛn su kpa’n, e wun yó e sɛ?
23 Maan e fa e wun e wla Zoova i junman’n nun kpa. Yɛ maan e srɛ i naan ‘e wun jɔ e fɔuun.’ (Fil. 4:6, 7) Nanwlɛ, i sɔ’n maan e di aklunjuɛ! Kpɛkun sɛ e fa e wla’n kwlaa gua Zoova su’n, e kwla lafi su kɛ e ɲrun lɔ sa’m be ti’n, srɛ su kunman e.
?Wafa sɛ yɛ amún tɛ́ su ɔ?
• ?Absalɔm ti’n sa benin yɛ ɔ ɲannin Davidi ɔ?
• ?Wafa sɛ yɛ Jue Mun ndɛ tre 3 yo naan srɛ w’a kunman e ɔ?
• ?Wafa sɛ yɛ Jue Mun ndɛ tre 4 ɔ wla e Zoova sulafilɛ’n i bo ase kpa ɔ?
• ?Wafa sɛ yɛ Ɲanmiɛn sulafilɛ kpa’n ɔ kwla yo e ye ɔ?
[Kosan mun]
[Foto mun, bue 32]
?Amun lafi Zoova su kpa?