Ɲanmiɛn kle e kɛ ɔ klo e

“Nyanmiɛn i aklunye’n ɔ maan sa kpa’n kaci [sran’m] be nzuɛn lele bé nyán anannganman nguan.”​—RƆM. 5:21.

1, 2. ?Cɛlɛ like nɲɔn benin yɛ sran’m be bu be cinnjin ɔn? ?Sanngɛ be nun onin yɛ ɔ ti dan tra kun lele ɔ?

 ƆSTRALI lɔ inivɛsite kun nun fluwa klefuɛ kun waan Rɔmufuɛ’m be mmla’m be ti like kun mɔ be fa cɛli klɔ sran mun ɔn. Naan klɔ sran’m be kwla di su cɛ kpa. Sanngɛ Biblu’n kle kɛ klolɛ su’n, Ɲanmiɛn cɛli e like kun mɔ i dan tra mmla sɔ mun fatifati ɔ. Like sɔ m’ɔ fa cɛli e’n yɛle like ng’ɔ yoli naan w’a bu e sran kpa’n, naan w’a de e naan y’a ɲan anannganman nguan’n.

² Wafa nga Ɲanmiɛn yoli naan y’a ɲan cɛlɛ like sɔ’n, ɔ kan i sa nuan su sɛsɛ yolɛ’n. Rɔmfuɛ Mun ndɛ tre 5 nun’n, akoto Pɔlu w’a yiyiman mmla’n nun weinwein w’a fa kleman wafa nga Ɲanmiɛn jrannin mmla’n su yoli i sɔ like’n. Sanngɛ kɛ ɔ́ bó ndɛ’n i bo’n, ɔ kannin ndɛ fɛfɛ yɛ’n. I waan: “Nyanmiɛn a bu ye sran kpa i su bɔ e lafi’n ti, ɔ maan siɛn’n e Min’n Jésus-Krist ti e nin i e afiɛn a sɛ.” Be nga be ɲan like nga Ɲanmiɛn fa mannin klɔ sran mun wie’n, be kusu be klo Ɲanmiɛn wie. Pɔlu ti i sɔfuɛ’m be nun kun. Ɔ klɛli i kɛ: “Nyanmiɛn maan i Wawɛ b’ɔ fa mannin ye’n kle ye klolɛ dan nga Nyanmiɛn bɔbɔ fa klo ye’n ye anwlɛn’n nun weiin.”—Rɔm. 5:1, 5.

3. ?Kosan benin mun yɛ e ka lɛ e bu be akunndan ɔn?

³ ?Sanngɛ ngue ti yɛ ɔ fata kɛ Ɲanmiɛn fa klolɛ like sɔ’n cɛ e ɔ? ?Wafa sɛ yɛ Ɲanmiɛn kwla nian mmla’n su naan w’a fa cɛ e ɔ? ?Yɛ ngue yɛ  ɔ fata kɛ sran’m be tinuntinun be yo naan b’a kwla ɲan wie ɔ? Maan e nian kosan sɔ’m be su tɛlɛ’n, naan e nian wafa nga be kle weiin kɛ Ɲanmiɛn klo sran’n.

Ɲanmiɛn i sran klolɛ’n nin sa tɛ’n

4, 5. (a) ?Wafa sɛ yɛ Zoova yili i sran klolɛ’n i nglo dan kpa ɔ? (b) ?Ndɛ benin yɛ i silɛ’n uka e naan y’a wun Rɔmfuɛ Mun 5:12 i wlɛ ɔ?

⁴ Klɔ sran’m be klolɛ dan’n ti’n, Zoova sunmɛnnin i Wa kunngba cɛ’n kɛ ɔ wa uka be. Pɔlu kɛnnin i sɔ’n i ndɛ kɛ: “Nyanmiɛn kle ye kɛ ɔ klo e, afin kɛ e ti sa tɛ yofuɛ’n, e ti ɔ maan Krist wuli.” (Rɔm. 5:8) Maan e bu sa kun mɔ be kɛnnin i ndɛ lɛ’n i akunndan. Yɛle kɛ: ‘E ti sa tɛ yofuɛ.’ Ɔ fata kɛ sran’m be ngba be si wafa nga e kacili sa tɛ yofuɛ’n.

⁵ Pɔlu kɛnnin i sɔ’n i ndɛ. Ɔ seli kɛ: “Sran kun ti yɛ sa tɛ yolɛ’n bali mɛn nun-ɔn, yɛ sa tɛ sɔ’n ti yɛ maan wie’n bali-ɔ. Yɛ i ti yɛ maan wie’n wo sran’m be kwlaa be su-ɔ, afin be kwlaa be yo sa tɛ.” (Rɔm. 5:12) E kwla wun i sɔ ndɛ’n i wlɛ, afin wafa nga klɔ sran’n i nguan’n boli i bo’n, Ɲanmiɛn maan be klɛli i su ndɛ. Zoova yili sran nɲɔn, Adam nin Ɛvu. Fɔ nunman Like Yifuɛ’n i nun. I ti’n, fɔ w’a tranman e nannan klikli sɔ’m be nun wie. Ɲanmiɛn mannin be mmla kunngba cɛ. Kpɛkun ɔ seli be kɛ sɛ be tɔn mmla sɔ’n, bé wú. (Bob. 2:17) Sanngɛ, be fali ajalɛ tɛ kpa. Yɛle kɛ be tɔnnin Ɲanmiɛn i mmla sɔ’n, ɔ maan b’a kplinman su kɛ i yɛ ɔ fata kɛ ɔ kpɛ mmla man be naan ɔ yo be Siefuɛ ɔ.—Mml. 32:4, 5.

6. (a) Ka naan Ɲanmiɛn w’a fa Mmla’n w’a man Moizi’n yɛ kɛ ɔ fa mɛnnin i’n, Adam i osu’n nunfuɛ’m be wu. ?Ngue ti ɔ? (b) ?Ngue yɛ e kwla fa tukpacɛ kun m’ɔ sa sran mun’n e sunnzun i ɔ?

⁶ Adam dun mmua kacili sa tɛ yofuɛ kwlaa, naan w’a wu ba. Ɔ maan sa tɛ yolɛ’n nin i bo nzuɛn’n be sali i mma’m be kwlaa. I yo, be liɛ’n b’a tɔnman Ɲanmiɛn i mmla’n wie kɛ Adam sa. Ɔ maan nán sa tɛ kunngba nga Adam yoli’n i wie yɛ be yoli ɔ. Yɛ kusu blɛ sɔ’n nun’n nn Ɲanmiɛn nin a manman be mmla. (Bob. 2:17) Sanngɛ sa tɛ nga Adam yoli’n, ɔ sɛli i osu’n nunfuɛ’m be ngba. Ɔ maan kɛ ɔ fin Adam blɛ su lele m’ɔ́ fá jú blɛ nga Ɲanmiɛn mannin Izraɛlifuɛ’m be mmla’n, i su’n, wie’n wluli be kwlaa be nun. I sɔ’n kle weiin kɛ be ti sa tɛ yofuɛ. (An kanngan Rɔmfuɛ Mun 5:13, 14 nun.) Wafa nga sa tɛ’n sali klɔ sran’m be ngba’n, e kwla fa sunnzun tukpacɛ kun mɔ awlobo kun nun’n, ɔ o siɛ’n nin niɛn’n be wun’n sa. I sɔ tukpacɛ’n kwla sa ba mun. Sanngɛ wie liɛ’n, nán ba’m be ngba yɛ tukpacɛ sɔ’n sa be ɔ. Sa tɛ yolɛ’n i liɛ’n, nán kɛ ɔ ti sɔ ɔ. Yɛle kɛ Adam i sa tɛ’n sali e, i ti yɛ e kwlaa e wu ɔ. ?Sanngɛ e kwla fin i sɔ liɛ’n nun e fite?

Like nga Ɲanmiɛn fali Zezi Klist yoli’n

7, 8. ?Wafa sɛ yɛ sran nɲɔn mɔ fɔ nunman be nun’n, be nantilɛ’n i agualiɛ’n yoli ngunminngunmin ɔn?

⁷ Zoova fali ajalɛ klolɛ su naan klɔ sran’m b’a fin sa tɛ ng’ɔ sali be’n i nun b’a fite. Pɔlu yiyili nun kɛ sran uflɛ mɔ fɔ nunmɛn i nun’n, mɔ be flɛ i Adam kasiɛnfuɛ’n, yɛ maan i sɔ’n kwla yo ye ɔ. (1 Kor. 15:45) Sanngɛ sran nɲɔn sɔ mɔ fɔ nunman be nun’n, be nantilɛ’n i bo’n w’a guaman kunngba. ?Ngue ti ɔ?—An kanngan Rɔmfuɛ Mun 5:15, 16 nun.

⁸ Pɔlu klɛli i kɛ: “Sa nga Adam yoli’n nin like dan nga Nyanmiɛn fa cɛ ye’n, be dan sɛ-man.” Kɛ mɔ Adam yɛ ɔ yoli sa tɛ’n ti’n, be buli i fɔ. Ɔ maan ɔ wuli. Sanngɛ nɛ́n i kunngba yɛ ɔ wuli ɔ. E kɛnngɛn i kɛ: “Sran kpanngban b’a wu sran kun [sɔ’n] i sa liɛ’n b’ɔ yoli’n ti.” Ɔ ti su kɛ Adam ti’n, e kwlaa nga e ti i osu’n nunfuɛ’n e wu, afin e yo sa tɛ. Sanngɛ sa kun i silɛ’n cici e wla. Yɛle kɛ Zezi mɔ fɔ nunmɛn i nun’n, ɔ kwla yo maan e ɲan like uflɛ. ?Ɔ maan Zezi maan sran’m bé ɲán ngue? E wun i su tɛlɛ i ndɛ nga Pɔlu kannin’n nun. I waan: ‘Nyanmiɛn bu sran’m be kwlaa be sran kpa, ɔ maan bé nyán nguan.’—Rɔm. 5:18.

9. ?Kɛ Rɔmfuɛ Mun 5:16, 18 se kɛ Ɲanmiɛn bu sran’m be sran kpa’n, i bo’n yɛle benin?

⁹ ?Akunndan ng’ɔ o Glɛki nun ndɛ mma nga be se kɛ Ɲanmiɛn ‘bu sran’m be kwlaa be sran kpa’n’ i sin’n yɛle benin? Be nga be kaci Biblu’n i aniɛnaniɛn’m be nun’n, be nun kun  klɛli i kɛ: “Ɔ ti mmla’n i su nantilɛ ndɛ. Ɔ kan wafa nga Ɲanmiɛn fa bu sran kun’n i ndɛ. Nán wafa nga sran kun i aeliɛ’n kaci’n, i ndɛ yɛ ɔ kan ɔn [...]. Ndɛ sɔ’n nun’n Ɲanmiɛn ti kɛ jɔlɛ difuɛ kun sa. Kpɛkun be fali sran kun mɔ be waan ɔ timan sran kpa’n, be bɛli i ja su. Sanngɛ kɛ Ɲanmiɛn dili ndɛ’n w’a buman sran’n i fɔ. Ɔ yacili i nun.”

10. ?Ngue yɛ Zezi yoli mɔ Ɲanmiɛn kwla jran su bu klɔ sran’m be sran kpa ekun ɔn?

¹⁰ ?Ngue su yɛ Ɲanmiɛn m’ɔ “di asiɛ’n sufuɛ’m be kwlaa be jɔlɛ’n,” ɔ jran naan w’a bu sran kun i sran kpa ekun ɔn? (Bob. 18:25) Like cinnjin nga Ɲanmiɛn dun mmua yoli’n, yɛle kɛ ɔ sunmɛnnin i Wa kunngba cɛ’n asiɛ’n su wa. Zezi kusu’n, kannzɛ be kleli i ɲrɛnnɛn be yoli i finfin yɛ be guɛli i ɲin ase’n, sanngɛ ɔ yoli i Si klun sa’n sɛsɛsɛ. Ɔ nantili seiin lele fa wuli waka’n su. (Ebr. 2:10) Zezi fɛli i nguan mɔ fɔ nunman nun’n yili tɛ naan Adam i osu’n nunfuɛ’m be ɲan be ti sa tɛ’n nin wie’n be sa nun.—Mat. 20:28; Rɔm. 5:6-8.

11. ?Ninnge benin mun yɛ be sɛ mɔ e ti kpɔlɛ tɛ’n taka su ɔ?

¹¹ Fluwa uflɛ nun’n, Pɔlu flɛli like nga Zezi yoli’n kɛ ‘sran’m be kwlaa be ti kpɔlɛ.’ (1 Tim. 2:6) Glɛki nun ndɛ mma nga Pɔlu fa kannin ndɛ’n, ɔ kle kɛ like nga Zezi fa kpɔ sran’m be ti’n, ɔ nin like ng’ɔ fili be sa’n be sɛ. ?Wafa sɛ yɛ be sɛ ɔ? Adam fali fɔ’n nin wie’n yili i osu’n nunfuɛ akpi ngbinngbin kpanngban be su. Ɔ ti su kɛ Zezi mɔ fɔ nunmɛn i nun’n waan ɔ́ wú ba akpi ngbinngbin kpanngban’n, nn ɔ wuli be. * I sɔ’n ti’n, e seli kɛ Zezi i nguan’n nin ba nga sɛ i waan ɔ́ wú be’n nn ɔ wuli be’n be liɛ’n, ɔ nin Adam nin i osu’n nunfuɛ mɔ fɔ o be nun’n be liɛ’n be sɛ. Sanngɛ Biblu’n kanman kɛ ba nga sɛ Zezi waan ɔ́ wú be’n nn ɔ wuli be’n, be nun kun sa yili e ti kpɔlɛ tɛ’n wie. Rɔmfuɛ Mun 5:15-19 kle kɛ “sran kunngba” i wie’n yɛ maan sran’m be ɲan nguan ɔn. Ɔ maan Zezi i nguan’n mɔ fɔ nunman nun’n ɔ nin Adam liɛ’n be sɛ. I ti’n ɔ fata kɛ Zezi Klist kunngba cɛ i su yɛ ɔ fata kɛ e fa e ɲin e sie ɔ. Zezi “i sa kpa ng’ɔ yoli’n” yɛle kɛ i ɲin yili Ɲanmiɛn, yɛ ɔ nantili seiin lele fa wuli’n. Ɔ maan Ɲanmiɛn kwla bu klɔ sran’m be kwlaa be sran kpa yɛ be kwla ɲan nguan. (2 Kor. 5:14, 15; 1 Piɛ. 3:18) ?Wafa sɛ yɛ Ɲanmiɛn yaci sa tɛ yofuɛ’m be wun sa’n cɛ be ɔ?

E ti kpɔlɛ tɛ’n ti yɛ e ɲan e ti sa tɛ’n i sa nun ɔn

12, 13. ?Ngue ti yɛ aunnvuɛ nin klolɛ’n ti yɛ Ɲanmiɛn jrannin e ti kpɔlɛ tɛ’n su buli sran’m be sran kpa ɔ?

¹² Ɲanmiɛn Zoova sɔli e ti kpɔlɛ tɛ nga i Wa’n yili’n nun. (Ebr. 9:24; 10:10, 12) Sanngɛ Zezi i akoto mɔ be o i sɔnnzɔnfuɛ nga be o asiɛ’n su wa be nun wie’n, fɔ’n w’a wieman be nun. Kannzɛ be miannin be ɲin kpa naan b’a yoman sa tɛ’n, sanngɛ nán blɛ ngba nun yɛ be kwla yoli sɔ ɔ. ?Ngue ti ɔ? Afin sa tɛ yolɛ’n sali be. (Rɔm. 7:18-20) Sanngɛ Ɲanmiɛn kwla yo like kun man be. Yɛ ɔ yoli i sɔ like liɛ’n kusu.  Yɛle kɛ ɔ sɔli e ti kpɔlɛ tɛ’n nun yɛ ɔ kplinnin su kɛ ɔ́ jrán su yó i sufuɛ nga be o asiɛ’n su’n be ye.

¹³ Nán kɛ Zezi i akoto mun nin sran uflɛ’m be yoli like kpa wie mannin Ɲanmiɛn ti yɛ Ɲanmiɛn jrán e ti kpɔlɛ tɛ’n su yó be ye ɔ. Sanngɛ kɛ mɔ Ɲanmiɛn si be aunnvuɛ’n m’ɔ klo be dan’n ti yɛ ɔ yo sɔ ɔ. W’a buman Zezi i akoto mun nin sran uflɛ’m be fɔ kɛ ng’ɔ nin i fata’n sa kun. Sanngɛ Ɲanmiɛn ɲrun’n, b’a ɲan be ti sa tɛ ng’ɔ sali be’n i sa nun. Pɔlu yiyili i sɔ’n nun weiin kɛ: “Nyanmiɛn i ye b’ɔ yoli amun’n ti ɔ maan amun’an nyan amun ti i su bɔ an lafi’n ti. Amun ti nyanlɛ sɔ’n, ɔ fin-man amun bɔbɔ, Nyanmiɛn yɛ maan an nyannin amun ti-ɔ.”—Efɛ. 2:8.

14, 15. ?Ngue yɛ be nga Ɲanmiɛn bu be sran kpa’n bé ɲɛ́n i ɔ? ?Sanngɛ ngue yɛ ɔ fata kɛ be yo i ekun ɔn?

¹⁴ Kɛ Ɲanmiɛn mɔ like fi nunmɛn i sin’n, ɔ yaci sa tɛ ng’ɔ sali sran kun’n ɔ nin sran sɔ’n i bɔbɔ i sa tɛ ng’ɔ yo be’n cɛ i’n, nanwlɛ like dan kun yɛ w’a fa cɛ i lɛ ɔ! Ka naan sran’m b’a kaci Klistfuɛ’n sa tɛ nga be tinuntinun be yoli be’n, e simɛn i nuan. Sanngɛ Ɲanmiɛn kwla jran e ti kpɔlɛ tɛ’n su yaci be sa tɛ sɔ mun cɛ be. Pɔlu klɛli i kɛ: “Like nga Nyanmiɛn fa cɛ ye’n ti, ɔ maan ɔ bu be bɔ be yoli sa tɛ kpanngban kpa’n be sran kpa.” (Rɔm. 5:16) Zezi i akoto mun nin sran uflɛ nga Ɲanmiɛn fali like sɔ’n (be sran kpa bulɛ’n) cɛli be klolɛ su’n, ɔ fata kɛ be lafi Ɲanmiɛn Kpli su yɛ be su i tititi. ?Sɛ be yo sɔ’n, ngue yɛ bé ɲɛ́n i be ɲrun lɔ ɔ? Yɛle kɛ “be kwlaa nga Nyanmiɛn yoli be ye b’ɔ kacili be sran kpa’n, bé nyán nguan yɛ bé dí famiɛn Krist fanngan nun.” Nanwlɛ, kɛ mɔ Ɲanmiɛn bu sran’m be sran kpa’n ti’n, i sɔ’n yo maan be nin wie’n be afiɛn’n ti nun. I agualiɛ su’n be ɲan nguan.—Rɔm. 5:17; an kanngan Lik 22:28-30 nun.

¹⁵ Be nga Ɲanmiɛn cɛli be like’n yɛle kɛ be ng’ɔ bu be sran kpa’n, be kaci i mma mun. Like nga Ɲanmiɛn fa man Klist’n, be bo be dunman nun wie. Ɔ maan bé cɛ́n be ɲanmiɛn su lɔ, yɛ be nin Zezi Klist m’ɔ ti famiɛn’n, “bé dí famiɛn.”—An kanngan Rɔmfuɛ Mun 8:15-17 nun.

Ɲanmiɛn yi i klolɛ’n i nglo sran uflɛ wie’m be lika

16. ?Wafa sɛ yɛ Ɲanmiɛn cɛ be nga be wla o su kɛ bé trán asiɛ’n su’n be like ɔ?

¹⁶ Nán Klistfuɛ nga be lafi Ɲanmiɛn su mɔ be su i kpa’n be ngba yɛ be nin Klist “bé dí famiɛn” ɲanmiɛn su lɔ ɔ. Ndɛ nga Biblu’n kannin’n mɔ laa Ɲanmiɛn i sufuɛ’m be wla o su’n, be nun sunman be wla o su wie. Be lafi su kɛ bé trán asiɛ m’ɔ́ káci mɛn klanman’n i su. ?Dɔ nga su bɔbɔ’n Ɲanmiɛn kwla cɛ be like, yɛle kɛ ɔ kwla bu be sran kpa naan b’a kwla tran asiɛ’n su tititi? Kɛ e nian ndɛ nga Pɔlu klɛli ko mannin Rɔmu lɔfuɛ mun’n, e kwla tɛ su kɛ ɛɛn!

17, 18. (a) ?Ɲanmiɛn su mɔ Abraamu lafili’n ti’n Ɲanmiɛn buli i sɛ? (b) ?Ngue ti yɛ maan Zoova kwla buli Abraamu i sran kpa ɔ?

¹⁷ Pɔlu kannin sran sɔ mɔ bé trán asiɛ’n su’n be nun cinnjin kun i ndɛ. Yɛle Abraamu m’ɔ lafili Ɲanmiɛn su kpa’n. I blɛ su’n nn Zoova nin a manman Izraɛlifuɛ’m be mmla, yɛ kɛ ɔ́ yó sɔ’n nn Klist nin a tikeman ɲanmiɛn su kɔlɛ’n i atin’n. (Ebr. 10:19, 20) Pɔlu klɛli i kɛ: “Nyanmiɛn seli Abraam kɛ mɛn’n ɔ́ yó i nin osu nunfuɛ’m be liɛ. Nán mmla’n b’ɔ fa su’n ti yɛ ɔ seli i sɔ-ɔ, sanngɛ i bɔbɔ Nyanmiɛn i su b’ɔ lafi bɔ i kusu bu i sran kpa’n ti yɛ ɔ seli i sɔ-ɔ.” (Rɔm. 4:13; Zak 2:23, 24) Ɔ maan Ɲanmiɛn buli Abraamu m’ɔ lafili i su kpa’n i sran kpa.—An kanngan Rɔmfuɛ Mun 4:20-22 nun.

¹⁸ I sɔ liɛ’n kleman kɛ sa tɛ yolɛ’n w’a saman Abraamu, annzɛ i bɔbɔ ba’n w’a yoman sa tɛ le. Nán kɛ w’a yoman sa mlɔnmlɔn ti yɛ Ɲanmiɛn buli i sran kpa ɔ. (Rɔm. 3:10, 23) Sanngɛ Zoova i ngwlɛlɛ dan ti’n, wafa nga anwlanmannun’n, sran nin a lafimɛn i su le kɛ Abraamu sa’n, i su yɛ ɔ jrannin ɔn. Yɛ ɔ niannin ninnge nga i Ɲanmiɛn sulafilɛ’n ti’n ɔ yoli be’n. I kwlaa sɔ’n kle kɛ Abraamu lafili ‘osu’ nga Ɲanmiɛn waan ɔ́ fín i anunman’m be nun’n i su. Osu’n yɛle Mɛsi’n annzɛ Klist’n. (Bob. 15:6; 22:15-18) I sɔ’n ti’n, Ɲanmiɛn m’ɔ ti jɔlɛ difuɛ’n, ɔ kwla jran “Krist-Jésus i delɛ b’ɔ  deli” e’n su ɔ yaci sa tɛ nga sran’m be yoli be laa’n, ɔ cɛ be. Ɔ maan bé cɛ́n Abraamu nin Ɲanmiɛn sufuɛ kpa nga be bali ka naan Klist w’a ba’n.—An kanngan Rɔmfuɛ Mun 3:24, 25 nun; Jue. 32:1, 2.

E yo naan Ɲanmiɛn bu e sran kpa ikisa

19. ?Ngue ti yɛ ɔ fata kɛ sran kpa mɔ Ɲanmiɛn buli Abraamu’n, ɔ wla Klistfuɛ kpa’m be fanngan andɛ ɔ?

¹⁹ Kɛ mɔ Ɲanmiɛn m’ɔ ti sran klofuɛ’n buli Abraamu i sran kpa’n ti’n, ɔ fata kɛ i sɔ’n wla Klistfuɛ kpa’m be fanngan andɛ. I sran kpa nga Zoova buli i’n, ɔ nin be ng’ɔ fɛli i wawɛ’n kpali be sieli be ngunmin’n naan ‘like ng’ɔ se kɛ ɔ́ fá mán Krist’n, be bo be dunman nun wie’n,’ ɔ timan kun. Sran sɔ mɔ Ɲanmiɛn kpali be’n, ɔ ‘flɛli be kɛ be kaci i liɛ mlɔnmlɔn,’ yɛ be ti “Nyanmiɛn wa.” (Rɔm. 1:7; 8:14, 17, 33) Sanngɛ Abraamu liɛ’n, ɔ kacili Zoova “i janvuɛ.” Yɛ ɔ kali sɔ lele naan b’a yi e ti kpɔlɛ tɛ’n. (Zak 2:23; Eza. 41:8) ?Yɛ Klistfuɛ kpa nga be wla o su kɛ bé trán asiɛ’n m’ɔ́ káci mɛn klanman’n i su’n be li?

20. ?Be nga andɛ Ɲanmiɛn bu be sran kpa kɛ Abraamu sa’n, ngue yɛ ɔ kunndɛ kɛ be yo ɔ?

²⁰ Be liɛ’n, Ɲanmiɛn w’a ‘kaciman be sran kpa’ naan “Krist-Jésus i delɛ b’ɔ deli be’n ti” b’a ko tran ɲanmiɛn su lɔ. (Rɔm. 3:24; 5:15, 17) Sanngɛ be lafi Ɲanmiɛn su kpa yɛ be lafi e ti kpɔlɛ tɛ ng’ɔ yili’n su. Kpɛkun be fa junman kpakpa nga be di’n be yi be Ɲanmiɛn sulafilɛ’n i nglo. Junman sɔ’m be nun kun yɛle kɛ be ‘kan Nyanmiɛn sielɛ ndɛ’n yɛ be kle e Min Jésus-Krist i ndɛ’n.’ (Yol. 28:31) Ɔ maan Zoova kwla bu be sran kpa kɛ ng’ɔ fa buli Abraamu i sran kpa’n sa. Like nga Ɲanmiɛn fa cɛ i sɔfuɛ mun’n, mɔ yɛle Ɲanmiɛn i janvuɛ kacilɛ’n ɔ nin “ye” nga ɔ yoli be ng’ɔ kpali be sieli be ngunmin’n, be timan kun. Sanngɛ ɔ ti like m’ɔ fa cɛli be mɔ be sɔli nun klanman, yɛ be si su ye kpa ɔ.

21. ?Zoova i sran klolɛ’n nin i sa nuan su sɛsɛ yolɛ’n ti’n, mmlusuɛ benin yɛ e kwla ɲɛn i ɔ?

²¹ Klɔ sran’m be siefuɛ’m be ta nda kpanngban, sanngɛ e wla m’ɔ o su kɛ é trán asiɛ’n su tititi’n, ɔ finman be. Anannganman nguan’n nun mɔ e kwla tran’n, ɔ fin like nga like’n kwlaa be Siefuɛ’n i waan ɔ́ yó’n. Zoova fali ajalɛ fanunfanun wie mun naan blɛblɛblɛ i klun sa’n w’a kpɛn su. I sɔ ajalɛ’m be nin i sa nuan su sɛsɛ yolɛ’n be kɔ likawlɛ. Sanngɛ ng’ɔ ti cinnjin trɛ i ngba’n, yɛle kɛ ajalɛ sɔ’m be yi Ɲanmiɛn i sran klolɛ dan’n i nglo. Ɔ maan Pɔlu kwla seli kɛ: “Nyanmiɛn kle ye kɛ ɔ klo e, afin kɛ e ti sa tɛ yofuɛ’n, e ti ɔ maan Krist wuli.”—Rɔm. 5:8.

[Ja ngua lɛ ndɛ’n]

?Amun wla kwla kpɛn su?

• ?Ngue yɛ ɔ sali Adam i osu’n nunfuɛ mun ɔn? ?Yɛ i sɔ’n i bo’n guali sɛ?

• ?Wafa sɛ yɛ be yili e ti kpɔlɛ tɛ’n niɔn? ?Yɛ wafa sɛ yɛ like ng’ɔ fili sran’m be sa’n ɔ nin nga be fa yili be ti tɛ’n, be ti kun ɔn?

• ?E sran kpa bulɛ’n m’ɔ ti like mɔ Ɲanmiɛn fa cɛli e’n ti’n, ngue yɛ amun bɔbɔ amun kwla ɲɛn i ɔ?

[Kosan mun]

[Foto, bue 21]

Adam mɔ fɔ nunmɛn i nun’n ɔ yoli sa tɛ. Zezi mɔ fɔ nunmɛn i nun’n ɔ yili e ti kpɔlɛ tɛ.

[Foto, bue 23]

Zezi fanngan nun’n Ɲanmiɛn kwla bu e sran kpa, nanwlɛ, ɔ ti jasin fɛ!