‘An bu be nga be di junman amun afiɛn’n be akunndan’
‘An bu be nga be di junman amun afiɛn’n be akunndan’
“An bu be nga be di junman [kekle] amun afiɛn bɔ e Min’n fa be sieli amun su kɛ be tu amun fɔ’n be akunndan.”—1 TƐS. 5:12.
1, 2. (a) ?I nun mɔ Pɔlu klɛ́ i fluwa klikli’n kó mán Tɛsaloniki lɔfuɛ mun’n, nn sa benin yɛ ɔ o lɔ asɔnun’n su ɔ? (b) ?Ngue yɛ Pɔlu wlali Tɛsalonikifuɛ’m be fanngan kɛ be yo ɔ?
TƐSALONIKI lɔ asɔnun’n ti Abloki lɔ asɔnun klikli nga be takali be’n be nun kun. Maan ɔ yo kɛ amun ti asɔnun sɔ i nunfuɛ kun sa. Akoto Pɔlu fali blɛ kpanngban kpa ukali lɔ aniaan mun naan be nin Ɲanmiɛn be afiɛn’n w’a mantan kpa. Atrɛkpa’n, ɔ sieli aniaan wie’m be asɔnun kpɛnngbɛn kɛ ɔ fa yoli i asɔnun onga’m be nun’n sa. (Yol. 14:23) Sanngɛ kɛ be takali asɔnun’n, Zuifu’m be wlawlali sran kpanngban wie mun naan be fuan Pɔlu nin Silasi klɔ’n su. Nanwlɛ, ɔ yoli Klistfuɛ nga be kali lɔ’n be kɛ b’a ka be ngunmin sa. Atrɛkpa’n bɔbɔ’n srɛ kunnin be.
2 Kɛ Pɔlu jasoli Tɛsaloniki lɔ’n, ɔ ti weiin kɛ lɔ asɔnun m’ɔ nin a takaman kpa’n i ndɛ loli i. Ɔ kunndɛli kɛ ɔ́ sɛ́ i sin lɔ, sanngɛ ‘Satan yoli maan b’a kwlá ɔ-man.’ Ɔ maan ɔ sunmannin Timote lɔ kɛ ɔ ko wla lɔfuɛ’m be fanngan. (1 Tɛs. 2:18; 3:2) Kɛ Timote ɔli Tɛsaloniki lɔ bali m’ɔ kannin lɔ ndɛ kpakpa kleli Pɔlu’n, i sɔ’n yoli maan ɔ klɛli fluwa kun ko mannin lɔfuɛ mun. Ndɛ nga Pɔlu kannin kleli be’n nun’n, ɔ wlali be fanngan wie kɛ ‘be bu be nga e Min’n fa be sieli be su’n be akunndan.’—An kanngan 1 Tɛsalonikfuɛ Mun 5:12, 13 nun.
3. ?Ngue ti yɛ ɔ fata kɛ Klistfuɛ nga be o Tɛsaloniki lɔ’n be bu asɔnun kpɛnngbɛn’m be sran tratra su ɔ?
3 Be nga be dun Tɛsaloniki lɔ Klistfuɛ’m be ɲrun mmua’n, be sa nin a tɔman Ɲanmiɛn junman’n i dilɛ nun kɛ Pɔlu nin i wiengu ngaliɛ difuɛ’m be sa. Yɛ kusu be kacili Klistfuɛ ɔ nin a cɛman kɛ Klistfuɛ nga be o Zerizalɛmu lɔ’n sa. Afin be takali lɔ asɔnun’n ɔ nin a diman afuɛ kun bɔbɔ! Sanngɛ ɔ ti kpa kɛ be nga be o lɔ asɔnun’n nun’n, be la be asɔnun kpɛnngbɛn’m be ase. Afin ‘be di junman [kekle]’ yɛ be “fa be sieli” i asɔnun’n su yɛle kɛ be nian su, kpɛkun “be tu” aniaan’m be ‘fɔ.’ Nanwlɛ, ɔ fata kɛ be ‘yo maan [asɔnun kpɛnngbɛn’m] be wun kɛ be klo be [naan] be bu be sran.’ Kɛ Pɔlu kannin sɔ’n, ɔ mannin be afɔtuɛ ekun kɛ ‘maan be nin be wiengu be afiɛn sɛ.’ ?Sɛ ɔ ti kɛ amun o Tɛsaloniki lɔ’n, nn amún sí junman nga asɔnun kpɛnngbɛn’m be di’n i su ye kpa? Ɲanmiɛn sinnin Klist lika “mannin sran’m be like kɛ be yo.” ?Amun bu i sɔ sran’m be sɛ?—Efɛ. 4:8.
“Be di junman kekle”
4, 5. ?Pɔlu blɛ su’n, ngue ti yɛ asɔnun’n nunfuɛ’m be like klelɛ’n ti junman kekle ɔ? ?Yɛ ngue ti yɛ ɔ ti sɔ wie andɛ ɔ?
4 ?Kɛ be sunmannin Pɔlu nin Silasi Bere lɔ’n, wafa sɛ yɛ asɔnun kpɛnngbɛn nga be o Tɛsaloniki lɔ’n ‘be dili junman kekle’ kpa ɔ? Be jrannin Ɲanmiɛn Ndɛ’n su be kleli aniaan’m be like kɛ Pɔlu sa. Sanngɛ amun kwla usa amun wun kɛ: ‘?Tɛsaloniki lɔfuɛ kpa’m be klo Ɲanmiɛn Ndɛ’n?’ Afin Biblu’n waan Bere lɔfuɛ’m “be nzuɛn’n ti kpa tra Tɛsalonik liɛ mun, [...] cɛn kwlaa be fa Nyanmiɛn ndɛ nga be klɛli’n nin ndɛ nga Pɔl kan kle be’n, be sunnzun nian sɛ ɔ ti kun o.” (Yol. 17:11) Maan e wun i wlɛ kɛ ndɛ sɔ’n nun’n, b’a faman Bere lɔ Zuifu nga be kacili Klistfuɛ’n b’a sunnzunman Klistfuɛ nga be o Tɛsaloniki lɔ mun. Be fali be sunnzunnin Zuifu nga be o Tɛsaloniki lɔ mɔ b’a kaciman Klistfuɛ’n. Afin be nga be kacili Klistfuɛ’n, kɛ be kannin Ɲanmiɛn Ndɛ’n be kleli be’n ‘be tili yɛ be fali su. B’a bu-mɛn i kɛ ɔ ti sran liɛ, sanngɛ be wunnin i kɛ ɔ ti Nyanmiɛn ndɛ sakpa.’ (1 Tɛs. 2:13) Ɔ maan ɔ ti weiin kɛ lɔ asɔnun kpɛnngbɛn’m be dili junman kekle kpa naan b’a kle asɔnun’n nunfuɛ’m be like.
5 Andɛ’n, sran kpa nanwlɛfuɛ m’ɔ si ngwlɛlɛ’n, ɔ man Ɲanmiɛn i bua fa’n i ‘aliɛ blɛ ng’ɔ ti i nuan su’n i su.’ (Mat. 24:45) Atrɛkpa’n, be nga be o asɔnun’n nun’n be le Biblu’n i akua kpanngban kpa. Yɛ aniɛn wie’m be nun’n, be le fluwa nga be flɛ i Index des publications Watch Tower ɔ nin Watchtower Library m’ɔ o CD-ROM su’n. Asa ekun’n, sran kpa nanwlɛfuɛ’n kle asɔnun kpɛnngbɛn’m be atin, ɔ maan be mian be ɲin be di junman kpa naan b’a kle be niaan Klistfuɛ’m be like. Kɛ ɔ ko yo naan asɔnun’n nunfuɛ’m be nin Ɲanmiɛn be afiɛn’n w’a mantan kpa’n ti’n, be fa blɛ kpanngban be siesie asɔnun aɲia mun naan b’a kwla yiyi ndɛ’n nun weinwein b’a kle aniaan mun.
6, 7. (a) ?Pɔlu i ajalɛ benin yɛ asɔnun kpɛnngbɛn nga be o Tɛsaloniki lɔ’n be niannin su ɔ? (b) ?Andɛ’n, ngue ti yɛ Pɔlu i ajalɛ’n i su falɛ’n kwla yo kekle man asɔnun kpɛnngbɛn mun ɔn?
6 Ajalɛ klanman nga Pɔlu kleli i Ɲanmiɛn i bua fa’n i su nianlɛ’n nun’n, asɔnun kpɛnngbɛn nga be o Tɛsaloniki lɔ’n be wla kpɛnnin su. Ɔ nunman nun kɛ, kɛ mɔ i sɔ’n ti be junman’n, i ti be di i sa ngbɛn. Sanngɛ ɔ fata kɛ be nian asɔnun’n i lika klolɛ su nin wɛtɛɛ su. Kɛ nga e fa kokoli su yalɛ like suanlɛ ng’ɔ sinnin lɛ’n nun’n sa’n, Pɔlu “yoli wɛtɛɛfuɛ kɛ bla ta b’ɔ yɛyɛ i mma mun’n sa.” (An kanngan 1 Tɛsalonikfuɛ Mun 2:7, 8 nun.) I kpa bɔbɔ’n, ɔ kplinnin su kɛ ɔ́ ‘fɛ́ i bɔbɔ wun nánnán’ jasin fɛ ng’ɔ fa mannin be’n su! Kɛ Tɛsaloniki lɔ asɔnun kpɛnngbɛn’m bé nían asɔnun’n i lika’n, ɔ fata kɛ be yo kɛ i sa.
7 Andɛ asɔnun kpɛnngbɛn’m be nian Pɔlu i ajalɛ’n su. Yɛle kɛ be yɛyɛ Ɲanmiɛn i bua fa’n. Asɔnun’n nunfuɛ wie’m be tranlɛ’n yo ya. Sanngɛ asɔnun kpɛnngbɛn’m be fa akunndan yɛ be kunndɛ ninnge kpakpa nga sran sɔ’m be yo’n. I yo, kɛ mɔ fɔ’n o asɔnun kpɛnngbɛn’m be nun’n ti’n, ɔ fata kɛ be kpli kpa naan b’a bu asɔnun’n nunfuɛ’m be tinuntinun be wun akunndan kpa. Ɔ maan be yo like kwlaa nga be kwla yo’n naan b’a yɛyɛ aniaan’m be kwlaa. ?I sɔ’n ti’n niɔn, be ɲin nga be mian naan b’a yo asɔnun sunianfuɛ kpa’n ti’n, ɔ fataman kɛ e yo be mo?
8, 9. ?Andɛ’n, ninnge fanunfanun benin wie’m be nun yɛ asɔnun kpɛnngbɛn’m ‘be nian e su titi’ ɔ?
8 Ɔ ti kpa kɛ e ngba e “nyin yi” asɔnun kpɛnngbɛn mun. Afin kɛ nga Pɔlu fa klɛli’n sa’n, ‘be nian e su titi.’ (Ebr. 13:17) I sɔ ndɛ’n yo maan e wla kpɛn nnɛn sunianfuɛ’m be su. Yɛle kɛ be bua’m be sasalɛ’n ti’n, kɔnguɛ be lafiman. I kunngba’n andɛ’n, be nga be kpinndinman kpa’n annzɛ be nga be akunndan’n ti sannganwa annzɛ kusu be nga Biblu’n nun mmla’m be su falɛ’n ti kekle man be’n ti’n, ɔ ju wie’n asɔnun kpɛnngbɛn’m be lafiman. I wie yɛle aniaan nga be di junman comités de liaison hospitaliers nun’n be liɛ’n. Ɔ ju wie’n be tinnge be naan be ko nian aniaan wie m’ɔ kpinndinman’n i lika. Nanwlɛ, kɛ i sɔ sa wie tɔ e su’n, ye nga be yo e’n ɔ yo e fɛ kpa!
9 Asɔnun kpɛnngbɛn nga be kplan e Ɲanmiɛn suwlɛ sua mun’n, ɔ nin nga kɛ ɲrɛnnɛn sa wie tɔ’n, be ko nian aniaan’m be osu’n, be di junman kekle kpa naan b’a uka aniaan mun. Ɔ fata kɛ e tu e klun e uka be! Kɛ aunmuan dan nga be flɛ i Nargisi’n fitali Myanmar lɔ afuɛ 2008 nun’n, wafa nga aniaan’m be ko niannin lɔfuɛ’m be lika’n maan e fa e ɲin e sie su e nian. Nvle sɔ’n nun lɔ asɔnun kun o klɔ nga be flɛ i Bothingone su. Kɛ ɔ ko yo naan aniaan’m b’a ju lɔ naan b’a uka asɔnun’n nunfuɛ mun’n, ɔ fata kɛ be sin lika tɛtɛ wie mɔ fuɛn’m be gua lɛ’n be nun. Kɛ lɔ aniaan’m be wunnin sran klikli nga be bali be ukalɛ’n, mɔ be wunnin kɛ be akpasua sunianfuɛ laa’n o be nun’n, be kpannin kɛ: “An nian! E akpasua sunianfuɛ’n niɔn! Zoova w’a de e!” ?Junman nga asɔnun kpɛnngbɛn’m be di i wia’n nun nin kɔnguɛ’n ɔ yo amun fɛ? Sɛ awa i mmla’m be su falɛ su ndɛ kekle wie tɔ’n, be sie asɔnun kpɛnngbɛn wie’m be kɛ be ko siesie ndɛ sɔ’n. Asɔnun kpɛnngbɛn sɔ’m be fɛmɛn i sɔ like mɔ be yoli’n be diman be nuan. Sanngɛ be nga be ɲɛn i sɔ’n i su mmlusuɛ’n, be si su ye!—Mat. 6:2-4.
10. ?Junman nga asɔnun kpɛnngbɛn’m be di mɔ sran’m be simɛn i kpa’n yɛle benin?
10 Asa ekun’n, ɔ fata kɛ asɔnun kpɛnngbɛn’m be di fluwa su junman wie mun. I wie yɛle kɛ, asɔnun sunianfuɛ’m be lika siesiefuɛ’n ɔ jaja asɔnun aɲia’m be siesielɛ’n. Anglo kwlaa nin afuɛ nuan kwlaa’n, asɔnun’n i fluwa klɛfuɛ’n klɛklɛ junman nga e dili’n i su rapɔru’n. Suklu sunianfuɛ’n bu suklu i siesielɛ’n i nun ndɛ’m be akunndan kpa. Anglo nsan kwlaa’n, be titi asɔnun’n i sika’n i nun yɛbuɛ. Asɔnun kpɛnngbɛn’m be kanngan lɛtri nga be fin Betɛli lɔ’n be nun. Kpɛkun ajalɛ mɔ maan aniaan’m be ‘yo kun Nyanmiɛn Wa’n i su bɔ be lafi’n ti’n,’ be nian be su. (Efɛ. 4:3, 13) Junman kekle mɔ asɔnun kpɛnngbɛn sɔ’m be nian nun be di’n ti’n, asɔnun’n nun’n be ‘yo [like] kwlaa i nuan su sɛsɛsɛ, ɔ yoman sukusuku.’—1 Kor. 14:40.
“E Min’n fa be sieli amun su”
11, 12. ?Wan mun yɛ be fa be sieli i asɔnun’n su ɔ? ?Yɛ ngue junman yɛ ɔ fata kɛ be di ɔ?
11 Pɔlu waan Tɛsaloniki lɔ asɔnun kpɛnngbɛn mɔ be di junman kekle kpa’n, “e Min’n fa be sieli” i asɔnun’n su. (1 Tɛs. 5:12) Glɛki nun ndɛ mma ng’ɔ fa kɛnnin i sɔ’n ndɛ liɛ’n, ɔ kle kɛ “be dun asɔnun’n i ɲrun mmua.” Asɔnun kpɛnngbɛn nga be o asɔnun’n nun’n, be ngba yɛ Pɔlu su kan be ndɛ ɔ. Ɔ kanman sran kun mɔ be sieli i asɔnun’n annzɛ asɔnun kpɛnngbɛn onga’m be su’n i ndɛ. Asɔnun kpɛnngbɛn’m be kwlaa ‘be di junman kekle,’ yɛ be ‘fali be kwlaa be sieli i asɔnun’n su.’ Kɛ be flɛ asɔnun kpɛnngbɛn kun kɛ “asɔnun sunianfuɛ’m be lika siesiefuɛ’n,” i sɔ’n uka e naan y’a wun i wlɛ kɛ asɔnun kpɛnngbɛn’m be bo’n ti kun.
12 Nán like klelɛ ngunmin ti yɛ “e Min’n fa be sieli” i asɔnun’n su ɔ. Pɔlu seli 1 Timote 3:4 nun kɛ ɔ fata kɛ asɔnun sunianfuɛ’n “ɔ yo sran b’ɔ si i bɔbɔ i awlo’n su nian, bɔ i mma’m be bu i sran be nyin yi i kpa” ɔ. Kɛ be se kɛ ‘ɔ si i awlo’n su nian’n’ ɔ kle weiin kɛ nɛ́n i mma’m be like klelɛ ngunmin ɔn. Sanngɛ ɔ fa awlo’n nun ninnge’m be yolɛ’n i nun ta’n, kpɛkun ɔ yo maan “i mma’m be bu i sran be nyin yi i kpa.” Ɔ maan asɔnun kpɛnngbɛn’m be dun asɔnun’n i ɲrun mmua. Be uka aniaan’m be ngba naan be lo be wun be man Zoova naan ɔ sie be.—1 Tim. 3:5.
13. ?Ngue ti yɛ asɔnun kpɛnngbɛn’m be aɲia’n i bo’n, ajalɛ falɛ’n kwla fa blɛ kpanngban ɔn?
13 Kɛ ɔ ko yo naan asɔnun kpɛnngbɛn’m b’a nian Ɲanmiɛn i bua fa’n i lika kpa’n, be tran ase be koko wafa nga be kwla uka asɔnun’n i kpa’n i su yalɛ. I yo, sɛ be nun kunngba yɛ ɔ fa ajalɛ’n, nn ɔ kwla yo i ndɛndɛ. Sanngɛ, be nga be dunnin asɔnun’n i ɲrun mmua Klistfuɛ klikli’m be blɛ su’n, be liɛ’n su yɛ asɔnun kpɛnngbɛn’m be nian andɛ ɔ. Be yia be koko ndɛ’m be su yalɛ weinwein, yɛ be kunndɛ afɔtuɛ Ɲanmiɛn Ndɛ’n nun. Like nga be kunndɛ’n yɛle kɛ bé nían Ɲanmiɛn Ndɛ’n nun mmla’m be su bé úka asɔnun’n. Ka naan asɔnun kpɛnngbɛn’m b’a yo be aɲia’n, sɛ be tinuntinun be siesie be wun’n, yɛ be kwla yo sɔ ɔ. Be wun siesielɛ’n nun’n be nian Ɲanmiɛn Ndɛ’n nun yɛ be fa ajalɛ nga sran kpa nanwlɛfuɛ m’ɔ si ngwlɛlɛ’n kleli be’n be su. Ɔ ti su kɛ i sɔ’n fa blɛ kpanngban. Ɔ ju wie’n, wafa nga be bu ndɛ’n ɔ timan kun. Ɔ kwla yo kɛ i nun mɔ be nga be dun anuannzɛ’n i ɲrun mmua Klistfuɛ klikli’m be blɛ su’n bé kán klɛn wlalɛ ndɛ’n sa. Sɛ ɔ ti sɔ’n, ɔ fata kɛ aɲia’n cɛ kan, yɛ maan be niannian Biblu’n i akua’m be nun naan be nuan w’a sɛ, naan ajalɛ nga bé fá’n w’a taka Ɲanmiɛn Ndɛ’n su.—Yol. 15:2, 6, 7, 12-14, 28.
14. ?Kɛ asɔnun kpɛnngbɛn’m be bo yo kun be di junman ɔ yo amun fɛ? ?Ngue ti yɛ ɔ yo amun sɔ ɔ?
14 ?Sɛ asɔnun kpɛnngbɛn kun waan san fii i ndɛ liɛ’n su yɛ ɔ ka’n, annzɛ i klunklo ndɛ’n yɛ i waan i wiengu’m be fa su’n nin? ?Annzɛ kusu sɛ be nun kun yo maan be nuan kwlá sɛman kɛ Diotrɛfu fa yoli i Klistfuɛ klikli’m be blɛ su’n sa’n nin? (3 Zan 9, 10) Sɛ ɔ yo sɔ’n, asɔnun’n wunmuan’n fɛ́. Klistfuɛ klikli’m be blɛ su’n, sɛ Satan kunndɛli kɛ ɔ́ sánngan asɔnun’n nun’n, e kwla lafi su kɛ ɔ kunndɛ kɛ ɔ́ yó i sɔ kunngba’n wie andɛ. Ɔ kwla jran klɔ sran’m be bɔbɔ be wun akunndan bulɛ’n mɔ maan be kunndɛ kɛ bé yó sran dan’n, i su. I sɔ’n ti’n, ɔ fata kɛ asɔnun kpɛnngbɛn’m be sɔnnzɔn be wun ase kanlɛ naan be di junman likawlɛ kɛ sran wunmuan kun sa. Kɛ asɔnun kpɛnngbɛn’m be bo yo kun be di junman aenvuɛ su’n, nanwlɛ ɔ yo e fɛ dan!
‘Be tu amun fɔ’
15. ?Ngue yɛ ɔ su asɔnun kpɛnngbɛn’m be bo mɔ be tu aniaan kun i fɔ ɔ?
15 I sin’n, Pɔlu fali e ɲin sieli i asɔnun kpɛnngbɛn’m be junman cinnjin kun m’ɔ ti kekle kpa’n i su. Yɛle Ɲanmiɛn i bua fa’n i fɔ tulɛ. Biblu’n i bue nga laa be klɛli i Glɛki nun’n i nun’n, Pɔlu kunngba yɛ ɔ fali ndɛ nga be kacili i kɛ “be tu amun fɔ’n” kannin ndɛ ɔ. Ndɛ sɔ’n wɔ afɔtuɛ nga be jran su man sran kun kpa’n, mɔ sanngɛ ɔ kleman kɛ be kpɔ i’n. (Yol. 20:31; 2 Tɛs. 3:15) I wie yɛle kɛ Pɔlu klɛli Korɛntifuɛ’m be fluwa seli kɛ: “Nán kɛ amun nyin ase gualɛ ti yɛ n klɛ ndɛ sɔ nin-ɔn, sanngɛ amun bɔ an ti sran kpa’n, amun afɔtuɛ manlɛ ti-ɔ.” (1 Kor. 4:14) Like nga ti yɛ ɔ mannin be afɔtuɛ’n yɛle be ndɛ m’ɔ loli i’n.
16. ?Kɛ asɔnun kpɛnngbɛn’m bé tú sran kun fɔ’n, ngue yɛ ɔ fataman kɛ be wla fi su ɔ?
16 Asɔnun kpɛnngbɛn’m be wla fiman su kɛ wafa nga be tu sran’n i fɔ’n ti cinnjin. Be mian be ɲin be yo kɛ Pɔlu sa. Yɛle kɛ, kɛ bé tú sran’n i fɔ’n be ukɛ i klun ufue su nin klolɛ su. (An kanngan 1 Tɛsalonikfuɛ Mun 2:11, 12 nun.) I yo, asɔnun kpɛnngbɛn’m be ‘lafi ndɛ nanwlɛ nga be kleli be’n su kpa naan ndɛ nanwlɛ bɔ be kle’n ti, b’a kwla tu sran’m be fɔ.’—Tit 1:5-9.
17, 18. ?Sɛ asɔnun kpɛnngbɛn kun tu amun fɔ’n, ngue yɛ ɔ fataman kɛ amun wla fi su ɔ?
17 Ɔ ti su kɛ fɔ o asɔnun kpɛnngbɛn’m be nun naan be kwla kan ndɛ wie mɔ i sin’n ɔ yo be nsisɔ ɔ. (1 Fam. 8:46; Zak 3:8) Asa ekun’n, kɛ be tu be niaan Klistfuɛ’m be fɔ’n, ‘i klikli’n nun ɔ yo [aniaan sɔ’m] be ya, ɔ yo-man be fɛ.’ (Ebr. 12:11) I ti’n, ka naan asɔnun kpɛnngbɛn kun w’a tu sran kun i fɔ’n, ɔ dun mmua bu akunndan kpa, yɛ ɔ srɛ su Ɲanmiɛn. ?Sɛ asɔnun kpɛnngbɛn kun tuli amun fɔ’n, amun ndɛ m’ɔ loli i’n ɔ yo amun fɛ?
18 Maan ɔ yo kɛ tukpacɛ wie mɔ dɔɔtrɔ be kwlá wunmɛn i’n ɔ o amun wun sa. I sin’n, dɔɔtrɔ bian kun wa wun tukpacɛ’n, sanngɛ i ndɛ ng’ɔ kannin’n i su falɛ’n ti kekle. ?I sɔ’n ti’n, amun nin dɔɔtrɔ bian sɔ’n bé tánnin nvlɛ? Cɛcɛ! I kpa’n sɛ i waan be kpaci amun nun’n, ɔ ti weiin kɛ amún kplín su. Afin amun si kɛ amun bɔbɔ amun kpa yolɛ ti ɔ. Wafa nga dɔɔtrɔ bian’n kannin ndɛ’n kleli amun’n ɔ kwla yo amun ya. ?Sanngɛ i sɔ’n ti’n amun su fɛmɛn i ndɛ’n su? Ɔ ti weiin kɛ amún fá su e. I kunngba’n, wafa nga be tuli amun fɔ’n ti’n, nán amun bu amun su nun waka. Atrɛkpa’n, Zoova nin Zezi be su sin asɔnun kpɛnngbɛn’m be ja nun bé klé amun wafa amun kwla yo naan amun a ɔ amun ɲrun Ɲanmiɛn junman’n i dilɛ’n nun’n, annzɛ amun a sasa amun nin Zoova be nantilɛ’n. I ti’n, amun tie be ndɛ’n.
Maan amun si like nga Zoova man’n i su ye
19, 20. ?Wafa sɛ yɛ amun kwla kle kɛ, kɛ be ‘mannin sran’m be like kɛ be yo’n,’ ɔ yo amun fɛ ɔ?
19 ?Sɛ be cɛ amun like kun m’ɔ ti amun ngunmin be liɛ’n, ngue yɛ amún yó ɔ? ?Amún fá like sɔ’n yó like ng’ɔ nin i fata’n naan amun a kle kɛ ɔ yo amun fɛ? Amun ti’n, Zoova sinnin Zezi Klist i lika “mannin sran’m be like kɛ be yo.” Wafa nga amun kwla kle kɛ i sɔ’n yo amun fɛ’n, i kun yɛle kɛ maan amun fa amun su sie i asɔnun kpɛnngbɛn’m be nzra nun ijɔlɛ’m be bo kpa. Kpɛkun amun mian amun ɲin be nanti ndɛ nga be kan’n su. I kun ekun yɛle kɛ maan amun tɛ kosan’m be su ngwlɛlɛ su aɲia’m be bo. Junman kɛ jasin fɛ’n i bolɛ’n sa mɔ asɔnun kpɛnngbɛn’m be fɛ i nun ta’n, amun di wie. ?Sɛ asɔnun kpɛnngbɛn kun i afɔtuɛ’n yoli amun ye’n, ngue ti yɛ amun kan klemɛn i ɔ? ?Yɛ ngue ti yɛ amun yiman amun ye silɛ’n i nglo asɔnun kpɛnngbɛn’m be awlobofuɛ’m be lika ɔ? Nán amun wla fi su kɛ, kɛ ɔ ko yo naan asɔnun kpɛnngbɛn kun w’a kwla di junman kekle asɔnun’n nun’n, ɔ fata kɛ i awlobofuɛ’m be klɛn blɛ ng’ɔ fata kɛ be nin i fa tran’n i bue.
20 Asɔnun kpɛnngbɛn’m be di junman kekle be man e, be nian e su yɛ be tu e fɔ. I sɔ’n ti’n ɔ ti kpa kɛ e si be ye lele. I sɔ ‘sran mɔ be mannin be like kɛ be yo’n,’ be ti like kpa kun mɔ Zoova fa mannin e klolɛ su ɔ!
?Amun wla kwla kpɛn su?
• ?Ngue ti yɛ Tɛsaloniki lɔ Klistfuɛ’m be kwla si be nga be dun be ɲrun mmua’n be ye ɔ?
• ?Amun asɔnun’n nun’n, wafa sɛ yɛ asɔnun kpɛnngbɛn’m be di junman kekle kpa be man amun ɔn?
• ?Kɛ be fali asɔnun kpɛnngbɛn’m be sieli amun su’n, i su ye benin yɛ amun ɲɛn i ɔ?
• ?Sɛ asɔnun kpɛnngbɛn kun tu amun fɔ’n, ngue yɛ ɔ fataman kɛ amun wla fi su ɔ?
[Kosan mun]
[Foto, bue 31]
?Wafa kpanngban nga asɔnun kpɛnngbɛn’m be nian asɔnun’n i lika’n ɔ yo amun fɛ?