Fluwa nun kannganfuɛ’m be usa kɛ...

?Anannganman nguan nun tranlɛ’n ɔ́ yó aɲrunkoun like?

▪ Biblu’n gua e awlɛn su nzue kɛ e kwla tran nguan nun tititi asiɛ’n m’ɔ́ káci mɛn klanman’n i su. (Jue Mun 37:29) ?Sanngɛ anannganman nguan’n nun tranlɛ’n lika klanman kun nun’n, ɔ́ yó aɲrunkoun like?

Kosan sɔ’n ti nanndoliɛ kpa. Be nga be kunndɛ sa’m be su like’n, be waan sran nga i ɲrun yo i koun dan’n, ngokɔɛ’n kwla tɔ i su, yɛ i akunndan’n kwla sanngan. Kpɛkun ɔ kwla tɔ ninnge’m be su yo. Be nga be wunman kɛ be mɛn dilɛ’n le bo mɔ ninnge nga be yo i cɛn kwlakwla’n flan be’n, be tɔ aɲrunkoun’n nun. ?Be nga bé trán mɛn klanman’n nun’n, bé trán nguan nun sa ngbɛn? ?Be mɛn dilɛ’n yó paloo sa ngbɛn?

I klikli’n, maan e wun i wlɛ kɛ Ɲanmiɛn Zoova mɔ Biblu’n fin i’n, yɛ ɔ sunnzunnin kɛ sran’m bé ɲán anannganman nguan ɔn. (Zan 3:16; 2 Timote 3:16) Ɲanmiɛn i nzuɛn klikli’n yɛle sran klolɛ’n. (1 Zan 4:8) Zoova klo e kpa liɛ su, kpɛkun ninnge kpakpa nga e le be dɔ nga su’n, i yɛ ɔ fa mannin e ɔ.—Zak 1:17.

E Yifuɛ’n si kɛ, kɛ ɔ ko yo naan y’a di aklunjuɛ’n, ɔ fata kɛ e ɲan junman ng’ɔ yo like ye’n. (Jue Mun 139:14-16; Akunndanfuɛ’n 3:12) Mɛn klanman’n nun’n junman difuɛ’m be su yoman kɛ mannzin wie mun sa. Junman nga bé dí’n, ɔ́ yó be bɔbɔ nin be nga be klo be’n be ye. (Ezai 65:22-24) ?Sɛ e le junman kun mɔ i dilɛ’n yo e fɛ mɔ e di i blɛ kwlaa nun’n, e ɲrun yó e koun?

Asa kusu’n, Ɲanmiɛn Zoova su kplinman su kɛ sran’m be ngba be tran mɛn klanman’n nun. Ɔ fa anannganman nguan’n nun tranlɛ’n cɛ be nga be sɔnnzɔn i Wa Zezi’n. (Zan 17:3) I nun mɔ Zezi o asiɛ’n su wa’n, i Si i klun sa’n i yolɛ’n yoli i fɛ kpa liɛ su. I ijɔlɛ’n nun nin i aeliɛ’n nun’n, ɔ kleli i sɔnnzɔnfuɛ’m be kɛ sɛ sran kun cɛ i wiengu like’n, yɛ ɔ di aklunjuɛ kpafuɛ’n niɔn. Nán kɛ be cɛ i like’n niɔn. (Sa Nga Be Yoli’n 20:35) Kɛ asiɛ’n ko kaci mɛn klanman ekun’n, sran’m be kwlaa bé nían mmla’n i nun dandan nɲɔn’n be su yɛ bé nánti ɔ. Mmla sɔ mun yɛle Ɲanmiɛn klolɛ’n ɔ nin be wiengu klolɛ’n. (Matie 22:36-40) Sran mɔ be buman be bɔbɔ be wun akunndan mɔ be klo e’n, mɔ be klo be junman’n, maan ɔ yo e kɛ e nin be tran lika kun sa! ?Kɛ e niɛn i sa’n, sɛ e nin i sɔ sran mun e o’n, e ɲrun yó e koun?

?Mɛn klanman’n nun’n, ngue like ekun yɛ é kwlá yó ɔ? Cɛn kwlaa’n, é kwlá súan e Yifuɛ’n i su ninnge uflɛ. Be nga be kunndɛ sa’m be su like’n b’a wun ninnge nga Zoova yili be’n be su ninnge kpanngban. (Rɔmfuɛ Mun 1:20) Sanngɛ lele nin andɛ’n, like nga e si i ninnge sɔ’m be su’n, be juman lika fi. I afuɛ akpiakpi kpanngban yɛ, Zɔbu m’ɔ suli Ɲanmiɛn kpa’n, ɔ buli Ɲanmiɛn i ninnge ng’ɔ yili be’n be su like ng’ɔ si i’n, i akunndan. Andɛ nin andɛ’n i ndɛ’n i atabo’n te yo nanwlɛ. Zɔbu waan: “Nga ti sa ng’ɔ [Nyanmiɛn] yo be’n be bue kaan sa. Be nganniɛn nga e ti i wa’n, e ti-mɛn i kpa bɔ ngbɛn. ?Yɛ i sa sroesroe ng’ɔ yo’n, e suɛn i bo sɛ yɛ ɔ yo ye-ɔ?”—Zɔb 26:14.

Kannzɛ bɔbɔ e tran nguan nun tititi’n, e su kwlá siman Ɲanmiɛn Zoova nin ninnge ng’ɔ yili be’n, be su like ngba. Biblu’n waan Ɲanmiɛn yoli maan e ɲin o anannganman nguan nun tranlɛ’n i sin titi. Sanngɛ ɔ se ekun kɛ “sa nga Nyanmiɛn yo’n, kɛ ɔ fin i bo bolɛ’n nun lele b’ɔ́ fá jú i awieliɛ’n,” e su simɛn i bo le. (Akunndanfuɛ’n 3:10, 11) ?Amun bu i kɛ sɛ e suan e Yifuɛ’n i su ninnge uflɛ titi’n e ɲrun yó e koun?

Be nga be di junman ng’ɔ yo sran’m be ye’n, mɔ maan Ɲanmiɛn ɲan ɲrun’n, dɔ nga su bɔbɔ’n be ɲrun yoman be koun. Be nga be waan i sɔ junman’n yo be ɲrun koun’n, nanwlɛ b’a sɔnman kaan sa. Ɔ maan e kwla lafi su kɛ sɛ e fa e wun e wlɛ i sɔ junman’n nun’n, kannzɛ bɔɔ e tran nguan nun tititi’n, e ɲrun su yoman e koun le.

[Foto cifuɛ mun, bue 14]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/​STScI/​NASA)