?Amun a wlu Ɲanmiɛn i wunmiɛn delɛ lika’n nun?
?Amun a wlu Ɲanmiɛn i wunmiɛn delɛ lika’n nun?
“Nyanmiɛn i ndɛ nga ɔ ko kan’n, wuun w’a kan ɔ kaci-mɛn i, ɔ maan sran’m be kaci.”—EBR. 4:12.
1. ?Ngue yɛ e kwla yo naan y’a wlu Ɲanmiɛn i wunmiɛn delɛ lika’n nun andɛ ɔ? ?Ngue ti yɛ Ɲanmiɛn i ndɛ’n su falɛ’n kwla yo kekle man e ɔ?
LIKE suanlɛ ng’ɔ sinnin lɛ nun’n, e wunnin i kɛ sɛ e ɲin yi Ɲanmiɛn naan e nin i anuannzɛ’n e di junman likawlɛ’n, yɛ e kwla wlu i wunmiɛn delɛ lika’n nun ɔn. E ɲin m’ɔ yi Zoova’n, ɔ kle kɛ e kunndɛ kɛ i klun sa’n kpɛn su. Sanngɛ nán cɛn ngba yɛ i sɔ yolɛ’n ti pɔpɔ man e ɔ. I wie yɛle kɛ sɛ e wunnin i wlɛ kɛ Zoova waan e yaci like kun mɔ e klo i’n i yolɛ’n, i klikli nun’n, i ndɛ’n su falɛ’n kwla yo kekle man e. Sɛ ɔ yo e sɔ’n, ɔ fata kɛ e yo “wɛtɛɛfuɛ.” Yɛle kɛ maan e fa su ndɛndɛ. (Zak 3:17) Kɛ be kan ndɛ be kle e’n, sɛ e fa su ndɛndɛ o annzɛ e faman su o, like suanlɛ nga nun’n, é wá kán sa wie mɔ be kwla yi i sɔ liɛ’n i nglo’n, be ndɛ.
2, 3. ?Sɛ e kunndɛ kɛ Zoova klun jɔ e wun’n, ngue yɛ ɔ fata kɛ e yo i titi ɔ?
2 ?Sɛ e suɛnnin i Biblu’n nun kɛ ɔ fata kɛ e kaci e sa’n, e yo i sɔ ndɛndɛ? Biblu’n waan sran nga Zoova flɛ be i anuannzɛ nun’n, be ti kɛ ‘aofuɛ’m be bo ninnge kpakpa mun’ sa. (Aze 2:7) I sɔ’n kle kɛ sran nga Ɲanmiɛn fa be’n, be ti i nanndoliɛ. Afin be klo sa kpa’n i yolɛ. I nun nga e nun sunman lika é bó Biblu’n nun like suanlɛ bo’n, nanwlɛ, e nzuɛn’n timan kpa mlɔnmlɔn. Sanngɛ kɛ mɔ e klo Ɲanmiɛn nin i Wa’n, ɔ yoli e fɛ kɛ e kaci e nzuɛn’n kpa, naan Ɲanmiɛn klun jɔ e wun. E srɛli Zoova kɛ ɔ uka e, kpɛkun e miannin e ɲin naan y’a kwla kaci e sa. I sin’n, be yoli e batɛmu. Ɔ maan, Ɲanmiɛn i klun jɔ e wun.—An kanngan Kolɔsfuɛ Mun 1:9, 10 nun.
3 Kannzɛ be yoli e batɛmu’n, sanngɛ fɔ’n te o e nun. I sɔ’n ti’n, ɔ fata kɛ e kaci e nzuɛn’n titi. Yɛ e kpli e yo sa kpa. Sanngɛ Zoova tali e nda kɛ sɛ e mian e ɲin kɛ i klun jɔ e wun titi’n, ɔ́ súan e bo.
Blɛ m’ɔ fata kɛ e kaci e sa’n
4. ?Ajalɛ fanunfanun nsan benin yɛ Zoova fa kle e kɛ ɔ fata kɛ e kaci e sa ɔ?
4 Ka naan y’a kan kacilɛ ndɛ’n, ɔ fata kɛ e si ninnge nga m’ɔ ti mɔ e kaci be’n. I sɔ liɛ nun’n, Zoova fa ninnge fanunfanun wie mun uka e. Ɔ kwla fa Ɲanmiɛn Sua’n nun lɔ ijɔlɛ kun, annzɛ e periodiki’m be nun ndɛ kun ɔ fa kle e kɛ e aeliɛ, annzɛ e akunndan wie timan kpa. Kannzɛ e tili ijɔlɛ wie annzɛ e kanngannin Biblu’n i akua kun nun bɔbɔ’n, sanngɛ wie liɛ’n e wunmɛn i kɛ ɔ fata kɛ e kaci. Ɔ maan Zoova kwla sin e niaan kun lika ɔ tu e fɔ amanniɛn su.—An kanngan Galasifuɛ Mun 6:1 nun.
5. ?Wie liɛ’n, kɛ be tu e fɔ’n, wafa sɛ yɛ e sɔ nun ɔn? Like nga ti yɛ ɔ fataman kɛ asɔnun kpɛnngbɛn’m be yaci e ukalɛ’n, an kɛn i ndɛ.
5 Sɛ e wiengu mɔ fɔ o i nun’n tu e fɔ’n, kannzɛ bɔbɔ ɔ kan ndɛ’n i amanniɛn su’n, sanngɛ i su falɛ’n kwla yo kekle man e. Sanngɛ kɛ nga Galasifuɛ Mun 6:1 fa kan sa’n, Zoova seli asɔnun kpɛnngbɛn’m be kɛ ɔ fata kɛ ‘be kle e atin ng’ɔ ti kpa’n amanniɛn su.’ Sɛ e kplin su naan be uka e’n, é yó sran kpa Zoova ɲrun. Titi’n, kɛ é srɛ́ Zoova’n, e se i kɛ fɔ’n o e nun naan e yo sa tɛ kpanngban. Sanngɛ kɛ asɔnun kpɛnngbɛn kun se e kɛ e yoli sa kun m’ɔ timan kpa’n, e kplinman su. Wie liɛ’n, e se kɛ nán e ɲinfu ɔ, annzɛ like nga e yoli’n, ɔ timan tɛ sɔ liɛ. Atrɛkpa kusu’n, e se kɛ sran ng’ɔ tu e fɔ’n, ɔ kloman e sa annzɛ kusu w’a kanman ndɛ’n amanniɛn su. (2 Fam. 5:11) Asa ekun’n, sɛ asɔnun kpɛnngbɛn’m be kan ndɛ wie m’ɔ timan e klun su’n, ɔ kwla lo e ngasi. I wie yɛle kɛ be kwla se e kɛ e awlobofuɛ kun su yo sa tɛ annzɛ ɔ wlɛwlɛmɛn i wun kpa. Annzɛ kusu be kwla se e kɛ e yo e wun saun annzɛ be kwla se e kɛ like nga e fa yiyi e ɲin su’n, ɔ yoman Zoova fɛ. Kpɛkun e liɛ nga é yó’n yɛle ya falɛ ɔ nin ndɛ tɛtɛ kanlɛ. I agualiɛ su’n, ɲannzuɛn kun e. Yɛ aniaan ng’ɔ bali e ukalɛ’n kusu’n, i wun yomɛn i fɛ. Sanngɛ kɛ e wla ko gua ase’n, e wun i wlɛ kɛ e bɔbɔ e kpa yolɛ ti yɛ be yoli e sɔ ɔ.
6. ?Ngue ti yɛ e kwla se kɛ Ɲanmiɛn i ndɛ’n yi “be klun akunndan’n, ɔ nin be klun sa’n” i nglo ɔ?
6 Like nga e su suɛn i yɛ’n ɔ taka Ebre Mun 4:12 su. Ndɛ sɔ’n se kɛ Ɲanmiɛn i ndɛ’n “maan sran’m be kaci.” Kwlaa naan b’a yo e batɛmu’n, Biblu’n ukali e naan y’a kaci e sa ninnge wie’m be yolɛ nun. Kɛ be ko yo e batɛmu ko wie’n, Biblu’n kwla uka e ekun naan y’a yo sran kpa y’a tra laa’n. Fluwa nga Pɔlu klɛli ko mannin Ebre mun’n i nun’n, ɔ kannin kɛ Ɲanmiɛn i ndɛ’n yi “be klun akunndan’n, ɔ nin be klun sa’n” i nglo. (Ebr. 4:12) Yɛle kɛ, kɛ e ko wun like nga Ɲanmiɛn waan e yo’n i wlɛ’n, e aeliɛ’n yi sran’n i wafa nga e ti’n i nglo siɛn’n. I lɛ nun’n, e kwla usa e wun kɛ: ?Wafa nga sran’m be wun e’n, i sɔ yɛ e ti i sakpa ɔ? (An kanngan Matie 23:27, 28 nun.) É wá kán sa wie’m be ndɛ. Ajalɛ nga é fɛ́ i sa sɔ’m be nun’n, maan e bu i akunndan.
Maan e nin Zoova i anuannzɛ’n e wɔ likawlɛ
7, 8. (a) ?Ngue ti yɛ Klistfuɛ nga be ti Ebre’n be nun wie’m b’a kunndɛman kɛ bé yáci Moizi Mmla’n i nun ndɛ wie’m be su nantilɛ ɔ? (b) ?Ngue ti yɛ e kwla se kɛ b’a yoman Zoova klun sa ɔ?
7 E nun sunman lika e si ndɛ ng’ɔ o Nyanndra Mun 4:18 nun’n. Ɔ se kɛ: “Kɛ wia’n tu i bo b’ɔ́ kɔ́’n, wuun i kpajalɛ’n úka su lele wia fá jrán, sran kpa’n kusu kɛ i nzuɛn’n ti weiin sɔ-ɔ.” Ndɛ sɔ’n i bo’n yɛle kɛ, kɛ ɔ́ kɔ́ i ɲrun’n, e wun like nga Zoova waan e yo’n i wlɛ kpa. Kpɛkun e yo i klun sa’n kpa tra laa.
8 E wunnin i like suanlɛ ng’ɔ sinnin lɔ’n nun kɛ, kɛ Zezi wuli’n, aniaan nga be ti Ebre’n be nun wie’m b’a kunndɛman kɛ bé yáci Moizi Mmla’n i su nantilɛ. (Yol. 21:20) Pɔlu yiyili nun kleli be kɛ ɔ nunman nun kɛ be fa Moizi Mmla’n su kun. Sanngɛ be nun wie’m b’a kplinman su kɛ bé yó like nga Zoova waan be yo’n. (Kol. 2:13-15) Atrɛkpa’n, be buli i kɛ, kɛ ɔ ko yo naan be nga be te fa Zuifu’m be mmla’m be su’n b’a kleman be yalɛ’n ti’n, ɔ fata kɛ be fa Moizi Mmla’n i nun ndɛ wie’m be su. Sanngɛ Pɔlu w’a faman ndɛ fi w’a fa fiaman be wun. Ɔ seli be weiin kɛ sɛ be yoman Ɲanmiɛn i klun sa’n, be su wluman Ɲanmiɛn i wunmiɛn delɛ lika’n nun. * (Ebr. 4:1, 2, 6; an kanngan Ebre Mun 4:11 nun.) Sɛ be kunndɛ kɛ Zoova klun jɔ be wun’n, ɔ fata kɛ be kplin su kɛ siɛn’n, ajalɛ uflɛ yɛ i waan be nian su be su i ɔ.
9. ?Sɛ sran kpa nanwlɛfuɛ m’ɔ si ngwlɛlɛ’n yiyi Biblu’n nun ndɛ kun i nun wafa uflɛ’n, ɔ fata kɛ i sɔ’n yo e sɛ?
9 Laa’n, sran kpa nanwlɛfuɛ m’ɔ si ngwlɛlɛ’n yiyili Biblu’n nun ndɛ wie’m be nun kleli e. Sanngɛ siɛn’n, ɔ yiyi nun wafa uflɛ. Ɔ fata kɛ i nun yiyilɛ uflɛ sɔ’n, ɔ yo e fɛ. Afin i sɔ’n kle kɛ Zoova fa sran kpa nanwlɛfuɛ m’ɔ si ngwlɛlɛ’n kle e ndɛ ng’ɔ ti nanwlɛ’n. Ɔ ju wie’n, e ɲrun dinfuɛ’m be anuannzɛ’n fɛ i ɲin sie i Ɲanmiɛn i ndɛ wie’m be su. Yɛ ɔ nian naan sɛ wafa nga e fa wun i wlɛ’n, ɔ ti su o. Sɛ ɔ fata kɛ be yiyi nun wafa uflɛ’n, be fɛ i wun ajalɛ. Ɲannzuɛn kunman be. Be kɛn i weiin kɛ ndɛ nga be kɛnnin i laa’n timan su. Be si kɛ, kɛ mɔ bé yíyí ndɛ wie’m be nun wafa uflɛ’n ti’n, sran wie’m bé kán sran kpa nanwlɛfuɛ m’ɔ si ngwlɛlɛ’n, i wun ndɛ tɛtɛ. Sanngɛ nɛ́n i sɔ yɛ ɔ ti be cinnjin ɔn. Ng’ɔ ti be cinnjin’n yɛle Ɲanmiɛn klun sa yolɛ’n. ?Kɛ sran kpa nanwlɛfuɛ m’ɔ si ngwlɛlɛ’n yiyi Biblu’n nun ndɛ kun nun wafa uflɛ’n, i sɔ’n yo e sɛ?—An kanngan Lik 5:39 nun.
10, 11. ?Kɛ Biblu’n nun like suanfuɛ wie’m be wunnin i kɛ ɔ fata kɛ be bo jasin fɛ’n i wafa uflɛ’n, ngue yɛ be yoli ɔ? ?Afɔtuɛ benin yɛ i sɔ’n man e ɔ?
10 Maan e kan like uflɛ ndɛ. I afuɛ ya tra su kan yɛ’n, Biblu’n nun like suanfuɛ [yɛle kɛ Zoova i Lalofuɛ] wie mɔ be si sran’m be ɲrun ijɔ kpa’n, be buli i kɛ Ɲanmiɛn ndɛ kanlɛ kpafuɛ’n yɛle nzra nun ijɔlɛ’n. Be klo i sɔ’n kpa. Kɛ be ijɔ nzra nun mɔ sran’m be yi be ayɛ’n, ɔ yo wie’m be fɛ kpa. Sanngɛ i osu m’ɔ́ lá nun kan’n, Zoova i sufuɛ’m be wunnin i wlɛ kɛ Zoova klo kɛ be yo like uflɛ be uka nzra nun ijɔlɛ’n su. Yɛle kɛ ɔ klo kɛ be bo jasin fɛ’n awloawlo’m be nun annzɛ i wafa uflɛ wie mun ekun. Sanngɛ be nga be si sran’m be ɲrun ijɔ kpa’n, be nun wie’m be kloman kɛ bé yó sɔ. Kɛ be ijɔ nzra nun sa’n, ɔ waan nn be klo Zoova naan be ɲin yi i. Sanngɛ ajalɛ nga be fɛli i blɛ sɔ nun’n, ɔ kleman sɔ. E si kɛ Zoova w’a kloman be aeliɛ sɔ’n. Yɛ i agualiɛ su’n, be tuli i anuannzɛ’n nun.—Mat. 10:1-6; Yol. 5:42; 20:20.
11 I klikli nun’n, awloawlo’m be nun jasin fɛ’n bolɛ’n yoli kekle mannin aniaan onga mun wie. Sanngɛ be trali be awlɛn be boli, yɛ b’a kpɔci Zoova i anuannzɛ’n. Zoova rali be su dan ti’n, kɛ ɔ́ kɔ́ i ɲrun’n, awloawlo’m be nun jasin fɛ’n bolɛ’n wa yoli pɔpɔ mannin be. ?Sɛ sran kpa nanwlɛfuɛ m’ɔ si ngwlɛlɛ’n se e kɛ e bo jasin fɛ’n i wafa kun mɔ e nin a bomɛn i le’n, é yó i sɛ? ?Kannzɛ ɔ yo e kɛ ɔ́ yó kekle mán e’n, sanngɛ é bó?
Kɛ e awlɛn su sran kun yaci Zoova sulɛ’n
12, 13. (a) ?Ngue ti yɛ Zoova se e kɛ ‘e kan sa tɛ yofuɛ’n i bo e nun lɛ’n’ niɔn? (b) ?Ngue yɛ i yolɛ kwla yo kekle man Klistfuɛ siɛ nin niɛn mun ɔn?
12 E kwlaa e si kɛ, kɛ ɔ ko yo naan Zoova i klun w’a jɔ e wun’n, ɔ fataman kɛ fiɛn kaan sa kan e. (An kanngan Tit 2:14 nun.) Sanngɛ ninnge wie’m be kwla yo maan mmla sɔ’n i su falɛ’n yo kekle. Maan e bu sa nga i akunndan e nian. Aniaan kun nin i yi mɔ be su Ɲanmiɛn kpa’n, be le ba kunngba cɛ. Kpɛkun i sɔ ba’n, ɔ yaci Zoova sulɛ. Ɔ klo “mɛn’n b’ɔ ti le nnyɔn kun like’n” tra kɛ ɔ nin Zoova, yɛ i si nin i nin be afiɛn’n sɛ’n. I aeliɛ’n sɔ’n ti’n, ɔ kwlá tranman asɔnun’n nun kun. Ɔ maan be tuli i.—Ebr. 11:25.
13 I si nin i nin be awlɛn’n kpɔtɔli be klun dan! Be si Pɔlu i ndɛ yɛ m’ɔ o Biblu’n nun’n. Ɔ seli kɛ: ‘Sɛ sran kun se i wun kɛ ɔ ti e niaan b’ɔ ti bla annzɛ bian kunndɛfuɛ’n, annzɛ b’ɔ ti sran bɔ i nyin yi-man like’n, annzɛ ɔ tɛ sɔ amuɛn’n, annzɛ ɔ ti nzowa kpɛfuɛ’n, annzɛ ɔ ti nzanboɛfuɛ, annzɛ ɔ de sran like wue kekle su’n, i sɔfuɛ’n yɛ n seli amun kɛ nán amun nin i san nun nin-ɔn, yɛ nán amun nin i di like bɔbɔ.’ Yɛ ɔ kan gua su kɛ: “An kan sa tɛ yofuɛ’n i bo amun nun lɛ.” (1 Kor. 5:11, 13) Asa ekun’n, be wun i wlɛ kɛ, kɛ Biblu’n se kɛ ‘sran kun’n,’ ɔ kwla yo be osufuɛ mɔ be nin i tranman awlo kunngba’n i wie. Sanngɛ klolɛ mɔ be klo be wa’n ti’n, be kwla bu akunndan nga. Yɛle kɛ: ‘?Sɛ e nin e wa’n e ijɔman’n, ɔ́ yó sɛ naan y’a kwla ukɛ i naan w’a sɛ i sin Zoova wun? ?Nán sɛ e nin i e ta yalɛ koko’n yɛ é úkɛ i ɔ?’ *
14, 15. ?Kɛ siɛ nin niɛn’m bé fá ajalɛ kɛ be nin be wa’n mɔ be tuli i asɔnun’n nun’n bé íjɔ’n, ngue yɛ ɔ fataman kɛ be wla fi su ɔ?
14 Siɛ nin niɛn sɔ’m be yo e kwlakwla e annvɔ. Sɛ ɔ ti kɛ be wa’n waan ɔ́ káci i aeliɛ’n nn ɔ kacili. Sanngɛ ɔ klo kɛ ɔ́ yó like nga i konvi o su’n tra kɛ ɔ nin i si nin i nin yɛ asɔnunfuɛ’m be tran’n. I si nin i nin’m be waan bé úkɛ i, sanngɛ be lemɛn i yowlɛ. I ti yɛ maan e wun kɛ afɛ’n o be su’n niɔn.
15 ?E niaan sɔ’m bé yó i sɛ? ?Bé nánti Zoova i mmla weiin su? E si kɛ awlo nun ndɛ cinnjin wie ti’n, ɔ ju wie’n be nin be wa’n be kwla koko yalɛ. ?Sanngɛ ɔ fata kɛ i sɔ’n yo be ajuin? Kɛ bé fɛ́ i sɔ ajalɛ’n, ɔ fataman kɛ be wla fi like nga Zoova waan be yo’n su. Ɔ fata kɛ be si kɛ Zoova klo kɛ i nvle’n ka sanwun. I sɔ ti yɛ ɔ seli kɛ be “kan sa tɛ yofuɛ’n i bo” asɔnun’n nun’n niɔn. Asa ekun’n, ɔ kunndɛ kɛ ɔ́ úka sa tɛ yofuɛ’n naan ɔ kaci naan ɔ sɛ i sin asɔnun’n nun. ?Wafa sɛ yɛ Klistfuɛ siɛ nin niɛn’m be kwla yo kɛ Zoova sa ɔ?
16, 17. ?Kɛ e bu sa ng’ɔ juli Aarɔn su’n i akunndan’n, i sɔ’n kle e sɛ?
16 Moizi i niaan bian Aarɔn i wa nɲɔn’m be like mɔ be yoli’n ti’n, Aarɔn trannin afɛ nun. I wa Nadab nin Abii be nɲɔn’n be fali like be mannin Zoova. Sanngɛ nn nɛ́n i sɔ yɛ Zoova kleli ɔ. I sɔ’n ti’n, Zoova maan sin fin ɲanmiɛn su lɔ wa rali be. I lɛ’n nun’n, e wun kɛ Aarɔn wunnin i ɲrun sakpa. Ɔ nin i mma’m be kwlá ijɔman kun. Afin, wie w’a kun be. Sanngɛ nán Aarɔn nin i awlobofuɛ’m be su afɛ’n i ngba yɛ ɔ o lɛ ɔ. Moizi seli Aarɔn nin i wa onga’m be kɛ Zoova waan nán be kle kɛ wie sɔ’n i ndɛ’n yo be ya. Ɔ seli kɛ: “Nán amun yaci amun ti ndrɛ’n lɛ maan ɔ yo sukusuku, yɛ nán amun titi amun wun tralɛ’m be nun. Sɛ amun yo i sɔ-ɔ, wuun amun su kunndɛ amun bɔbɔ amun wie, yɛ amun su klɔklɔ Anannganman naan ɔ fɛ i ya’n gua Izraɛlfuɛ’m be su.” (Sau. 10:1-6) Ndɛ’n ti wauun. Ɔ fata kɛ klolɛ nga e klo Zoova’n, ɔ tra klolɛ nga e klo e awlobofuɛ nga be suman Zoova’n.
17 Zoova kaman lɛ kunman be nga be fɛmɛn i mmla’m be su’n andɛ. Klolɛ m’ɔ klo be ti’n, ɔ man be atin naan be kaci. ?Sanngɛ sɛ siɛ annzɛ niɛn kun klo i wa mɔ be tuli i asɔnun’n nun’n dan ti’n, ɔ faman Zoova i mmla’n su’n, Zoova bú i sɔ’n sɛ?
18, 19. ?Sɛ awlobo kun i nunfuɛ’m be nanti Zoova i mmla’n su’n, ye benin yɛ bé ɲɛ́n i ɔ?
18 Sran kpanngban be kan kɛ, kɛ be tuli be asɔnun’n nun’n, sɛ be sali be sin ekun’n, ɔ fin be janvuɛ nin be osufuɛ mun. Afin Zoova i klolɛ’n ti’n, be nin be b’a ijɔman. I sɔ liɛ’n nun’n, talua kun seli asɔnun kpɛnngbɛn’m be kɛ like nga ti yɛ ɔ kacili i nzuɛn’n, i kun yɛle i niaan bian i aeliɛ’n. Yɛle kɛ kɛ be tuli i’n, i niaan’n nantili Zoova i mmla’n su. I sɔ’n ti’n, ɔ kunndɛli kɛ ɔ́ sɛ́ i sin asɔnun nun.
19 ?Ɔ maan ngue yɛ ɔ fata kɛ e yo ɔ? Ɔ fata kɛ e ɲin yi Zoova like kwlaa nun. Sanngɛ fɔ m’ɔ o e nun’n ti’n, ɔ ju wie’n i sɔ liɛ’n yó kekle mán e. Sanngɛ ɔ fata kɛ e si kpa kɛ e bɔbɔ e kpa yolɛ ti yɛ Zoova se e kɛ e yo ninnge wie mun ɔn.
“Nyanmiɛn i ndɛ ng’ɔ ko kan’n, wuun w’a kan ɔ kacimɛn i”
20. ?Wafa nɲɔn benin yɛ e kwla wun Ebre Mun 4:12 i wlɛ ɔ? (An nian ja ngua lɔ nzɔliɛ’n.)
20 Pɔlu klɛli i kɛ “Nyanmiɛn i ndɛ nga ɔ ko kan’n, wuun w’a kan.” Kɛ ɔ́ klɛ́ ndɛ sɔ’n, nán Biblu’n i ndɛ trele sa yɛ ɔ kan ɔn. * Ndɛ tre kunngba sɔ’n i nun ndɛ mma onga’m be kle kɛ kasiɛ nga Ɲanmiɛn boli’n be ndɛ yɛ ɔ kan ɔn. Pɔlu su kle kɛ kasiɛ nga Ɲanmiɛn bo be’n be kpɛn su titi. Zoova kɛn i nuan ndɛ’n i ndɛ se kɛ: “Sɛ ɔ ti sran’n, wuun ń sé kɛ ɔ sɛ-mɛn i sin min wun wa sa ngbɛn.” Yɛ ɔ kan gua su kɛ: “San ɔ́ yó min klun sa, san ɔ́ yó nga bɔ i ti yɛ n sunmɛnnin i’n.” (Eza. 55:11) Ɔ maan sɛ like nga e klo kɛ Ɲanmiɛn yo’n ɔ yomɛn i ndɛndɛ kɛ e sunnzun’n sa’n, maan e tra e awlɛn. Maan e si kɛ Zoova di junman naan i klun sa’n kpɛn su.—Zan 5:17.
21. ?Wafa sɛ yɛ Ebre Mun 4:12 kwla uka sran kpɛnngbɛn mun naan b’a su Zoova titi ɔ?
21 Be nga be o “sran kpanngban” kpa’m be akpasua’n nun’n, be nun kpanngban be su Zoova nán andɛ sa ɔ. (Ngl. 7:9) B’a bumɛn i kɛ bé yó oke mɛn tɛ nga nun. Sanngɛ be te mian be ɲin be te su Zoova kɛ be sa kwla ju lɛ’n. (Jue. 92:15) Be si kɛ “Nyanmiɛn i ndɛ ng’ɔ ko kan’n, wuun w’a kan ɔ kaci-mɛn i.” (Ebr. 4:12) Be si kɛ Zoova su yo naan like nga i waan ɔ́ yó i asiɛ’n su wa’n, ɔ nin like nga i waan ɔ́ yó mán klɔ sran mun’n, ɔ kpɛn su. Kɛ mɔ Ɲanmiɛn i klun sa’n ti cinnjin kpa mɛn i’n ti’n, kɛ ɔ wun kɛ ɔ ti e cinnjin wie’n, ɔ yo i fɛ kpa. Cɛn’n i nso su nga Zoova fa lo wunmiɛn’n nun’n, like fi sa su jrɛnmɛn i naan like nga i waan ɔ́ yó’n w’a yo. Yɛ ɔ si kɛ i nvlefuɛ’m be nin i bé dí junman naan i klun sa’n kpɛn su. ?Yɛ ɔ bɔbɔ li? ?W’a wlu Ɲanmiɛn i wunmiɛn delɛ lika’n nun?
[Ja ngua lɛ ndɛ mun]
^ Zuifu’m be asɔnun kpɛnngbɛn’m be nun sunman be waan be nian Moizi Mmla’n nun ndɛ’n kwlaa su be nanti. Sanngɛ kɛ Zezi bali’n, b’a lafiman su kɛ i yɛ ɔ ti Mɛsi’n niɔn. Ɔ maan b’a yoman Ɲanmiɛn klun sa.
^ An nian fluwa ‘Maan e yo sa nga e yo ɔ e si kɛ Ɲanmiɛn klo e’n’ i bue 207-209 nun.
^ Andɛ’n, Biblu’n yɛ Zoova fa kan ndɛ kle e ɔ. Biblu’n kwla yo maan sran’m be kaci. Ɔ maan ndɛ nga e kɛnngɛn i Ebre Mun 4:12 nun’n, e kwla fa kan Biblu’n bɔbɔ ba’n i ndɛ wie.
?Amun wla kwla kpɛn su?
• ?Ngue yɛ ɔ fata kɛ e yo naan y’a wlu Ɲanmiɛn i wunmiɛn delɛ lika’n nun ɔn?
• ?Kɛ e wun i wlɛ kɛ Biblu’n nun like trele kun sa yɛ Ɲanmiɛn waan e yo’n, wafa sɛ yɛ e kle kɛ é yó Ɲanmiɛn i klun sa ɔ?
• ?Blɛ benin nun yɛ like nga Zoova se e kɛ e yo’n, ɔ kwla yo kekle man e ɔ? ?Sanngɛ ngue ti yɛ ɔ ti cinnjin kɛ e fa Ɲanmiɛn ndɛ’n su ɔ?
• ?Wafa nɲɔn benin yɛ e kwla wun Ebre Mun 4:12 i wlɛ ɔ?
[Kosan mun]
[Foto, bue 31]
Siɛ nin niɛn’m be awlɛn’n w’a kpɔtɔ be klun!
