?Atin nga Zoova kle e klolɛ su’n é fá su?
?Atin nga Zoova kle e klolɛ su’n é fá su?
“Atin ng’ɔ ti gblɛ atin’n, min nyin ci i.”—JUE. 119:128.
1, 2. (a) ?Kɛ amun se sran kun kɛ ɔ kle amun atin’n, ndɛ benin sɛ ɔ kan’n ɔ́ yó amun fɛ ɔ? ?Yɛ ngue ti ɔ? (b) ?Ndɛ benin yɛ Zoova kan kle be nga be su i’n niɔn? ?Yɛ ngue ti ɔ?
AMUN kunndɛ kɛ amún tú ajalɛ wie, sanngɛ amun siman lika sɔ’n kpa. I ti’n, amun se amun janvuɛ kun m’ɔ si lika’n, mɔ amun lafi i su’n kɛ ɔ uka amun. Amun janvuɛ sɔ’n kle amun atin kpɛkun ɔ man amun afɔtuɛ wie mun naan sa w’a ɲanman amun atin’n nun. Ɔ kwla se amun kɛ atin’n nun nzɔliɛ kun i wlɛ wunlɛ ti kekle. Naan sran sunman nga be fali su’n, be mlinnin. ?Ukalɛ mɔ amun janvuɛ’n ukali amun sɔ’n, ɔ́ yó amun fɛ, yɛ amún fɛ́ i ndɛ’n su? E kusu ɔ ti kɛ e su tu ajalɛ sa. E kwla fa lika nga e kɔ’n e sunnzun anannganman nguan’n mɔ e klo kɛ é ɲɛ́n i’n. Zoova ti e janvuɛ, yɛ ɔ kle e atin nga e ko fa su naan y’a tran nguan nun tititi’n. Asa ekun’n, ninnge wie mɔ be kwla yo naan y’a fɛmɛn i ndɛ’n su’n, ɔ bo be su kle e.—Mml. 5:32; Eza. 30:21.
2 Like suanlɛ nga ɔ nin ng’ɔ́ bɛ́ i sin lɔ’n nun’n, ninnge nga mɔ be kwla fa ɲrɛnnɛn yi e su mɔ e janvuɛ Ɲanmiɛn Zoova se e kɛ e sasa e wun be lika’n, é kán be ndɛ. Nán e wla fi su kɛ e ndɛ m’ɔ lo Zoova’n, ɔ nin klolɛ m’ɔ klo e’n be ti yɛ ɔ wla e su nun’n niɔn. Ɔ klo kɛ e ju lika nga e waan é kɔ́’n. Kɛ sran wie’m be fa sran tɛ’m be aeliɛ’n su mɔ be yaci i sulɛ’n, ɔ yo i ya. (Eze. 33:11) Like suanlɛ nga nun’n, é wá kán ninnge tɛtɛ nsan be ndɛ. Like klikli’n fin sran uflɛ mun. I nɲɔn su’n fin e bɔbɔ. I nsan su’n, ɔ fin like kun m’ɔ timan nanwlɛ’n. Ɔ fata kɛ e si ninnge tɛtɛ sɔ mun, ɔ nin wafa nga Zoova uka e naan y’a yoman be’n. Biblu’n i klɛfuɛ kun klɛli ninnge sɔ’m be su ndɛ. Ɔ seli kɛ: “Atin ng’ɔ ti gblɛ atin’n, min nyin ci i.” (Jue. 119:128) ?Kɛ ɔ yo amun sɔ wie ɔ? Maan e kan wafa nga e kwla jran kpa naan y’a faman atin ng’ɔ ti gblɛ atin’n su’n, i ndɛ.
Nán nian kɛ “be ti kpanngban ti” á sé kɛ á sú be su
3. (a) ?Sɛ é kɔ́ lika naan e wunman atin nga e ko fa su’n i wlɛ’n, ngue ti yɛ ɔ kwla yo tɛ kɛ e su be nga’m be su ɔ? (b) ?Mmla cinnjin benin yɛ ɔ o Ezipt Lɔ Tulɛ 23:2 nun ɔn?
3 ?Sɛ amún kɔ́ lika mmuammua naan amun siman atin nga amun ko fa su’n, ngue yɛ amún yó ɔ? Ɔ kwla yo amun kɛ amun su be nga’m be su sa. I li sɛ be nun kpanngban be fa atin kun su’n yɛ ɔ kwla yo amun sɔ kpa’n niɔn. Sanngɛ i sɔ’n kwla yo tɛ. Afin amun siman sɛ nán lika nga amun waan amún kɔ́’n i nun yɛ be nga’m be kɔ o, annzɛ kusu sɛ be bɔbɔ be mlinnin wie o. Ɲanmiɛn mannin Izraɛlifuɛ’m be mmla kun fa tuli be fɔ. Sunnzun ase ngalɛ’n ɔ uka e naan y’a wun fɔ nga ɔ tuli be’n i wlɛ. Mmla sɔ’n nun’n, Ɲanmiɛn wlali jɔlɛ difuɛ mun nin be nga be di ndɛ nun lalo’n be su nun kɛ, nán maan be se kɛ be nga’m “be ti kpanngban ti” bé sú be su. (An kanngan Ezipt Lɔ Tulɛ 23:2 nun.) Klɔ sran mɔ fɔ o be nun’n, ɔ cɛman naan b’a fɛ i sɔ ajalɛ naan b’a di ndɛ kwlɛ. ?Sanngɛ jɔlɛ dilɛ nun ngunmin yɛ ɔ fata kɛ e nanti mmla sɔ’n su ɔ? Cɛcɛ.
4, 5. ?Blɛ benin nun yɛ sran’m be su sulɛ ndɛ’n, ɔ jrannin Zozie nin Kalɛbu be su ɔ? ?Sanngɛ ngue ti yɛ be kwla jrannin kekle ɔ?
4 Nanwlɛ, blɛ sunman nun’n be kwla mian e kɛ e fa ‘sran kpanngban’m be’ atin liɛ’n su. I sɔ sa liɛ’n kwla tɔ e su kpɛ kunngba, kpɛkun kɛ ɔ ko yo naan y’a suman be nga’m be su’n, ɔ kwla yo kekle. Maan e bu sa ng’ɔ tɔli Zozie nin Kalɛbu be su’n i akunndan e nian. Be o sran 12 nga be ɔli mɛn nga Ɲanmiɛn tali nda kɛ ɔ́ fá mán Izraɛlifuɛ mun’n, be nun wie. Kɛ be sali be sin’n, be nun sran blu be ndɛ liɛ nga be kannin’n, ɔ boli nvlefuɛ’m be wla. Be seli bɔbɔ kɛ sran jajraajra nga anzi ɲin keklefuɛ’m be wuli be asiɛ’n su wa’n, be mma’m be o mɛn sɔ’n nun lɔ. (Bob. 6:4) Sanngɛ ɔ kwlá yoman sɔ mlɔnmlɔn. Afin kɛ anannganman su nzue dan’n tɔli’n, sran jajraajra sɔ’m be kwlaa be nunnunnin i osu w’a cɛ kpa. Be wa fi w’a kaman lɛ. Sanngɛ kɛ mɔ Izraɛlifuɛ’m be Ɲanmiɛn sulafilɛ’n kpɔnzɔli’n ti’n, be fali ndɛ nga sran blu’n be kannin’n su. Ndɛ sɔ mɔ be kannin’n, w’a cɛman naan w’a tru lika wunmuan’n nun. Ɔ maan srɛ w’a kunman nvlefuɛ mun aɔwi. Kɛ ɔ yoli sɔ’n, sran’m be nun sunman be wa seli kɛ nán be yo like nga Zoova seli be kɛ be yo’n kun. Yɛle kɛ nán be wɔ lika nga i waan ɔ́ fá mán be’n, i nun lɔ kun. ?Kɛ ɔ wa jrannin kɛ ngalɛ’n sa’n, Zozie nin Kalɛbu be yoli i sɛ?—Kal. 13:25-33.
5 Zozie nin Kalɛbu b’a nianman kɛ be nga’m be ‘ti kpanngban’n ti’n’ bé sú be su. Kannzɛ Izraɛlifuɛ’m b’a kunndɛman kɛ bé tí ndɛ nanwlɛ’n, sanngɛ srɛ w’a kunman be nɲɔn sɔ’n i kanlɛ’n nun. Kɛ be waan bé kún be bɔbɔ’n, be yoli like ng’ɔ ti su’n! ?Ɔ yoli sɛ yɛ be kwla yoli yakpa sɔ ɔ? Be yakpa yolɛ’n i dan fin Ɲanmiɛn su mɔ be lafi’n. Sran nga be lafi Ɲanmiɛn su’n be wun ndɛ ng’ɔ fin Ɲanmiɛn Zoova’n, ɔ nin ndɛ ng’ɔ ti ato’n be ngbaciɛ’n. Kɛ i sin’n Zozie nin Kalɛbu bé kán Ɲanmiɛn su mɔ be lafi’n i ndɛ’n, be seli kɛ ndɛ kwlaa nga Zoova kan’n, ɔ yiɛ i nuan. (An kanngan Zozie 14:6, 8 ɔ nin 23:2, 14 nun.) Zozie nin Kalɛbu be klo be Ɲanmiɛn’n yɛ be lafi i su. Ɔ maan, nán sran’m be su sulɛ’n ti yɛ be su yoman like ng’ɔ klo i’n niɔn. I sɔ ti’n be jrannin kekle. Ɔ maan be kle e ajalɛ kpa andɛ.—Kal. 14:1-10.
6. ?Sa benin nun yɛ sɛ y’a nianman e wun’n, é yó like nga sran kpanngban be yo’n niɔn?
6 ?Ɔ ju wie’n, ɔ yo amun kɛ amun su ‘sran kpanngban’m be’ su sa? Sran nga be ɲin yiman Zoova mɔ be bu i mmla’n i finfin’n, b’a sɔn kpa andɛ. Ɔ le be bɔbɔ be like liɛ nga be bu i kɛ ɔ ti kpa’n annzɛ ɔ ti tɛ’n. Kpɛkun be kunndɛ kɛ bé yó naan e bu i sɔ wie. I wie yɛle ninnge nga be kle i televiziɔn annzɛ sriman’m be nun’n, ɔ nin ɔrdinatɛli nun’n. Sɛ be yi bla nin bian nna nga be fa fite nzra nun’n, ɔ nin nzaje sa nin amuɛn sɔlɛ’n be nglo’n, be se kɛ ɔ timan like tɛ. (2 Tim. 3:1-5) ?Kɛ amún kúnndɛ like nga amun bɔbɔ nin amun awlobofuɛ mun amún fá yíyí amun ɲin su’n, ngue su yɛ amun jran ɔn? ?Ndɛ nga sran kpanngban be kan’n, ɔ nin like nga be yo’n, i su yɛ amun jran be se kɛ like sɔ’n ti kpa ɔ? Sɛ i sɔ yɛ amun yo’n, nn like nga ‘sran kpanngban’m be’ yo’n yɛ amun su yo wie ɔ.
7, 8. (a) ?Wafa sɛ yɛ e kwla suan ‘sa ng’ɔ ti kpa’n nin tɛ’n be ngbaciɛ’n’ lele e si i ɔ? ?Yɛ ngue ti yɛ i sɔ yolɛ’n ti kpa tra kɛ be klɛklɛ ninnge ng’ɔ fata kɛ e yo be’n man e ɔ? (b) ?Ngue ti yɛ Klistfuɛ gbanflɛn nin talua kpanngban be aeliɛ’n yo e klanman ɔn?
7 Zoova mannin e like kpa kun naan y’a kwla fa ajalɛ kpa. Yɛle kɛ e kwla kunndɛ ‘sa ng’ɔ ti kpa’n nin tɛ’n be ngbaciɛ’n.’ Sanngɛ ɔ fata kɛ e yo i sɔ “lele” naan y’a si sa sɔ’m be ngbaciɛ’n i kpa. (Ebr. 5:14) Sɛ e su sran’m be su’n, e su kwlá kunndɛman sa kpa nin sa tɛ’n be ngbaciɛ’n. Ninnge kpanngban nun’n, ɔ fata kɛ e bu e klun lɔ naan e wun ajalɛ ng’ɔ ti kpa’n naan y’a fa. I sɔ ti yɛ Zoova i anuannzɛ’n seman e kɛ fluwa nga sa, annzɛ flimu nga sa, annzɛ ɛntɛnɛti nun ninnge nga sa yɛ e nian annzɛ nán e nian ɔn. Kɛ mɔ mɛn nga i nun ninnge’m be kacikaci ndɛndɛ’n, sɛ be klɛ i sɔ ninnge’m be man e andɛ’n, ainman ninnge sɔ’m bé káci. I ng’ɔ ti tɛ’n, yɛle kɛ sɛ be klɛ be man e’n, e bɔbɔ e su kwlá buman Biblu’n nun mmla’m be su akunndan naan y’a srɛ Ɲanmiɛn y’a fa ajalɛ ng’ɔ nin i fata’n.—Efɛ. 5:10.
8 Ɔ ti su kɛ sɛ e nian ndɛ nga Biblu’n kan’n su e fa ajalɛ’n, ɔ ju wie’n, ɔ su yoman sran’m be fɛ. Klistfuɛ suklu mma’m be janvuɛ’m be kwla mian be kɛ be yo ninnge nga sran kwlaa yo’n wie. (1 Piɛ. 4:4) Ɔ maan asɔnun’n nun’n, kɛ e wun gbanflɛn nin talua mun yɛ sran kpɛnngbɛn mɔ be kwlaa be fa Zozie nin Kalɛbu be ajalɛ’n su’n, mɔ be suman ‘sran kpanngban’m be’ su’n, ɔ yo ɲɛnmɛn dan.
Nán amun yo “amun klunklo ninnge nin konvi ninnge”
9. (a) ?Sɛ é kɔ́ lika’n, ngue ti yɛ sɛ atin kun i klanman’n ti e fa su’n ɔ kwla yo tɛ man e ɔ? (b) ?Ngue ti yɛ mmla ng’ɔ o Kalɛ 15:37-39 nun’n, ɔ yoli cinnjin mannin laa Ɲanmiɛn i nvle’n niɔn?
9 Ninnge tɛtɛ’n i nɲɔn su nga é kɛ́n i ndɛ’n, ɔ fin e bɔbɔ. E kwla fa sunnzun ase kun e kle i sɔ liɛ’n. ?Yɛle kɛ sɛ e waan é tú ajalɛ é kɔ́ lika kun mɔ e siman lɔ’n, é yáci atin nga e janvuɛ wie kleli e’n lɛ naan é nían atin uflɛ i klanman’n ti é fɛ́ i lifuɛ’n su? Nanwlɛ, sɛ e yo sɔ’n, e su juman kan nga e waan é kɔ́’n. Maan e fa ndɛ sɔ’n naan e bu mmla nga Zoova fa mannin Izraɛlifuɛ mun laa’n i nun kun ekun i akunndan e nian. Zoova seli Izraɛlifuɛ’m be kɛ be yo be tralɛ’n i nuan njɔlɛ yɛ be sinsin su nin jese ble nzuenzue. Sran sunman be wunman mmla sɔ’n i wlɛ andɛ. (An kanngan Kalɛ 15:37-39 nun.) ?Amun si like nga ti yɛ mmla sɔ’n ti cinnjin? Mmla sɔ’n i su falɛ’n ukali Ɲanmiɛn i nvle’n nunfuɛ mun naan b’a faman be wun b’a mantanman nvle nga be mantan be lɛ mɔ be ti amuɛn sɔfuɛ’n. I sɔ liɛ’n ti cinnjin, afin i yɛ maan Zoova i klun jɔ́ be wun titi ɔ. (Sau. 18:24, 25) Sanngɛ, like kun ekun ti yɛ Zoova mannin mmla sɔ’n niɔn. Maan e kan like sɔ’n i ndɛ naan e si ninnge tɛtɛ’n i nɲɔn su ng’ɔ kwla yo naan y’a nantiman Zoova i mmla’n su’n.
10. ?Wafa sɛ yɛ Zoova kleli kɛ ɔ si klɔ sran mun ɔn?
10 Kɛ Zoova fá mmla sɔ’n mɛ́n i nvle’n, ɔ kleli be like nga ti m’ɔ fa mannin be’n. Ɔ seli be kɛ: “Nán amun yo amun klunklo ninnge nin konvi ninnge bɔ be fa sran wla amuɛn sɔlɛ nun mun.” Zoova si klɔ sran mun lele. Ɔ si like ng’ɔ o e awlɛn’n nun’n. Ɔ si kɛ ninnge nga e wun be’n, ɔ cɛman naan e konvi w’a sɔ be. I ti’n, Biblu’n se e kɛ: “Klɔ sran’n i klun akunndan’n ti tɛ tra like kwlaa, be yo akunndan sɔ’n i sa fi-ɔ ɔ yo-man ye. ?Wan cɛ yɛ ɔ kwla si-ɔ?” (Zer. 17:9) I sɔ ti yɛ Zoova seli Izraɛlifuɛ’m be kɛ nán be yo be klunklo ninnge nin konvi ninnge mun’n niɔn. Ɔ si kɛ sɛ Izraɛlifuɛ’m be nian nvle nga be suman Zoova’n be aeliɛ’n, be kwla kunndɛ kɛ bé yó kɛ be sa. Ɔ kwla yo be kɛ be wlawla be wun kɛ be sa wie, naan be bu akunndan nga be bu’n wie yɛ be nian be aeliɛ’n su.—Nya. 13:20.
11. ?Wafa sɛ yɛ e konvi kwla sɔ ninnge nga e wun be’n mun ɔn?
11 Andɛ’n, ninnge nga e wun be’n, e konvi kwla sɔ be ndɛndɛ kpa. Mɛn nga e o nun yɛ’n, ɔ yo maan e konvi sɔ ninnge tɛtɛ mun. ?Ɔ maan é yó i sɛ naan y’a fa ndɛ ng’ɔ o Kalɛ 15:39 nun’n su? ?Be nga e wun be cɛn kwlaa’n, suklu lɔ o, e junman su lɔ o, annzɛ e mantanfuɛ mun o, sɛ wafa nga be fa wlawla be wun’n, ɔ yo maan akunndan tɛ ba sran’m be ti nun’n, é kúnndɛ é yó kɛ be sa? Kɛ mɔ e wun be titi’n ti’n, e konvi kwla sɔ be aeliɛ’n. Kɛ ɔ ko yo sɔ’n, e wun wlawlalɛ’n su faman Klistfuɛ’m be liɛ’n kun, sanngɛ ɔ́ fá be nga be suman Zoova’n be liɛ’n.—Rɔm. 12:1, 2.
12, 13. (a) ?Sɛ e klo like wie m’ɔ nin i fataman’n i nianlɛ’n, ngue yɛ e kwla yo ɔ? (b) ?Ngue yɛ ɔ kwla uka e naan y’a yoman naan sran wie w’a yo sa tɛ ɔ?
12 Ɔ ti cinnjin kpa kɛ e tra e awlɛn konvi’n i lika. Sɛ e klo like wie m’ɔ nin i fataman’n i nianlɛ’n, ɔ ti cinnjin kɛ e yaci i sɔ’n. I sɔ yolɛ nun’n, Ɲanmiɛn i sufuɛ nanwlɛfuɛ Zɔbu i ajalɛ’n kwla uka e. Zɔbu tali nda kɛ ɔ su fɛmɛn i ɲinma kpɛman bla m’ɔ timɛn i yi’n i kannglɛ. (Zɔb 31:1) I kunngba’n yɛ Famiɛn Davidi yoli ɔ. Ɔ tali nda kɛ: “Sa ng’ɔ nin yolɛ fata-man’n, ɔ su kpɛn-man n klun kɛ ń yó.” (Jue. 101:3) “Sa ng’ɔ nin yolɛ fata-man’n” yɛle like kwlaa ng’ɔ kwla sanngan e akunndan’n, m’ɔ kwla saci e nin Zoova e afiɛn’n. I wie yɛle like kwlaa nga mɔ sɛ e nian’n, ɔ kwla yo maan e yo sa tɛ’n.
13 Asa kusu’n, sɛ e bɔbɔ e yo naan sran uflɛ wie yo sa tɛ’n, nn y’a yo “sa ng’ɔ nin yolɛ fata-man’n.” I ti yɛ ɔ ti cinnjin kɛ e fa Biblu’n i afɔtuɛ nga i waan e wlawla e wun kpa’n naan nán e fa e wun e kle’n i su’n niɔn. (1 Tim. 2:9) Sɛ e wun wlawlalɛ nun’n, e faman e wun kleman’n, nn e su bu e wiengu’m be sran trá e bɔbɔ. I sɔ yolɛ’n kle ekun kɛ nán like ng’ɔ jɔ e bɔbɔ e klun’n yɛ ɔ ti e cinnjin ɔn, sanngɛ e wiengu’m be liɛ’n niɔn. (Rɔm. 15:1, 2) Asɔnun nun’n, gbanflɛn nin talua akpiakpi kpanngban be wlawla be wun kpa. Be ayeliɛ sɔ’n yo e fɛ dan! Afin ɔ kle kɛ be yoman be klunklo ninnge nin konvi ninnge. Sanngɛ, be kunndɛ kɛ bé yó Zoova i klun sa like kwlaa nga be yo’n nun.
Nán amun su “ninnge finfin’m” be su
14. ?“Ninnge finfin’m” be su sulɛ’n i su ndɛ benin yɛ Samiɛli kannin kleli Izraɛlifuɛ mun ɔn?
14 Maan ɔ yo e kɛ, kɛ é kɔ́ lika nga e dun mmua e kɛnnin ndɛ’n, e sin aawlɛ flɛnnɛn dan kun nun sa. Kpɛkun kɛ é jú lika wie’n, ɔ yo e kɛ y’a wun nzue bla wie sa. Sanngɛ nn like fi sa nunman lɛ. ?Sɛ e yaci atin’n naan e kɔ nzue sɔ’n i salɛ’n, sa benin yɛ ɔ kwla ɲan e ɔ? E kwla mlin kpɛkun i agualiɛ su’n e wu. I kunngba’n, Zoova si kɛ sɛ e fa e ɲin e sie i finfin ninnge’m be su’n, sa kwla ɲan e. Maan e nian ndɛ nga. Blɛ kun nun’n, Izraɛlifuɛ’m be kunndɛli kɛ bé yó kɛ nvle nga be mantan be lɛ’n be sa. Yɛle kɛ be kunndɛli kɛ klɔ sran kun yɛ ɔ yo be su famiɛn ɔn. I sɔ liɛ’n ti sa tɛ dan kpa, afin ɔ ti kɛ nn be su yi Zoova i blo sa, naan be kunndɛman kɛ ɔ yo be Famiɛn kun. Kannzɛ Zoova mannin be atin kɛ klɔ sran kun sie be’n, sanngɛ ɔ sunmɛnnin i nuan ijɔfuɛ Samiɛli kɛ ɔ se be kɛ be nian be wun “ninnge finfin’m” be su sulɛ’n i lika.—An kanngan 1 Samiɛl 12:21 nun.
15. ?Wafa sɛ yɛ Izraɛlifuɛ’m be suli ninnge finfin’m be su ɔ?
15 Atrɛkpa’n, Izraɛlifuɛ’m be bu i kɛ sɛ klɔ sran kun yɛ ɔ ti be famiɛn’n, be kwla lafi i su tra Zoova. Sanngɛ sɛ be bu i sɔ’n nn be su su like finfin kun su. Yɛ i sɔ’n kusu kwla yo maan be su ninnge finfin uflɛ nga Satan fa sie be ɲrun’n, be su wie. Famiɛn nga be ti klɔ sran’n, be kwla fa be wlɛ i amuɛn sɔlɛ’n nun. Amuɛn sɔfuɛ’m be bu i kɛ be kwla lafi ninnge kɛ waka sran sa mɔ be kwla wun be’n annzɛ be kwla kan be’n, be su tra Ɲanmiɛn Zoova mɔ be wunmɛn i’n mɔ kusu ɔ yili like kwlaa’n. Sanngɛ kɛ nga akoto Pɔlu fa kannin’n sa’n, amuɛn’m be “ti-man like nanwlɛ.” (1 Kor. 8:4) Be wunman ase, be timan sa, be kwlá ijɔman yɛ be kwlá yoman like fi. E kwla wun be yɛ e kwla kan be, sanngɛ sɛ e sɔ be nun kun’n, nn like finfin yɛ e su yo ɔ. I agualiɛ su’n, ɲrɛnnɛn yɛ ɔ́ tɔ́ e su ɔ.—Jue. 115:4-8.
16. (a) ?Wafa sɛ yɛ Satan laka sran mun naan be su ninnge finfin’m be su andɛ ɔ? (b) ?Kɛ e fa aɲanbeun ninnge mun e sunnzun Zoova’n, ngue ti yɛ e kwla se kɛ be ti ninnge finfin ɔn?
16 Satan ti gblɛfuɛ kpa, yɛ andɛ nin andɛ’n ɔ te yo naan sran’m be su ninnge finfin’m be su. I wie yɛle kɛ ɔ lakali sran kpanngban naan be bu i kɛ sɛ be le sika nin junman kpa’n, ɔ nin ninnge kpakpa kpanngban’n bé dí aklunjuɛ, yɛ sa fi su kwlá ɲanman be. Be bu i kɛ nn ninnge sɔ’m be kwla uka be naan b’a ɲan be su sa’m be trawlɛ. ?Sanngɛ kɛ be tɔ tukpacɛ annzɛ sika ndɛ’n yo kekle’n annzɛ kusu sanvuɛsa wie tɔ’n, ninnge sɔ mɔ be le be’n be kwla uka be sakpa? ?Sɛ ɔ yo be kɛ be wunman like kpa kun nga ti yɛ be o mɛn’n nun’n, ninnge sɔ’m be kwla uka be? ?Ninnge sɔ’m be kwla tɛ kosan cinnjin nga be fa usa be wun’n be su? ?Sɛ sran’m be o wie’n i nuan’n, ninnge nga be le be’n be kwla uka be? Sɛ sika nin ninnge nga e le be’n be su yɛ e lafi’n, nn klenzua kplɔwa su yɛ y’a lafi ɔ. Ninnge ng’ɔ fata kɛ e ɲan be naan y’a di aklunjuɛ’n, sika nin aɲanbeun ninnge’m be kwlá fa manman e. Yɛ be kwlá deman e tukpacɛ nin wie’n be sa nun. Be ti ninnge finfin. (Nya. 23:4, 5) Sanngɛ Ɲanmiɛn Zoova liɛ’n ɔ o lɛ sakpasakpa! San kɛ e nin i e afiɛn’n w’a mantan kpa yɛ e kwla di aklunjuɛ kpakpa naan sa tɛ w’a ɲanman e ɔ. Zoova kunngba yɛ ɔ kwla uka e sa nga be o e su’n be nun ɔn. E kunndɛman kɛ é kpɔ́ci i naan é sú “ninnge finfin’m” be su le.
17. ?Ninnge nsan nga e kannin be ndɛ like suanlɛ nga nun’n ti’n, ngue yɛ é tá nda kɛ é yó ɔ?
17 Kɛ Zoova ti e janvuɛ’n m’ɔ kle e atin nga e ko fa su’n naan y’a ɲan anannganman nguan’n, ɔ yo e fɛ. Sɛ e yaciman afɔtuɛ ng’ɔ man e’n be su falɛ’n, é kwlá ɲán anannganman nguan. Like suanlɛ nga nun’n, e kannin ninnge tɛtɛ nsan mɔ be yo maan sran’m be fa atin tɛ’n su’n be ndɛ. E kannin sran kpanngban nin e awlɛn’n yɛ “ninnge finfin’m” be ndɛ. Like suanlɛ ng’ɔ́ bá lɛ’n nun’n, é wá kán ninnge nsan uflɛ mɔ Zoova fa uka e naan e ɲin w’a ci ‘gblɛ atin’ mun’n be ndɛ.—Jue. 119:128.
?Amun bu i sɛ?
?Wafa sɛ yɛ amun kwla fa Biblu’n nun mmla nga be o yɛ’n be su nanti ɔ?
[Kosan mun]
[Foto, bue 11]
?Ɔ ju wie’n, ɔ yo amun kɛ amun su sran kpanngban’m be su?
[Foto, bue 13]
?Ngue ti yɛ ɔ ti tɛ kɛ e yo e klunklo ninnge nin konvi ninnge mun’n niɔn?
[Foto, bue 14]
?Ninnge finfin mun yɛ e kunndɛ be ɔ?
