Be nga be wla’n w’a bo’n be fɔnvɔlɛ
Maan e fa e wun e mantan Ɲanmiɛn
Be nga be wla’n w’a bo’n be fɔnvɔlɛ
KLISTFUƐ bla kun mɔ i akunndan’n sanngannin kpɛ sunman’n, ɔ seli kɛ: ‘Zoova su kloman min le.’ Ɔ seli i wun kɛ Zoova nin i be afiɛn’n ti nun dan. ?Sanngɛ Zoova nin i sufuɛ nga be akunndan’n w’a sanngan’n be afiɛn’n ti nun sakpa? Kosan sɔ’n i su tɛlɛ’n, ɔ fɔnvɔ e. I su tɛlɛ sɔ’n, ɔ o ndɛ nga Ɲanmiɛn maan jue tofuɛ Davidi klɛli i Jue Mun 34:19 nun’n, i nun.
Sɛ Zoova i sufuɛ kpa kun i wla bo i wun dan’n, like ng’ɔ kwla yo i’n, Davidi si i. I nun m’ɔ te yo gbanflɛn’n, famiɛn Saili i ɲin cili i. Ɔ maan ɔ guguli kɛ ɔ́ kún i. I sɔ’n ti’n, Davidi wanndi tɔli blo trilili. Davidi ko fiali lika kun m’ɔ bu i kɛ Saili su kɔmɛn i kunndɛlɛ lɔ le’n i nun. Yɛle kɛ ɔ ko fiali be kpɔfuɛ Filistifuɛ’m be nvle’n nun lɔ klɔ kun mɔ be flɛ i Gati’n i su. Sanngɛ kɛ Gati lɔfuɛ’m be wunnin i wlɛ kɛ Davidi yɛ ɔ o lɛ’n, ɔ yoli i wun kɛ fiaunfuɛ sa, ɔ maan b’a kunmɛn i. Davidi seli kɛ Ɲanmiɛn yɛ ɔ deli i ɔ. Kpɛkun ɔ jrɛnnin i delɛ sɔ’n su klɛli Jue Mun 34.
Kɛ kekle o sran wie’m be su’n, be bu i kɛ Zoova nin be nunman nun kun. ?Davidi buli i sɔ wie? I bɔbɔ klɛli i kɛ: “Anannganman mantan be nga be akunndan’n w’a sanngan’n. Yɛ ɔ de be nga be wla’n w’a bo’n.” (Ndɛ mma 19) Maan e nian wafa nga ndɛ sɔ’n fɔnvɔ e’n.
“Anannganman mantan be.” Fluwa kun waan ndɛ sɔ’n nun’n, “wafa nga Anannganman i sufuɛ’m be ndɛ lo i’n m’ɔ nian be su m’ɔ kunndɛ kɛ ɔ́ úka be naan ɔ́ dé be’n, i ndɛ yɛ be kɛnnin i klanman sɔ ɔ.” Kɛ e si kɛ Zoova niɛn i sufuɛ’m be su’n ɔ cici e wla. Sa nga be o i sufuɛ’m be su ‘lika’n mɔ w’a yo kekle’ yɛ’n nun’n, ɔ wun be. Kpɛkun ɔ si ndɛ ng’ɔ o be akunndan’n nun lɔ’n.—2 Timote 3:1; Sa Nga Be Yoli’n 17:27.
“Be nga be akunndan’n w’a sanngan’n.” Fluwa sifuɛ kun waan “ɲrɛnnɛn ng’ɔ tɔ sran sunman be su’n,” i ndɛ yɛ jue tofuɛ’n kan ɔn. Nanwlɛ, Ɲanmiɛn i sufuɛ kpa mun bɔbɔ’n, ɔ ju wie’n kekle dan kpa tɔ be su. Ɔ maan be akunndan’n sanngan.
“Be nga be wla’n w’a bo’n.” Be nga be sa sin bubu be’n, wie liɛ’n be buman be wun sran kun mlɔnmlɔn ti’n, be kwlá faman be wla be guɛmɛn i like kun su. Be nga be kaci Biblu’n aniɛnaniɛn’m be nun’n, be fluwa kun waan be kwla kaci ndɛ sɔ’n kɛ “be nga be leman like kpa kun sa naan b’a fa be wla b’a gua su’n.”
?“Be nga be akunndan’n w’a sanngan’n” ɔ nin “be nga be wla’n w’a bo’n” Zoova nin be tran sɛ? ?Ɔ bu i kɛ ɔ fataman kɛ ɔ nian be lika naan ɔ klo be ti’n, ɔ fɛmɛn i wun mantanman be? Cɛcɛ, ɔ yoman sɔ mlɔnmlɔn! Kɛ siɛ annzɛ niɛn kun mɛn i wa mɔ i akunndan’n w’a sanngan’n su m’ɔ fɔnvɔ i’n sa’n, Zoova mɛntɛn i sufuɛ nga be kpan flɛ i kɛ ɔ uka be’n. I wun blibli i kɛ ɔ́ fɔ́nvɔ be. Ɔ kwla man be ngwlɛlɛ nin wunmiɛn naan b’a fa jran ɲrɛnnɛn kwlaa ng’ɔ tɔ be su’n i ɲrun.—2 Korɛntfuɛ Mun 4:7; Zak 1:5.
?Ngue ti yɛ amun kunndɛman wafa nga amun kwla fa amun wun mantan Zoova ɔ? Ɲanmiɛn sɔ m’ɔ si aunnvuɛ’n, ɔ ta e nda kɛ: “Be nga b’a fɛ’n, ɔ nin be nga be wun a fɔ’n, min nin be e o nun, kɛ ɔ́ yó naan m’an wla be fanngan, naan m’an wla be nga b’a fɛ’n be fanngan wie’n ti.”—Ezai 57:15.
