Be wunnin Mɛsi’n!
Be wunnin Mɛsi’n!
“Y’a wun Mɛsi’n.”—ZAN 1:41.
1. ?Ngue ti yɛ Andre seli i niaan bian Piɛli kɛ: “Y’a wun Mɛsi’n” niɔn?
ZAN BATƐMU YOFUƐ’N nin i sɔnnzɔnfuɛ nɲɔn be o lɛ. Kɛ ɔ wunnin kɛ Zezi su ba be wun lɛ’n, ɔ seli kɛ: “An nian Nyanmiɛn Bua Gbanflɛn’n yɛ.” Kɛ Andre nin Zan i sɔnnzɔnfuɛ kun’n, be tili ndɛ sɔ’n, be suli Zezi su. Kpɛkun be trɛnnin i wun lɔ lele. I sin’n, Andre ko toli i niaan bian Simɔn Piɛli. Yɛ ɔ seli i kɛ: “Y’a wun Mɛsi’n.” I sin’n, ɔ nin i be ɔli Zezi i wun lɔ.—Zan 1:35-41.
2. ?Mɛsi’n i su ndɛ nga be kɛnnin i Ɲanmiɛn Ndɛ’n nun’n be su like suanlɛ’n, ɔ́ yó maan é yó ngue?
2 Kɛ afuɛ’m bé sín bé kɔ́’n, Andre nin Piɛli ɔ nin sran wie mun ekun bé wá súan Ɲanmiɛn Ndɛ’n kpa. Ɔ maan bé wá kɛ́n i weiin kɛ Zezi yɛle Mɛsi mɔ Ɲanmiɛn seli kɛ ɔ́ bá’n. Mɛsi’n i su ndɛ nga be kɛnnin i Ɲanmiɛn Ndɛ’n nun mɔ maan é wún sran ng’ɔ́ káci Mɛsi’n i wlɛ’n, é wá fá e ɲin síe be nun wie’m be su ekun. I sɔ’n yó maan é fá e wla gúa Biblu’n su kpa trá laa’n, yɛ ɔ́ yó naan y’a lafi sran nga Zoova fɛli i kɛ ɔ kaci Mɛsi’n i su.
“Nian, ɔ famiɛn’n su ba ɔ sin”
3. ?Kɛ Zezi wluli Zerizalɛmu lɔ kɛ famiɛn sa’n, Ɲanmiɛn nuan ijɔfuɛ’m be ndɛ benin mun yɛ be kpɛnnin su ɔ?
3 Mɛsi’n wá wlú Zerizalɛmu klɔ nun kɛ famiɛn sa. Ɲanmiɛn nuan ijɔfuɛ Zakari seli kɛ: “Siɔnfuɛ mun, maan amun wun blibli amun, amun tu kpɛn! Zerizalɛmfuɛ mun, amun bo sro. Amun nian, amun famiɛn’n su ba amun wun. Ɔ ti sran kpa, ɔ kwla, ɔ ti wɛtɛfuɛ. W’a fu aflunmun bɔ w’a kpɛ cro kun su. Aflunmun sɔ’n ɔ ti aflunmun bla kun wa.” (Zkr. 9:9) Biblu’n i klɛfuɛ kun seli kɛ: “Sran ng’ɔ ba Anannganman dunman nun’n, maan Nyanmiɛn yo i liɛ ye!” (Jue. 118:26) Kɛ Zezi wlú Zerizalɛmu klɔ’n nun’n, sran kaka kpa be bo sroli. Nán Zezi yɛ ɔ sunmannin be ɔ. Sanngɛ ndɛ nga Ɲanmiɛn nuan ijɔfuɛ’m be klɛli’n i nuan su sa yɛ be yoli ɔ. Kɛ amún kánngan Biblu’n i bue ng’ɔ kɛn i sɔ ndɛ’n i nun’n, maan ɔ yo amun kɛ amun o lɛ blɛ sɔ nun sa, naan amun ti bo srolɛ nga sran’m be bo sro’n.—An kanngan Matie 21:4-9 nun.
4. ?Wafa sɛ yɛ ndɛ ng’ɔ o Jue Mun 118:22, 23 nun’n kpɛnnin su ɔ?
4 Kannzɛ sran’m b’a sɔman Zezi nun kɛ i yɛ ɔ ti Mɛsi’n, sanngɛ ɔ ti Ɲanmiɛn i sran kpa. Kɛ Ɲanmiɛn nuan ijɔfuɛ’m be fa kannin’n sa’n, sran sunman be kpɔli Zezi kpɛkun be yoli i finfin. Sran sɔ’m b’a lafimɛn i su. (Eza. 53:3; Mar. 9:12) Sanngɛ jue tofuɛ’n waan: “Yɛbuɛ nga sua kplanfuɛ’m be yili i blo’n, i yɛ w’a kaci yɛbuɛ kpa b’ɔ tra sua’n i cɔnjɔ’n i ase-ɔ. I sɔ’n fin Anannganman.” (Jue. 118:22, 23) Cɛn kun mɔ Zezi kán ndɛ klé i kpɔfuɛ mun’n, ɔ boli ndɛ sɔ’n su. Piɛli waan Zezi nin be nga be kpali be sieli be ngunmin be akpasua’n be ndɛ yɛ jue tofuɛ’n kan ɔn. Piɛli fali sran akpasua sɔ’n sunnzunnin sua. Kɛ be wla sua kun i bo ase’n, ɔ le yɛbuɛ kun m’ɔ trɛ i ase ɔ. Zezi yɛ ɔ ti yɛbuɛ sɔ’n niɔn. Be nga b’a lafimɛn i su’n, b’a bumɛn i kɛ i yɛ ɔ ti Mɛsi’n niɔn. Sanngɛ “Nyanmiɛn wunnin kɛ ɔ ti kpa” yɛ ‘ɔ fɛli i.’—1 Piɛ. 2:4-6; Mar. 12:10, 11; Yol. 4:8-11.
I sɔnnzɔnfuɛ kun kpɛli i bo waka yɛ be onga’m be wanndili i
5, 6. ?Mɛsi’n i bo waka kpɛlɛ’n i su ndɛ benin yɛ Ɲanmiɛn nuan ijɔfuɛ’m be kannin ɔn? ?Wafa sɛ yɛ ndɛ sɔ’m be kpɛnnin su ɔ?
5 Sran kun m’ɔ yo i wun kɛ ɔ ti Mɛsi’n i janvuɛ sa’n, ɔ́ kpɛ́ i bo waka. Davidi kɛnnin i laa kɛ: “Min janvuɛ kpa bɔbɔ nga e nin i e ti koko nnya nun ɔn ɔ ti-man, bɔ n fa min wla’n n guɛ i su’n, bɔ e nin i e wla asa’n, w’a kaci min kpɔfuɛ.” (Jue. 41:10) Laa kpa’n, sɛ a nin sran kun wla asa’n, nn ɔ ti ɔ janvuɛ. (Bob. 31:54) Ɔ maan Ɲanmiɛn Ndɛ’n se kɛ Mɛsi’n i janvuɛ kun ɔ́ wá yó sa tɛ kpa kun. Yɛle kɛ ɔ́ kpɛ́ i bo waka! Zezi kannin sran sɔ’n i ndɛ kleli i akoto mun. Ɔ seli kɛ: “Nán amun ngba amun ndɛ yɛ n kan-an, n si be nga n fali be’n. Sanngɛ san Nyanmiɛn Ndɛ nga be klɛli’n ɔ́ kpɛ́n su. Be klɛli i kɛ: ‘Sran ng’ɔ nin min di like’n, w’a kaci n kpɔfuɛ.’” (Zan 13:18) Zida Iskariɔti m’ɔ ti Zezi i sɔnnzɔnfuɛ ɔ nin i janvuɛ laa’n i ndɛ yɛ Zezi su kan ɔn. Kɛ ɔ fali Zezi mannin sran mun’n yɛ ndɛ nga Davidi kɛnnin i laa’n kpɛnnin su ɔ.
6 Sran ng’ɔ́ fá Mɛsi’n mán’n, bé mɛ́n i jɛtɛ ufue 30. Kanga kun i gua yɛle i sɔ’n. Matie kannin kɛ, kɛ Zida fali Zezi mannin’n, be mɛnnin i jɛtɛ ufue 30. I sɔ m’ɔ yoli’n ti’n, ndɛ ng’ɔ o Zakari 11:12, 13 nun’n kpɛnnin su. Sanngɛ Matie kannin kɛ Ɲanmiɛn nuan ijɔfuɛ Zeremi i ndɛ’n yɛ ɔ kpɛnnin su ɔ. ?Ngue ti yɛ Matie seli kɛ Zeremi yɛ ɔ kannin ndɛ’n kusu nn Zakari i fluwa’n nun yɛ ndɛ sɔ’n o ɔ? Matie blɛ su’n, be siesieli Biblu’n nun fluwa’m be akpasuaakpasua. Akpasua kun nga Zakari fluwa’n o nun’n, Zeremi fluwa liɛ’n yɛ be fa boli i bo ɔ. (An nian Lik 24:44.) Zida kusu w’a kwlá faman jɛtɛ ufue 30 w’a yoman like fi. Ɔ toli sika’n guɛli i Nyanmiɛn i sua’n nun lɔ naan “w’a wɔ w’a ko bo i kɔmin.”—Mat. 26:14-16; 27:3-10.
7. ?Wafa sɛ yɛ Zakari 13:7 kpɛnnin su ɔ?
7 Mɛsi’n i sɔnnzɔnfuɛ’m bé bó sánndi. Zakari klɛli i kɛ: “Kun nnɛn kankanfuɛ’n yɛ bua’m bé bó sánndi.” (Zkr. 13:7) Afuɛ nga be flɛ i 33 nun Nisan i le 14 su’n, Zezi seli i sɔnnzɔnfuɛ’m be kɛ: “Ndɛ kɔnguɛ nga amun kwlaa amun ti nun wá sáci min ti, afin be klɛli i kɛ: ‘Ḿ má bó bua tafuɛ’n, yɛ bua fa sɔ’n bé bó sánndi.’” Kɛ ɔ yoli sɔ sɛsɛsɛ ɔ. Afin Matie kannin kɛ Zezi i sɔnnzɔnfuɛ’m be kwlaa be yacili i lɛ be wanndili.—Mat. 26:31, 56.
Be tɔnnin i suɛn yɛ be boli i
8. ?Wafa sɛ yɛ ndɛ ng’ɔ o Ezai 53:8 nun’n kpɛnnin su ɔ?
8 Sran’m bé fá Mɛsi’n kɔ́ jɔlɛ difuɛ’m be ja su. Kpɛkun bé sé kɛ maan be kun i. (An kanngan Ezai 53:8 nun.) Zuifu’m be jɔlɛ difuɛ dandan mun be kwlaa be yiali Nisan i le 14 su nglɛmun nun. Be cili Zezi kpɛkun be fɛ i ɔli Pɔnsu Pilati m’ɔ ti Rɔmufuɛ’m be kpɛn kun’n i ja su. Ɔ usali Zezi i sa wie mun. I sin’n, ɔ seli kɛ Zezi w’a yoman like fi. Sanngɛ kɛ ɔ usali sran mun sɛ ɔ fata kɛ ɔ yaci i nun’n, be kpannin kɛ: “Bobo i waka’n su!” Be liɛ nga be kunndɛ’n yɛle kɛ Pilati yaci Barabasi m’ɔ ti kakajefuɛ’n i nun naan ɔ kun Zezi. Kɛ ɔ yoli sɔ’n, ɔ yacili Barabasi nun afin ɔ kunndɛ kɛ sran’m be klun jɔ i wun. Kpɛkun ɔ seli i sran’m be kɛ be bo Zezi nin ngble naan be bobo i waka kun su.—Mar. 15:1-15.
9. ?Zezi blɛ su’n, wafa sɛ yɛ ndɛ ng’ɔ o Jue Mun 35:11 nun’n kpɛnnin su ɔ?
9 Sran wie’m bé wá tɔ́n Mɛsi’n i suɛn. Davidi klɛli i kɛ: “Sran suɛn tɔnfuɛ wie’m bé bá, bé wá úsa min sa nga n si-man nun’n i nun ndɛ.” (Jue. 35:11) Kɛ nga Davidi kannin’n sa cɛ’n, ‘Nyanmiɛn nyrun jranfuɛ dandan’m be nin jɔlɛ difuɛ dandan’m be kwlaa be kunndɛli Jésus wun sa kun bɔ bé jrán su fá kún i’ ɔ. (Mat. 26:59) Biblu’n waan sran kpanngban be tɔnnin i suɛn, sanngɛ suɛn sɔ’n mɔ be tɔnnin i’n, be ti ngunminngunmin. (Mar. 14:56) I kpa’n ndɛ nga sran’m be kannin’n, sɛ ɔ ti nanwlɛ annzɛ ato o, ɔ timan Zezi i kpɔfuɛ’m be cinnjin. Be liɛ nga ɔ ti be cinnjin’n yɛle kɛ be kun i.
10. ?Wafa sɛ yɛ Ezai 53:7 kpɛnnin su ɔ?
10 Mɛsi’n su tɛman be nga be tɔn i suɛn’n be su. Ezai kannin kɛ: “Kɛ bé klé i yalɛ’n, ɔ kɛnnin i wun ase, ɔ yoli kɛ bua bɔ be su fɛ i kɔ́ i kunlɛ’n sa, ɔ yoli kɛ bua bɔ kɛ bé kpɛ́kpɛ́ i ndrɛ’n, ɔ kpan-man’n sa, w’a uke-mɛn i nuan.” (Eza. 53:7) ‘Suɛn nga Nyanmiɛn nyrun jranfuɛ dandan mun nin kpɛnngbɛn mun be tɔnnin Zezi’n, w’a tɛ-man wie fi su.’ Kɛ ɔ yoli sɔ’n, Pilati usali kɛ: “?A ti-man suɛn tɛtɛ kpa nga bé tɔ́n wɔ lɛ’n?” Sanngɛ Zezi w’a “tɛ-man ndɛ sɔ’n kun sa su, i sɔ’n yɛ ɔ boli be kpɛnngbɛn’n i nuan dan nin-ɔn.” (Mat. 27:12-14) Asa kusu’n, Zezi w’a kpɛmɛn i kpɔfuɛ’m be nzowa.—Rɔm. 12:17-21; 1 Piɛ. 2:23.
11. ?Wafa sɛ yɛ Ezai 50:6 nin Mise 4:14 be kpɛnnin su ɔ?
11 Ezai seli kɛ bé bó Mɛsi’n. Ezai klɛli i kɛ: “N tikeli min sin’n su m mannin be nga be boli min’n, n yacili min nyrun’n lɛ m mannin be nga be tutuli min akanza’n, kɛ bé kpɛ́ min nzowa’n, kɛ bé tí be nuan nzue tá min wun’n, m’an kata-man min nyrun’n.” (Eza. 50:6) Mise dun mmua kannin kɛ: “Be su finfin Izraɛl kpɛn’n i nyrun nun nyantiaan.” (Mis. 4:14) Marki kleli kɛ Zezi i ndɛ yɛ be kan ɔn. Ɔ klɛli i kɛ: “Be wie’m be guɛli i wun ngɔsrɛ, be boli i zaga, be usɛli i kɛ: ‘?Wan yɛ ɔ boli wɔ-ɔ?’ Yɛ sua sunianfuɛ’m be sɔli i bolɛ su-ɔ.” Marki seli ekun kɛ be fali ndɛma be finfinnin i ti’n su, be guɛli i wun ngɔsrɛ kpɛkun be kotoli i bo be yoli i finfin. (Mar. 14:65; 15:19) Be kleli Zezi i ɲrɛnnɛn sɔ ngbɛn, afin w’a yoman sa tɛ fi.
W’a kpɔciman Ɲanmiɛn lele ɔ fa wuli
12. ?Wafa sɛ yɛ Jue Mun 22:17 kpɛnnin su ɔ? ?Wafa sɛ yɛ Ezai 53:12 kpɛnnin su ɔ?
12 Waka kun su yɛ Mɛsi’n wú ɔ. Davidi seli kɛ: “Sran tɛtɛ’m be sin yia min, be sɔnnin kpanngbangban. [...] Be fitili min sa nin min ja mun.” (Jue. 22:17) Marki kannin sa kun mɔ Biblu’n nun kannganfuɛ’m be si i kpa’n i ndɛ. Ɔ klɛli i kɛ nglɛmun wia’n nun dɔ ngwlan su’n, be boboli Zezi waka’n su. (Mar. 15:25) Ɲanmiɛn nuan ijɔfuɛ kun kɛnnin i ekun kɛ bé kún Mɛsi’n nin sa tɛ yofuɛ mun likawlɛ. Ezai klɛli i kɛ: “I bɔbɔ kplinnin su kɛ ɔ́ wú, ɔ maan be fɛli i wlali sa tɛ yofuɛ’m be nun.” (Eza. 53:12) I sɔ ndɛ’n kpɛnnin su. Yɛle kɛ “be boboli i nin kodiawiefuɛ nnyɔn, kun o i fama su, kun o i bɛ su.”—Mat. 27:38.
13. ?Wafa sɛ yɛ ndɛ ng’ɔ o Jue Mun 22:8, 9 nun’n kpɛnnin su Zezi i lika ɔ?
13 Davidi kɛnnin i kɛ sran’m bé wá kpɛ́ Mɛsi’n i nzowa. (An kanngan Jue Mun 22:8, 9 nun.) I nun nga Zezi wún ɲrɛnnɛn waka’n su’n, sran’m be yoli i finfin. Matie waan: “Be nga bé sín lɛ’n, be di i tɛ, be kpukpu be ti nun, be se kɛ: ‘Ɔ bɔ ɔ waan á búbú Nyanmiɛn i sua’n naan á kplɛ́n i le nsan’n, de wɔ wun siɛn’n, yɛ sɛ a ti Nyanmiɛn Wa sakpa’n, fin waka’n su jra.’” Nyanmiɛn nyrun jranfuɛ dandan mun nin mmla klefuɛ mun ɔ nin kpɛnngbɛn mun be yoli i finfin, be seli kɛ: “Ɔ deli sran wie mun, sanngɛ ɔ kwlá de-mɛn i bɔbɔ wun. Ɔ ti Zuif’m be famiɛn! Maan ɔ fin waka’n su jra, sɛ ɔ yo i sɔ’n yɛ é láfi i su-ɔ. Ɔ fɛ i wla guali Nyanmiɛn su, sɛ Nyanmiɛn sɔ’n klo i’n, maan ɔ de i siɛn’n, afin i waan ɔ ti Nyanmiɛn Wa.” (Mat. 27:39-43) Zezi wunnin i ɲrun dan, sanngɛ ɔ trannin diin. Kpɛkun ndɛ tɛ kun sa w’a finmɛn i nuan nun w’a fiteman. Nanwlɛ ɔ kle e ajalɛ kpa!
14, 15. Like nga bé fá Mɛsi i tralɛ’n bé yó’n ɔ nin vinɛgri mɔ bé fá mɛ́n i kɛ ɔ nɔn’n, Ɲanmiɛn nuan ijɔfuɛ’m be kɛnnin i ndɛ. ?Wafa sɛ yɛ ndɛ sɔ’m be kpɛnnin su ɔ?
14 Be tuli Mɛsi’n i tralɛ’m be wun fɔtɔ. Davidi klɛli i kɛ: “Be cɛcɛli min tralɛ’m be nun be fali. Be tuli min tralɛ dan’n i wun fɔtɔ.” (Jue. 22:19) Kɛ ɔ yoli sɔ sɛsɛsɛ ɔ. Afin Biblu’n waan kɛ Rɔmufuɛ’m be boboli Zezi waka’n su’n, be tuli i tralɛ’m be wun fɔtɔ naan i sin’n b’a cɛ nun.—Mat. 27:35; an kanngan Zan 19:23, 24 nun.
15 Bé mán Mɛsi’n i vinɛgri nin like wiwi wie kɛ ɔ nɔn. Ɲanmiɛn ndɛ’n kɛnnin i laa kɛ: “Be gua min aliɛ’n nun duwlɛ. Sɛ nzue we kun min’n, vinɛgri yɛ be fa man min-ɔn.” (Jue. 69:22) E si kɛ ndɛ sɔ’n kpɛnnin su afin Matie se e kɛ: “Be mɛnnin i nzan bɔ be fa like wiwi wie guali nun’n kɛ ɔ nɔn, sanngɛ kɛ ɔ wɔli su’n, w’a nɔn-man.” I sin’n, “be nun kun wanndi ko fali mlɛn boli vinɛgri nun, ɔ fa blɛblɛli i ndɛma kun su, ɔ fa mɛnnin i kɛ ɔ nɔn.”—Mat. 27:34, 48.
16. ?Wafa sɛ yɛ ndɛ ng’ɔ o Jue Mun 22:2 nun’n kpɛnnin su ɔ?
16 Sran’m bé bú i kɛ Ɲanmiɛn i wla w’a fi Mɛsi’n. (An kanngan Jue Mun 22:2 nun.) Marki se e kɛ nnɔsua wia nun dɔ nsan su’n, Zezi kpannin kekle kɛ: “‘?Eloi, Eloi, lama sabaktani?’ bɔ i bo’n yɛlɛ: ‘?Min Nyanmiɛn, min Nyanmiɛn, nguɛ ti yɛ a kaci ɔ sin si min-ɔn?’” (Mar. 15:34) Kɛ Zezi seli kɛ Ɲanmiɛn kacili i sin sili i’n, nán kɛ ɔ lafiman i Si i su kun ti ɔ. Ɔ si kɛ Ɲanmiɛn yili i sa i su naan i kpɔfuɛ’m be kun i. Sanngɛ blɛ sɔ nun kusu’n, ɔ ti blɛ kun m’ɔ kwla fa kle kɛ ɔ su kpɔciman Ɲanmiɛn le ɔ. Kɛ Zezi kpannin kɛ: “?Min Nyanmiɛn, min Nyanmiɛn, ngue ti yɛ a kaci ɔ sin si min-ɔn?” yɛ ndɛ ng’ɔ o Jue Mun 22:2 nun’n ɔ kpɛnnin su ɔ.
17. ?Wafa sɛ yɛ ndɛ nga be o Zakari 12:10 ɔ nin Jue Mun 34:21 nun’n be kpɛnnin su ɔ?
17 Mɛsi’n i kpɔfuɛ’m bé wɔ́ i cua. Sanngɛ be su bumɛn i owie’n wie fi. Zakari kannin kɛ Zerizalɛmufuɛ’m bé káci be ɲin sran nga be wɔli i cua’n i wun lɔ. (Zkr. 12:10) Jue Mun 34:21 nun’n, be kɛnnin i kɛ Ɲanmiɛn niɛn i wunnɛn’n i akpɔlɛ’m be ngba su yɛ i owie kun sa su buman. Akoto Zan kannin kɛ ndɛ nga e boboli be su lɛ’n, be kpɛnnin su. Zan klɛli i kɛ: “Sonja’m be nun kun wɔli i nvɛn nun cua, kpɛkuun nzue nin mmoja be fin nun fiteli. Sran ng’ɔ wunnin nun’n yɛ ɔ kannin-ɔn, yɛ ndɛ ng’ɔ kan’n ti nanwlɛ.” Zan kɛnnin i ekun kɛ: “Kɛ ɔ ko yo naan Nyanmiɛn Ndɛ nga be klɛli’n w’a kpɛn su’n ti yɛ ɔ yoli sɔ-ɔ. Be klɛli i kɛ: ‘Be su bu-mɛn i owie’n wie fi.’ Yɛ be kɛn i Nyanmiɛn Ndɛ’n nun lika uflɛ ekun kɛ: ‘Bé nían sran nga be bɔbɔ be wɔli i cua’n.’”—Zan 19:33-37.
18. Ɲanmiɛn nuan ijɔfuɛ’m be kannin kɛ sran dandan’m be asieliɛ’n nun yɛ bé síe Zezi ɔ. ?Wafa sɛ yɛ i sɔ’n kpɛnnin su ɔ?
18 Sran dandan’m be asielɛ’n nun yɛ bé síe Mɛsi’n niɔn. (An kanngan Ezai 53:5, 8, 9 nun.) Nisan i le 14 su’n kɛ lika’n wá sán’n, “bian anyanbeunfuɛ kun bɔ be flɛ i kɛ Zozɛf’n, b’ɔ fin Arimate’n,” ɔ ɔli Pilat wun lɔ ko srɛli Jésus fuɛn’n. Afin Zozɛfu waan ɔ́ kó síe Zezi. Pilati kusu kplinnin su kɛ be fa mɛn i. Matie se kɛ: “Zozɛf fali Jésus fuɛn’n, ɔ fa tannin kpa kun cicili i, naan w’a ko sie i i bɔbɔ i ndia uflɛ bɔ be ko sie i nun’n, b’ɔ maan be kpɛli i yɛbuɛ nun’n i nun. Yɛ ɔ kondoli yɛbuɛ dan kun sieli ndia sɔ’n i anuan’n nun naan w’a wɔ.”—Mat. 27:57-60.
Maan e manman Mɛsi’n m’ɔ ti e Famiɛn’n!
19. ?Wafa sɛ yɛ ndɛ ng’ɔ o Jue Mun 16:10 nun’n kpɛnnin su ɔ?
19 Zoova wá cɛ́n Mɛsi’n i nguan. Davidi klɛli i kɛ: “A su yaciman min ndia nun.” (Jue. 16:10, NW) Nisan i le 16 su’n, bla wie’m be ɔli Zezi i ndia’n su lɔ. Kɛ be wunnin anzi’n ng’ɔ ti ase ndia nun lɔ’n, e kwla se kɛ be wawɛ ka lɛ wanndili be wun! Anzi’n seli bla mun kɛ: “Nán srɛ kun amun. An su kunndɛ Jésus b’ɔ fin Nazarɛt’n bɔ be boboli i waka’n su’n, ɔ cɛnnin, ɔ nun-man wa, an nian kan be sieli i’n yɛ.” (Mar. 16:6) Kɛ i osu cɛli kan’n, yɛle kɛ afuɛ 33 i pantekɔtu nun’n, akoto Piɛli boli ndɛ nga Davidi kɛnnin i Jue Mun 16 nun’n i su kleli sran kpanngban kpa Zerizalɛmu lɔ. Ɔ kannin Davidi i ndɛ seli kɛ: “Kɛ ɔ́ kán ndɛ’n, ɔ boli Klist i cɛnlɛ ndɛ’n su kɛ Ɲanmiɛn w’a yacimɛn i ndia nun lɔ naan i fuɛn’n kplɔ.” (Yol. 2:29, 30, 31, NW) Ɲanmiɛn w’a kplinman su kɛ i Wa’n i fuɛn’n kplɔ. Kpɛkun ɔ yoli like ɲɛnmɛn kun. Yɛle kɛ Zoova mannin Zezi i nguan naan w’a kwla tran ɲanmiɛn su lɔ!—1 Piɛ. 3:18.
20. ?Ndɛ benin yɛ be kɛnnin i sielɛ mɔ Mɛsi’n síe’n, i su ɔ?
20 Kɛ nga Ɲanmiɛn nuan ijɔfuɛ’m be fa kannin’n sa’n, Ɲanmiɛn seli kɛ Zezi ti i Wa. (An kanngan Jue Mun 2:7 ɔ nin Matie 3:17 nun.) Asa ekun’n, sran’m be yili i ayɛ kpɛkun be manmannin i Sielɛ’n. E kusu e manman Zezi sɔ wie andɛ. Yɛle kɛ aklunjuɛ su e kɛn i nin i Sielɛ’n be ndɛ e kle sran mun. (Mar. 11:7-10) Ɔ ka kaan sa’n, Klist wá ‘fú i kakaklolo’n nun naan ɔ́ kó kún sa kpa’n i ti alɛ. Ɔ́ kó kún be bɔ be ti yalɛfuɛ bɔ be bu be lufle’n be ti alɛ. Ɔ́ yó maan sran’m bé yó sa mun be nuan su.’ Blɛ sɔ nun’n, ɔ́ núnnún i kpɔfuɛ’m be kwlaa. (Jue. 2:8, 9; 45:2-7) I sin’n, ɔ́ síe asiɛ wunmuan’n. Sran’m be kwlaa bé trán fɔundi nun yɛ like fi su mianman be. (Jue. 72:1, 3, 12, 16; Eza. 9:5, 6) Kɛ é sé yɛ’n, Zezi Klist m’ɔ ti Zoova i awlɛn su ba’n, w’a bo i sielɛ’n bo ɲanmiɛn su lɔ. Nanwlɛ, ɔ ti e cenjele like kɛ e yo Zoova i Lalofuɛ naan e kan nanwlɛ ndɛ fɛfɛ sɔ mun e kle sran mun!
?Amún tɛ́ su sɛ?
• ?Wafa sɛ yɛ be kpɛli Zezi i bo waka mɔ i sɔnnzɔnfuɛ’m be yacili i lɛ be wanndili ɔ?
• ?Zezi i waka’n su bobolɛ’n i su ndɛ benin yɛ Ɲanmiɛn nuan ijɔfuɛ’m be kannin ɔn?
• ?Ngue ti yɛ amun lafi su kpa kɛ Zezi yɛ ɔ ti Mɛsi mɔ be seli kɛ ɔ́ bá’n niɔn?
[Kosan mun]
[Foto, bue 15]
?Kɛ Zezi wluli Zerizalɛmu lɔ kɛ famiɛn sa’n, Ɲanmiɛn nuan ndɛ benin mun yɛ be kpɛnnin su ɔ?
[Foto, bue 17]
E sa tɛ’m be ti’n, Zezi wuli. Sanngɛ dɔ nga su’n, ɔ su di Famiɛn.
