Maan e fa e wun e mantan Ɲanmiɛn

?Sa wie kwla yo Zoova ya annzɛ ɔ kwla yo i fɛ?

E KWLA tɛ kosan sɔ’n su kɛ ɛɛn. Sannge sɛ e tɛ su sɔ’n nn ɔ fata kɛ e fa kosan uflɛ e usa e wun. Yɛle kɛ: ?E bɔbɔ e aeliɛ’n kwla yo maan Ɲanmiɛn i klun jɔ annzɛ i wla bo? Laa’n, mɛn’n nun ngwlɛlɛ sifuɛ wie’m be waan like nga e yo’n ɔ yoman Ɲanmiɛn i like fi. Be waan sran fi kwlá yoman naan Ɲanmiɛn w’a kaci i akunndan’n, naan i ti’n sa fi kwlá yoman Ɲanmiɛn i ya annzɛ i fɛ. Sanngɛ Biblu’n kanman sɔ. I waan Zoova ɲin kpaman sa nga e yo be’n be su. Kɛ ɔ ko yo naan y’a wun i wlɛ’n, maan e fa e ɲin e sie i ndɛ ng’ɔ o Jue Mun 78:40, 41 nun’n i su e nian.

Jue Mun 78 kan wafa nga Ɲanmiɛn nin laa Izraɛli nvle’n be nantili’n i ndɛ. Kɛ Zoova deli Izraɛli nvle’n kanga nun Ezipti lɔ bali’n, ɔ kunndɛli kɛ be kaci i liɛ mlɔnmlɔn. Ɔ tali be nda kɛ sɛ be fɛ i mmla’m be su titi’n, bé káci i “liɛ klonglo.” Kpɛkun wafa ng’ɔ́ fá bé dí junman naan i klun sa’n w’a kpɛn su’n, ɔ́ yó abonuan. Izraɛlifuɛ’m be kplinnin su, yɛ be nin Zoova be trali aenguɛ. ?Sanngɛ be dili aenguɛ nga be trali’n su lele guɛli i ti nin i bo?—Ezipt Lɔ Tulɛ 19:3-8.

Jue tofuɛ’n seli kɛ: “I wun nga be jasoli aawlɛ flɛnnɛn’n nun lɔ’n ɔ sɔnnin.” (Ndɛ mma 40) Ndɛ mma ng’ɔ bɛ i sin’n kan gua su kɛ: “Be kɛnnin i be niannin ekun.” (Ndɛ mma 41) Maan e sie i nzɔliɛ kɛ ndɛ nga jue tofuɛ’n kannin’n, ɔ kle kɛ ɲin kekle yolɛ’n ɔ kacili be ajuin. Kɛ Ɲanmiɛn deli be Ezipti lɔ mɔ be juli aawlɛ flɛnnɛn’n nun lɔ’n, w’a cɛman yɛ be boli be aeliɛ tɛ sɔ’n i bo ɔ. Izraɛlifuɛ’m be ijɔli be konviabo be kannin Ɲanmiɛn i wun ndɛ tɛtɛ. Be waan be lafiman su kɛ Ɲanmiɛn kwla nian be lika. (Kalɛ 14:1-4) Be nga be kaci Biblu’n aniɛnaniɛn’m be nun’n, be fluwa kun waan ndɛ nga be kacili i kɛ ‘i wun nga be jasoli’n,’ be kwla kaci i ekun kɛ ‘be keteli be awlɛn’n,’ annzɛ “be seli Ɲanmiɛn kɛ ‘cɛcɛ.’” Sanngɛ kɛ kekle’n ko tɔ be su m’ɔ ko yo be nsisɔ’n, Zoova i aunnvuɛ silɛ’n ti’n ɔ yaci be wun sa cɛ be. Kusu kɛ ɔ ko yaci ko cɛ be’n, kpɛkun b’a sa be sin be ɲin kekle aeliɛ sɔ’n nun ekun. Ɔ maan be aeliɛ sɔ’n kali be nun.—Jue Mun 78:10-19, 38.

?Kɛ Izraɛlifuɛ’m be kacikaci kɛ lolowlɛ sa’n, ɔ yoli Zoova sɛ? Ndɛ mma 40 waan: “Be klɔklɔli i lika kee sɔ’n nun lɔ kpa.” Biblu’n uflɛ kacili ndɛ sɔ’n kɛ “be boli i wla.” Fluwa kun m’ɔ kan Biblu’n i ndɛ’n, ɔ yiyi nun kɛ: “Ndɛ sɔ’n i bo’n yɛle kɛ Ebre’m be aeliɛ’n ɔ yoli kɛ bakan ɲin keklefuɛ kun i aeliɛ’n m’ɔ bo i si nin i nin be wla’n sa.” Ɔ maan Izraɛlifuɛ’m be ɲin kekle’n ti’n “be klɔklɔli i b’ɔ ti Izraɛl Nyanmiɛn’n.”—Ndɛ mma 41.

?Jue sɔ’n i nun ndɛ’n kle e sɛ? Yɛle kɛ Zoova i sufuɛ’m be ndɛ lo i kpa yɛ ɔ yimɛn i sa be su ngbɛnngbɛn sa. Kɛ e wun i sɔ liɛ’n, e wla gua ase. Kusu’n, ɔ ti cinnjin kpa kɛ e wun i wlɛ kɛ sa nga e yo be’n be kwla yo Zoova i fɛ annzɛ be kwla yo i ya. ?Kɛ mɔ e si sɔ’n ti’n wafa sɛ yɛ ɔ fata kɛ e nanti ɔ? ?I sɔ’n yo maan e kunndɛ kɛ é yó like ng’ɔ ti kpa’n?

Nán maan e yo sa tɛtɛ naan Zoova i wla bo i wun. Sanngɛ maan e yo sa kpa naan i klun jɔ. I sɔ yɛ ɔ seli i sufuɛ mun kɛ be yo ɔ. I waan: “Min wa, fa akunndan nanti. Sɛ a fa akunndan nanti’n, n klun jɔ́.” (Nyanndra Mun 27:11) Like dan kpafuɛ nga e kwla yo e man Zoova’n, yɛle kɛ maan e yo naan i klun jɔ.

[Ndɛ kwle, bue 32]

Like dan kpafuɛ nga e kwla yo e man Zoova’n, yɛle kɛ maan e yo naan i klun jɔ.