?Ɔ fata kɛ ba’m be suan Ɲanmiɛn i su like?

“Ɲanmiɛn sulɛ wafa nga be o lɛ andɛ’n, be yoman naan y’a klo e wun. Be yo maan e kpɔ e wun.”—JONATHAN SWIFT, Ɔ TI ANGLE BIAN. Ɔ TI FLUWA KLƐFUƐ.

BIAN sɔ’n kannin ndɛ ngalɛ’n i afuɛ ya nɲɔn tra su yɛ. Sanngɛ lele nin andɛ’n, sran sunman be te bu i nanwlɛ. I sɔ’n ti’n, wie mun bɔbɔ be waan ɔ fataman kɛ be man siɛ nin niɛn’m be atin naan be kan Ɲanmiɛn ndɛ be kle be mma mun. Afin be bu i kɛ ba nga be talɛ nun’n, be kle be Ɲanmiɛn ndɛ’n, be yoman kpa.

?Amun bu i sɛ? ?Ndɛ nga bé bá lɛ’n, beninfuɛ’n yɛ ɔ ti nanwlɛ ɔ?

● Ɔ fataman kɛ be man siɛ nin niɛn’m be atin kɛ be kle be mma’m be Ɲanmiɛn ndɛ.

● Maan siɛ nin niɛn’m be minndɛ kɛ ba’m be ɲin ka naan b’a kan Ɲanmiɛn i ndɛ b’a kle be.

● Kɛ ba’m be te yo kanngan’n, ɔ fata kɛ be si nin be nin be kan Ɲanmiɛn i su like nga be si i’n, be kle be. Sanngɛ sɛ ba’m be ɲin’n, maan be se be kɛ be bɔbɔ be fɛ i wun ajalɛ.

● Wafa nga siɛ nin niɛn’m be fa su Ɲanmiɛn’n, yɛ ɔ fata kɛ ba’m be fa su i wie ɔ. Nán maan be usa i nun ndɛ fi.

?Ɲanmiɛn i su like suanlɛ’n saci ba mun?

Siɛ annzɛ niɛn ng’ɔ klo i wa’n, ɔ kwlá yomɛn i tɛ. ?Sanngɛ sakpasakpa naan be nga be waan ɔ fataman kɛ be kan Ɲanmiɛn ndɛ’n be kle ba mun’n, be ndɛ’n ti nanwlɛ? I afuɛ blu tra su yɛ, fluwa sifuɛ’m be fali be ɲin sieli i ba nga be si nin be nin’m be kannin Ɲanmiɛn i ndɛ kleli be’n, be su. ?Ngue yɛ be sieli i nzɔliɛ ba’m sɔ’m be lika ɔ?

Fluwa sifuɛ’m be wunnin i kɛ Ɲanmiɛn ndɛ’n saciman be. Sanngɛ ɔ yo be kpa. I sɔ yɛ be klɛli i zronali kun nun afuɛ 2008 nun ɔn. Be klɛli i kɛ: “Kɛ siɛ nin niɛn’m be kan Ɲanmiɛn ndɛ’n be kle be mma mun’n, ɔ yo maan be nin be be afiɛn’n sɛ.” Be kɛnnin i ekun kɛ: “Ɲanmiɛn i su like suanlɛ’n, ɔ nin mɛn nun ninnge’m be wlɛ wunlɛ’n, ɔ ti cinnjin kpa man ba mun. Yɛ ɔ kwla uka be kpa awlo lɔ.” (Social Science Research) * Be flɛ i kɛ ndɛ kunngba’n yɛ Zezi Klist kannin ɔn. Ɔ seli kɛ: “Be nga be si kɛ be di Nyanmiɛn ninnge’m be yalɛ’n, be liɛ su ti ye.”—Matie 5:3.

?Yɛ kɛ be se kɛ maan siɛ nin niɛn’m be minndɛ kɛ ba’m be ɲin ka naan b’a kan Ɲanmiɛn ndɛ’n b’a kle be’n, ɔ ti su? Be nga be kan sɔ’n, be wla fi ndɛ cinnjin kun su. Yɛle kɛ ba kanngan mun be siman like fi. Ɔ fata kɛ be kle be like. I sɔ trɔ yɛ ɔ o siɛ nin niɛn’m be ti su ɔ. Yɛle kɛ be bɔbɔ be kwla kle ba’m be ngwlɛlɛ. Annzɛ be kwla yaci gua su lɔfuɛ’m be nun naan be saci be.

?Ngue yɛ maan i sɔ’n kwla yo ye ɔ?

Kɛ ɔ fɛ i laa lele fa ju andɛ’n, Ɲanmiɛn sulɛ wafa’m be yo maan sran’m be kpɔ be wun. ?Ɔ maan, kɛ ɔ ko yo naan Ɲanmiɛn sulɛ’n ti’n, ba’m b’a kpɔman be wiengu kɛ nga bian nga e kɛnnin i ndɛ i klikli nun’n fa kannin’n sa’n, ngue yɛ siɛ nin niɛn’m be kwla yo ɔ? ?Wafa sɛ yɛ be kwla kle be mma’m be like kpa naan b’a klo be wiengu ɔ?

Sɛ be si kosan nsan nga’m be su tɛlɛ’n, i sɔ’n kwlá úka be. Yɛle kɛ: (1) ?Ɲanmiɛn i su like benin yɛ ɔ fata kɛ ba’m be si i ɔ? (2) ?Wan yɛ ɔ fata kɛ ɔ kle be like ɔ? (3) ?Wafa sɛ yɛ be kwla kle ba’m be like kpa ɔ?

[Ja ngua lɛ ndɛ’n]