?Wan yɛ ɔ fata kɛ ɔ kle ba mun Ɲanmiɛn i su like ɔ?

“Sran b’ɔ suan like’n ti-man dan tra-man sran b’ɔ kle i like’n, sanngɛ sran kwlaa b’ɔ wie i like’n suan’n, ɔ yo kɛ sran b’ɔ kle i like’n sa.”—LIK 6:40.

SIƐ nin niɛn wie’m be waan be kwlá kleman be mma mun Ɲanmiɛn i su like. Be waan be siman fluwa annzɛ kusu be siman Ɲanmiɛn ndɛ naan b’a fa kle be mma mun kɛ ɔ fata’n sa. Ɔ maan be kunndɛ kɛ be osufuɛ wie annzɛ Ɲanmiɛn junman difuɛ wie yɛ ɔ uka be mma mun i sɔ liɛ’n nun ɔn.

?Sanngɛ, wan yɛ ɔ nin fata kɛ ɔ kle ba mun Ɲanmiɛn su ndɛ naan ɔ kle be atin ng’ɔ ti kpa’n niɔn? Amun nian ndɛ nga Biblu’n kan’n naan amun fa sunnzun nga sa sifuɛ’m be kan’n.

Siɛ’n i junman liɛ’n

Like nga Biblu’n kle’n: “Nja mun, amun kusu, nán an yo sa b’ɔ kun amun mma’m be ya, sanngɛ an ta be kpa e Min’n liɛ’n su, yɛ an tu be fɔ, an kle be ngwlɛlɛ.”—Efɛzfuɛ Mun 6:4.

Ndɛ nga sa sifuɛ’m be kan’n: ?Kɛ Ɲanmiɛn sulɛ’n yo siɛ’m be cinnjin’n, ye benin yɛ be ɲɛn i nun ɔn? Fluwa kun mɔ be klɛli i afuɛ nga be flɛ i 2009 nun’n waan: “Siɛ ng’ɔ nin sran uflɛ be su Ɲanmiɛn likawlɛ titi’n, ɔ si i mma’m be ta kpa. Ɲanmiɛn sulɛ’n yo maan sran’m be nian be wiengu lika, kpɛkun ɔ yo maan sran’m be nantilɛ nun’n, be nian be wun su. Yɛ ɔ kle be wafa ng’ɔ fata kɛ be nanti’n.”—Fathers’  Religious Involvement and Early Childhood Behavior.

Biblu’n kan tin su kɛ junman nga siɛ’n di i ba’m be talɛ’n nun’n, ɔ ti cinnjin kpa. (Nyanndra Mun 4:1; Kolɔsfuɛ Mun 3:21; Ebre Mun 12:9) ?Sanngɛ andɛ’n, i sɔ ndɛ’n te yo cinnjin? Afuɛ nga be flɛ i 2009 nun’n, klɔ nga be flɛ i Floridi i su inivɛsite’n yili fluwa kun. Fluwa sɔ’n nun’n, be kannin wafa nga siɛ’n kwla ɲan ta i mma’m be su’n i ndɛ. Sa sifuɛ sɔ’m be kannin kɛ ba nga be si’m be fa wun wlɛ i be talɛ’n nun’n, be timan kɛ ba kun nga’m be sa. Afin be liɛ’n, be si sran auunvuɛ yɛ be buman be wun kɛ be timan sran. Be nun yasua kanngan’m be aeliɛ’n ti kpa, yɛ ba bla’m be kusu be ɲin kan ase. Nanwlɛ, Biblu’n i ndɛ ng’ɔ kan’n te yo cinnjin.

Junman cinnjin nga niɛn’n di’n

Like nga Biblu’n kle’n: “Fɔ nga ɔ nin tu wɔ’n, nán se kɛ a ti-man.”—Nyanndra Mun 1:8.

Ndɛ nga sa sifuɛ’m be kan’n: Afuɛ nga be flɛ i 2006 nun’n, fluwa kun seli kɛ blɛ nga niɛn’m be fa naan be nin be mma kanngan’m b’a koko yalɛ naan b’a nian be lika’n, ɔ sɔnnin tra siɛ’m be liɛ’n lele tratra su. Be wun i sɔ liɛ’n nvle kpanngban nun. (Handbook of Child Psychology) Kɛ niɛn’m be nin ba mun o trilili kɛ ngalɛ’n sa’n, kɛ bé fá ɲín’n niɛn’n i ndɛ ng’ɔ kan’n ɔ nin i nzuɛn’n be ɲan ta be su.

Kɛ siɛ’n nin niɛn’n be bo yo kun mɔ be fa Ɲanmiɛn i su ndɛ nanwlɛ’n be kle be mma mun’n, ninnge kpakpa nɲɔn yɛ be fa man be lɛ ɔ. Like klikli’n yɛle kɛ ba’m be nin be Si m’ɔ o ɲanmiɛn su lɔ’n be afiɛn’n kwla sɛ kpa. I sɔ liɛ’n úka be be mɛn dilɛ’n nun. I nɲɔn su’n yɛle kɛ ba’m bé súan wafa ng’ɔ fata kɛ siɛ nin niɛn’m be bo yo kun naan b’a kwla yo ninnge nga be ti cinnjin’n. (Kolɔsfuɛ Mun 3:18-20) Kannzɛ sran uflɛ wie’m be kwla uka siɛ nin niɛn mun’n, sanngɛ ba’m be talɛ’n i bo’n taka siɛ nin niɛn’n be ti su. Be yɛ ɔ fata kɛ be kle ba mun Ɲanmiɛn i ndɛ’n, ɔ nin wafa nga Ɲanmiɛn kunndɛ kɛ be siesie awlobo’n niɔn.

?Sanngɛ wafa sɛ yɛ ɔ fata kɛ siɛ nin niɛn’m be kle ba mun Ɲanmiɛn ndɛ’n niɔn? ?Ajalɛ’m be nun kpafuɛ mɔ be kwla yo ye man be’n yɛle benin?