Maan e “fɔnvɔ be nga be o sɛ nun’n mun”

“Anannganman guali n su ngo kɛ [...] n wa fɔnvɔ be nga be o sɛ nun’n mun.”​—EZA. 61:1, 2.

1. ?Wafa sɛ yɛ Zezi ukali be nga be o afɛ nun’n niɔn? ?Ngue ti yɛ ɔ yoli sɔ ɔ?

 ZEZI KLIST seli kɛ: “Min aliɛ’n yɛlɛ sran ng’ɔ sunmannin min’n i klun sa’n yolɛ nin junman ng’ɔ mannin min’n i bo guagualɛ.” (Zan 4:34) Kɛ Zezi dí junman nga i Ɲanmiɛn fa wlɛli i sa nun’n, ɔ yili i Si’n i aeliɛ mɔ be yo ɲɛnmɛn’n be nglo. Zoova i aeliɛ ɲɛnmɛn sɔ’m be nun kun yɛle i sran klolɛ dan’n. (1 Zan 4:7-10) Like ng’ɔ kle kɛ Zoova klo sran mun’n i kun yɛle kɛ ɔ fɔnvɔ be. I sɔ yɛ akoto Pɔlu kannin ɔn. I waan Zoova “ti Nyanmiɛn kun b’ɔ jran e sin [ɔ fɔnvɔ e] sa’n kwlaa nun.” (2 Kor. 1:3) Klolɛ kunngba’n yɛ Zezi fa kloli sran mun ɔn. I sɔ nun’n, ɔ yiali Ɲanmiɛn nuan ndɛ nga be klɛli i Ezai fluwa nun’n, i nuan. (An kanngan Ezai 61:1, 2 nun.) * I nun nga Zezi ɔli Nazarɛti Ɲanmiɛn ndɛ suanlɛ nin i srɛlɛ sua nun lɔ’n, ɔ kanngannin Ezai i ndɛ sɔ’n. Yɛ ɔ  seli kɛ i bɔbɔ ndɛ yɛ Ezai kɛnnin i lɛ ɔ. (Lik 4:16-21) Kɛ ɔ fa boli i junman’n i bo lele m’ɔ́ fá gúɛ i bo’n, ɔ fɔnvɔli be nga be o afɛ nun’n. Ɔ wlali be fanngan, yɛ ɔ yoli maan be wla guali ase.

2, 3. ?Ngue ti yɛ ɔ ti cinnjin kɛ be kwlaa nga be ti Klist i sɔnnzɔnfuɛ’n, be fɔnvɔ sran mun kɛ i sa ɔ?

² Ɔ fata kɛ be kwlaa nga be ti Zezi i sɔnnzɔnfuɛ’n, be yo kɛ i sa. Yɛle kɛ be fɔnvɔ be nga be o afɛ nun’n. (1 Kor. 11:1) Pɔlu seli kɛ: “An cici amun wiengu wla maan ɔ yo sran.” (1 Tɛs. 5:11) E blɛ liɛ nga nun yɛ ɔ nin i fata kɛ e fɔnvɔ sran’m be kpa ɔ. Afin ‘lika’n w’a yo kekle.’ (2 Tim. 3:1) Asa ekun’n, mɛn wunmuan’n nun’n sran kpa’m be fɛ afin be o sran mɔ be aeliɛ’n nin be nuan nun ndɛ’n ɔ kpɔtɔ sran awlɛn’n, be afiɛn.

³ Kɛ nga Biblu’n fa kannin’n sa’n, mɛn tɛ nga i awieliɛ blɛ nga nun’n, sran’m be sunman lika ‘be bu be bɔbɔ be wun akunndan, be ti sika klofuɛ, be di be nuan, be tu be wun, be saci Nyanmiɛn wun, be nyin yi-man be si nin be nin mun, be si-man ye, be nyin yi-man Nyanmiɛn, be klo-man sran, be yo be sa-a be yaci cɛ-man, be di abla, be si-man be wun su nian, be ti wlɛ, be kpɔ sran kpa mun, be yi be janvuɛ mun man, be yo like-ɔ be bu-mɛn i akunndan, be di tutre, be klo mɛn dilɛ’n tra Nyanmiɛn.’ Asa ekun’n, kɛ lika’n cɛ́n m’ɔ́ sán’n, ‘sran nga be klun yo wi bɔ be ti gblɛfuɛ’n, be sa tɛ nga be yo’n i tɛ’n ɔ tra laa liɛ’n.’​—2 Tim. 3:2-4, 13.

4. ?Lika’n ti sɛ andɛ?

⁴ Sɛ lika’n ti kɛ ngalɛ’n sa’n, ɔ boman e nuan. Afin Ɲanmiɛn Ndɛ’n kɛn i weiin kɛ “klunwifuɛ’n sie mɛn wunmuan’n.” (1 Zan 5:19) Kusu “mɛn” nun ninnge’m be wie yɛle politiki anuannzɛ mun, nin Ɲanmiɛn sulɛ wafa mun, nin aata dilɛ anuannzɛ mun, ɔ nin ninnge nga klunwifuɛ’n sin be lika tru i akunndan tɛtɛ mun. Ɔ maan kɛ Biblu’n kɛn i kɛ “sran ng’ɔ sie mɛn nga’n” yɛle mmusu’m be si Satan naan i yɛ ɔ ti “mɛn nga i min’n,” ɔ buaman ato. (Zan 14:30; 2 Kor. 4:4) Kɛ mɔ Satan w’a fa ya dan ti’n, kɛ lika’n cɛ́n m’ɔ́ sán’n nn mɛn’n yó kekle kɔ́. Ɔ si kɛ i cɛn’n w’a sɔnman kun. (Ngl. 12:12) E si kɛ blɛ nga Ɲanmiɛn mannin Satan nin i mɛn tɛ nga’n ɔ su wa wie. Naan atin nga Zoova le i sie nglo nin asiɛ’n i su akplowa nga Satan kpɛli’n, i ti kpɛ́. Nanwlɛ i sɔ’n fɔnvɔ e dan!​—Bob. ndɛ tre 3; Zɔb ndɛ tre 2.

Be bo jasin fɛ’n asiɛ’n wunmuan’n su

5. ?Wafa sɛ yɛ jasin fɛ’n i bolɛ’n, i su ndɛ nga Zezi kannin’n su kpɛn su mɛn’n i awieliɛ blɛ nga nun ɔn?

⁵ Blɛ kekle nga nun’n, ndɛ nga Zezi kannin’n su kpɛn su. Ɔ seli kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.” (Mat. 24:14) Be su bo Ɲanmiɛn Sielɛ’n i jasin fɛ’n asiɛ wunmuan’n su kɛ nga Zezi fa kannin’n sa cɛ. Andɛ’n, Zoova i Lalofuɛ 7.500.000 tra su mɔ be  o asɔnunasɔnun 107.000 tra su nun’n, yɛ be di i sɔ junman’n niɔn. Be yo kɛ Zezi mɔ jasin ng’ɔ boli’n taka Ɲanmiɛn Sielɛ’n su’n sa. (Mat. 4:17) Jasin fɛ sɔ mɔ e bo’n, ɔ fɔnvɔ be nga be o afɛ nun’n kpa. Afuɛ nɲɔn cɛ nga be sinnin koko yɛ’n nun’n, be yoli sran lele 570.601 be batɛmu naan b’a kaci Zoova i Lalofuɛ!

6. ?Wafa sɛ yɛ amun bu jasin fɛ’n i trɛlɛ m’ɔ trɛ kɔ i ɲrun’n niɔn?

⁶ Dɔ nga su’n, Zoova i Lalofuɛ’m be kaci Biblu’n i akua mun aniɛnaniɛn 500 tra su nun, yɛ be fa man sran mun. Kɛ Ɲanmiɛn yili mɛn’n lele’n, i sɔ sa’n nin a juman asiɛ’n su le! Kannzɛ Satan yɛ ɔ sie mɛn nga’n, sanngɛ Zoova i anuannzɛ’n i bue ng’ɔ o asiɛ’n su wa’n, ɔ o lɛ, ɔ di junman yɛ ɔ trɛ kɔ. I sɔ liɛ’n ti abonuan. Sɛ Ɲanmiɛn i wawɛ’n m’ɔ kwla kpa’n ɔ klemɛn i atin yɛ ɔ suɛnmɛn i bo’n, nn i sɔ liɛ’n kwlá yoman ye. Kɛ mɔ Zoova i Lalofuɛ’m be bo jasin fɛ’n asiɛ wunmuan’n su’n ti’n, sran nga be o afɛ nun mɔ be sɔ Ɲanmiɛn Sielɛ’n i jasin nun’n, be ɲan fɔnvɔlɛ kunngba nga Zoova i sufuɛ’m be ɲɛn i’n wie.

E niaan Klistfuɛ’m be kwla fɔnvɔ e

7. (a) ?Ngue ti yɛ e kwlá lafiman su kɛ dɔ nga su’n, Zoova yí afɛ kwlaa ng’ɔ o e su’n niɔn? (b) ?Ngue yɛ maan e si kɛ sɛ be kle e yalɛ’n e kwla jran kekle ɔ?

⁷ Mɛn tɛ yɛ’n nun’n, e si kɛ saan kekle tɔ́ e su. Sanngɛ e kwlá lafiman su kɛ dɔ nga su’n, Ɲanmiɛn yí afɛ kwlaa ng’ɔ o e su’n. Afin ɔ fata kɛ e minndɛ lele naan ɔ nunnun mɛn tɛ nga ka. Asa ekun’n, be seli kɛ bé klé e ɲrɛnnɛn naan i sɔ’n yó naan y’a kle kɛ e kpɔciman Zoova naan e suɛn i sielɛ’n i bo. (2 Tim. 3:12) E Si m’ɔ o ɲanmiɛn su lɔ’n suan e bo. I ti’n, e kwla yo kɛ laa Klistfuɛ nga be kpali be sieli be ngunmin mɔ be o Tɛsaloniki lɔ’n be sa. Yalɛ nga be kleli be’n nin ɲrɛnnɛn nga be wunnin i’n, i kwlaa sɔ’n nun’n, be trali be anwlɛn be lafili Ɲanmiɛn su.​—An kanngan 2 Tɛsalonikfuɛ Mun 1:3-5 nun.

8. ?Biblu’n nun ndɛ benin yɛ be kle kɛ Zoova fɔnvɔ i sufuɛ mun ɔn?

⁸ Ɔ ti weiin kɛ Zoova fɔnvɔ i sufuɛ mun sakpa. I wie yɛle i nuan ijɔfuɛ Eli i liɛ’n. Kɛ Famiɛn bla Zezabɛli waan ɔ́ kún i’n, Eli i sa sin bubuli i kpɛkun ɔ wanndili. Ɔ seli bɔbɔ kɛ ɔ kunndɛ kɛ ɔ́ wú. Kɛ ɔ yoli sɔ’n Zoova w’a tutumɛn i. Sanngɛ ɔ fɔnvɔli i yɛ ɔ wlɛli i yakpa naan w’a yacimɛn i Ɲanmiɛn nuan ijɔfuɛ junman’n i dilɛ. (1 Fam. 19:1-21) Blɛ kun nun’n, wafa nga Klistfuɛ klikli’m be asɔnun’n ɔli i ɲrun’n, ɔ kle ekun kɛ Zoova fɔnvɔ i sufuɛ mun. Biblu’n waan blɛ sɔ’n nun’n, “asɔnunfuɛ’m bɔ be o Zide, nin Galile, ɔ nin Samari mɛn wunmuan’n nun lɔ’n, be lɛ alaje, yɛ asɔnun’n kɔ i nyrun.” Asa ekun’n, “kɛ bɔ asɔnunfuɛ’m be nyin yi e Min’n bɔ Nyanmiɛn Wawɛ’n jran be sin ti’n, be trɛ.” (Yol. 9:31) E kusu, kɛ “Nyanmiɛn Wawɛ’n jran” e sin’n, ɔ yo e fɛ kpa!

9. ?Ngue ti yɛ Zezi i su like suanlɛ’n kwla fɔnvɔ e ɔ?

⁹ E mɔ e ti Klistfuɛ’n, Zezi Klist i su like nga e suannin ɔ nin i ajalɛ’n su falɛ’n ɔ fɔnvɔ e. Zezi seli kɛ: “Amun kwlaa bɔ an sua trɔ bɔ amu’an fɛ’n, an bla min sin, ń síke amun, yɛ amún dé wunmiɛn. An fa amun ti wla n kɔmin su waka’n bo, yɛ an fa min nzuɛn’n su, afin n ti sran wɛtɛɛ yɛ min anwlɛn’n ti flɔlɔ. Yɛ amun wla wá gúa ase. Afin n kɔmin su waka’n i sualɛ yo fɛ, yɛ n trɔ’n yo-man nɔnnin.” (Mat. 11:28-30) Wafa nga Zezi yili i klun ufue i nglo sran’m be lika’n, ɔ nin wafa ng’ɔ nin be trannin klolɛ su’n, kɛ e suan su like mɔ e yo kɛ i sa’n, i sɔ’n uka e kpa naan sɛ wie nun ɔn e akunndan sanngan’n, y’a wun e wun fɛ kasiɛn su.

10, 11. ?Asɔnun’n nun’n, wan yɛ ɔ kwla fɔnvɔ i wiengu mun ɔn?

¹⁰ E niaan Klistfuɛ’m be kwla fɔnvɔ e wie. Maan e bu wafa nga asɔnun kpɛnngbɛn’m be uka be nga kekle o be su’n i akunndan kan e nian. Zezi i sɔnnzɔnfuɛ Zaki klɛli i kɛ: “Sɛ amun nun wie wunnɛn yo i ya’n [yɛle kɛ sɛ i Ɲanmiɛn sulafilɛ’n su kan ase’n], maan ɔ flɛ asɔnun kpɛnngbɛn mun. Maan [...] be srɛ Nyanmiɛn kɛ ɔ yo i juejue.” ?Sɛ be yo sɔ’n i bo’n gúa sɛ? “Nyanmiɛn su bɔ be lafi’n ti’n, Nyanmiɛn srɛlɛ sɔ’n maan tukpacɛfuɛ sɔ’n nyɛ́n i ti, yɛ e Min’n maan ɔ́ jáso. Yɛ sɛ ɔ yoli sa  wie’n, ɔ́ yáci cɛ́ i.” (Zak 5:14, 15) Sanngɛ nán asɔnun kpɛnngbɛn’m be ngunmin yɛ be kwla fɔnvɔ e ɔ.

¹¹ Blɛ sunman nun’n, kɛ bla’m be kan be klun ndɛ kle be wiengu bla mun’n, yɛ be wun be wun fɛ ɔ. Bla kpɛnngbɛn mɔ be si sa kpa’n be li yɛ be kwla man talua’m be afɔtuɛ kpakpa ɔ. Atrɛkpa’n, sa nga be tɔli talua’m be su mɔ i ti yɛ ɔ fata kɛ be man be afɔtuɛ’n b’a tɔ aniaan bla kpɛnngbɛn sɔ’m be su le. Aniaan bla kpɛnngbɛn be su mɔ bé fá síe i aniaan bla talua’m be nuan bo’n, ɔ nin be nzuɛn kpa’n, ɔ́ kwlá úka talua’m be kpa. (An kanngan Tit 2:3-5 nun.) Kɛ nga y’a fa wun i lɛ’n, asɔnun’n nun’n, asɔnun kpɛnngbɛn nin aniaan onga’m be kwla “wla be nga be anwlɛn sɔ-man’n be yakpa.” I sɔ kusu yɛ ɔ fata kɛ be yo ɔ. (1 Tɛs. 5:14, 15) I ti’n, maan ɔ tran e klun titi kɛ Ɲanmiɛn fɔnvɔ e sa kwlaa nun naan ‘fɔnvɔlɛ kunngba ng’ɔ fa fɔnvɔ ye’n, e kusu y’a [kwla] fa fɔnvɔ wie mun sa kwlaa b’ɔ tɔ be su’n i nun.’​—2 Kor. 1:4.

12. ?Ngue ti yɛ ɔ ti cinnjin kpa kɛ e ɔ aɲia’m be bo ɔ?

¹² Like cinnjin kpa kun mɔ e kwla yo naan y’a ɲan fɔnvɔlɛ’n, yɛle asɔnun aɲia’m be bo kɔlɛ’n. Biblu’n i nun ndɛ nga e ti i lɔ’n wla e fanngan. Biblu’n waan Zid nin Silasi “be kannin ndɛ kpanngban, be mannin be niaan’m be afɔtuɛ, be wlali be fanngan.” (Yol. 15:32) Ka naan aɲia’n w’a bo i bo’n yɛ kɛ aɲia’n ko wie’n, asɔnun’n nunfuɛ’m be koko yalɛ be wla be wiengu fanngan. I sɔ’n ti’n, sɛ ɲrɛnnɛn wie o e su’n, ɔ flunman kɛ e fa e wun e mantan e niaan Klistfuɛ mun. Afin sɛ e sin e ngunmin’n, ɲrɛnnɛn sɔ’n kwla tin e su. (Nya. 18:1) Maan e fa afɔtuɛ yɛ mɔ Ɲanmiɛn maan akoto Pɔlu mannin e’n i su. I waan: “Maan e bu e wiengu’m be akunndan e wla be fanngan naan be klo be wun yɛ be yo sran ye. Nán maan e yaci yialɛ’n kɛ sran wie’m be yo’n sa. Sanngɛ maan e yia e tu e wun fɔ. Siɛn’n bɔ an wun kɛ e Min’n i cɛn’n su mantan’n, an yo i sɔ tra su.”​—Ebr. 10:24, 25.

Ɲanmiɛn Ndɛ’n fɔnvɔ e

13, 14. ?Wafa sɛ yɛ Ɲanmiɛn Ndɛ’n kwla fɔnvɔ e ɔ?

¹³ Sɛ be yoli e batɛmu o, annzɛ sɛ blɛ li yɛ e su suan Ɲanmiɛn nin i klun sa’n be su like o, Ɲanmiɛn Ndɛ’n kwla fɔnvɔ e kpa. Pɔlu klɛli i kɛ: “Ndɛ nga be klɛli be laa’n, be klɛli i kwlaa sɔ’n kɛ bé fá klé e ngwlɛlɛ naan Nyanmiɛn fɛ i ndɛ sɔ’n wla e fanngan, naan e tra ye anwlɛn e fa e wla’n guɛ i su.” (Rɔm. 15:4) Biblu’n fɔnvɔ e yɛ ɔ yo naan y’a ‘nyan like bɔ e kwla fa di junman kwlaa ng’ɔ ti kpa’n.’ (2 Tim. 3:16, 17) Biblu’n ɔ nin Biblu’n i akua’m be nun kannganlɛ’n ɔ nin be nun like suanlɛ’n ti’n, e wun ninnge nga Ɲanmiɛn waan ɔ́ yó bé’n, be wlɛ kpa. Kpɛkun i sɔ’n yo maan e wla o like kpa kun su. ?Kɛ mɔ fluwa sɔ’m be fɔnvɔ e mɔ be yo e ye dan sɔ’n ti’n, nán e wun ukalɛ cɛ yɛ ɔ ti mɔ e fa be e uka e wun ɔn?

¹⁴ Zezi fali Biblu’n kleli sran’m be like, yɛ ɔ  fa fɔnvɔli be. I sɔ’n nun’n, ɔ kle e ajalɛ kpa. Kɛ be kunnin i mɔ Ɲanmiɛn cɛnnin i’n, m’ɔ fiteli i sɔnnzɔnfuɛ nɲɔn be ɲrun’n, ɔ ‘yiyili Nyanmiɛn Ndɛ nga be klɛli’n nun kleli be.’ I sɔ m’ɔ yoli’n ɔ yoli i sɔnnzɔnfuɛ sɔ’m be fɛ dan. (Lik 24:32) Akoto Pɔlu fali Zezi i ajalɛ kpa sɔ’n su. Ɔ nin sran mun ‘be kannin Nyanmiɛn Ndɛ nga be klɛli’n i wun ndɛ.’ Bere lɔ’n, i ndɛ tiefuɛ’m “be fali Nyanmiɛn ndɛ’n su ndɛndɛ, cɛn kwlaa be fa Nyanmiɛn ndɛ nga be klɛli’n nin ndɛ nga Pɔl kan kle be’n, be sunnzun nian sɛ ɔ ti kun o.” (Yol. 17:2, 10, 11) I sɔ’n kle e kɛ ɔ fata kɛ e kanngan Biblu’n nun cɛn kwlakwla naan e kanngan Biblu’n i akua’m be nun wie. Afin blɛ kekle nga nun’n, be cici e wla. Yɛ be yo maan e fa e wla e guɛ i like cinnjin kpa kun su.

Wafa uflɛ nga e kwla fɔnvɔ e niaan mun’n

15, 16. ?Ninnge benin wie mun yɛ e kwla yo e fa uka e niaan mun yɛ e fa fɔnvɔ be ɔ?

¹⁵ Ninnge nga e kwla yo e fa uka e niaan mun yɛ e fa fɔnvɔ be’n, be sɔnnin. E kwla ko di gua e man aniaan nga b’a yo kpɛnngbɛn’n annzɛ be wun sanndiman be’n. Annzɛ sɛ be le fie’n, e kwla ko uka be. Asa ekun’n, e kwla uka be be awlo lɔ junman’m be dilɛ’n nun. I sɔ mɔ é yó’n, ɔ́ klé kɛ be ndɛ lo e. (Fil. 2:4) Wie liɛ kusu’n, e niaan’m be sran klolɛ’n ɔ nin yakpa mɔ be ti’n, ɔ nin be Ɲanmiɛn sulafilɛ’n nin ninnge nga be si be yo’n be ti’n, e kwla yo be mo.

¹⁶ E kwla yo like kun ekun e fa fɔnvɔ be nga b’a yo oke’n. Yɛle kɛ e kwla ko nian be osu, kpɛkun kɛ bé kán sa nga be wunnin be Zoova i sulɛ’n nun’n ɔ nin wafa nga Ɲanmiɛn rali be su’n i ndɛ’n, maan e sie e su. Ndɛ nga bé kán’n, ɔ́ wlá e fanngan yɛ ɔ́ fɔ́nvɔ e dan. E nin be e kwla kanngan Biblu’n annzɛ Biblu’n i akua wie’m be nun likawlɛ. Annzɛ kusu e kwla nian fluwa nga e suan be nun like e aɲia’m be bo lɔ’n nun likawlɛ. Ɔ kwla yo Sasafuɛ Tranwlɛ’n i nun like nga é wá súɛn i le mɔcuɛ nga e ko niannin be osu nun’n. Annzɛ fluwa nga é wá súan nun like Asɔnun’n i Biblu’n nun like suanlɛ aɲia’n i bo lɔ’n. Asa ekun’n, e nin be e kwla nian flimu nga anuannzɛ’n yili’n be nun kun. Asa kusu e kwla kanngan jasin fɛ’n bolɛ i su ndɛ fɛ nga be o e Biblu’n i akua’m be nun’n, annzɛ e kwla kan be ndɛ.

17, 18. ?Ngue yɛ ɔ kle e kɛ Zoova su yaciman e mɔ e su i kpa titi’n e fɔnvɔlɛ nin e ukalɛ’n le ɔ?

¹⁷ Sɛ e sie i nzɔliɛ kɛ e niaan kun i sa mian fɔnvɔlɛ wun’n, e kwla srɛ Ɲanmiɛn mɛn i. (Rɔm. 15:30, 31; Kol. 4:12) Sɛ e o kekle blɛ’n nun annzɛ sɛ e su fɔnvɔ e wiengu mun’n, maan e lafi Ɲanmiɛn su kɛ Davidi fa yoli mɔ i ti’n, ɔ kwla kannin ndɛ yɛ’n sa. Ɔ seli kɛ: “Fa sa ng’ɔ o ɔ su’n kwlaa wlɛ i Anannganman sa nun, ɔ́ súan ɔ bo. Ɔ su yaci-mɛn i sufuɛ kpa’n lɛ maan srɛ kun-mɛn i naan i wun usu-mɛn i.” (Jue. 55:23) Zoova su yaciman e mɔ e su i kpa titi’n e fɔnvɔlɛ nin e ukalɛ’n le. Ɔ su sokpɛmɛn i gbanflɛn difuɛ mun le.

¹⁸ Laa kpa’n, Ɲanmiɛn seli i sufuɛ’m be kɛ: “M bɔbɔ min yɛ n fɔnvɔ amun-ɔn.” (Eza. 51:12) I sɔ kunngba’n yɛ Zoova yó mán e ɔ. Kpɛkun sa kpa kwlaa nga e yo’n, ɔ nin ndɛ kpa kwlaa nga e kan e fa fɔnvɔ e wiengu mun’n, ɔ́ rá su mán e. Pɔlu kannin ndɛ kun fa fɔnvɔli i niaan nga be kpali be sieli be ngunmin’n. Kannzɛ e wla o su kɛ é ká asiɛ’n su wa annzɛ é kɔ́ ɲanmiɛn su lɔ’n, ndɛ sɔ’n kwla fɔnvɔ e wie. Ɔ seli be kɛ: “Maan e Min Jésus-Krist bɔbɔ nin e Si Nyanmiɛn b’ɔ klo ye’n, bɔ ye b’ɔ yo ye’n ti ɔ gua ye anwlɛn su nzue tititi’n, b’ɔ man e like kpa bɔ e fa e wla gua su’n, be wla amun yakpa, maan an jran kekle yo sa kwlaa ng’ɔ ti kpa’n, yɛ an kan ndɛ kwlaa ng’ɔ ti kpa’n.”​—2 Tɛs. 2:16, 17.

[Ja ngua lɛ ndɛ’n]

?Amun wla kwla kpɛn su?

• ?Sran’m be fɔnvɔlɛ junman nga e di’n, w’a ɔ i ɲrun w’a ju sɛ?

• ?Ninnge benin wie mun yɛ e kwla yo e fa fɔnvɔ e wiengu mun ɔn?

• ?Biblu’n nun ndɛ benin yɛ be kle kɛ Zoova fɔnvɔ i sufuɛ mun ɔn?

[Kosan mun]

[Foto, bue 26]

?Amun fɔnvɔ be nga be o afɛ nun’n wie?

[Foto, bue 28]

I bakan o, i kpɛnngbɛn o, be kwla wla sran fanngan.