3 Ɲanmiɛn yaciman sa cɛman ?Ndɛ sɔ’n ti nanwlɛ?
3 Ɲanmiɛn yaciman sa cɛman ?Ndɛ sɔ’n ti nanwlɛ?
Atrɛkpa’n amun a ti ndɛ nga le: “Ɲanmiɛn fa sa tɛ kwlaa nga sran’m be yo’n sie i klun, kpɛkun ɔ tu be fɔ sin fɛtɛ’n nun.”
“Ɲanmiɛn fa sanvuɛsa kɛ nzue dan m’ɔ tɔ di lika’n sa’n, ɔ fa tu sa tɛ yofuɛ’m be fɔ.”
Ndɛ nga Biblu’n kan’n: Piɛr fluwa nɲɔn su’n i ndɛ tre 3 i mma 9 se kɛ Zoova “klo-man kɛ sran kun sa mlin [yɛle kɛ ɔ saci], ɔ klo kɛ sran’m be kwlaa be kaci be nzuɛn’n.” Ɔ fɛmɛn i ɲin siemɛn i e fɔnlɛ’m be su. Sa kpa nga e yo be’n be su yɛ ɔ fɛ i ɲin sie ɔ. Ɲanmiɛn “nian-nian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.”—2 Be Nyoliɛ 16:9.
Biblu’n kleman mlɔnmlɔn kɛ Ɲanmiɛn kle sran’m be ɲrɛnnɛn sin fɛtɛ kun nun. I sɔ yolɛ’n yo Ɲanmiɛn i kain kpa. Sɛ be waan Ɲanmiɛn w’a tu sran kun fɔ dan o yɛle nguan ng’ɔ fa mɛnnin i’n i falɛ. (Zeremi 7:31; Rɔmfuɛ Mun 6:7) Yɛ kusu, sanvuɛsa kɛ asiɛ m’ɔ keje’n sa’n, mɔ bé kún sran be kpaman nun’n, be finman Ɲanmiɛn. Sanngɛ be ti sa mɔ be kwla fu sran kwlaa nun ɔn.—Akunndanfuɛ’n 9:11.
Wafa nga nanwlɛ’n i silɛ’n kwla yo amun ye’n: Kɛ e wun i wlɛ kɛ Ɲanmiɛn “yaci sran wun sa cɛ i” naan ɔ kpliman buman e fɔ’n, ɔ yo maan e kwla fa e wun e mɛntɛn i. (Jue Mun 86:5) Ɔ fataman kɛ e akunndan m’ɔ bu e fɔ’n annzɛ fɔ tulɛ’n i wun srɛ ti yɛ e su Ɲanmiɛn ɔn. Sanngɛ ɔ fata kɛ Zoova i klolɛ’n yɛ ɔ su e bo ɔ. I sɔ klolɛ’n ti wunmiɛn kun m’ɔ su e bo naan y’a tu e klun y’a yo like ng’ɔ jɔ Zoova i klun’n.—Matie 22:36-38; 1 Zan 5:3.
Ɲanmiɛn kunndɛ kɛ sran’m be ngba be yo sa kpa. Sanngɛ ɔ si kɛ be nun kaka su yoman sɔ le. Ɔ fata kɛ ɔ tu be nga sa tɛ yolɛ’n yɛ ɔ ti be ajuin’n be fɔ. Afin sɛ w’a yoman sɔ’n, nn ɔ ti kɛ famiɛn kun m’ɔ kpɛ mmla mɔ sanngɛ ɔ yoman naan sran’m b’a nanti su’n sa. I sɔ’n kusu yó maan sa sukusuku nin ɲrɛnnɛn’n be su wieman sran’m be su le. (Akunndanfuɛ’n 8:11) Kɛ e si kɛ Ɲanmiɛn su yaciman sran’m be nun kɛ be yo klunwi’n sa trilili’n, ɔ yo maan e lafi su kpa kɛ e ɲrun lɔ’n yó kpa. Ɲanmiɛn tali nda kɛ ɔ́ núnnún be nga be yaciman sa tɛtɛ yolɛ’n. I liɛ’n “yalɛfuɛ mun [wun ase kanfuɛ mun]” bé kwlá dí aklunjuɛ asiɛ’n su tititi, kɛ nga mɛn’n i bo bolɛ’n nun’n ɔ fa sunnzunnin’n sa.—Jue Mun 37:10, 11, 29. *
[Ja ngua lɛ ndɛ’n]
^ Sɛ amun kunndɛ kɛ amún sí wafa nga Ɲanmiɛn yó maan asiɛ’n káci mɛn klanman’n i su like kpa ekun’n, an nian fluwa ?Ngue like yɛ Biblu’n kle i sakpasakpa ɔ? i ndɛ tre 3 nin 8 nun.
[Ndɛ kwle, bue 6]
?Sɛ fɔ tulɛ’n i wun srɛ ti yɛ e su Ɲanmiɛn’n, ɔ́ yó i fɛ?
[Foto cifuɛ, bue 6]
Engravings by Doré
