E ti “wlan-wlanfuɛ” mɛn tɛ nga nun
E ti “wlan-wlanfuɛ” mɛn tɛ nga nun
“Be kwlaa be lafi Nyanmiɛn su lele [...] be dili be wun nanwlɛ kɛ be ti aofuɛ nin wlan-wlanfuɛ asiɛ’n su.”—EBR. 11:13.
1. ?Mɛn nga nun’n, Zezi seli kɛ i sɔnnzɔnfuɛ’m be ti sran’n i wafa benin?
ZEZI kannin i sɔnnzɔnfuɛ’m be ndɛ seli kɛ: “Be liɛ’n be tɛ o wa,” yɛle kɛ be te o mɛn nga nun. Sanngɛ ɔ kan guali su kɛ: “Be ti-man mɛn nunfuɛ kɛ n kusu n ti-man mɛn nunfuɛ’n sa.” (Zan 17:11, 14) Zezi i ndɛ sɔ’n kle wafa ng’ɔ fata kɛ Klistfuɛ kpa’m be bu “mɛn nga” mɔ i min’n yɛle Satan’n. (2 Kor. 4:4) Klistfuɛ’m be tran mɛn tɛ nga nun. Sanngɛ be timan mɛn nunfuɛ. I ti yɛ Biblu’n se kɛ be ti “aofuɛ nin wlan-wlanfuɛ asiɛ’n” su’n niɔn.—1 Piɛ. 2:11.
Be yoli kɛ “wlan-wlanfuɛ” sa
2, 3. ?Ngue ti yɛ be kwla se kɛ Enɔku, Nowe yɛ Abraamu nin Sara be yoli kɛ “aofuɛ nin wlan-wlanfuɛ” sa asiɛ’n su ɔ?
2 Kɛ ɔ fɛ i laa lele’n, Zoova i sufuɛ’m b’a nantiman kɛ mɛn i nunfuɛ mun sa. Be nun nɲɔn yɛle Enɔku nin Nowe. Biblu’n waan be “nin Nyanmiɛn be nantili klanman.” (Bob. 5:22-24; 6:9, 10) Fɔ nga Zoova buli Satan i mɛn tɛ nga’n, yakpa su be boli i jɔ kleli sran mun. (An kanngan 2 Piɛr 2:5; Zid 14, 15 nun.) Kannzɛ bɔbɔ be nga be sin yia be’n be ti klunwifuɛ’n, sanngɛ be liɛ’n be yoli sɛsɛfuɛ. I ti’n Biblu’n waan “Nyanmiɛn klun jɔli [Enɔku] i wun” yɛ Nowe kusu ‘ɔ tuli i klun suli Nyanmiɛn.’—Ebr. 11:5; Bob. 6:9.
3 Abraamu nin Sara be nin Ɲanmiɛn nantili klanman wie. Kɛ Ɲanmiɛn seli be kɛ be tu Iri klɔ’n m’ɔ o Babilɔni lɔ’n su’n, be yoli kɛ Ɲanmiɛn fa kannin’n sa. Kusu nn Iri lɔ’n, be tran pɔɔ nun. (Bob. 11:27, 28; 12:1) Akoto Pɔlu klɛli i kɛ: “Nyanmiɛn su bɔ Abraam lafi’n ti, kɛ ɔ flɛli i kɛ ɔ wɔ nvle nga i waan ɔ́ fá mɛ́n i nun’n, i nyin yili i, ɔ si-man lika ng’ɔ kɔ’n, sanngɛ ɔ ɔli. I su b’ɔ lafi’n ti, ɔ ko trannin nvle nga i waan ɔ́ fá mɛ́n i’n nun kɛ aofuɛ sa. Ɔ nin Izaak nin Zakɔb bɔ be kusu bé nyán like nga i waan ɔ́ fá mɛ́n i’n wie’n, be trannin tannin sua’n nun.” (Ebr. 11:8, 9) Pɔlu kannin Zoova i sufuɛ kpa sɔ’m be ndɛ seli kɛ: “Be kwlaa be lafi Nyanmiɛn su lele be fa wuli, sanngɛ ɔ nin i sɔ’n ngba’n, b’a nyan-man ninnge nga i waan ɔ́ fá mán be’n. Be wunnin be mmua lɔ, ɔ maan be klun jɔli. Yɛ be dili be wun nanwlɛ kɛ be ti aofuɛ nin wlan-wlanfuɛ asiɛ’n su.”—Ebr. 11:13.
Be wlali Izraɛlifuɛ’m be su nun
4. ?Ka naan Izraɛlifuɛ’m b’a ko tran mɛn nga Zoova fa mannin be’n i nun lɔ’n, wafa sɛ yɛ ɔ wlali be su nun ɔn?
4 Abraamu ɲannin ba nin anunman kaka. Ɲanmiɛn maan be kacili nvle kun. Yɛle Izraɛli nvle’n. Ɲanmiɛn mannin be asiɛ. Yɛ ɔ kpɛli mmla mannin be. (Bob. 48:4; Mml. 6:1) Ɔ nin i fata kɛ ɔ tran Izraɛlifuɛ’m be klun titi kɛ asiɛ nga be o su’n timan be liɛ naan ɔ ti Zoova liɛ. (Sau. 25:23) Be tran su sɔ. Sanngɛ ɔ fata kɛ be nanti mmla nga Zoova mɔ i liɛ yɛle asiɛ’n, ɔ kpɛ mannin be’n i su. Asa kusu’n, ɔ nin i fatali kɛ ɔ tran be klun titi kɛ “nán aliɛ kunngba yɛ ɔ man sran nguan-an.” Kpɛkun kannzɛ be ɲan be wun’n, ɔ nin i fataman kɛ be wla fi Zoova. (Mml. 8:1-3) Kwlaa naan Izraɛlifuɛ’m b’a ko tran mɛn nga Ɲanmiɛn fa mannin be nun’n, ɔ wlali be su nun kɛ: “Anannganman amun Nyanmiɛn’n ɔ́ fá amún kɔ́ mɛn nga ɔ seli amun nannan Abraam, nin Izaak, nin Zakɔb kɛ ɔ́ fá mán amun’n i nun lɔ. Amun ko fa klɔ dandan, nin klɔ kpakpa bɔ nán amun yɛ amun kplannin’n. Amún fá sua bɔ amun a kunndɛ-man ninnge b’a wla-man be nun sanngɛ bɔ ninnge kpakpa’m b’a yi be piɛ’n, amún fá nzue gbo bɔ nán amun yɛ amun kpɛli’n, amún fá vinyi fie mun nin olivie fie mun bɔ nán amun yɛ amun dili be’n. Amún nyán aliɛ kaka kpa amún dí. Sanngɛ amun nian amun wun kpa, nán amun wla fi Anannganman su.”—Mml. 6:10-12.
5. ?Ngue ti yɛ Zoova yili Izraɛlifuɛ’m be blo ɔ? ?Yɛ nvle uflɛ benin yɛ ɔ fa yoli i nvle ɔ?
5 Zoova si like nga ti yɛ ɔ seli be sɔ’n. Afin kɛ Izraɛlifuɛ’m be ko trannin mɛn nga Ɲanmiɛn fa mannin be’n i nun’n, be ɲannin sua kpa trannin nun, be ɲannin aliɛ nin nzan kpanngban, “be dili like kpa be ku yili, be yoli sa lɔklɔlɔklɔɔ.” Sanngɛ be wla wa fili Zoova. I kpa bɔbɔ’n, be kunnin i nuan ijɔfuɛ ng’ɔ sunmannin be kɛ be ko tu be fɔ’n. I kwlaa sɔ’n ti’n, ɔ yaci be mannin be kpɔfuɛ mun. Neemi blɛ su’n, kɛ Levifuɛ wie’m be wla kpɛnnin sa sɔ’n su’n, ɲannzuɛn kunnin be. (An kanngan Neemi 9:25-27 nun; Oze 13:6-9) I sin, i nun nga Rɔmufuɛ mun yɛ be sie Izraɛli nvle’n, Izraɛlifuɛ sɔ mɔ be lafiman Ɲanmiɛn su’n, be kunnin Mɛsi nga Ɲanmiɛn sunmɛnnin i be sin’n bɔbɔ! Be aeliɛ sɔ’n ti’n, Zoova yili be blo. Yɛ ɔ fali nvle uflɛ yoli i nvle. Be flɛ i kɛ “Izraɛlfuɛ nga be ti i liɛ sakpa’n.”—Mat. 21:43; Yol. 7:51, 52; Gal. 6:16.
Klistfuɛ’m be timan ‘mɛn nunfuɛ’
6, 7. (a) ?Wafa ng’ɔ fata kɛ Zezi i sɔnnzɔnfuɛ’m be tran mɛn’n nun’n i su ndɛ nga Zezi bɔbɔ kannin’n, i bo’n yɛle benin? (b) ?Ngue ndɛ yɛ Piɛli kannin m’ɔ kle kɛ ɔ fataman kɛ Klistfuɛ kpa’m be yo kɛ Satan i mɛn’n nunfuɛ’m be sa ɔ?
6 Kɛ nga e fa wunnin i like suanlɛ nga i bo bolɛ’n nun’n sa’n, Zezi Klist m’ɔ ti asɔnun’n i su kpɛn’n, ɔ seli kɛ ɔ fataman kɛ i sɔnnzɔnfuɛ’m be fa be wun be wlɛ i Satan i mɛn tɛ yɛ’n nun. I nun mɔ Zezi i wie cɛn’n mantannin koko’n, ɔ seli i sɔnnzɔnfuɛ’m be kɛ: “Sɛ an ti mɛn nga nunfuɛ wie’n, wuun be klo amun yɛlɛ kɛ an ti be fuɛ. Sanngɛ kɛ n fali amun’n, n yili amun mɛn nunfuɛ’m be nun, i ti yɛ maan be kpɔ amun nin-ɔn.”—Zan 15:19.
7 ?Kɛ Klistfuɛ’m bé sɔ́n bé kɔ́’n, bé fá be wun wlɛ́ i mɛn’n nun yɛ bé káci mɛn nunfuɛ? Cɛcɛ. Kan kwlaa nga be tran’n, ɔ fataman kɛ be aeliɛ’n yo kɛ Satan i mɛn’n nunfuɛ’m be liɛ’n sa. Kɛ Klist wuli m’ɔ dili afuɛ kɔe 30, akoto Piɛli klɛli fluwa ko mannin Klistfuɛ nga be o Rɔmu nvle’n i likalika’m be nun’n. Ɔ seli be kɛ: “N sran kpa mun, an ti aofuɛ nin wlan-wlanfuɛ asiɛ’n su, ɔ maan ń srɛ́ amun kɛ an wla amun konvi bɔ maan amun nyin blo ninnge’m be su’n i ase, afin konvi sɔ’n kwla kun ye. An yo sa ng’ɔ ti kpa’n be nga be ti-man Kristfuɛ’n be nyrun.”—1 Piɛ. 1:1; 2:11, 12.
8. ?Ngue ndɛ yɛ laa sa’m be su like suanfuɛ kun kannin m’ɔ kle kɛ Klistfuɛ klikli’m b’a yoman mɛn’n nunfuɛ ɔ?
8 Klistfuɛ klikli’m be yoli kɛ “aofuɛ nin wlan-wlanfuɛ” sa Rɔmu nvle’n nun. Laa sa’m be su like suanfuɛ kun mɔ be flɛ i Laturɛti’n, ɔ klɛli i kɛ kpɛ sunman’n be kleli Klistfuɛ’m be ɲrɛnnɛn kpa. I waan kɛ mɔ be faman be wun wlɛmɛn i Ɲanmiɛn sulɛ wafawafa’m be ninnge yolɛ nun’n ti’n, be tɔnnin be suɛn kɛ be lafiman Ɲanmiɛn su. Kɛ be blɛ sufuɛ’m bé dí cɛn’n annzɛ bé yíyí be ɲin su’n, be sɔ amuɛn yɛ be kunndɛ bian nin bla sukusuku. Kɛ mɔ Klistfuɛ sɔ’m b’a faman be wun b’a wlaman ninnge sɔ’m be nun wie’n ti’n, be waan be ti “sran kpɔfuɛ.”
E ɲin bloman mɛn’n nun ninnge’m be kunndɛlɛ’n su
9. ?Wafa sɛ yɛ e kle kɛ e timan “sran kpɔfuɛ” ɔ?
9 ?Yɛ andɛ li? Kɛ Klistfuɛ klikli’m be sa’n, e faman e wun e wlɛmɛn i ‘mɛn tɛ kain nga nun.’ (Gal. 1:4) I sɔ’n ti’n, sran kpanngban be wunman e nantilɛ wafa’n i wlɛ. Be nun wie’m be kpɔ e bɔbɔ. Sanngɛ e timan “sran kpɔfuɛ.” Klolɛ mɔ e klo sran mun’n ti’n, e kɔ awloawlo’m be nun e ko bo ‘Nyanmiɛn sielɛ’n i jasin fɛ’n.’ E mian e ɲin e bo e kle awlofuɛ’m be kwlaa. (Mat. 22:39; 24:14) Like ti yɛ e yo sɔ’n, yɛle kɛ e lafi su kpa kɛ ɔ ka kaan sa’n, Zoova i Sielɛ’n mɔ Klist ti i su famiɛn’n, ɔ́ wá núnnún sran’m be famiɛn diwlɛ mun. Sielɛ sɔ’n yó maan asiɛ’n su ninnge’m be kaci uflɛ. Yɛ sa kpa ngunmin yɛ bé yó i asiɛ’n su ɔ.—Dan. 2:44; 2 Piɛ. 3:13.
10, 11. (a) ?Wafa sɛ yɛ andɛ Ɲanmiɛn sufuɛ’m be fa mɛn’n nun ninnge’m be yo be wun sa ye ɔ? (b) ?Ninnge benin yɛ be ɲin bloman su ɔ?
10 Ɔ ka kaan sa’n, bé wá núnnún Satan i mɛn nga. I ti’n, nán dɔ nga su yɛ é kúnndɛ pɔɔ nun tranlɛ ɔ. Ndɛ yɛ mɔ akoto Pɔlu kannin’n ti e cinnjin. Ɔ seli kɛ: “Nja mun, an nian ndɛ nga ń kán klé amun’n yɛ: e nyrun a ka koko, i sɔ’n ti’n, [...] be nga be to like’n, maan be yo kɛ be lɛ-man like sa, yɛ be nga be fa mɛn’n nun ninnge’n yo be wun sa ye’n, nán maan be nyin blo i kunndɛlɛ su ngboko, afin mɛn ng’ɔ o yɛ’n ɔ cɛ-man.” (1 Kor. 7:29-31) ?Wafa sɛ yɛ andɛ Klistfuɛ’m be fa mɛn’n nun ninnge’m be yo be wun sa ye ɔ? Be fa mannzin nga b’a ju su’n ɔ nin ninnge uflɛ nga be sin be lika kan ndɛ’n, be fa kan Biblu’n nun ndɛ kle sran mun mɛn wunmuan’n nun aniɛn kpanngban nun. Asa ekun’n, be di junman naan b’a ɲan sika kan b’a fa nian be wun lika. Asa kusu’n, like kan nga be sa miɛn i wun sakpa’n yɛ be to ɔ. Sanngɛ be ɲin bloman mɛn’n nun ninnge’m be kunndɛlɛ’n su. Yɛle kɛ nán sika nga be le i’n, annzɛ ninnge nga be o be sa nun’n, annzɛ junman nga be di’n yɛ be ti be cinnjin kpa ɔ.—An kanngan 1 Timote 6:9, 10 nun.
11 Like kun ekun mɔ Klistfuɛ’m be ɲin bloman su’n yɛle suklu dilɛ dan’n. Mɛn nunfuɛ’m be waan ɔ fata kɛ sran kun di suklu lele ju inivɛsite, naan ɔ di junman dandan mun, naan ɔ ɲan sika kpanngban. Sanngɛ e mɔ e ti Klistfuɛ’n e tran kɛ aofuɛ nin wlanwlanfuɛ sa asiɛ’n su, yɛ nán ninnge sɔ mun yɛ e kunndɛ be ɔ. E kunndɛman “pɔɔ nun tranlɛ.” (Zer. 45:5; Rɔm. 12:16) Kɛ mɔ e ti Zezi i sɔnnzɔnfuɛ’n ti’n, e fɛ i afɔtuɛ yɛ’n su. Ɔ seli kɛ: “An nian amun wun kpa konvi kpli yolɛ’n i lika, afin maan sran nyɛn i wun ɔ nyɛn i wun sɛ, nán ninnge sɔ mun yɛ be mɛn i nguan-an.” (Lik 12:15) I sɔ’n ti’n, nán maan gbanflɛn nin talua’m be wla fi su le kɛ like ng’ɔ ti cinnjin kpafuɛ’n yɛle Ɲanmiɛn sulɛ’n. Suklu kan nga be ko di naan b’a kwla di junman b’a fa nian be wun lika’n, yɛ ɔ fata kɛ be di ɔ. Kɛ bé yó i sɔ’n be siesie be wun naan kɛ bé sú Zoova’n, ‘bé fá be wla’n kwlaa gúɛ i su, bé fá be wunmuan’n kwlaa bé mɛ́n i yɛ be akunndan’n kwlaa trɛ́n i su.’ (Lik 10:27) Sɛ be yo sɔ’n, Ɲanmiɛn ɲrun’n bé yó ‘anyanbeunfuɛ.’—Lik 12:21; an kanngan Matie 6:19-21 nun.
Nán maan e koko mɛn’n nun ninnge’m be ti
12, 13. ?Matie 6:31-33 i su mɔ e fa’n ti’n, ngbaciɛ benin yɛ ɔ o e nin mɛn nunfuɛ mun e afiɛn ɔn?
12 Like kun ekun m’ɔ kle kɛ Zoova i sufuɛ’m be nin mɛn nunfuɛ’m be timan kun’n, yɛle wafa nga be bu aɲanbeun ninnge mun’n. Zezi seli i sɔnnzɔnfuɛ’m be kɛ: “Nán an koko se kɛ: ‘?Ndɛ nguɛ yɛ é dí ɔ? Annzɛ, ?Nguɛ yɛ é nɔ́n-ɔn? Annzɛ, ?Nguɛ yɛ é klá-a?’ Like sɔ’n kwlaa be bɔ be su-man Nyanmiɛn’n be yɛ be kunndɛ-ɔ. Nán an yo sɔ, afin amun Si b’ɔ o nyanmiɛn su lɔ’n si kɛ amun sa mian like sɔ’m be wun. An dun mmua fa amun wun man Nyanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n kwlaa úka su mán amun.” (Mat. 6:31-33) E wiengu Klistfuɛ kpanngban be wunnin i kɛ ndɛ nga Zezi kannin’n ti nanwlɛ naan e Si m’ɔ o ɲanmiɛn su lɔ’n w’a yaciman be lika nianlɛ le.
13 ‘Sɛ sran kun su Nyanmiɛn naan i nyin yi like ng’ɔ lɛ i’n, i sɔ’n ti anyanbeun like dan.’ (1 Tim. 6:6) Andɛ’n, mɛn nunfuɛ’m be bumɛn i sɔ kaan sa. I wie yɛle kɛ, kɛ gbanflɛn nin talua nga be ja uflɛuflɛ’n, be kunndɛ kɛ bé ɲán like kwlaa be ja nun lɛ. Be kunndɛ kɛ bé ɲán sua, nin loto nin ninnge tɛkɛtɛkɛ kwlaa nga be fa siesie sua’n nun’n. Asa kusu’n, be klo kɛ bé ɲán mannzin kanngan kwlaa nga be yi be uflɛuflɛ’n wie. Sanngɛ kɛ mɔ Klistfuɛ’m be ti aofuɛ nin wlanwlanfuɛ mɛn nun’n ti’n, like nga be sa ju su’n, yɛ be yo ɔ. Yɛ be nian be konvi’n su naan w’a wɔman ninnge nga be sa juman su’n, be su. Ɔ maan gbanflɛn nin talua nga be wla be wun ase be di Zoova junman’n, mɔ be saciman be sika’n nin be blɛ’n ninnge’m be totolɛ nun’n, be nin mo yolɛ fata. Be nun wie’m be ti atin bofuɛ annzɛ be di junman Betɛli’m be nun, annzɛ be ti akpasua annzɛ nvle sunianfuɛ, annzɛ kusu be ti ngaliɛ difuɛ. Nanwlɛ, Zoova junman mɔ e niaan’m be tu be klun be di’n, ɔ yo e kwlaa e fɛ dan!
14. ?Afɔtuɛ benin yɛ awie guafuɛ’n i wun ɲanndra nga Zezi buli’n ɔ man e ɔ?
14 Awie guafuɛ’n i wun ɲanndra nga Zezi buli nun’n, ɔ seli kɛ “mɛn’n nun ninnge’n i ngokoɛ’n nin anyanbeun’n i klolɛ’n” be kwla yo naan Ɲanmiɛn ndɛ’n w’a traman ndin e awlɛn’n nun lɔ. Kpɛkun i agualiɛ su’n, e kpɔnzɔ Ɲanmiɛn sulɛ’n nun. (Mat. 13:22) Sɛ e tran kɛ aofuɛ nin wlanwlanfuɛ sa mɛn nga nun naan e klun jɔ i sɔ’n su’n, i sɔ sa liɛ’n su ɲanman e. Sanngɛ ɔ́ úka e naan e ‘nyinma’n w’a yo kpa’ titi. Yɛle kɛ e nantilɛ nun’n, Ɲanmiɛn Sielɛ’n i junman dilɛ’n ɔ́ yó e cinnjin trá like kwlaa.—Mat. 6:22.
“Mɛn’n [su] wie”
15. ?Mɛn nga i su ndɛ benin yɛ akoto Zan kannin mɔ i su yɛ Klistfuɛ kpa’m be nian be nanti ɔ?
15 Like nga ti yɛ e Klistfuɛ kpa mun e tran kɛ “aofuɛ nin wlanwlanfuɛ” sa asiɛ’n su’n, i kun yɛle kɛ e si kɛ mɛn nga su wa wie. (1 Piɛ. 2:11; 2 Piɛ. 3:7) Sɛ e konvi sɔ like wie o, sɛ é fá ajalɛ o, sɛ é yó like uflɛ wie o, e bu i sɔ liɛ’n i akunndan. Akoto Zan mɛnnin i wiengu Klistfuɛ’m be afɔtuɛ kɛ nán be klo mɛn’n ɔ nin ninnge nga be o mɛn’n nun’n. Afin “mɛn’n nin i nun ninnge kwlaa bɔ sran nyin blo su’n, bé wíe, sanngɛ sran ng’ɔ yo Nyanmiɛn klun sa’n, ɔ́ ká lɛ tititi.”—1 Zan 2:15-17.
16. ?Wafa sɛ yɛ e kwla kle kɛ e o “sran” nga Zoova fali be sieli i ngunmin’n be nun wie ɔ?
16 Zoova seli Izraɛlifuɛ’m be kɛ sɛ be ɲin yi i’n, bé yó ‘nvle b’ɔ ti i liɛ klonglo nvle kun nga’m be afiɛn.’ (Tul. 19:5) I nun nga Izraɛlifuɛ’m be ɲin yi Zoova’n, be Ɲanmiɛn sulɛ’n nin be ninnge yolɛ wafa’n nin nvle kun nga’m be liɛ’n timan kun. I kunngba’n, andɛ’n, Zoova fali sran wie mun fa yoli i nvle. I sɔfuɛ’m be nin Satan i mɛn’n nunfuɛ’m be ninnge yolɛ wafa’n timan kun. Biblu’n se e kɛ “e yaci sa b’ɔ yo-man Nyanmiɛn fɛ’n nin mɛn nun ninnge nga e nyin blo be su’n, naan blɛ nga e o nun yɛ’n, e yo sa ng’ɔ ti i nuan su’n, nin sa ng’ɔ ti kpa’n, yɛ e sro Nyanmiɛn. E yo sɔ naan e minndɛ cɛn kpa nga e wla o su kɛ e Nyanmiɛn Kpli’n nin e Defuɛ Krist-Jésus bé wá yí be wun nglo’n. E ti Jésus ɔ fɛli i wun mannin naan ɔ́ yí ye sa tɛtɛ’n kwlaa nun naan e kaci i sa ti sran bɔ e wun sa tɛtɛ’n kwlaa w’a wie, bɔ e tu e klun yo sran ye.” (Tit 2:11-14) Ɲanmiɛn i “sran” sɔ mun yɛle Klistfuɛ nga be kpali be sieli be ngunmin’n, ɔ nin be ukafuɛ akpinngbin kpanngban mɔ be flɛ be “bua’m be wie” mun’n.—Zan 10:16.
17. ?Wlanwlanfuɛ tranlɛ nga be nga be kpali be sieli be ngunmin’n nin bua’m be wie mun be trannin mɛn tɛ nga nun’n, ngue ti yɛ bé dí i ti aklunjuɛ ɔ?
17 Aklunjuɛ like nga be nga be kpali be sieli be ngunmin’n ‘be wla o su’n’ yɛle famiɛn mɔ be nin Klist bé dí i ɲanmiɛn su lɔ’n. (Ngl. 5:10) Be nga be flɛ be bua’m be wie mun’n, be liɛ’n yɛle anannganman nguan nun tranlɛ asiɛ’n su wa’n. Kɛ be ko ɲan nguan sɔ’n, be su yoman aofuɛ nin wlanwlanfuɛ mɛn’n nun kun. Bé ɲán sua nglanmannglanman bé trán nun, yɛ bé ɲán like kpakpa kpanngban bé dí, yɛ bé nɔ́n nzan fɛfɛ. (Jue. 37:10, 11; Eza. 25:6; 65:21, 22) Be liɛ’n be su yoman kɛ Izraɛlifuɛ’m be sa. Be wla su fiman su le kɛ i sɔ ninnge kwlaa fin Zoova “b’ɔ sie mɛn wunmuan’n.” (Eza. 54:5) Blɛ sɔ’n nun’n, wlanwlanfuɛ tranlɛ mɔ be nga be kpali be sieli be ngunmin’n nin bua’m be wie mun be trannin mɛn tɛ nga nun’n, bé dí i ti aklunjuɛ.
?Amún tɛ́ su sɛ?
• ?Wafa sɛ yɛ laa Ɲanmiɛn sufuɛ kpa’m be trannin kɛ wlanwlanfuɛ sa ɔ?
• ?Aeliɛ benin yɛ Klistfuɛ klikli’m be yili i nglo mɛn’n i lika ɔ?
• ?Wafa sɛ yɛ Klistfuɛ kpa’m be kle kɛ be ɲin bloman mɛn’n nun ninnge’m be kunndɛlɛ’n su ɔ?
• ?Ngue ti yɛ wlanwlanfuɛ tranlɛ mɔ e tran mɛn tɛ nga nun’n, ɔ su yoman e nsisɔ le ɔ?
[Kosan mun]
[Foto, bue 21]
Be ɲin su yiyilɛ nga bian nin bla kunndɛlɛ’n nin nzaje sa o nun’n, Klistfuɛ klikli’m b’a faman be wun b’a wlaman nun.
