Maan e uka yasua mun naan be kwla di asɔnun’n nun junman
Maan e uka yasua mun naan be kwla di asɔnun’n nun junman
“Sran kwlaa b’ɔ wie i like’n suan’n, ɔ yo kɛ sran b’ɔ kle i like’n sa.”—LIK 6:40.
1. ?I nun mɔ Zezi dí i junman’n asiɛ’n su wa’n, ngue yɛ ɔ yoli naan sɛ ɔ kɔ ɲanmiɛn su’n junman ng’ɔ boli i bo’n w’a ɔ i ɲrun titi ɔ?
JUNMAN nga Zezi dili i asiɛ’n su wa’n i su ndɛ nga akoto Zan klɛli’n, ɔ guɛli i bo seli kɛ: “Jésus yoli like wie mun ekun kpanngban kpa bɔ m bu i kɛ sɛ be waan bé klɛ́ be kunngunngun’n, be wun fluwa’m be su sɔn-man mɛn’n nun.” (Zan 21:25) Blɛ kpe kan nga Zezi dili i asiɛ’n su wa’n i nun’n, ɔ tuli i klun dili junman kpa. Ɔ kunndɛli yasua ng’ɔ ko kle be like naan sɛ ɔ sɛ i sin ɲanmiɛn su lɔ’n b’a di junman ng’ɔ boli i bo’n. Kɛ ɔ́ kɔ́ ɲanmiɛn su afuɛ nga be flɛ i 33 nun’n, be sɔfuɛ’m b’a sɔnman. Sanngɛ w’a cɛman, sran akpiakpi kpanngban kpa be wa ukali be su.—Yol. 2:41, 42; 4:4; 6:7.
2, 3. (a) ?Ngue ti yɛ be le aniaan yasua nga be ko nian asɔnun’m be lika’n be awuliɛ ɔ? (b) ?Like suanlɛ nga nun’n, ngue su yɛ é wá fá e ɲin síe ɔ?
2 Andɛ’n, mɛn wunmuan’n nun’n sran nga be bo Ɲanmiɛn Sielɛ’n i jasin fɛ’n, be ti akpinngbin nso tra su yɛ be o asɔnunasɔnun 100.000 tra su nun. I sɔ’n ti’n, be le aniaan yasua nga be ko nian asɔnun’m be lika’n be awuliɛ kpa. I wie yɛle kɛ asɔnun kpɛnngbɛn mun sa. Aniaan nga be klo kɛ bé dí i sɔ junman’n ɔ fata kɛ e yo be mo, afin be ‘klo junman b’ɔ ti kpa’n.’—1 Tim. 3:1.
3 Sanngɛ ɔ fata kɛ aniaan yasua kun dun mmua yo ninnge wie mun ka naan b’a kwla mɛn i junman asɔnun’n nun. Nán suklu nga sran kun dili’n nin sa ng’ɔ si be’n ɔ nin ninnge ng’ɔ kwla be yo’n, yɛ be kwla ukɛ i naan w’a di junman wafa sɔ’n niɔn. Sanngɛ sɛ i waan ɔ́ dí i sɔ junman’n, ɔ fata kɛ ɔ yo ninnge nga Biblu’n waan be nga be klo kɛ bé dí i sɔ junman’n be yo’n. ?Wafa sɛ yɛ e kwla uka aniaan yasua mun naan b’a kwla di asɔnun’n nun junman ɔn? Zezi seli kɛ: “Sran kwlaa b’ɔ wie i like’n suan’n, ɔ yo kɛ sran b’ɔ kle i like’n sa.” (Lik 6:40) Maan e nian wafa nga Zezi Klist m’ɔ ti like klefuɛ’m be ti’n, ɔ kleli i sɔnnzɔnfuɛ’m be like’n ɔ nin afɔtuɛ nga like ng’ɔ yoli’n man e’n.
‘N flɛ amun n janvuɛ’
4. ?Wafa sɛ yɛ Zezi kleli kɛ ɔ ti i sɔnnzɔnfuɛ’m be janvuɛ kpa ɔ?
4 Zezi w’a buman kɛ i kpa tra i sɔnnzɔnfuɛ mun. Ɔ nin be trannin kɛ sran kun nin i janvuɛ sa. Ɔ nin be yoli ninnge mun likawlɛ, kpɛkun ɔ lafili be su. Ɔ seli be kɛ: “Like nga n suɛnnin n Si sa nun’n, n kleli amun i kwlaa.” (An kanngan Zan 15:15 nun.) Zezi i sɔnnzɔnfuɛ’m be usɛli i kɛ: “?Nguɛ yɛ ɔ ti ɔ balɛ’n nin mɛn’n i awieliɛ’n i nzɔliɛ nin-ɔn?” Kɛ Zezi tɛli be su’n, e kwla se kɛ ɔ yoli be fɛ dan. ?Nɛ́n i ɔ? (Mat. 24:3, 4) Asa’n, Zezi kɛnnin i klun ndɛ kleli i sɔnnzɔnfuɛ mun, yɛ ɔ kunndɛli kɛ be si wafa nga i wun fa yo i’n. I wie yɛle kɛ kɔnguɛ nga bé wá trɛ́ i’n, ɔ fali Piɛli nin Zaki nin Zan ɔli lika kun mɔ be flɛ i Zɛtsemane’n nun. Lɔ’n, ɔ tuli i klun srɛli Ɲanmiɛn kpa. W’a faman wafa nga i akunndan’n w’a sanngan’n w’a fiaman be wun. Be wunnin kɛ kekle dan kpa o i su. (Mar. 14:31-38) Kusu’n, kɛ ɔ fali be nsan sɔ’n ɔli lika kun mɔ i wunnɛn’n kacili be ɲrun’n, wafa nga i sɔ’n wlali be fanngan’n, maan e bu i akunndan kan e nian. (Mar. 9:2-8; 2 Piɛ. 1:16-18) Janvuɛ mɔ Zezi nin i sɔnnzɔnfuɛ’m be trɛli i tankaan kpa’n, ɔ ukali be naan b’a kwla di junman cinnjin ng’ɔ mannin be’n b’a ɔ be ɲrun.
5. ?Wafa sɛ yɛ asɔnun kpɛnngbɛn’m be uka be niaan Klistfuɛ mun ɔn?
5 Kɛ Zezi sa’n, andɛ’n, asɔnun kpɛnngbɛn’m be nin be niaan Klistfuɛ’m be tra janvuɛ yɛ be uka be. Be klo be yɛ be kle be kɛ be ndɛ lo be kpa. Asɔnun kpɛnngbɛn’m be wun i wlɛ kɛ ndɛ wie’m be o lɛ’n ɔ fataman kɛ be bo su be kle sran. Sanngɛ ninnge nga be suɛnnin i Ɲanmiɛn Ndɛ’n nun’n, be fa fiaman be niaan’m be wun. Be lafi be su. Kpɛkun be bumɛn i kaan sa kɛ be kpa tra asɔnunfuɛ’m be lika nianfuɛ nga be trɛ i kpɛn’n. Be wun i wlɛ kɛ kannzɛ asɔnunfuɛ’m be lika nianfuɛ kun te yo gbanflɛn bɔbɔ’n, sanngɛ w’a ɔ i ɲrun nanwlɛ’n i silɛ nun wie, naan ɔ kwla kɔ i ɲrun ekun. Be si kɛ gbanflɛn sɔ’m be klo Zoova naan be nin be yɛ be nian asɔnun’n i lika ɔ.
“N yoli i sɔ kleli amun”
6, 7. Ajalɛ nga Zezi kleli i sɔnnzɔnfuɛ mun’n, ɔ nin wafa nga i sɔ’n ukali be’n, an kɛn i ndɛ.
6 Zezi i sɔnnzɔnfuɛ’m be kloli Ɲanmiɛn Ndɛ’n i kpa. Sanngɛ wafa nga be fa tali be’n ɔ nin wafa nga be fa yo ninnge mun titi’n ti’n, ɔ juli wie’n, be nin Zezi be akunndan’n w’a yoman kun. (Mat. 19:9, 10; Lik 9:46-48; Zan 4:27) Sanngɛ Zezi w’a tutuman be, kusu w’a faman be wun ya le. W’a seman be kɛ be yo like nga be wunmiɛn juman su’n, annzɛ be yo like wie mɔ i bɔbɔ’n yoman’n. Sanngɛ like nga i waan be yo’n, ɔ dun mmua yo kle be.—An kanngan Zan 13:15 nun.
7 ?Ajalɛ benin yɛ Zezi kleli i sɔnnzɔnfuɛ mun ɔn? (1 Piɛ. 2:21) Kɛ ɔ ko yo naan w’a ɲɛn i ti w’a niɛn i wiengu’m be lika’n, w’a fɛmɛn i blɛ’n w’a kunndɛman ninnge kpanngban. (Lik 9:58) Like kwlaa nga Zezi kleli’n ɔ taka Ɲanmiɛn Ndɛ’n su. W’a kpɛmɛn i ti nun w’a kleman like. (Zan 5:19; 17:14, 17) Asa ekun’n, Zezi klun ti ufue yɛ sran’m be kwla fa be wun be mɛntɛn i. Ninnge ng’ɔ yoli be’n be kle kɛ ɔ klo sran. (Mat. 19:13-15; Zan 15:12) Zezi i ajalɛ klanman’n ukɛli i akoto mun kpa. Ɔ ukali Zaki maan ɔ suli Ɲanmiɛn yakpa su lele naan b’a kun i. (Yol. 12:1, 2) Ɔ ukali Zan wie naan ɔ nin Ɲanmiɛn b’a nanti klanman lele afuɛ 60 tra su.—Ngl. 1:1, 2, 9.
8. ?Ajalɛ benin yɛ asɔnun kpɛnngbɛn’m be kle gbanflɛn nin sran uflɛ mun ɔn?
8 Asɔnun kpɛnngbɛn nga be buman be ngunmin be wun akunndan mɔ be ti wun ase kanfuɛ yɛ be klo sran’n, be kle gbanflɛn’m be ajalɛ kpa. (1 Piɛ. 5:2, 3) Asa ekun’n, kɛ be kle ajalɛ kpa Ɲanmiɛn sulafilɛ’n nun nin like klelɛ’n nun’n ɔ nin be nantilɛ’n nun’n, yɛ jasin fɛ’n bolɛ’n nun’n, be di aklunjuɛ. Afin be si kɛ be niaan Klistfuɛ’m be kwla nian be liɛ’n su.—Ebr. 13:7.
‘Zezi mannin be afɔtuɛ naan w’a sunman be’
9. ?Ngue yɛ ɔ kle e kɛ Zezi kleli i sɔnnzɔnfuɛ mun wafa nga be kwla di jasin fɛ’n bolɛ junman’n niɔn?
9 Kɛ Zezi wlɛli i wun ase boli jasin fɛ’n lele afuɛ kɔe nɲɔn’n, ɔ wa sunmɛnnin i akoto 12 mun kɛ be ko bo jasin fɛ’n. Sanngɛ ɔ dun mmua kleli be like trele ng’ɔ fata kɛ be yo’n ka. (Mat. 10:5-14) Blɛ uflɛ nun’n, ka naan Zezi w’a man sran akpiakpi kpanngban be aliɛ’n, ɔ kleli i sɔnnzɔnfuɛ mun wafa ng’ɔ kunndɛ kɛ be siesie sran mun naan be ngba b’a ɲan like b’a di’n. (Lik 9:12-17) I kwlaa sɔ’n kle kɛ Zezi kleli i sɔnnzɔnfuɛ mun like trele ng’ɔ fata kɛ be yo’n, ɔ nin wafa ng’ɔ fata kɛ be yo’n. Zezi i like klelɛ wafa sɔ’n ɔ nin ukalɛ mɔ Ɲanmiɛn wawɛ’n ukali i akoto mun’n ti’n, be kwla siesieli jasin fɛ’n bolɛ junman dan’n m’ɔ boli i bo afuɛ nga be flɛ i 33 nun’n.
10, 11. ?Wafa sɛ yɛ asɔnun kpɛnngbɛn nin aniaan onga’m be kwla uka yasua mun naan b’a di asɔnun’n nun junman ɔn?
10 Andɛ’n, kɛ e bo yasua kun i Biblu’n nun like klelɛ bo’n, lɛ yɛ e bo i ukalɛ bo naan w’a kwla di junman asɔnun’n nun ɔn. Wie liɛ’n, ɔ fata kɛ e ukɛ i naan w’a si kanngan kpa. Kɛ e nin i é súan Biblu’n nun like é kɔ́’n, e ukɛ i ninnge uflɛ nun ekun. Kɛ ɔ bo aɲia’m be bo kɔlɛ bo’n, e kle i like ng’ɔ fata kɛ ɔ yo naan w’a kwla di Ɲanmiɛn junman dilɛ suklu’n, ɔ nin ng’ɔ fata kɛ ɔ yo naan w’a kaci jasin bofuɛ mɔ be nin a yomɛn i batɛmu’n. Kɛ be ko yo i batɛmu’n, aniaan’m bé klé i ninnge uflɛ wie mun. Be nun wie yɛle wafa ng’ɔ kwla uka aniaan mun Ɲanmiɛn Sielɛ Sua’n i lika nianlɛ’n nun’n. Asa ekun’n, asɔnun kpɛnngbɛn’m be kwla ukɛ i naan w’a wun like ng’ɔ fata kɛ ɔ yo naan w’a kaci asɔnunfuɛ’m be lika nianfuɛ’n.
11 Kɛ asɔnun kpɛnngbɛn’m be man aniaan kun mɔ b’a yo i batɛmu’n i junman asɔnun’n nun’n, be ukɛ i naan w’a di i kpa. Wafa nga aniaan yasua’m be di i sɔ junman’n asɔnun’m be nun’n, be yiyi nun be kle i. Kpɛkun be kle i like trele ng’ɔ fata kɛ ɔ yo’n. Sɛ junman’n i dilɛ’n yo kekle mɛn i’n, asɔnun kpɛnngbɛn’m be kaman lɛ be seman kɛ ɔ kwlɛmɛn i di mlɔnmlɔn. Sanngɛ like ng’ɔ fata kɛ ɔ yo’n ɔ nin wafa ng’ɔ kwla yo’n, amanniɛn su be kle i ekun. Be klo kɛ bé úka aniaan’n naan ɔ di i junman’n. Afin be si kɛ sɛ ɔ niɛn i wiengu’m be lika asɔnun’n nun’n, ɔ́ dí aklunjuɛ.—Yol. 20:35.
“Sran ng’ɔ ti akunndanfuɛ’n be tu i fɔ-ɔ ɔ fa”
12. ?Ngue ti yɛ Zezi i afɔtuɛ’m be kwla ukali i sɔnnzɔnfuɛ mun ɔn?
12 Kɛ Zezi klé i sɔnnzɔnfuɛ’m be like’n, ɔ niannin wafa nga be tinuntinun be fa ti’n su naan w’a man be afɔtuɛ. I nun mɔ Zaki nin Zan be waan bé yó naan sin fin ɲanmiɛn su lɔ w’a ra Samarifuɛ wie mɔ b’a sɔman be nun’n, Zezi seli be kɛ ndɛ nga be kannin’n timan su. (Lik 9:52-55) Blɛ uflɛ nun’n, Zaki nin Zan be nin’n wa srɛli Zezi kɛ ɔ mɛn i mma’m be aɲrunɲan tranwlɛ Ɲanmiɛn Sielɛ’n nun lɔ. Zezi wunnin i wlɛ kɛ Zaki nin Zan be bɔbɔ yɛ be kunndɛli i sɔ like’n niɔn. I sɔ’n ti’n, ɔ kannin ndɛ’n wɔli be trele. Ɔ seli be kɛ: “N fama su nin m bɛ su tranlɛ liɛ’n, nán min yɛ m man-an, san be nga n Si sie mannin be’n, be yɛ bé trán lɛ-ɔ.” (Mat. 20:20-23) Blɛ kwlaa nun’n, afɔtuɛ nga Zezi mannin’n be ti weinwein, yɛ be wun be su fawlɛ. Kpɛkun be taka Ɲanmiɛn Ndɛ’n su. Zezi kleli i sɔnnzɔnfuɛ mun wafa nga be kwla bu Ɲanmiɛn Ndɛ’n su akunndan naan b’a fa ajalɛ’n. (Mat. 17:24-27) Asa kusu’n, i wla w’a fiman kɛ fɔ o be nun naan ninnge wie’m be o lɛ’n be su kwlaman be yo. Afɔtuɛ kwlaa ng’ɔ mannin be’n ɔ takali klolɛ’n su.—Zan 13:1.
13, 14. (a) ?Wan yɛ ɔ nin i fata kɛ be mɛn i afɔtuɛ ɔ? (b) ?Afɔtuɛ benin wie mun yɛ asɔnun kpɛnngbɛn’m be kwla man aniaan yasua kun ɔn?
13 Aniaan bian kwlaa ng’ɔ kunndɛ kɛ ɔ́ dí asɔnun’n nun junman’n, saan ɔ́ jú blɛ kun m’ɔ nin i fata kɛ be fa Biblu’n be mɛn i afɔtuɛ ɔ. Nyanndra Mun 12:15 se kɛ: “Sran ng’ɔ ti akunndanfuɛ’n be tu i fɔ-ɔ ɔ fa.” Aniaan gbanflɛn kun seli kɛ laa’n, kɛ ɔ niɛn i wun sa’n, ɔ bumɛn i kɛ ɔ́ kwlá dí asɔnun’n nun junman’n wie. Sanngɛ i waan asɔnun kpɛnngbɛn kun ukɛli i naan w’a wun i wlɛ kɛ ɔ nunman nun kɛ ɔ yo sran mɔ fɔ nunmɛn i nun naan w’a kwla di asɔnun’n nun junman.
14 Kɛ asɔnun kpɛnngbɛn’m be sie i nzɔliɛ kɛ aniaan bian kun i aeliɛ tɛ wie ti’n be kwlá mɛnmɛn i junman asɔnun’n nun’n, be ka lɛ kle i atin ng’ɔ ti kpa’n amanniɛn su. (Gal. 6:1) Ɔ ju wie kusu’n, sran’n i bɔbɔ i nzuɛn’n ti’n, ɔ fata kɛ be mɛn i afɔtuɛ. Wie liɛ’n, asɔnun kpɛnngbɛn’m be kwla sie i nzɔliɛ kɛ aniaan yasua kun tumɛn i klun diman Ɲanmiɛn junman’n. Sɛ ɔ ti sɔ’n, be kwla wlɛ i fanngan kɛ ɔ bu Zezi i akunndan. Zezi boli Ɲanmiɛn Sielɛ’n i jasin’n juejue su yɛ ɔ seli i sɔnnzɔnfuɛ’m be kɛ be yo kɛ i sa. (Mat. 28:19, 20; Lik 8:1) Sɛ aniaan kun klo kɛ be bu i sran dan’n, asɔnun kpɛnngbɛn’m be kwla kle i kɛ Zezi seli i sɔnnzɔnfuɛ’m be kɛ nán maan be kunndɛ kɛ bé yó sran dan be wiengu’m be afiɛn. (Lik 22:24-27) ?Yɛ sɛ aniaan yasua kun yaciman sa cɛman’n nin? Junman difuɛ nga i waan ɔ yaciman i kalɛ kan ng’ɔ o i wiengu kun su’n cɛmɛn i, kusu nn b’a yaci kalɛ dan ng’ɔ o i bɔbɔ su’n b’a cɛ i’n, i su sunnzun ase’n kwla ukɛ i. (Mat. 18:21-35) Sɛ ɔ fata kɛ asɔnun kpɛnngbɛn’m be man aniaan kun i afɔtuɛ’n, be cuɛncuɛnman be ja ase.—An kanngan Nyanndra Mun 27:9 nun.
“Mian ɔ nyin”
15. ?Wafa sɛ yɛ yasua kun i yi nin i mma’m be kwla ukɛ i naan w’a di asɔnun’n nun junman ɔn?
15 Asɔnun kpɛnngbɛn’m be mian be ɲin be uka aniaan yasua mun naan b’a kwla di asɔnun’n nun junman. Sanngɛ sran uflɛ kwla uka be wie. I wie yɛle kɛ aniaan yasua kun i awlobofuɛ’m be kwla ukɛ i. Sɛ kusu ɔ ti asɔnun kpɛnngbɛn’n, i yi nin i mma’m be kwla suɛn i bo naan w’a kwla tu i klun w’a di asɔnun’n nun junman’n titi. Be wun i wlɛ kɛ ɔ fata kɛ ɔ fɛ i blɛ’n nin i wunmiɛn’n wie nian asɔnun’n nunfuɛ’m be lika. Kɛ i yi nin i mma’m be kplin i sɔ’n su’n, ɔ kwla di i junman’n kpa yɛ i sɔ’n mɛn i aklunjuɛ. I sɔ’n yo aniaan onga’m be fɛ wie.—Nya. 15:20; 31:10, 23.
16. (a) ?Wan yɛ ɔ fata kɛ ɔ kle kɛ i konvi o asɔnun’n nun junman’n i dilɛ’n su ɔ? (b) ?Ngue yɛ ɔ fata kɛ aniaan yasua kun yo naan b’a mɛn i junman asɔnun’n nun ɔn?
16 I yo, sran uflɛ’m be kwla uka aniaan kun naan w’a kwla di asɔnun’n nun junman. Sanngɛ ɔ fata kɛ i bɔbɔ yɛ ɔ kle kɛ i konvi o i sɔ junman’n su ɔ. (An kanngan Galasifuɛ Mun 6:5 nun.) Sakpa, ɔ nunman nun kɛ aniaan yasua kun kaci asɔnunfuɛ’m be lika nianfuɛ annzɛ asɔnun kpɛnngbɛn naan w’a kwla uka sran uflɛ annzɛ w’a bo jasin fɛ’n i juejue su. Sanngɛ sɛ aniaan kun waan ɔ́ dí i sɔ junman’n, ɔ fata kɛ ɔ miɛn i ɲin yo ninnge nga Biblu’n waan ɔ yo naan w’a kwla di’n. (1 Tim. 3:1-13; Tit 1:5-9; 1 Piɛ. 5:1-3) I ti’n, sɛ aniaan bian kun klo kɛ ɔ́ káci asɔnunfuɛ’m be lika nianfuɛ annzɛ asɔnun kpɛnngbɛn’n, ɔ fata kɛ ɔ bu ninnge nga be nun’n ɔ ti m’ɔ yo kpa tra laa’n be akunndan. Ninnge nga be kwla ukɛ i naan w’a yo kpa w’a tra laa’n, i wie yɛle Biblu’n nun kannganlɛ titi’n, nin i su akunndan bulɛ’n ɔ nin i nun like suanlɛ’n. I wie ekun yɛle Ɲanmiɛn srɛlɛ tankaan’n ɔ nin jasin fɛ’n bolɛ juejue su’n. Sɛ ɔ yo i kwlaa sɔ’n, nn ɔ su fa afɔtuɛ yɛ mɔ Pɔlu mannin Timote’n i su. Pɔlu seli i kɛ: “Mian ɔ nyin mantan Nyanmiɛn kpa.”—1 Tim. 4:7.
17, 18. ?Ngue yɛ aniaan yasua kun kwla yo naan w’a wun i kɛ ɔ kwla di asɔnun’n nun junman’n wie ɔ? ?Yɛ ngue yɛ ɔ kwla yo naan i konvi w’a tran i dilɛ’n su ɔ?
17 ?Yɛ sɛ aniaan yasua kun bumɛn i kɛ ɔ́ kwlá dí asɔnun’n nun junman’n wie’n nin? Sɛ ɔ fɛ i ɲin sie ninnge kpanngban nga Ɲanmiɛn Zoova nin Zezi Klist be yo man e’n be su’n, i sɔ’n úkɛ i. “Cɛn kwlakwla” Zoova “nian e lika.” (Jue. 68: 20) Ɔ maan e Si m’ɔ o ɲanmiɛn su lɔ’n kwla uka aniaan yasua mun naan b’a kwla di asɔnun’n nun junman. Dɔ nga su’n, be mian aniaan yasua nga be kwla nian asɔnun’m be lika’n be wun kpa liɛ su. Aniaan bian ng’ɔ nin a kaciman asɔnunfuɛ’m be lika nianfuɛ annzɛ asɔnun kpɛnngbɛn’n, ɔ kwla bu i sɔ’n i akunndan. Sɛ ɔ yo i sɔ’n, ɔ́ yó i ye. Ɔ́ wlɛ́ i fanngan naan w’a bu i kɛ ɔ kwla junman sɔ’n wie di. Asa’n, ɔ kwla srɛ Zoova naan ɔ fɛ i wawɛ’n mɛn i, afin i sɔ’n úkɛ i naan i wla w’a gua ase naan w’a yo sa i nuan su. (Lik 11:13; Gal. 5:22, 23) Maan e lafi su kɛ aniaan bian kwlaa nga be klo kɛ bé úka be wiengu mɔ be yoman sɔ dunman annzɛ like uflɛ ɲanlɛ ti’n, Zoova rá be su.
18 ?Yɛ sɛ aniaan yasua kun i konvi yɛ ɔ nunman asɔnun’n nun junman’n i dilɛ’n su mlɔnmlɔn’n nin? ?Ngue yɛ ɔ kwla ukɛ i ɔ? Akoto Pɔlu klɛli i kɛ: “Nyanmiɛn bɔbɔ yɛ ɔ maan i klun sa yolɛ’n yo amun fɛ yɛ maan an kwla yo-ɔ.” (Fil. 2:13) Ɲanmiɛn yɛ ɔ yo maan sran kun i konvi sɔ i wiengu ukalɛ ɔ. Yɛ i wawɛ’n kwla man sran sɔ’n i wunmiɛn naan w’a yo Ɲanmiɛn klun sa. (2 Kor. 4:7) Yɛ kusu Klistfuɛ kun kwla srɛ Ɲanmiɛn kɛ ɔ ukɛ i naan ɔ yo like ng’ɔ ti kpa’n.—Jue. 25:4, 5.
19. ?Kɛ be se kɛ Zoova wá súnman “kpɛnngbɛn kpanngban” i sɔ’n kle e sɛ?
19 Zoova ra asɔnun kpɛnngbɛn’m be ɲin nga be mian be kle be niaan Klistfuɛ’m be Ɲanmiɛn junman dilɛ’n su. Ɔ ra aniaan bian nga be kunndɛ kɛ bé dí asɔnun’n nun junman’n be su wie. Biblu’n kle kɛ e kwla lafi su kɛ Ɲanmiɛn i sufuɛ’m bé ɲán aniaan kaka mɔ bé nían asɔnun’m be lika ɔ. I waan Zoova wá súnman “kpɛnngbɛn kpanngban.” (Mis. 5:4) Andɛ’n, aniaan yasua kpanngban mɔ be ti wun ase kanfuɛ’n be klo kɛ bé dí asɔnun’n nun junman. Yɛ be su uka be. Nanwlɛ i sɔ’n manman Zoova yɛ e ɲan su ye kpa!
?Amún tɛ́ su sɛ?
• ?Kɛ ɔ ko yo naan Zezi i sɔnnzɔnfuɛ’m b’a kwla junman cinnjin wie’m be di’n, wafa sɛ yɛ ɔ ukali be ɔ?
• ?Kɛ asɔnun kpɛnngbɛn’m bé úka aniaan yasua mun naan b’a di asɔnun nun junman’n, wafa sɛ yɛ be kwla sɔnnzɔn Zezi ɔ?
• ?Wafa sɛ yɛ yasua kun i awlofuɛ’m be kwla ukɛ i naan w’a kwla di asɔnun’n nun junman ɔn?
• ?Ngue yɛ yasua kun kwla yo naan b’a mɛn i junman asɔnun’n nun ɔn?
[Kosan mun]
[Foto, bue 31]
?Wafa sɛ yɛ e kwla uka Biblu’n nun like suanfuɛ kun m’ɔ kunndɛ kɛ ɔ́ kɔ́ i ɲrun’n niɔn?
[Foto, bue 32]
?Wafa sɛ yɛ yasua’m be kwla kle kɛ be konvi o asɔnun’n nun junman’n i dilɛ’n su ɔ?
