Akoto’m be blɛ su yɛ andɛ Ɲanmiɛn wawɛ’n sie Klistfuɛ mun
Akoto’m be blɛ su yɛ andɛ Ɲanmiɛn wawɛ’n sie Klistfuɛ mun
“Wawɛ kunngba’n yɛ ɔ fa like sɔ mun man be kwlaa [...] yɛ maan be yo-ɔ.”—1 KOR. 12:11.
1. ?Kosan benin mun yɛ é wá tɛ́ be su like suanlɛ nga nun ɔn?
AFUƐ nga be flɛ i 33 i Pantekɔtu nun’n, sa wie mɔ be ti abonuan kpa’n be juli. Cɛn sɔ’n nun yɛ Ɲanmiɛn fɛli i wawɛ’n guɛli i sufuɛ’m be su ɔ. (Yol. 2:1-4) Kɛ ɔ fɛ i lɛ’n, Ɲanmiɛn fɛ i wawɛ’n kle i sufuɛ’m be atin wafa uflɛ ekun. Like suanlɛ ng’ɔ sinnin lɛ’n nun’n, e wunnin wafa nga Ɲanmiɛn wawɛ’n ukali laa Ɲanmiɛn sufuɛ kpa mun naan b’a kwla di junman kekleekle wie mun b’a man Ɲanmiɛn’n. ?Sanngɛ wafa nga Ɲanmiɛn fɛli i wawɛ’n dili junman laa kpa’n, ɔ nin wafa ng’ɔ fa yoli i akoto’m be blɛ su’n, ngbaciɛ benin yɛ ɔ o be afiɛn ɔn? ?Yɛ wafa sɛ yɛ andɛ Klistfuɛ’m be ɲan junman nga Ɲanmiɛn wawɛ’n di’n i su ye ɔ? Maan e nian.
“Min yɛ, n ti e Min Nyanmiɛn’n i afanniɛn”
2. ?Junman nga Ɲanmiɛn wawɛ’n di’n i su like benin yɛ Mali wunnin i ɔ?
2 Zerizalɛmu lɔ’n, i nun mɔ Ɲanmiɛn wawɛ’n jrá Klistfuɛ’m be su nglo sua tɛtrɛ’n nun lɔ’n, nn Mali o lɛ wie. (Yol. 1:13, 14) Sanngɛ, nán cɛn sɔ’n nun ngunmin yɛ ɔ wunnin kɛ Zoova kwla fɛ i wawɛ’n yo ninnge ɲɛnmɛn wie mun ɔn. Ɔ dun mmua wunnin i sɔ afuɛ 30 tra su ka naan cɛn sɔ’n w’a ju. Yɛle kɛ Zoova fɛli i Wa’n i nguan’n fa wlɛli i Mali i ku sɛ’n nun asiɛ’n su wa. Kɛ ɔ́ yó sɔ’n, nn Mali nin a siman bian. Wunnzɛlɛ m’ɔ wunnzɛli’n, ɔ “fin Nyanmiɛn Wawɛ’n.”—Mat. 1:20.
3, 4. ?Aeliɛ kpa benin yɛ Mali yili i nglo ɔ? ?Yɛ wafa sɛ yɛ e kwla yo sɔ wie ɔ?
3 ?Ngue ti yɛ Zoova fɛli i sɔ cenjele junman’n wlɛli i Mali sa nun ɔn? Kɛ anzi’n wa toli Mali m’ɔ yiyili like nga Ɲanmiɛn waan ɔ́ wá fɛ́ i yó’n i nun kleli i’n, Mali seli kɛ: “Min yɛ, n ti e Min Nyanmiɛn’n i afanniɛn, Nyanmiɛn nin ɔ nuan fɛ.” (Lik 1:38) Ndɛ nga Mali kannin’n, ɔ yili wafa nga i awlɛn’n fa ti’n mɔ Ɲanmiɛn dun mmua sieli i nzɔliɛ’n i nglo. W’a sisimɛn i bo naan w’a kplin anzi’n i ndɛ’n su. I lɛ’n nun’n, ɔ kleli kɛ like kwlaa nga Zoova waan ɔ́ fɛ́ i yo’n, ɔ ti i klun su. Sɛ ɔ wunnzɛ’n, wafa nga sran’m bé bú i’n ɔ nin wafa nga ɔ nin i soman’n be afiɛn’n wá yó’n, w’a fa usaman anzi’n. Kɛ Mali seli kɛ ɔ ti Zoova i afanniɛn’n, i lɛ nun’n ɔ kleli kɛ Zoova su yɛ i wla’n kwlaa o ɔ.
4 ?Ɔ ju wie’n ɔ yo amun kɛ Ɲanmiɛn junman nga amun di’n, ɔ su tin amun su naan ɔ tra amun wunmiɛn’n su? Maan e tinuntinun e usa e wun kɛ: ‘?N lafi su kpa kɛ Zoova yó maan ninnge’m be bo’n gúa kɛ ng’ɔ fa klo’n sa? ?N kle kɛ n kunndɛ kɛ ń dí junman nga Zoova mannin min’n sakpa?’ Maan amun si kɛ Ɲanmiɛn fɛ i wawɛ’n man be nga be fa be wla’n kwlaa guɛ i su mɔ be ɲin yi i’n.—Yol. 5:32.
Ɲanmiɛn wawɛ’n ukali Piɛli
5. ?Kwlaa naan afuɛ 33 nun Pantekɔtu’n w’a ju’n, wafa sɛ yɛ Ɲanmiɛn wawɛ’n ukali Piɛli ɔ?
5 Kwlaa naan afuɛ 33 nun Pantekɔtu’n w’a ju’n, kɛ Mali sa’n, junman dandan nga Ɲanmiɛn kwla fɛ i wawɛ’n di’n, akoto Piɛli bɔbɔ wunnin i jrɛiin sa. Zezi mannin Piɛli nin akoto onga’m be tinmin naan be fuan mmusu mun. (Mar. 3:14-16) Kannzɛ Biblu’n kɛnmɛn i sɔ’n i su ndɛ tɛkɛtɛkɛ’n kwlaa’n, sanngɛ e kwla wun i kɛ Piɛli fɛli i sɔ tinmin’n dili junman. Asa ekun’n, kɛ Zezi seli Piɛli kɛ ɔ nanti Galile jenvie’n su to i lɔ’n, Ɲanmiɛn wawɛ’n i fanngan nun maan Piɛli kwla nantili jenvie’n su. (An kanngan Matie 14:25-29 nun.) Ɔ maan ɔ ti weiin kɛ Piɛli lafili Ɲanmiɛn wawɛ’n su ti yɛ ɔ kwla yoli abonuan sa sɔ mun ɔn. Kɛ ɔ cɛli kan’n, Ɲanmiɛn wawɛ’n tinnin Piɛli nin Zezi i sɔnnzɔnfuɛ onga mun naan b’a yo ninnge uflɛ wie mun.
6. ?Afuɛ 33 nun Pantekɔtu’n nun’n, ngue yɛ Ɲanmiɛn wawɛ’n maan Piɛli kwla yoli ɔ? ?Kɛ blɛ sɔ’n sinnin’n, ngue yɛ Ɲanmiɛn wawɛ’n maan ɔ kwla yoli ekun ɔn?
6 Afuɛ 33 nun Pantekɔtu’n nun’n, Ɲanmiɛn wawɛ’n yoli maan Piɛli nin i wiengu’m be kwla kannin sran fanunfanun nga be bali Zerizalɛmu lɛ’n be aniɛn mun. Kɛ ɔ yoli sɔ’n, Piɛli jasoli naan w’a kan ndɛ w’a kle sran nga be yia lɛ’n. (Yol. 2:14-36) Laa’n, ninnge wie’m be yolɛ nun’n, Piɛli fali srɛ yɛ w’a buman akunndan. Sanngɛ kɛ Ɲanmiɛn fɛli i wawɛ’n mɛnnin i mɔ Pantekɔtu cɛn’n sinnin’n, kannzɛ be wa kleli i ɲrɛnnɛn’n yɛ be tanninnin i jasin fɛ’n i bolɛ’n, ɔ kannin Ɲanmiɛn ndɛ’n kleli sran mun yakpa su. (Yol. 4:18-20, 31) Ɲanmiɛn wawɛ’n yili sa wie’m be nglo kleli i. (Yol. 5:8, 9) I kpa bɔbɔ’n, Ɲanmiɛn wawɛ’n mɛnnin i tinmin maan ɔ cɛnnin sran kun.—Yol. 9:40.
7. ?Kɛ Ɲanmiɛn wawɛ’n jrali Piɛli su’n, Zezi i ndɛ benin yɛ ɔ wa wunnin be wlɛ ɔ?
7 Ka naan Pantekɔtu’n w’a ju’n, Piɛli wunnin ndɛ nanwlɛ nga Zezi kleli’n, be nun kpanngban be wlɛ. (Mat. 16:16, 17; Zan 6:68) Sanngɛ be nun wie’m be o lɛ’n w’a wunman be wlɛ. Kɛ Pantekɔtu’n sinnin’n yɛ ɔ wunnin be wlɛ ɔ. W’a wunmɛn i wlɛ kɛ, kɛ Zezi ko wu’n i cɛn nsan su’n, Ɲanmiɛn cɛ́n i naan ɔ́ káci aolia nun sran. Yɛ w’a wunmɛn i wlɛ ekun kɛ ɲanmiɛn su lɔ yɛ Klist trán dí famiɛn ɔn. (Zan 20:6-10; Yol. 1:6) Piɛli w’a wunmɛn i wlɛ kɛ klɔ sran kwla kaci aolia nun sran naan ɔ kwla tran ɲanmiɛn su lɔ di famiɛn. Kɛ Ɲanmiɛn wawɛ’n jrɛli i su Pantekɔtu nun m’ɔ yoli be nga bé kó trán ɲanmiɛn su lɔ’n be nunfuɛ’n, yɛ ɔ wa wunnin ndɛ sɔ’m be wlɛ ɔ.
8. ?Ngue yɛ be nga be kpali be sieli be ngunmin’n ɔ nin be nga be flɛ be “bua’m be wie” mun’n, be kwla si i ɔ?
8 Kɛ Ɲanmiɛn fɛli i wawɛ’n mannin Zezi i sɔnnzɔnfuɛ mun’n yɛ be wa wunnin ndɛ wie mɔ b’a wunman be wlɛ laa’n be wlɛ ɔ. Ɲanmiɛn wawɛ’n maan be nga i klikli nun’n be klɛli Biblu’n i Glɛki aniɛn’n nun’n, be yiyili ninnge ɲɛnmɛn nga Zoova waan ɔ́ yó’n be nun. (Efɛ. 3:8-11, 18) Andɛ’n, i be nga be kpali be sieli be ngunmin mun o, i be nga be flɛ be “bua’m be wie” mun o, be kwla suan ndɛ nanwlɛ sɔ mun yɛ be kwla wun be wlɛ. (Zan 10:16) ?Kɛ Ɲanmiɛn wawɛ’n uka e naan y’a si Ɲanmiɛn Ndɛ’n naan y’a wun i wlɛ’n, e si i sɔ’n su ye?
‘Nyanmiɛn Wawɛ’n sieli’ Pɔlu
9. ?Ɲanmiɛn wawɛ’n i fanngan nun’n, ngue yɛ Pɔlu kwla yoli ɔ?
9 Kɛ afuɛ 33 nun Pantekɔtu’n sinnin m’ɔ dili afuɛ kun annzɛ afuɛ kun gua su’n, Ɲanmiɛn fɛli i wawɛ’n kpali sran kun ekun. Sran sɔ’n yɛle Sɔlu mɔ be wa flɛli i Pɔlu’n. Wafa nga Ɲanmiɛn wawɛ’n fɛli i dili junman’n, e ɲan su ye andɛ. I wie yɛle kɛ Ɲanmiɛn wawɛ’n maan ɔ klɛli Biblu’n nun fluwa’m be nun 14. Kɛ nga Ɲanmiɛn wawɛ’n fa ukali Piɛli sa’n, ɔ ukali Pɔlu wie maan ɔ wunnin ndɛ wie’m be wlɛ yɛ ɔ klɛli be su fluwa. Ɔ wunnin i wlɛ kɛ sran sa’n ɔ kwla ko tran nguan nun tititi ɲanmiɛn su lɔ yɛ ɔ ɲan wunnɛn kun m’ɔ kwlá saciman ɔn. Ɲanmiɛn wawɛ’n maan Pɔlu yoli sran juejue, ɔ fuannin mmusu mun, yɛ ɔ cɛnnin sran kun nguan bɔbɔ! Sanngɛ Ɲanmiɛn wawɛ’n maan Pɔlu yoli like kun mɔ i cinnjin tra ng’ɔ yoli be lɛ’n be kwlaa ɔ. Andɛ’n, Ɲanmiɛn i sufuɛ’m be yo like kunngba sɔ’n wie. Sanngɛ wafa nga Ɲanmiɛn wawɛ’n uka be’n, ɔ nin wafa ng’ɔ fa ukali Pɔlu’n be timan kun.
10. ?Ndɛ nanwlɛ’n i kanlɛ’n nun’n, wafa sɛ yɛ Ɲanmiɛn wawɛ’n ukali Pɔlu ɔ?
10 Pɔlu mɔ “Nyanmiɛn Wawɛ’n sie i’n” ɔ jrannin Satan i sa nun sran tinwafuɛ kun ɲrun kannin ndɛ yakpa su kleli i. Kɛ ɔ́ yó sɔ’n nn bian ng’ɔ sie Sipri nvle’n o lɛ wie. Ɔ tili ndɛ kwlaa nga be kannin’n. Ndɛ nga Pɔlu kannin’n ɔ yoli i fɛ kpa, ɔ maan ɔ wa fali nanwlɛ atin’n su. Biblu’n waan Zoova “i ndɛ’n bɔ be kle’n ɔ boli i nuan kpa naan w’a lafi su.” (Yol. 13:8-12) Nanwlɛ, Pɔlu sili kɛ saan Ɲanmiɛn wawɛ’n i fanngan nun yɛ ɔ kwla kan ndɛ nanwlɛ’n juejue su ɔ. (Mat. 10:20) Cɛn kun’n, ɔ srɛli Efɛzi lɔ asɔnun’n nunfuɛ’m be kɛ be srɛ Ɲanmiɛn be mɛn i naan ‘kɛ ɔ uke i nuan’n, ɔ kle i ndɛ nga ɔ kan-an ɔ ti su’n.’—Efɛ. 6:18-20.
11. ?Wafa sɛ yɛ Ɲanmiɛn wawɛ’n ukali Pɔlu jasin fɛ’n bolɛ’n nun ɔn?
11 Nán ijɔlɛ ngunmin yɛ Ɲanmiɛn wawɛ’n ukali Pɔlu maan ɔ kwla ijɔli ɔ. Blɛ wie nun’n, w’a mɛnmɛn i atin kɛ ɔ bo jasin fɛ’n lika wie’m be nun. Blɛ kwlaa ng’ɔ́ tú ajalɛ kó dí i ngaliɛ difuɛ junman’n, Ɲanmiɛn wawɛ’n yɛ ɔ kleli i atin ɔn. (Yol. 13:2; an kanngan Sa Nga Be Yoli’n 16:6-10 nun.) Zoova te fɛ i wawɛ’n te kle e atin jasin fɛ’n i bolɛ nun andɛ. Kɛ Pɔlu sa’n, Zoova sufuɛ kwlaa nga be lo be wun be man Ɲanmiɛn wawɛ’n, be mian be ɲin be bo jasin fɛ’n yakpa su nin juejue su. Ɔ ti su kɛ wafa Ɲanmiɛn wawɛ’n kle e atin’n ɔ timan kɛ nga ɔ fa kleli Pɔlu’n sa. Sanngɛ e kwla lafi su kɛ Zoova te fɛ i wawɛ’n te yo naan sran kpa’m be ti ndɛ nanwlɛ’n.—Zan 6:44.
Junman nga Ɲanmiɛn fɛ i wawɛ’n ‘di’n ti fanunfanun’
12-14. ?Junman nga Ɲanmiɛn wawɛ’n di i Ɲanmiɛn i sufuɛ’m be nun’n ɔ ti kun? An yiyi nun.
12 Zoova rali Klistfuɛ klikli m’ɔ kpali be sieli be ngunmin’n be su. Kɛ e kanngan wafa nga Zoova yoli i sɔ’n i su ndɛ andɛ’n, ɔ wla e fanngan kpa. Ɲanmiɛn wawɛ’n yoli maan Klistfuɛ sɔ’m be kwla yoli ninnge fanunfanun wie mɔ be ti abonuan’n. Kɛ Pɔlu kán ninnge sɔ’m be ndɛ fluwa ng’ɔ klɛ ko mannin Klistfuɛ nga be o Korɛnti lɔ’n nun’n, ɔ seli kɛ: ‘Nyanmiɛn i ninnge b’ɔ fa man sran mun kɛ be yo’n be ti fanunfanun, sanngɛ i Wawɛ’n ti kunngba, junman’n ti fanunfanun, sanngɛ e Min’n ti kunngba, i dilɛ’n ti fanunfanun, sanngɛ Nyanmiɛn kunngba’n yɛ maan be yo i kwlaa sɔ nin-ɔn.’ (1 Kor. 12:4-6, 11) Pɔlu su kle kɛ junman nga Ɲanmiɛn wawɛ’n maan Ɲanmiɛn i sufuɛ’m be tinuntinun be di’n, ɔ kwla yo fanunfanun. Klist i sɔnnzɔnfuɛ nga be flɛ be “bua akpasua kaan” ɔ nin be nga be flɛ be “bua’m be wie” mun’n, Ɲanmiɛn wawɛ’n kunngba’n yɛ ɔ kle be atin ɔn. (Lik 12:32; Zan 10:16) Sanngɛ nán junman kunngba’n yɛ blɛ kwlaa nun’n ɔ fa be di ɔ.
13 I wie yɛle kɛ Ɲanmiɛn wawɛ’n yɛ ɔ sie aniaan kun asɔnun kpɛnngbɛn ɔn. (Yol. 20:28) Sanngɛ nán Klistfuɛ nga be kpali be sieli be ngunmin’n be ngba yɛ be ti asɔnun kpɛnngbɛn ɔn. ?Ngue yɛ i sɔ’n kle e ɔ? Ɔ kle e kɛ asɔnun’n nun’n, ɔ le sran kun nin i like liɛ nga Ɲanmiɛn wawɛ’n maan ɔ kwla yo ɔ.
14 Ɲanmiɛn wawɛ’n yo maan be nga be kpali be sieli be ngunmin’n be si jrɛiin kɛ b’a “kaci kɛ Nyanmiɛn klun ba sa.” Wawɛ kunngba’n yɛ Zoova fa cɛnnin i Wa kunngba cɛ’n i nguan naan w’a ko tran ɲanmiɛn su lɔ ɔ. (An kanngan Rɔmfuɛ Mun 8:11, 15 nun.) Wawɛ kunngba’n sɔ’n yɛ Zoova fa yili like kwlaa ɔ. (Bob. 1:1-3) Zoova fali wawɛ’n kunngba’n mannin Bɛzaleɛli i ngwlɛlɛ naan w’a kwla yo Ɲanmiɛn i tannin sua’n i nun ninnge mun. Kpɛkun ɔ tinnin Samsɔn naan w’a kwla yo sa sroesroe wie mun. Yɛ ɔ yoli maan Piɛli kwla nantili nzue’n i ɲin su. Ɔ maan kɛ be se kɛ Ɲanmiɛn wawɛ’n o sran kun su’n, ɔ nin kɛ Ɲanmiɛn wawɛ’n w’a kpa sran kun w’a sie i ngunmin’n, nɛ́n i kunngba’n niɔn. Junman fanunfanun nga Ɲanmiɛn fɛ i wawɛ’n di’n, be nun kun yɛle sran m’ɔ kpa be sie’n. Ɲanmiɛn bɔbɔ yɛ ɔ fɛ i sɔ ajalɛ’n niɔn.
15. ?Ɲanmiɛn su yaciman be nga bé kɔ́ ɲanmiɛn su’n be kpalɛ le? An yiyi nun.
15 Laa kpa lele m’ɔ́ fá jú andɛ’n, Ɲanmiɛn wawɛ’n di junman fanunfanun Ɲanmiɛn i sufuɛ kpa’m be nun. Ɔ dili junman be nun afuɛ akpiakpi kpanngban lele naan Ɲanmiɛn w’a bo be nga bé kɔ́ ɲanmiɛn su’n be kpalɛ bo. Afuɛ 33 nun Pantekɔtu nun yɛ Ɲanmiɛn boli be nga bé kɔ́ ɲanmiɛn su’n be kpalɛ bo ɔ. Sanngɛ ɔ le cɛn kun m’ɔ́ yáci sran’m be kpalɛ ɔ. Kannzɛ ɔ ti sɔ’n, sanngɛ Ɲanmiɛn wawɛ’n su yaciman Ɲanmiɛn i sufuɛ’m be nun junman dilɛ le. Ɔ́ yó i sɔ naan b’a kwla yo Ɲanmiɛn i klun sa’n tititi.
16. ?Ɲanmiɛn i wawɛ’n i fanngan nun’n, ngue yɛ Ɲanmiɛn i sufuɛ’m be yo ɔ?
16 ?Kɛ é sé yɛ’n, junman benin yɛ Zoova i wawɛ’n i fanngan nun’n, be su di i asiɛ’n su wa ɔ? Sa Nglo Yilɛ 22:17 tɛ su kɛ: “Nyanmiɛn Wawɛ’n nin atɔnvlɛ’n be se kɛ: ‘Bla!’ Sran ng’ɔ ti sa sɔ’n, maan ɔ se kɛ: ‘Bla!’ Sran nga nzue we kun i’n, maan ɔ bla, maan sran ng’ɔ klo kɛ ɔ́ fá nzue ng’ɔ man nguan’n, ɔ fa, dein su fite-man nun!” Andɛ’n, Zoova i wawɛ’n ɔ uka Klistfuɛ mun maan be yia ‘be nga be klo’n’ kɛ be bla be wa fa nzue ng’ɔ man nguan’n. Klistfuɛ nga bé wá kɔ́ ɲanmiɛn su’n be yɛ be dun be nga be di i sɔ junman’n be ɲrun mmua ɔ. Be nin be nga bé ká asiɛ’n su wa’n yɛ be di junman’n niɔn. Ɲanmiɛn wawɛ’n kunngba’n ɔ kle be akpasua nɲɔn sɔ’n, be atin. Asa kusu’n, be yoli be batɛmu “e Si Nyanmiɛn, nin i Wa’n, ɔ nin i wawɛ’n be dunman nun” be fa kleli kɛ be fali be wun mannin Zoova. (Mat. 28:19) Yɛ be mɛn dilɛ nun’n, be kplin su kɛ Ɲanmiɛn wawɛ’n kle be atin. Yɛle kɛ be yo sa nga Ɲanmiɛn wawɛ’n maan sran yo’n. (Gal. 5:22, 23) Kpɛkun Ɲanmiɛn wawɛ’n i fanngan nun’n, like kwlaa nga bé yó’n, be kplin be ɲin naan sa tɛ fi w’a tranman be nin Ɲanmiɛn be afiɛn.—2 Kor. 7:1; Ngl. 7:9, 14.
Maan e srɛ Ɲanmiɛn titi kɛ ɔ fɛ i wawɛ’n man e
17. ?Ngue yɛ e kwla yo naan y’a kle kɛ Ɲanmiɛn wawɛ’n o e su ɔ?
17 Kannzɛ e lafi su kɛ é kɔ́ ɲanmiɛn su’n, annzɛ é ká asiɛ’n su wa’n, sanngɛ “Nyanmiɛn b’ɔ kwla like kwlaa yo’n,” yɛ ɔ fɛ i wunmiɛn’n man e naan y’a nanti seiin titi naan y’a kwla ɲan like nga i waan ɔ́ fá mán e’n niɔn. (2 Kor. 4:7) Ɲanmiɛn Sielɛ’n i jasin mɔ e bo’n ti’n, be kwla yo e finfin. Sanngɛ sɛ e yaciman jasin fɛ’n bolɛ’n, i lɛ nun’n, e kle kɛ Ɲanmiɛn i wawɛ’n o e su. Nán maan e wla fi su kɛ ‘sɛ be kpɛ e nzowa Krist dunman b’ɔ o e su’n ti’n, e liɛ su ti ye, afin Nyanmiɛn Wawɛ’n b’ɔ lɛ nyrun’n ɔ nin e wo nun!’—1 Piɛ. 4:14.
18, 19. ?Wafa sɛ yɛ Zoova fɛ́ i wawɛ’n súan e bo ɔ? ?Ngue yɛ ɔ fataman kɛ e yaci i yolɛ ɔ?
18 Ɲanmiɛn fɛ i wawɛ’n cɛ be nga be tu be klun be srɛ i kɛ ɔ fa man be’n. Ɲanmiɛn wawɛ’n kwla yo maan e si ninnge’m be yo kpa tra laa’n. Kusu Ɲanmiɛn i klun sa nga e klo kɛ é tú e klun é yó’n, wawɛ sɔ’n kwla yo maan e klo sɔ tra laa’n. ‘Nyanmiɛn bɔbɔ yɛ maan i klun sa yolɛ’n yo e fɛ yɛ maan e kwla yo-ɔ.’ Like ɲɛnmɛn kɛ Ɲanmiɛn wawɛ’n sa’n, mɔ Ɲanmiɛn fa man e’n ɔ nin e ɲin nga e mian e “fa ndɛ b’ɔ man nguan’n” su’n, bé yó maan ‘é mían e nyin dí junman kpa kɛ ɔ ko yo naan y’a nyan e ti mlɔnmlɔn’n’ ti.—Fil. 2:12, 13, 16.
19 Maan e lafi Ɲanmiɛn wawɛ’n su naan e fa e wun wla junman kwlaa nga be fa man e’n i nun kpa. Yɛ e mian e ɲin naan e si i di kpa. Asa kusu’n, maan e srɛ Zoova kɛ ɔ suan e bo. (Zak 1:5) I liɛ’n, ɔ́ úka e maan é wún Ɲanmiɛn Ndɛ’n i wlɛ yɛ é wún e su sa’m be trawlɛ, yɛ é bó jasin fɛ’n. Zezi seli kɛ: “An srɛ, bé fá mán amun, an kunndɛ, amún nyɛ́n i, an bobo, bé tíke amun anuan.” (Lik 11:9, 13) Ɲanmiɛn wawɛ’n o ninnge ng’ɔ fata kɛ e srɛ’n be nun wie. I sɔ’n ti’n, maan e srɛ Zoova titi kɛ ɔ uka e naan e yo kɛ i sufuɛ ndɛnmanfuɛ m’ɔ fɛli i wawɛ’n kleli be atin’n sa.
?Amun kwla yiyi nun?
• ?Wafa sɛ yɛ e kwla sɔnnzɔn Mali naan Ɲanmiɛn w’a ra e su ɔ?
• ?Wafa sɛ yɛ Ɲanmiɛn wawɛ’n ukali Pɔlu ɔ?
• ?Wafa sɛ yɛ Ɲanmiɛn wawɛ’n uka Ɲanmiɛn i sufuɛ mun andɛ ɔ?
[Kosan mun]
[Foto, bue 26]
Ɲanmiɛn wawɛ’n maan Pɔlu kannin ndɛ yakpa su kleli sran tinwafuɛ kun.
[Foto, bue 28]
Andɛ’n Ɲanmiɛn wawɛ’n te kle be nga bé kɔ́ ɲanmiɛn su’n nin be nga bé trán asiɛ’n su wa’n be atin.
