?Ɲanmiɛn yɛ ɔ su kle e ɲrɛnnɛn ɔn?

Afuɛ 2011 nun’n, Marsi anglo’n nun’n, kɛ asiɛ’n kejeli Zapɔn lɔ’n, mɔ jenvie’n dili lika’n, ndɛ nga lɔ politikifuɛ kun kannin’n yɛ: “Kannzɛ bɔɔ n koko be nga be wuli’n, sanngɛ kɛ n niɛn i sa’n m bu i kɛ Ɲanmiɛn yɛ ɔ su kle e ɲrɛnnɛn ɔn.”

Afuɛ 2010 nun’n, Zanvie anglo nun’n, kɛ asiɛ’n kejeli Aiti lɔ’n, sran 220.000 tra su be wuli. Lɔ Ɲanmiɛn sulɛ wafa kun i su kpɛnngbɛn kun m’ɔ ijɔ televiziɔn nun titi’n, ɔ seli kɛ “be nin Satan trali aenguɛ,” ti yɛ ɲrɛnnɛn sa sɔ’n tɔli be su ɔ, naan ɔ fata kɛ “be fa be wun man Ɲanmiɛn.”

Filipini lɔ klɔ kun su’n, kɛ nzrafuɛ’m be susuli be wiengu bo mɔ sran 79 be wuli’n, mɔnpɛli kun seli kɛ: “Ɲanmiɛn kunndɛ kɛ e bu akunndan naan e lo e wun e mɛn i, i ti yɛ ɔ fa sa sɔ’n yili e su ɔ.” Lɔ zronali kun nun’n, be klɛli i kɛ: “Sɛ e fa sran ya’n, be nun 21 be lafi su kɛ Ɲanmiɛn fa asiɛ’n i kejelɛ’n ɔ nin aunmuan dandan nin ɲrɛnnɛn uflɛ wie’m mɔ be tɔ klɔ’n su titi’n, ɔ fa yi i ya’n i nglo.”

NÁN andɛ yɛ sran’m be lafi su kɛ Ɲanmiɛn fa ɲrɛnnɛn sa mun fa kle sa tɛtɛ yofuɛ’m be nun ɔn. Afuɛ 1755 nun’n, Pɔrtigali lɔ klɔ nga ɔ suan Lizbɔnu su lɔ’n, asiɛ’n kejeli, sin’n rali lika’n, kpɛkun jenvie’n dili lika’n. Ɔ maan sran 60.000 be wuli. Kɛ ɔ yoli sɔ’n, mɛn’n nun ngwlɛlɛ sifuɛ kun mɔ be flɛ i Vɔltɛli’n, ɔ usɛli i wun kɛ: “?Lizbɔnu lɔ sran’m be yo sa tɛtɛ tra Aflansi lɔ klɔ nga ɔ suan Pali’n i sufuɛ mun ti ɔ? Afin Pali lɔ’n sran’m be yoman sa sukusuku aɔwi, kusu nán be yɛ ɲrɛnnɛn sɔ’n tɔli be su ɔ.” Nanwlɛ, sran kpanngban be usa be wun kɛ: ?Ɲanmiɛn su fa sa sroesroe mun kle sran’m be ɲrɛnnɛn? Nvle kpanngban nun’n, kɛ sran’m be bu i sɔ ɔ.

I kwlaa sɔ’n ti’n, ɔ nin i fata kɛ e fa kosan nga mun e usa e wun: ?Sakpasakpa naan Ɲanmiɛn su fa sa sroesroe mun kle sran’m be ɲrɛnnɛn? ?Ɲrɛnnɛn sa nga koko nun wa’n, be lɔngɔli su’n, Ɲanmiɛn yɛ ɔ fa yili sran’m be su kɛ ɔ́ fá klé be nun ɔn?

Biblu’n kle kɛ Ɲanmiɛn fali nzue ɔ nin sin fa nunnunnin sran wie mun. Ɔ maan Ɲanmiɛn i suɛn tɔnlɛ m’ɔ o sran wie’m be klun’n ti’n, be jran ndɛ sɔ’m be su be se kɛ, Ɲanmiɛn fa like kɛ nzue, annzɛ sin, annzɛ aunmuan sa’n, ɔ fa kle sran’m be nun. (Bo Bolɛ 7:17-22; 18:20; 19:24, 25; Kalɛ 16:31-35) Sanngɛ sɛ e fa e ɲin sie i Biblu’n nun ndɛ sɔ’m be su’n, é wún i kɛ ngbaciɛ kpakpa nsan be o ɲrɛnnɛn sa nga be tɔ andɛ’n ɔ nin sran wie’m be nunnunlɛ nga Ɲanmiɛn nunnunnin be’n, be afiɛn. I klikli’n yɛle kɛ Ɲanmiɛn boli i jɔ kɛ ɔ su wa yo i sɔ sa. I nɲɔn su’n, Ɲanmiɛn w’a kpanndanman sran kpa nin sran tɛ mun w’a nunkunman be. Klunwifuɛ’m mɔ be bu be su nun waka’n, be ngunmin yɛ be wuli ɔ. Sanngɛ, andɛ’n kɛ ɲrɛnnɛn sa tɔ’n, ɔ kun sran kpa, ɔ kun sran tɛ. I nsan su’n yɛle kɛ, be nga b’a yoman sa tɛ’n, Ɲanmiɛn yoli naan b’a fin nun b’a fite.—Bo Bolɛ 7:1, 23; 19:15-17; Kalɛ 16:23-27.

Like wie fi kleman kɛ ɲrɛnnɛn sa nga be kun sran kpanngban kpa andɛ’n, be fin Ɲanmiɛn. ?Sanngɛ e kwla lafi su kɛ cɛn wie lele’n, ɲrɛnnɛn sa sroesroe sɔ’m bé wíe? ?Wafa sɛ yɛ e kwla sasa e wun be lika ɔ? É wá tɛ́ kosan sɔ’m be su ndɛ akpasua nga bé bá lɛ’n nun.