Wafa nga e kwla tu e klun e man Zoova like’n
Wafa nga e kwla tu e klun e man Zoova like’n
“Like kwlaa nga amún yó’n, an tu amun klun yo i kɛ e Min’n yɛ an su yo mɛn i sa.”—KOL. 3:23.
?WAFA SƐ YƐ AMÚN TƐ́ KOSAN NGA’M BE SU Ɔ?
?Aliɛ ba kwlaa nun’n, kɛ é yó e ninnge mun’n, wafa sɛ yɛ e kwla yi Zoova i ayɛ ɔ?
?Ɲanmiɛn sulɛ’n nun’n, ninnge benin mun yɛ be yolɛ’n ti kɛ tɛ yɛ e su yi man Ɲanmiɛn sa ɔ?
?Wafa sɛ yɛ e kwla fa ninnge nga e le be’n e man Zoova ɔ?
1-3. (a) ?Kɛ mɔ Zezi fɛli i wun yili e ti tɛ’n ti’n, Zoova kunndɛman kɛ e yi tɛ wafa uflɛ fi kun? An yiyi nun. (b) ?Tɛ i wafa nga e yi’n i su kosan benin yɛ e kwla fa usa e wun ɔn?
AKOTO’M be blɛ su’n, Zoova kleli i sufuɛ’m be weiin kɛ e ti kpɔlɛ tɛ nga Zezi yili’n, ɔ nunnunnin Moizi Mmla’n. (Kol. 2:13, 14) Laa’n, Zuifu’m be yi sraka annzɛ tɛ be man Zoova. Be yoli sɔ cɛli kpa. Sanngɛ kɛ Zezi yili i tɛ’n, Zoova w’a kloman kɛ be yo i sɔ kun. Afin like nga ti yɛ Ɲanmiɛn mannin Mmla’n i nuan yiali. Yɛle kɛ Mmla’n yoli ‘kɛ sran kun b’ɔ kleli be atin nga be fa su’n, lele Krist bali’ sa.—Gal. 3:24.
2 I sɔ’n kleman kɛ Klistfuɛ’m be ndɛ nunman tɛ yilɛ ndɛ nun kun. I kpa’n, akoto Piɛli kannin kɛ ɔ ti cinnjin kɛ Klistfuɛ’m be ‘[“yi tɛ be man,” NW] Nyanmiɛn wafa uflɛ.’ Naan ‘Jésus-Krist ti’n, i sɔ’n ɔ́ jɔ́ i klun.’ (1 Piɛ. 2:5) Asa ekun’n, akoto Pɔlu kleli weiin kɛ ninnge fanunfanun nga Klistfuɛ’m be yo’n, be ti kɛ “sraka” annzɛ tɛ yɛ be su yi man Ɲanmiɛn sa.—Rɔm. 12:1.
3 Ɔ maan kɛ e fa ninnge wie mun e man Zoova’n annzɛ i ti’n e kpɔci ninnge wie mun’n, ɔ ti kɛ tɛ yɛ e su yi mɛn i sa. ?Tɛ nga Izraɛlifuɛ’m be yili be laa’n i su like nga e si i’n, wafa sɛ yɛ ɔ kwla uka e naan tɛ nga e yi be andɛ’n, y’a si kɛ be jɔ Zoova klun ɔn?
NINNGE NGA E YO BE ALIƐ BA KWLAA NUN’N BE NUN
4. ?Aliɛ ba kwlaa nun’n, kɛ é yó e ninnge mun’n, ngue yɛ ɔ fataman kɛ e wla fi ɔ?
4 Aliɛ ba kwlaa nun’n, atrɛkpa’n e bumɛn i kɛ ninnge nga e yo be’n be ti kɛ tɛ yɛ e su yi e man Zoova sa. Kɔlɛ’n, e wunman kɛ junman nga e di’n, nin awlo nun junman dilɛ’n, nin suklu dilɛ’n, yɛ gua dilɛ’n ɔ nin be wunsu ninnge uflɛ mun be kwla yo maan e nin Zoova e afiɛn saci. Sanngɛ sɛ e fali e wun e mannin Zoova annzɛ e sunnzun kɛ é yó i sɔ koko nun wa’n, ɔ ti cinnjin kɛ e wun i wlɛ kɛ ninnge nga e yo be aliɛ ba kwlaa nun’n, be kan e nin Zoova e nantilɛ’n. Dɔ kwlaa su’n, e ti Klistfuɛ. Ɔ maan, ɔ fata kɛ e fa Biblu’n nun mmla’m be su sa kwlaa nun. I ti’n, Pɔlu wlali e fanngan seli kɛ: “Like kwlaa nga amún yó’n, an tu amun klun yo i kɛ e Min’n yɛ an su yo mɛn i sa, nán an bu i kɛ sran yɛ an su yo mɛn i-ɔ.”—An kanngan Kolɔsfuɛ Mun 3:18-24 nun.
5, 6. ?Ninnge benin mun yɛ ɔ fata e bu be akunndan naan y’a si nanti naan kusu y’a wlawla e wun kpa ɔ?
5 E bɔbɔ e ninnge nga e yo be aliɛ ba kwlaa nun’n, be nunman junman nga e di e man Ɲanmiɛn’n i nun wie. Sanngɛ Pɔlu wlali e fanngan kɛ like kwlaa nga é yó’n, maan ‘e tu e klun yo i kɛ e Min’n yɛ e su yo mɛn i sa.’ I sɔ m’ɔ kannin’n maan e bu wafa ng’ɔ fata kɛ e nanti blɛ kwlaa nun’n i akunndan. ?Blɛ kwlaa nun’n, e aeliɛ nin e wun wlawlalɛ’n be nin Klistfuɛ fata? ?Annzɛ kɛ é yó e bɔbɔ e ninnge mun’n, e aeliɛ’n nin e wun wlawlalɛ’n ti’n, sɛ e waan é sé sran’m be kɛ e ti Zoova i Lalofuɛ’n ɔ́ yó kekle? Nán maan ɔ yo sɔ le mlɔnmlɔn! E kunndɛman kɛ é yó like kun sa m’ɔ kwla saci Ɲanmiɛn i dunman’n.—Eza. 43:10; 2 Kor. 6:3, 4, 9.
6 Sɛ e klo kɛ ‘é tú e klun é yó like kwlaa kɛ e Min’n yɛ e su yo mɛn i sa’n,’ wafa nga i sɔ’n ɲán ta e akunndan’n nin ninnge fanunfanun nga e yo be’n su’n, é wá kɛ́n i ndɛ. Kɛ é yó i sɔ’n, maan ɔ tran e klun kɛ Zoova kunndɛli kɛ Izraɛlifuɛ’m be ninnge’m be nun kpakpafuɛ mun yɛ be fa mɛn i ɔ.—Tul. 23:19
WAFA NGA É YÍ I NGLO E NANTILƐ’N NUN’N
7. ?E wun mɔ e fa mannin Ɲanmiɛn’n ti’n, wafa sɛ yɛ ɔ fata kɛ e nanti ɔ?
7 E wun mɔ e fa mannin Zoova’n, ɔ ti ajalɛ kpa. I nun nga é yó sɔ’n, e tɛli i nda kɛ e nguan cɛn’n nun’n, i junman’n yɛ é dí ɔ. I sɔ’n kle kɛ é dún mmua bú Zoova i akunndan ka naan like kwlaa nga e waan é yó’n, y’a yo. (An kanngan Ebre Mun 10:7 nun.) Kusu e wunnin kɛ, kɛ e kunndɛli akunndan nga Zoova bu i sa kun su’n, mɔ e niannin su be fali ajalɛ’n, i bo’n guali kpa mannin e. (Eza. 48:17, 18) Ɲanmiɛn i sran’m be ti sanwun yɛ be di aklunjuɛ afin be nzuɛn’n fa Zoova m’ɔ ti be like klefuɛ’n i liɛ’n.—Sau. 11:44; Jue. 104:31.
8. ?Ngue ti yɛ ɔ ti cinnjin kɛ ɔ tran e klun kɛ Zoova ɲrun’n, laa tɛ nga Izraɛlifuɛ’m be yi’n be ti i liɛ mlɔnmlɔn ɔn?
8 Tɛ nga Izraɛlifuɛ’m be yi be man Zoova’n, Zoova waan be ti i liɛ mlɔnmlɔn. (Sau. 6:18; 7:1) Ebre nun ndɛ mma nga be kacili i kɛ “min liɛ mlɔnmlɔn’n,” ɔ kle ekun kɛ be fali like sɔ’n be sieli i ngunmin annzɛ Ɲanmiɛn nin sran jaman nun awɛ. Annzɛ kusu ɔ ti Ɲanmiɛn liɛ klonglo. Ɔ maan, sɛ e kunndɛ kɛ Zoova sɔ ninnge nga e yo e mɛn i mɔ be ti kɛ tɛ yɛ e su yi mɛn i sa’n, be nun’n, ɔ fataman kɛ e kan mɛn’n nun ninnge fiɛnfiɛn mun. Ɔ nin i fataman kaan sa kɛ e klo like nga Zoova kpɔ i’n. (An kanngan 1 Zan 2:15-17 nun.) Yɛle kɛ ɔ fataman kɛ e mantan sran annzɛ like kwlaa ng’ɔ kwla yo naan y’a yo fiɛn Ɲanmiɛn ɲrun’n. (Eza. 2:4; Ngl. 18:4) Asa’n, ɔ fataman kɛ e fa e ɲin e sie sa sukusuku nin ninnge fiɛnfiɛn nga sran’m be yo’n be su. Yɛ e buman be akunndan mlɔnmlɔn.—Kol. 3:5, 6.
9. ?Ngue ti yɛ wafa nga e nin sran mun e tran’n, ɔ ti cinnjin ɔn?
9 Pɔlu wlɛli i wiengu Klistfuɛ’m be fanngan kɛ: ‘Nán an yaci sa kpa nin sran ye yolɛ’n, afin i sɔ like’n yɛ be yo-ɔ ɔ jɔ Nyanmiɛn klun-ɔn.’ (Ebr. 13:16) Ɔ maan Zoova ɲrun’n, sa kpa nga e yo’n ɔ nin sran’m be ukalɛ’n be ti kɛ tɛ mɔ i klun jɔ su’n yɛ e su yi mɛn i sa ɔ. Sɛ e kle kɛ e klo e wiengu’n, ɔ́ klé kɛ e ti Klistfuɛ kpa.—Zan 13:34, 35; Kol. 1:10.
ƝANMIƐN I SULƐ’N NUN
10, 11. ?Wafa sɛ yɛ Zoova bu jasin fɛ’n bolɛ junman nga e di’n ɔ nin sulɛ nga e su i’n niɔn? ?Ngue yɛ ɔ fata kɛ i sɔ’n su e bo naan e yo ɔ?
10 Wafa nga e kwla yo sran’m be ye’n, i kun yɛle ‘like nga e wla o su’n i ndɛ kanlɛ.’ ?Kɛ e ɲan jasin fɛ’n bolɛ’n i wun atin’n, e bo? Pɔlu waan ɔ ti cinnjin kɛ “e manman Nyanmiɛn” naan “ɔ yo kɛ asenna like bɔ e fa man Jésus kɛ ɔ fa mɛn i’n sa. Kɛ é yó sɔ’n [maan] e bo [Nyanmiɛn] dunman.” (Ebr. 10:23; 13:15; Oze 14:3) Sɛ e bu blɛ nga e fa bo jasin fɛ’n ɔ nin wafa nga e kwla si i bo kpa tra laa’n be su akunndan’n, ɔ kwla yo e ye. Be siesieli junman dilɛ aɲia’n i nun junman wie mun naan be uka e i sɔ yolɛ’n nun. Sanngɛ like ng’ɔ fataman kɛ e wla fi su’n yɛle kɛ jasin fɛ’n mɔ e nin asɔnun’n nunfuɛ mun e bo’n, ɔ nin nga kɛ e ɲɛn i wun atin’n e bo’n be ti kɛ “asenna like bɔ e fa man” Ɲanmiɛn’n sa, naan be o e Ɲanmiɛn sulɛ’n nun wie. Ɔ maan ɔ fata kɛ e nian nun e yo i kpa. I yo, ɔ le sran kun nin i su sa. Sanngɛ sɛ e bu Zoova i sulɛ’n i like cinnjin annzɛ e bumɛn i like cinnjin’n, blɛ sunman nun’n, be wun i sɔ liɛ’n dɔ nga e di i jasin bolɛ’n nun’n, i nun.
11 Zoova waan e fa blɛ e su i e awlo lɔ annzɛ asɔnun sua’n nun lɔ. I sɔ yɛ e yo ɔ. Ɔ ti su kɛ e diman wunmiɛn lolɛ cɛn’n i su mmla’n su kun. Yɛ e tuman ajalɛ e kɔman cɛn dilɛ Zerizalɛmu. Sanngɛ ninnge sɔ mɔ be yo be laa’n be le be wunsu ninnge wie mɔ e yo be andɛ ɔ. Yɛle kɛ kannzɛ aliɛ ba kun nun sa’n, e le ninnge kaka e yo’n, sanngɛ Ɲanmiɛn te kunndɛ kɛ e fa e blɛ’n wie e suan Biblu’n nun like naan e fa wie e srɛ i, yɛ e fa wie e wɔ aɲia’m be bo. Kusu’n, awlobo kpɛn mun yɛ ɔ fata kɛ be fa awlobofuɛ’m be Ɲanmiɛn sulɛ awlo lɔ’n i nun ta ɔ. (1 Tɛs. 5:17; Ebr. 10:24, 25) I kwlaa sɔ’n ti’n, ɔ ti kpa kɛ e usa e wun kɛ: ‘?N kwla yo maan wafa nga n su Ɲanmiɛn’n, ɔ yo kpa tra laa’n?’
12. (a) ?Andɛ’n, ngue yɛ e kwla fa ansans nga laa be ra be man Zoova’n e sunnzun i ɔ? (b) ?Wafa sɛ yɛ e srɛlɛ’n kwla yo kɛ ansans mɔ be rɛ i be man Ɲanmiɛn’n sa ɔ?
12 Jue kun nun’n, Famiɛn Davidi seli Zoova kɛ: “Min srɛlɛ nga n srɛ’n, maan ɔ yo ɔ nyrun kɛ ansans sa.” (Jue. 141:2) Maan e bu Ɲanmiɛn nga e srɛ’n i akunndan kan e nian. ?Aliɛ ba kun nun’n, e srɛ Ɲanmiɛn kpɛ nɲɛ? ?Yɛ ngue ndɛ yɛ e kɛn i e srɛlɛ’n nun ɔn? Sa Nglo Yilɛ fluwa’n fa “yalɛ nga Nyanmiɛn sran’m be koko kle i’n” sunnzun ansans. I waan srɛlɛ ng’ɔ ti Ɲanmiɛn klun su’n, ɔ ti kɛ ansans m’ɔ bɔn Zoova i bue nun fanninfannin’n sa. (Ngl. 5:8) Laa Izraɛlifuɛ’m be blɛ su’n, ansans nga be rɛ i be man Zoova aliɛ ba kwlaa nun’n, ɔ ti i liɛ ngunmin kun. Ɔ fata kɛ be bo be ɲin ase kpa be yo ansans sɔ’n kɛ Zoova fa kleli be’n sa naan i klun w’a jɔ su. (Tul. 30:34-37; Sau. 10:1, 2) I wafa kunngba’n, sɛ e srɛ Zoova kɛ nga i waan e yo’n sa naan e bu srɛlɛ’n i like ngunmin kun’n, e kwla lafi su kɛ Zoova sɔ́ nun.
LIKE MANLƐ NIN LIKE ƝANLƐ
13, 14. (a) ?Ngue yɛ Epafroditi nin Filipu lɔ asɔnun’n be yoli mannin Pɔlu ɔ? ?Wafa sɛ yɛ Pɔlu buli i sɔ liɛ’n niɔn? (b) ?Wafa sɛ yɛ e kwla nian Epafroditi nin Filipufuɛ’m be ajalɛ’n su ɔ?
13 Sika nga e yi e fa suan mɛn wunmuan’n nun jasin fɛ’n bolɛ junman’n i bo’n, kannzɛ ɔ sɔnnin o annzɛ w’a sɔnman o, ɔ ti kɛ tɛ yɛ e su yi e man Ɲanmiɛn sa. (Mar. 12:41-44) Akoto’m be blɛ su’n, Filipu lɔ asɔnun’n sunmannin Epafroditi kɛ ɔ fa ninnge wie mun ɔ nin sika ko man Pɔlu Rɔmu lɔ. Be waan bé yó i sɔ naan Pɔlu sa w’a mianman sika wun naan kusu i akunndan kwlaa w’a tran Ɲanmiɛn junman’n i dilɛ’n su. Nán kpalɛ klikli nga Filipufuɛ’m bé yó Pɔlu ye’n yɛ ɔ lɛ ɔ. ?Wafa sɛ yɛ Pɔlu buli ninnge nga be mɛnnin i’n niɔn? I waan be ti kɛ “like b’ɔ bɔn fannin bɔ be fa man Nyanmiɛn b’ɔ sɔ nun ɔ jɔ i klun’n sa.” (An kanngan Filipfuɛ Mun 4:15-19 nun.) Pɔlu sili Filipufuɛ’m be ye kpa. Zoova kusu, i klun jɔli wie.
14 Andɛ kusu’n, kɛ e fa e sa nun ninnge mun e suan mɛn wunmuan’n nun jasin fɛ’n bolɛ junman’n i bo’n, Zoova i klun jɔ kpa. Yɛ i waan like kwlaa nun’n, sɛ e dun mmua e fa e wun e mɛn i kɛ ɔ sie e’n, ɔ́ mán e ninnge nga bé yó naan y’a lafi i su kpa titi’n, ɔ nin ng’ɔ fata kɛ e ɲan be aliɛ ba kwlaa nun’n.—Mat. 6:33; Lik 6:38.
MAAN E KLE KƐ E SI YE
15. ?Ninnge benin wie’m be ti yɛ amun si Zoova i ye ɔ?
15 Ninnge nga be ti’n ɔ fata kɛ e si Zoova i ye’n, sɛ e waan é bóbó be’n, nán andɛ yɛ é wíe be bobo ɔ. ?Kɛ mɔ e o nguan nun’n ti’n, ɔ fataman kɛ aliɛ ba kwlaa nun’n e lɛ i ase? Zoova man e ninnge ng’ɔ fata kɛ e ɲan be naan y’a tran nguan nun titi’n. Be nun wie yɛle aliɛ nin tralɛ nin lawlɛ nin aunmuan nga e fa lo wunmiɛn’n. Asa kusu’n, ɔ yo maan e si Biblu’n nun ndɛ nanwlɛ’n mɔ maan e kwla lafi i su’n naan kusu y’a lafi su kɛ e ɲrun lɔ’n lika’n yó kpa’n. Kɛ mɔ Zoova ti e Yifuɛ m’ɔ yoli ninnge kpanngban mannin e’n ti’n, ɔ fata kɛ e su i yɛ e tu e klun e mɛnmɛn i, yɛ e yi i ayɛ.—An kanngan Sa Nglo Yilɛ 4:11 nun.
16. ?Wafa sɛ yɛ e kle kɛ e si e ti kpɔlɛ tɛ’n i su ye ɔ?
16 Like suanlɛ ng’ɔ sinnin lɛ’n nun’n, e wunnin i kɛ e ti kpɔlɛ tɛ’n ti like nanndoliɛ kpa kun mɔ Ɲanmiɛn yoli mannin klɔ sran mun ɔn. I sɔ liɛ’n yi klolɛ dan mɔ Ɲanmiɛn klo e’n i nglo. (1 Zan 4:10) ?Wafa sɛ yɛ e kle kɛ e si i su ye ɔ? Pɔlu seli kɛ: ‘Sa kwlaa nga e yo’n, e yo i klolɛ bɔ Krist fa klo sran’n ti. E si kɛ sran kun wuli sran’m be kwlaa be ti. Ɔ wuli be ngba be ti, i sɔ’n ti’n, olɛ nga be o lɛ’n, nán be bɔbɔ be olɛ yɛ be wo-ɔ, sanngɛ sran ng’ɔ wuli b’ɔ cɛnnin be ti’n, i dunman nun yɛ be wo-ɔ.’ (2 Kor. 5:14, 15) Pɔlu su se kɛ sɛ e si like nga Ɲanmiɛn yoli mannin e’n i su ye sakpa’n, é fá e nguan’n é yó like ng’ɔ manman Ɲanmiɛn nin i Wa’n. Ninnge nga e yo e fa kle kɛ e klo Ɲanmiɛn nin Klist’n naan e si be ye’n, yɛle Ɲanmiɛn mmla’m be su nantilɛ’n, ɔ nin jasin fɛ’n mɔ e bo i aklunjuɛ su’n. Naan kusu é úka sran mun naan be kaci Zezi i sɔnnzɔnfuɛ’n.—1 Tim. 2:3, 4; 1 Zan 5:3.
17, 18. ?Wafa sɛ yɛ aniaan wie’m be ukali manmanlɛ nga be manman Zoova’n i su ɔ? An fa ndɛ kun yiyi nun.
17 ?Wafa nga amun tu amun klun be manman Ɲanmiɛn’n, amun kwla yo sɔ kpa ekun tra laa’n? Kɛ aniaan wie’m be buli ninnge kpakpa kpanngban nga Zoova yoli mannin be’n i akunndan’n, be ukali dɔ nga be fa bo Ɲanmiɛn Sielɛ’n i jasin fɛ’n su. Ɔ maan be yoli cɛn kunngun atin bofuɛ kpɛ kun annzɛ kpɛ sunman afuɛ kwlaa nun. Annzɛ be kacili titi atin bofuɛ. Wie’m be liɛ kusu’n, be ukali be junman nga be di be fa suan Zoova i anuannzɛ’n bo’n i su. Be fali be wun wlɛli i Ɲanmiɛn sulɛ sua’m be kpanlɛ junman’n nun. Ninnge kpakpa mɔ e kwla yo e fa kle kɛ e si ye’n be nun wie mun yɛ be o lɛ ɔ. Sɛ e yo be nin akunndan kpa’n, yɛle kɛ sɛ Ɲanmiɛn i ye silɛ nin i ase lalɛ ti yɛ e yo be e mɛn i’n, i klun jɔ́ be su.
18 Klistfuɛ sunman be kunndɛli kɛ bé lá Zoova i ase lele, nɛnnɛn nga ɔ dili be’n ti. Be nun kun yɛle Morena. Lele nin kɛ ɔ́ fá ɲín’n, ɔ kɔ katoliki. Ɔ kunndɛli kɛ ɔ́ sí Ɲanmiɛn nin like nga ti yɛ e o asiɛ’n su’n, be su ndɛ wie mun asɔnun katoliki’n nun. I sin, ɔ wa kunndɛli sɔ Azifuɛ’m be Ɲanmiɛn sulɛ wafa’m be nun. Sanngɛ i kwlaa sɔ’n yoli ngbɛn. San kɛ ɔ nin Zoova i Lalofuɛ’m be yiali mɔ be kleli i Biblu’n nun like’n, yɛ ɔ wunnin ndɛ sɔ’m be wlɛ ɔ. Biblu’n nun like nga Morena’n suannin’n ti’n, ɔ sili Zoova i ye dan. Afin like sɔ’n maan ɔ dili aklunjuɛ kpafuɛ’n. I sɔ’n ti’n, ɔ kunndɛli kɛ ɔ́ fɛ́ i wunmiɛn’n kwlaa dí Zoova i junman’n ɔ́ fá lɛ́ i ase. Ɔ maan kɛ be yoli i batɛmu cɛ’n, ɔ dili cɛn kunngun atin bolɛ junman’n anglo sunman lɔngɔli su. Kɛ ɔ ɲannin titi atin bolɛ junman’n i wun alaje cɛ’n, ɔ fɛli i wun wlali nun. I afuɛ 30 yɛ. Lele nin andɛ’n, ɔ te di blɛ kwlaa nun Ɲanmiɛn junman’n.
19. ?Wafa sɛ yɛ e kwla manman Zoova i kpa tra laa ɔ?
19 I yo, Zoova i sufuɛ kpa sunman be ɲanman atin bolɛ’n junman’n i dilɛ’n wun alaje. Kannzɛ Zoova i junman’n nga e kwla di’n ti sɛ ti sɛ’n, sɛ é kwlá sé’n, e ngba e kwla yi tɛ nga i klun jɔ su’n e mɛn i. Yɛle kɛ e kwla lafi Ɲanmiɛn su kɛ ɔ́ yó ninnge ng’ɔ sunnzunnin’n. E nantilɛ’n nun’n, e kwla nian Biblu’n nun mmla’m be su, afin e wla fiman su kɛ blɛ kwlaa nun’n, e ti Zoova i janunfuɛ. Kusu’n, junman kpa nga e di’n nun’n, e kwla mian e ɲin e yo naan sran kaka kpa ekun b’a ti jasin fɛ’n. Ɔ maan like kwlaa nga Zoova yoli mannin e’n i fɛ m’ɔ yo e’n ti’n, maan e ngba e tu e klun e yi tɛ nga andɛ’n e kwla e yi’n, e man Zoova titi.
[Kosan mun]
[Ndɛ kwle, bue 27]
?Ye nga Zoova yoli amun’n ɔ su amun bo kɛ amun mɛnmɛn i?
[Foto, bue 25]
?Blɛ kwlaa nga e ɲan jasin fɛ’n i bolɛ’n i wun atin’n, e bo?
