Abraamu: Sran m’ɔ lafili Ɲanmiɛn su’n

Lika’n w’a san. Abraamu jin gua su lɔ. Lika’n ti koun. Ɔ mɛn i ɲin su nian nzraama mɔ be ta nglo lɔ fuaii’n. Akunndan kunngba cɛ ng’ɔ bɛ i klun’n yɛle kasiɛ nga Ɲanmiɛn boli i’n. Ɲanmiɛn seli i kɛ i anunman’m bé wá sɔ́n kɛ nzraama kpanngban sɔ’m be sa. (Bo Bolɛ 15:5) Nzraama’m be ti Abraamu i wla kpɛnlɛ like. Be yo maan i ɲin kpɛn kasiɛ nga Zoova boli’n su. Be kle i ekun kɛ saan kasiɛ sɔ’m bé kpɛ́n su. ?Afin sɛ Ɲanmiɛn kwla yili ɲanmiɛn m’ɔ la nglo lɔ plaii’n, ɔ nin i su ninnge mun’n, nn ba yɛ ɔ kwlá manman Abraamu nin Sara ɔ? Abraamu i Ɲanmiɛn sulafilɛ’n i bo’n yɛ ɔ o lɛ ɔ.

?ƝANMIƐN SULAFILƐ’N I BO’N YƐLE BENIN? Biblu’n tu Ɲanmiɛn sulafilɛ’n i bo. I waan: “Nyanmiɛn su bɔ e lafi’n ti, e si weiin kpa kɛ y’a nyan like nga e wla o su’n, ɔ maan e si kpa kɛ like nga e wun-mɛn i’n wo lɛ.” Sran ng’ɔ lafi Ɲanmiɛn su’n, kasiɛ nga Zoova boli be’n be su kpɛnlɛ’n su yɛ i akunndan’n kwlaa wo ɔ. I ɲrun’n, ɔ ti kɛ b’a kpɛn su sa bɔbɔ.

?WAFA SƐ YƐ ABRAAMU YILI I ƝANMIƐN SULAFILƐ’N I NGLO Ɔ? Abraamu kleli kɛ ɔ lafi kasiɛ nga Ɲanmiɛn boli be’n su. Ɲanmiɛn su m’ɔ lafi’n ti, ɔ tuli i awuliɛ klɔ’n su. Ɔ lafili su kɛ Zoova klé i nvle uflɛ kɛ nga ɔ fa kannin’n sa. Ɲanmiɛn su mɔ Abraamu lafi’n ti’n, ɔ wlanwlannin Kanaan mɛn’n nun, afin ɔ si kɛ cɛn wie lele mɛn sɔ’n káci i anunman’m be liɛ. Yɛ Ɲanmiɛn su m’ɔ lafi’n ti’n, ɔ kali kan naan w’a fa Izaaki w’a yi tɛ w’a man Ɲanmiɛn, afin ɔ si kɛ sɛ ɔ ti mɔ Zoova cɛn i’n, ɔ́ cɛ́n i.​—Ebre Mun 11:8, 9, 17-19.

Abraamu fɛli i ɲin sieli i ɲrun lɔ sa’m be su. I laa nun ndɛ’n w’a yomɛn i cinnjin. Kannzɛ Ir lɔ’n, Abraamu nin Sara be le tranwlɛ kpa yɛ be di ye tra Kanaan lɔ’n, sanngɛ ‘be nyin w’a kpɛnman nvle nga be tuli lɔ’n su.’ (Ebre Mun 11:15) Like nga be fali be ɲin sieli su’n, yɛle wafa nga cɛn wie lele Ɲanmiɛn yrá be bɔbɔ nin be mma’m be su’n.​—Ebre Mun 11:16

?Abraamu i Ɲanmiɛn sulalilɛ’n kali ngbɛn? Cɛcɛ. Afin Zoova yiali kasiɛ kwlaa ng’ɔ boli’n, be nuan. Abraamu i anunman’m be wa sɔnnin lele be yoli nvle kun mɔ be flɛ i Izraɛli’n. Kɛ ɔ́ kɔ́ i ɲrun’n, Izraɛlifuɛ’m be wa trannin Kanaan kɛ nga Zoova kan kleli Abraamu’n sa.—Zozie 11:23.

?NGUE YƐ I KWLAA SƆ’N KLE E Ɔ? E kwla lafi su kɛ kasiɛ kwlaa nga Zoova boli’n, ɔ́ yía be nuan. Kannzɛ e klɔ sran mun e kwla bu i kɛ kasiɛ sɔ wie’m be kwlá kpɛnman su’n, sanngɛ e lafi su kɛ “Nyanmiɛn kwla sa’n kwlaa yo.”​—Matie 19:26.

Like nga Abraamu i ajalɛ’n kle e ekun’n, yɛle kɛ ɔ fataman kɛ e fa e ɲin sie i laa ninnge’m be su. Sanngɛ maan e ɲin tran fɛ nga é wá dí i e ɲrun lɔ’n su. I sɔ yɛ bian kun mɔ be flɛ i Zazɔn’n,  ɔ suɛnnin i yolɛ ɔ. Tukpacɛ tɛ wie m’ɔ yoli i’n, ɔ bubuli i mlɔnmlɔn. Ɔ seli kɛ: “Nanwlɛ, ɔ ju wie’n min wla kpɛn min laa nun.” Ɔ seli ekun kɛ: “Ninnge kanngan nga kɛ a wun be sa’n, a buman be like’n, be li yɛ min konvi sɔ be yolɛ dan ɔn. I wie yɛle kɛ blɛ wie nun’n, n klo kɛ ń tɔ́ min yi Amanda nun.”

Sanngɛ Zazɔn lafi su kpa kɛ Zoova yía kasiɛ ng’ɔ boli be’n, be kwlaa be nuan. Be nun wie yɛle kɛ ɔ ka kan’n, asiɛ’n káci mɛn klanman, kpɛkun sran nga be nin Ɲanmiɛn nantili klanman’n bé ɲán anannganman nguan yɛ bé yó juejue. * (Jue Mun 37:10, 11, 29; Ezai 35:5, 6; Sa Nglo Yilɛ 21:3, 4) Zazɔn se kɛ: “N se min wun kɛ mɛn’n i kpafuɛ te o min ɲrun lɔ.” Yɛ ɔ yiyi nun se kɛ: “Ɔ ka kaan sa’n, nga kwlaa wíe. I akluntitiɛ o, i awlaboe o, i ɲrɛnnɛn o, bé wíe mlɔnmlɔnmlɔn.” Nanwlɛ, Ɲanmiɛn sulafilɛ’n nun’n Zazɔn kle e ajalɛ kpa kɛ Abraamu sa!

[Ja ngua lɛ ndɛ’n]