Abraamu: Sran m’ɔ ti wun ase kanfuɛ’n

Wia’n su bo kpa. Abraamu ti i tannin sua’n nun lɛ. Ɔ́ mɛ́n i ɲin su ɔ, w’a wun sran nsan. * Yɛ ndɛndɛ kpa, ɔ wanndi ko kpali be atin ɔn. Ɔ srɛli be kɛ be wlu i awlo lɔ be lo wunmiɛn kan. Yɛ ɔ seli be kɛ ɔ́ blɛ́ be “like kan,” sanngɛ nán like kan yɛ ɔ fa blɛli be ɔ. Ɔ fali ajalɛ naan b’a blɛ be ndidiɛ like kpa. Be mannin be kpaun mɔ b’a tɔn i uflɛuflɛ’n ɔ nin nɔnnɔn nga w’a lafi’n nin nɔnnɔn mɔnnɛn. Yɛ be fali nannin mɔ w’a kpɛ cro mɔ i nnɛn’n nin a tinman’n be wlali be tro nun. Aliɛ mɔ Abraamu fa mɛnnin i aofuɛ mun’n, ɔ kle kɛ ɔ klo sran sikelɛ kpa. Sanngɛ kɛ nga é wá fá wún i’n sa’n, ɔ kle ekun kɛ ɔ ti wun ase kanfuɛ dan.​—Bo Bolɛ 18:1-8.

?BE WUN ASE KANLƐ’N I BO’N YƐLE BENIN? Sran ng’ɔ ti wun ase kanfuɛ’n, ɔ tumɛn i wun, ɔ bumɛn i kɛ i kpa tra be nga mun. I sɔ sran liɛ’n, sɛ sran wie’m be si ninnge wie’m be yo trɛ i’n, ɔ yomɛn i ya. (Filipfuɛ Mun 2:3) Kɛ be mɛn i afɔtuɛ annzɛ be kan ndɛ be kle i’n, ɔ tie. Sɛ ɔ ti m’ɔ di junman wie m’ɔ leman ɲrun’n man sran’n, ɔ di i aklunjuɛ su.

?WAFA SƐ YƐ ABRAAMU KLELI KƐ Ɔ TI WUN ASE KANFUƐ Ɔ? Abraamu suli sran mun aklunjuɛ su. Kɛ nga e fa kɛnnin i ndɛ’n i bo bolɛ’n nun’n sa’n, kɛ Abraamu wunnin aofuɛ nsan mun’n, ɔ ka lɛ fali be nun sɔlɛ wun ajalɛ. Ndɛndɛ kpa’n, i yi Sara boli like tɔnlɛ bo. Sanngɛ maan e sie i nzɔliɛ kɛ sran ng’ɔ dili junman’n i dan lika’n yɛle Abraamu. Ɔ wanndi ko kpali aofuɛ’m be atin, ɔ seli be kɛ ɔ́ mán be lika diwa kan. Ɔ wanndi ɔli kuku’n nun lɔ ko fali nnɛn nga be ko kun i’n, kpɛkun kɛ be tɔnnin aliɛ’n, i bɔbɔ yɛ ɔ fa mannin be ɔ. Abraamu kwla fa junman sɔ’n kwlaa wlɛ i junmanfuɛ’m be sa nun. Sanngɛ w’a yoman sɔ. Sran aenvuɛfuɛ sɔ’n bɔbɔ fɛli i wun wlali ninnge’m be yolɛ’n nun. W’a seman kɛ sran sulɛ nin i fataman.

Kɛ be nga Abraamu sie be’n be kan ndɛ’n, ɔ sie i su tie. Yalɛ nga Abraamu nin Sara be  kokoli mɔ Biblu’n kɛn i ndɛ’n, w’a sɔnman. Sanngɛ Biblu’n kɛn i kpɛ nɲɔn kɛ Abraamu sieli i su tieli Sara i nuan ndɛ yɛ ɔ fali su. (Bo Bolɛ 16:2; 21:8-14) Blɛ kun nun’n, ndɛ nga Sara kannin’n, i klikli nun’n, w’a “yo-man Abraam fɛ mlɔnmlɔn.” Sanngɛ kɛ Zoova seli Abraamu kɛ Sara i ndɛ yo fɛ naan ɔ fa su’n, Abraamu fali su.

?NGUE YƐ I KWLAA SƆ’N KLE E Ɔ? Sɛ e ti wun ase kanfuɛ sakpa’n, e wiengu’m be sulɛ’n yó e fɛ. Like kwlaa nga e kwla yo naan b’a wun be wun fɛ’n, é yó i aklunjuɛ su.

Kɛ be man e afɔtuɛ annzɛ be kan ndɛ wie kle’n mɔ e sɔ nun’n, i sɔ’n nun e kle kɛ e ti wun ase kanfuɛ. Sɛ be kan ndɛ wie m’ɔ nin nga e sunnzun’n timan kun’n nán e niɛn i sɔ’n ti naan e kpalo ndɛ sɔ’n. Sanngɛ maan e sɔ nun klanman. (Nyanndra Mun 15:22) Be nga sran uflɛ kan ndɛ kle be ɔ, be fa be su tie’n, i li sɛ be di kpɛn’n be wun sa yo ye kpa. Zan m’ɔ ti junman sunianfuɛ kpa w’a cɛ’n, ɔ seli kɛ: “N wunnin i kɛ junman sunianfuɛ kpa’n, ɔ yo maan be ng’ɔ nian be su’n be kwla kan be klun ndɛ.” Ɔ kan gua su kɛ: “Sɛ a ti sran kun i sunianfuɛ’n, ɔ fata kɛ a yo wun ase kanfuɛ naan w’a kplin su kɛ sran sɔ’n kwla si ninnge wie’m be yo tra ɔ. I kpa bɔbɔ’n, sran fi kwlá seman kɛ i kunngba yɛ ɔ si ngwlɛlɛ ɔ. Junman sunianfuɛ’n bɔbɔ kwlá seman sɔ.”

Kɛ be man e afɔtuɛ annzɛ be kan ndɛ be kle e mɔ e sie e su’n, mɔ e di junman ng’ɔ leman ɲrun e man e wiengu’n, kɛ Abraamu fa yoli’n sa’n, Zoova i klun jɔ e wun. Afin, “Nyanmiɛn nin be nga be tu be wun mun be lɛ i, sanngɛ ɔ yo aenvuɛfuɛ’m be ye.”​—1 Piɛr 5:5.

[Ja ngua lɛ ndɛ’n]