?Wan Yɛle Abraamu?

SRAN nga mɛn’n nun Ɲanmiɛn sulɛ wafawafa’m be bu be sran dan kɛ be fa bu Abrahamu sa’n, b’a sɔnman. I Zuifu mun o, i Ɲanmiɛn flɛfuɛ mun o, i Klistfuɛ mun o, be kwlaa be ɲin yi i. Sran’m be kannin kɛ Ɲanmiɛn Ndɛ’n nun’n, Abraamu * ti sran nanndoliɛ kpa, naan i Ɲanmiɛn sulafilɛ’n leman wunsu. Biblu’n kan kɛ sran kwlaa nga be lafi Ɲanmiɛn su’n, ‘Abraamu ti be si.’​—Rɔmfuɛ Mun 4:11.

?Ngue ti yɛ sran’m be ɲin yi Abraamu dan sɔ ɔ? Yɛle kɛ Abraamu kunngba cɛ yɛ Biblu’n flɛ i trele kɛ Ɲanmiɛn i janvuɛ ɔ. Ɔ flɛ i sɔ lele kpɛ nsan!​—2 Be Nyoliɛ 20:7; Ezai 41:8; Zak 2:23.

Kannzɛ ɔ ti sɔ’n, Abraamu ti sran kɛ e sa wie. Afɛ ng’ɔ o e su’n, i dan lika tɔli i su wie. Sanngɛ ɔ jrannin be kwlaa be ɲrun kekle kpa. ?Amun klo kɛ amún sí like ng’ɔ ukɛli i naan w’a kwla yo sɔ’n? Sɛ ɔ ti sɔ’n amun nian ndɛ nga Biblu’n kɛn i sran kpa sɔ’n su’n.

I finwlɛ’n

Afuɛ nga be flɛ i 2018 ka naan b’a wu Zezi’n, i nun yɛ be wuli Abraamu ɔ. Ɔ ɲinnin klɔ nga be i Ir’n su lɔ. (Bo Bolɛ 11:27-31) Klɔ sɔ’n ti aboje klɔ dan kpa. Sanngɛ i su amuɛn liɛ’n be kanman. Abraamu i si Teraki o amuɛn wafawafa sɔ’m be sɔfuɛ’m be nun wie. (Zozie 24:2) Sanngɛ Abraamu liɛ’n, Zoova * kunngba cɛ yɛ ɔ suli i ɔ. W’a fɛmɛn i wun w’a wlɛmɛn i amuɛn sɔlɛ’n nun wie.

?Ngue yɛ maan Abraamun fali ajalɛ sɔ’n niɔn? Kɛ be wuli i’n, ɔ dili afuɛ lele 150 naan Nowe i wa Sɛmu w’a wu. Sɛ Abraamu nin sran kpɛnngbɛn sɔ’n be sannin nun’n, nanwlɛ, e kwla se kɛ Sɛmu ɲannin ta kpa i su. Nn kusu’n, Sɛmu m’ɔ wunnin anannganman su nzue dan’n i tɔlɛ’n nun’n, ɔ yiyili wafa nga be fiteli nun’n i nun kleli i. Yɛ kusu nn Abraamu wunnin like nga ti yɛ Zoova m’ɔ deli Sɛmu nin i awlobofuɛ mun’n, i sulɛ’n ti cinnjin’n.

Sɛ Sɛmu yɛ ɔ kleli Abraamu i like o, annzɛ sran uflɛ o, sanngɛ ng’ɔ ti weiin yɛle kɛ Abraamu sɔli Ɲanmiɛn i su like nga be kleli i’n nun klanman. Zoova m’ɔ “sa sran i klun lɔ akunndan’n nian’n,” kɛ ɔ niannin Abraamu i klun lɔ’n, ɔ wunnin kɛ ɔ ti sran kpa. Kpɛkun ɔ ukɛli i naan ɔ yo kpa wɔ i ɲrun.​—Nyanndra Mun 17:3; 2 Be Nyoliɛ 16:9.

Sa nga be juli i su’n

Abraamu i mɛn dilɛ’n yoli fɛ kpa. Blɛ sunman nun’n, ninnge wie’m be yolɛ’n yoli kekle kpa i sa nun, sanngɛ nán ngbɛn ti ɔ. Maan e kan be nun nɲɔn kun ndɛ e nian.

▪ Ɲanmiɛn seli Abraamu kɛ ɔ tu i awuliɛ klɔ Ir su lɔ naan ɔ ko tran mɛn nga i bɔbɔ Ɲanmiɛn’n ɔ́ klé i’n nun. Kannzɛ Abraamu nin Sara be siman lika nga bé kó trán’n, ɔ nin like nga ti yɛ Ɲanmiɛn seli be kɛ be tu be klɔ’n su’n, sanngɛ be ɲin yili Ɲanmiɛn. I agualiɛ su’n, Abraamu nin Sara be ko trannin tannin sua nun Kanaan mɛn’n nun lɔ kɛ aofuɛ sa lele be fa wuli.​—Sa Nga Be Yoli’n 7:2, 3; Ebre Mun 11:8, 9, 13.

▪ I nun mɔ Abraamu nin Sara be nin a wuman ba’n, Zoova seli Abraamu kɛ ɔ́ yó maan i osu’n káci nvle dan kun. Zoova kan guali su kɛ Abraamu i dunman nun’n, ɔ́ yó asiɛ’n sufuɛ’m be kwlaa be ye. (Bo Bolɛ 11:30; 12:1-3)  Kɛ ɔ́ kɔ́ i ɲrun’n, Zoova kleli kɛ i wla w’a fiman ndɛ sɔ’n su. Ɔ wa seli Abraamu kɛ i anunman’m bé wá sɔ́n kɛ nzraama mun sa.​—Bo Bolɛ 15:5, 6.

▪ Kɛ Abraamu ɲannin afuɛ 99 m’ɔ ka kaan sa Sara ɲán afuɛ 90, Zoova seli be kɛ bé wá wú ba kun. Klɔ sran ɲrun’n, i sɔ liɛ’n kwlá yoman ye. Sanngɛ w’a cɛman naan Abraamu nin Sara b’a wun i kɛ ɔ leman like kun sa “bɔ i yolɛ ti kekle man” Zoova ɔ. (Bo Bolɛ 18:14) I afuɛ nuan m’ɔ́ yía’n, Abraamu mɔ w’a di afuɛ 100, ɔ wuli ba yasua kun. Ɔ flɛli i Izaaki. (Bo Bolɛ 17:21; 21:1-5) Ɲanmiɛn kɛnnin i trele kɛ ɔ́ sín Izaaki lika ɔ́ yó sran’m be kwlaa be ye.

▪ Kɛ ɔ dili afuɛ nɲɔn kun’n, Zoova seli Abraamu kɛ ɔ yo like kun m’ɔ ti abonuan’n. Ɔ seli Abraamu kɛ ɔ fɛ i wa Izaaki m’ɔ klo i kpa’n, ɔ yi tɛ mɛn i. Sanngɛ nn Izaaki nin a jaman bla naan se kɛ ba yɛ ɔ́ wú i ɔ. Kɛ Abraamu buli i wa’n i wie’n i akunndan’n, e kwla se kɛ i awlɛn kpɛli i klun, sanngɛ ɔ fɛfɛli i wun naan ɔ́ yó like nga Zoova waan ɔ yo’n. Abraamu lafili su kpa kɛ sɛ ɔ ti mɔ Ɲanmiɛn cɛn Izaaki naan i kasiɛ ng’ɔ boli be’n b’a kpɛn su’n, ɔ kwla cɛn i. (Ebre Mun 11:19) Kɛ Abraamu waan ɔ́ kpɛ́ i wa’n i kɔmin cɛ’n, Ɲanmiɛn jrɛnnin i naan w’a de Izaaki. Ɔ yoli Abraamu mo, i aɲinyiɛ dan’n ti. Kɛ ɔ yoli sɔ’n, Zoova flannin kasiɛ ng’ɔ boli Abraamu’n i nun kleli i ekun.​—Bo Bolɛ 22:1-18.

▪ Abraamu dili afuɛ 175, yɛ ɔ wuli ɔ. Biblu’n se kɛ: “Ɔ yoli oke, ɔ cɛli kpa.” Ɔ kan gua su bɔbɔ kɛ: “Ɔ dili ye lele guɛli i ti nin i bo.” (Bo Bolɛ 25:7, 8) I lɛ nun’n, kasiɛ kun ekun mɔ Ɲanmiɛn boli Abraamu’n, ɔ kpɛnnin su. Yɛle kɛ i ti’n boli je fitafita yɛ ɔ wuli wɛtɛɛ kɛ Ɲanmiɛn fa kannin’n sa.​—Bo Bolɛ 15:15.

Ajalɛ ng’ɔ mannin e’n

Abraamu timan Ɲanmiɛn sran annzɛ lalafuɛ sran sa ngbɛn. Andɛ nin andɛ’n, ninnge ng’ɔ yoli be’n be kle e ajalɛ m’ɔ fata kɛ e fa su ɔ. (Ebre Mun 11:8-10, 17-19) Abraamu i aeliɛ kpakpa’m be sɔnnin. É wá kán be nun nnan ndɛ. I Ɲanmiɛn sulafilɛ’n mɔ sɛ e kwla se’n yɛ sran’m be fa si i kpa’n, yɛ é fá bó i bo ɔ.

[Ja ngua lɛ ndɛ mun]

[Kuku, bue 4]

Biblu’n nun sran nanndoliɛ kpa kun

Biblu’n nun fluwa nga be flɛ i Bo Bolɛ’n i ndɛ tre blu klikli’m be nun’n, be kan sran sunman mɔ be lafili Ɲanmiɛn su’n be ndɛ. Be nun wie yɛle Abɛli nin Enɔku nin Nowe. Sanngɛ, i ndɛ tre 15 nga bé bɛ́ i sin’n be nun’n, sran kunngba yɛ be tɛli i ndɛ kan ɔn. Sran sɔ’n yɛle Abraamu.

Asa ekun’n, Abraamu su yɛ be dun mmua boli Biblu’n nun ndɛ cinnjin kpa’m be nun wie’m be su ɔ. Yɛle kɛ Abraamu...

▪ i su yɛ be dun mmua kannin kɛ Ɲanmiɛn ti kɛ ɲrɛn sa ɔ, yɛle kɛ ɔ ti i sufuɛ’m be sasafuɛ.​—Bo Bolɛ 15:1; an nian Mmla’n 33:29 ɔ nin Jue Mun 115:9 yɛ Nyanndra Mun 30:5 be nun.

▪ i su yɛ be dun mmua kannin Ɲanmiɛn i su lafilɛ ndɛ ɔ.​—Bo Bolɛ 15:6.

▪ i su yɛ be dun mmua kannin Ɲanmiɛn nuan ijɔfuɛ ndɛ ɔ.​—Bo Bolɛ 20:7.

▪ i su yɛ be dun mmua kannin klolɛ nga sran kun klo i wa’n i ndɛ ɔ.​—Bo Bolɛ 22:2.