‘Ba’n klo kɛ ɔ́ fɛ́ i Si’n klé’
‘Ba’n klo kɛ ɔ́ fɛ́ i Si’n klé’
“Sran fi si-man Nyanmiɛn Wa’n i Si’n, saan Ba’n bɔbɔ ɔ nin sran ng’ɔ klo kɛ ɔ́ fɛ́ i Si klé i’n, i yɛ ɔ si i-ɔ.”—LIK 10:22.
?WAFA SƐ YƐ AMÚN TƐ́ KOSAN’M BE SU Ɔ?
?Ngue ti yɛ Zezi kunngba cɛ yɛ ɔ kwla fɛ i Si kle sran mun ɔn?
?Ngue yɛ Zezi yoli naan sran’m b’a si i Si ɔ?
?Wafa sɛ yɛ e kwla yo kɛ Zezi sa naan y’a fa e Si’n y’a kle e wiengu mun ɔn?
1, 2. ?Kosan benin yɛ sran sunman be fa usa be wun ɔn? ?Yɛ ngue ti ɔ?
ANDƐ, sran sunman be wunman wafa nga Ɲanmiɛn ti’n i wlɛ kun. Ɔ maan be usa be wun kɛ: ‘?Sran’n i wafa benin yɛle Ɲanmiɛn?’ Be nga be tɔn be wun suɛn kɛ be ti Klistfuɛ’n be nun sunman be waan ɔ ti atre nsan. Sanngɛ be bɔbɔ be kwlá wunmɛn i bo. Fluwa klɛfuɛ kun m’ɔ ti Ɲanmiɛn sulɛ wafa sɔ’m be nun kpɛnngbɛn kun’n, ɔ seli kɛ: “Klɔ sran kwlá wunman ndɛ sɔ’n i wlɛ. Afin ɔ trɛ i kpɛn.” Wie mun ekun’n, be liɛ nga be kan’n yɛle kɛ Ɲanmiɛn nunman lɛ. Be waan abonuan ninnge nga be o nglo lɔ’n nin asiɛ’n su wa’n, be boli nun sa ngbɛn naan nán sran yɛ ɔ yili be ɔ. Bian nga be flɛ i Charles Darwin liɛ’n, w’a seman kɛ Ɲanmiɛn nunman lɛ. Sanngɛ i waan: “Ɲanmiɛn i su ndɛ’n tra klɔ sran’n i akunndan’n su.”
2 I kwlaa yoli o, sran kpanngban be kunndɛ kɛ bé sí Ɲanmiɛn i su ndɛ nanwlɛ’n. Sanngɛ kɛ ɔ́ kɔ́ i ɲrun’n, be sa sin bubu be. Afin wafa nga be fa yiyi Ɲanmiɛn i su ndɛ’n nun kle be’n, ɔ jɔman be klun. Ɔ maan, be yaci ndɛ sɔ’n i kunndɛlɛ. Nanwlɛ, be nga be lafiman Ɲanmiɛn su’n, Satan “sacili be akunndan’n.” (2 Kor. 4:4) I kwlaa sɔ’n ti’n, sɛ sran’m be dan lika be wunman sran ng’ɔ yili nglo nin asiɛ’n i su ndɛ nanwlɛ i wlɛ’n, ɔ boman e nuan!—Eza. 45:18.
3. (a) ?Wan yɛ ɔ fali e Yifuɛ’n kleli e ɔ? (b) ?Kosan benin mun yɛ é wá fá e ɲin síe be su ɔ?
3 Ɔ ti cinnjin kɛ sran’m be si Ɲanmiɛn kpa. Afin saan be nga be “flɛ e Min Nyanmiɛn’n,” be ngunmin cɛ yɛ bé fíte nun ɔn. (Rɔm. 10:13) Be nga be bo Ɲanmiɛn i dunman Zoova’n, be si kɛ ɔ o lɛ sakpasakpa. Zezi Klist tuli ndɛ cinnjin sɔ’n i ɲin kleli i sɔnnzɔnfuɛ mun. Ɔ fɛli i Si kleli be. (An kanngan Lik 10:22 nun.) ?Ngue ti yɛ sran wie fi w’a kwlá faman e Si’n w’a kleman sran mun kɛ Zezi sa ɔ? ?Wafa sɛ yɛ Zezi yoli sɔ ɔ? ?Yɛ wafa sɛ yɛ e kwla fa Zezi i ajalɛ’n su naan y’a fa e Si’n y’a kle e wiengu mun ɔn? Maan e fa e ɲin e sie kosan sɔ’m be su.
Ɔ LEMAN SRAN KUN M’Ɔ KWLA FA E SI’N KLE KƐ ZEZI SA Ɔ
4, 5. ?Ngue ti yɛ Zezi kunngba cɛ yɛ ɔ kwla fɛ i Si kle sran mun ɔn?
4 ?Ngue ti yɛ Zezi kunngba cɛ yɛ ɔ kwla fɛli i Si’n kleli sran mun ɔn? Afin ɔ nin i Si be o ɲanmiɛn su lɔ. I yɛ ɔ ti aolia nun sran klikli nga Ɲanmiɛn yili’n niɔn, i sin naan Ɲanmiɛn w’a yi ɲanmiɛn su lɔ nin asiɛ’n su wa ninnge mun. Ɔ ‘ti Ɲanmiɛn i Wa kunngba cɛ.’ (Zan 1:14; 3:18) I nun nga Zoova nin a yiman like uflɛ wie fi’n, ɔ nin Zezi kunngba yɛ be o lɛ ɔ. Ɔ maan Zezi nin i Si be mantannin kpa. Tranlɛ m’ɔ nin i be trannin leleele’n ɔ nin be afiɛn yalɛ mɔ be kokoli’n ti’n, Zezi sili i Si kpa. Be sran nɲɔn’n be wa kacili kɛ janvuɛ mɔ be ti koko nɲa nun ɔn, ɔ timan’n sa. (Zan 5:20; 14:31) Nanwlɛ, Zezi sili i Si’n i nzuɛn’n kpa!—An kanngan Kolɔsfuɛ Mun 1:15-17 nun.
5 Zoova waan i Wa’n ɔ yo i nuan ndɛ kanfuɛ. I ti yɛ be flɛ i ‘Nyanmiɛn ndɛ’n’ niɔn. (Ngl. 19:13) I sɔ’n ti’n, i kunngba cɛ yɛ ɔ kwla fɛ i Si kle sran mun ɔn. E wun like nga ti yɛ Zan seli kɛ Zezi mɔ yɛle “Ndɛ’n” ɔ “mantan Siɛ’n.” (Zan 1:1, 18, Jésus-Christ i amanien fè) Like kun ti yɛ Zan seli kɛ Zezi mantan Siɛ’n niɔn. Yɛle kɛ i blɛ su’n, ɔ le wafa kun mɔ sran’m be fa tran aliɛ sin ɔn. Sran’m be lala bɛ’m be su be mantan be wiengu. I liɛ’n be kwla koko yalɛ. Ɔ maan kɛ Zan se kɛ Zezi “mantan Siɛ’n” i sɔ’n kle kɛ Zezi nin i Si be kokoli be afiɛn yalɛ, be kannin be klun ndɛ kleli be wiengu.
6, 7. ?Ngue ti yɛ Siɛ’n nin Ba’n be afiɛn mantannin kpa ɔ?
6 “Cɛn kwlaa Ba’n yo [Ɲanmiɛn] i klun sa maan i klun jɔ klanman.” (An kanngan Nyanndra Mun 8:22, 23, 30, 31 nun.) Siɛ’n nin Ba’n be afiɛn mantannin kpa, afin be sran nɲɔn’n be dili junman likawlɛ. Kpɛkun Ba’n sɔnnzɔnnin i Si i nzuɛn’n. Asa ekun kɛ Zoova yili anzi nin klɔ sran mun’n, Zezi wunnin wafa nga i Si’n nin be nantili’n. I sɔ’n yoli maan ɔ wa kloli i Si kpa ekun. Kpɛkun i ɲin wa yili i kpa trali laa’n.
7 I nun nga Satan seli kɛ Zoova siman sran sie’n, Zezi wunnin wafa nga i Si’n siesieli ndɛ kekle sɔ’n. Yɛle kɛ ɔ wunnin kɛ ɔ klo sran, naan ɔ diman ndɛ kwlɛ naan kusu i ngwlɛlɛ’n leman sin, yɛ i tinmin’n ti dan. I sɔ’n ukali Zezi. Ɔ maan kɛ ɔ bali asiɛ’n su wa’n, ɔ wunnin sa nga be tɔli i su’n, be trawlɛ.—Zan 5:19.
8. ?Wafa sɛ yɛ Zezi i su ndɛ nga be kɛnnin i Biblu’n nun’n, ɔ uka e naan y’a wun wafa nga Ɲanmiɛn ti’n i wlɛ ɔ?
8 Kɛ mɔ Zezi nin Zoova be afiɛn mantan kpa ti’n, Zezi ngunmin yɛ ɔ kwla kle e i Si’n i sran’n i wafa nga ɔ ti’n niɔn. Ɔ maan sɛ e fa e ɲin e sie i Zoova i Wa kunngba cɛ’n i like klelɛ’n ɔ nin i ninnge nga ɔ yoli be’n be su’n, yɛ é sí Zoova kpa ɔ. Amun e bu ndɛ ng’ɔ o yɛ’n i akunndan e nian. ?Kɛ be se kɛ ‘be klo sran’n’, i bo’n yɛle benin? Nanwlɛ, ɔ le sran kun ɔ nin wafa nga ɔ́ fá yíyí ndɛ sɔ’n nun ɔn. Wie mun bɔbɔ be kwla kpɛ i kpo se kɛ be wunmɛn i wlɛ. Sanngɛ ndɛ nga Matie nin Marki ɔ nin Liki yɛ Zan be klɛli i Zezi su’n, yɛ wafa nga Zezi ukali sran mun’n, ɔ yo maan e wun sran klolɛ’n i wlɛ weiin. Kɛ e fa e ɲin e sie ndɛ sɔ’m be su mɔ e bu i akunndan kpa’n, kɛ be se kɛ ‘Nyanmiɛn’n yɛ ɔ ti sran klofuɛ’n,’ e wun i bo. (1 Zan 4:8, 16) Sanngɛ nán klolɛ mɔ Zoova fa klo sran mun’n, i ngunmin yɛ Zezi ukali i sɔnnzɔnfuɛ mun naan b’a wun i wlɛ ɔ. Ɔ ukali be ekun naan b’a wun Ɲanmiɛn i nzuɛn onga’m be wlɛ.
?WAFA SƐ YƐ ZEZI FƐLI I SI KLELI Ɔ?
9. (a) ?Ninnge cinnjin nɲɔn benin yɛ Zezi yoli naan sran’m b’a si i Si ɔ? (b) ?Sunnzun ase benin yɛ Zezi fali naan sran’m b’a si i Si ɔ?
9 ?Ajalɛ cinnjin nɲɔn benin yɛ Zezi fali naan i sɔnnzɔnfuɛ nga be o i wun lɛ’n, ɔ nin sran nga cɛn wie lele’n bé wá káci i sɔnnzɔnfuɛ’n, b’a si e Si Ɲanmiɛn ɔn? Be nun klikli’n yɛle ninnge nga ɔ kleli sran mun’n, yɛ i nɲɔn su’n yɛle i ayeliɛ’n. Maan e kan ninnge nga ɔ fa kleli sran mun’n i ndɛ ka. Zoova i su ndɛ nga Zezi kan kleli i sɔnnzɔnfuɛ mun’n, ɔ kle kɛ ɔ wunnin akunndan nga i Si bu’n ɔ nin ninnge nga i Si yo be’n, be wlɛ kpa. Ɔ seli kɛ i Si ti kɛ bua tafuɛ mɔ i bua ba kun w’a mlin m’ɔ kɔ i kunndɛlɛ’n sa. Zezi waan kɛ bua tafuɛ’n ko wun i’n, “i klun jɔ i ti tra be nun ablangwlan-nin-ngwlan nga b’a mlin-man’n.” ?Ndɛ sɔ’n i bo’n yɛle benin? Zezi yiyi nun kɛ: “I kunngba nin-ɔn, amun Si b’ɔ o nyanmiɛn su lɔ’n ɔ klo-man kɛ ba kanngan nga’m be nun kun mlin.” (Mat. 18:12-14) ?Ngue yɛ ndɛ sɔ’n kle e Zoova su ɔ? Blɛ wie nun’n, ɔ kwla yo amun kɛ amun nunman sran nun naan amun ndɛ loman sran fi sa. Kannzɛ amun wun yo amun sɔ’n, sanngɛ maan amun si kɛ amun ndɛ lo amun Si m’ɔ o ɲanmiɛn su lɔ’n, yɛ ɔ nian amun lika. Ɔ maan, ɔ bu amun kɛ amun ti “ba kanngan nga’m” be nun kun.
10. ?Wafa sɛ yɛ Zezi i ayeliɛ’n ti’n, sran’m be sili i Si ɔ?
10 Zezi i ayeliɛ’n yɛ ɔ ti like i nɲɔn su nga ɔ ukali sran mun naan b’a si e Si Ɲanmiɛn ɔn. I ti yɛ kɛ akoto Filipu seli Zezi kɛ ɔ ‘kle be e Si’n,’ Zezi kwla tɛli i su kɛ: “Sran ng’ɔ wun min’n, wuun w’a wun e Si’n” niɔn. (Zan 14:8, 9) Wafa nga Zezi kleli kɛ ɔ yoli kɛ i Si sa’n, i su ndɛ wie’m be yɛ. Bian kun mɔ “kokowe’n wo i wunnɛn’n kwlaa su’n,” ɔ srɛli Zezi kɛ ɔ yo i juejue. Zezi tinngɛli i sa’n kɛnnin i yɛ ɔ seli i kɛ: “M’an ti, maan ɔ kokowe’n wie weiin.” Ɔ maan, bian sɔ’n wunnin i weiin kɛ Zoova yɛ maan Zezi kwla yoli i juejue ɔ. (Lik 5:12, 13) I wie ekun yɛle blɛ nga Lazali wuli’n. Lazali i wie’n ti’n, Zezi ‘i anwlɛn’n kpɛli i klun, i wun yoli i nyɛiin’ yɛ “ɔ sunnin.” Wafa nga Zezi i wun yoli i blɛ sɔ nun’n, ɔ kleli i sɔnnzɔnfuɛ’m be kɛ e Si Ɲanmiɛn ti sran aunnvuɛ sifuɛ. Kannzɛ bɔbɔ Zezi si kɛ ɔ́ wá cɛ́n Lazali’n, sanngɛ afɛ ng’ɔ o Lazali i osufuɛ nin i janvuɛ’m be su’n, ɔ wluwluli i wun wie. (Zan 11:32-35, 40-43) Atrɛkpa’n, Biblu’n nun ndɛ nga be kan ninnge nga mɔ Zezi yoli be’n be ndɛ’n, mɔ be kle kɛ e Si Ɲanmiɛn si aunnvuɛ’n, be nun wie’m be o lɛ mɔ amun klo be kpa ɔ.
11. (a) ?Kɛ Zezi fuannin sran mun Ɲanmiɛn i sua’n nun lɔ’n, ngue yɛ i sɔ’n kle e i Si’n su ɔ? (b) ?Yɛ ngue ti yɛ i sɔ’n fɔnvɔ e ɔ?
11 Cɛn kun’n, Zezi fuannin sran nga be yo ninnge atɛ Ɲanmiɛn i sua’n nun’n. Ɔ fali ɲanman wɔli ngble yɛ ɔ kannin be nga be yo nannin nin bua’m be atɛ’n be bo. Ɔ guali sika kacifuɛ’m be sika’n i ase, yɛ ɔ suli be tabli’m be bo guali. ?Ngue yɛ sa sɔ mɔ Zezi yoli’n, ɔ kle e ɔ? (Zan 2:13-17) Ajalɛ sɔ mɔ Zezi fɛli i yasua su’n maan i sɔnnzɔnfuɛ’m be wla kpɛnnin ndɛ nga Famiɛn Davidi kɛnnin i laa kpa’n su. Ɔ seli kɛ: “Ɔ sua’n i klolɛ’n w’a kun n kpo.” (Jue. 69:10) Like nga Zezi yoli’n, ɔ kle kɛ Zezi kunndɛman kɛ be yo Ɲanmiɛn i sulɛ’n i finfin. ?Ngue yɛ ndɛ sɔ’n kle e e Si Ɲanmiɛn su ɔ? Ɔ kle e kɛ Ɲanmiɛn i tinmin’n ti dan naan ɔ́ wá núnnún ninnge tɛtɛ’n kwlaa nga be o mɛn nun’n. Yɛ ɔ kle e kusu kɛ Ɲanmiɛn i wun blibli i kɛ ɔ́ yó sɔ. Asa ekun’n, ɔ kle e kɛ, kɛ e Si Ɲanmiɛn nian asiɛ’n su wa m’ɔ wun kɛ sa tɛ yolɛ’n w’a kaci sran’m be aliɛ yɛ be di’n, ɔ tran ɔn, ɔ tranman. Nanwlɛ, i sɔ’n fɔnvɔ e afin ɔ kle e kɛ Zoova nin Zezi be ɲin kpaman sa nga ɔ o e su’n, i su.
12, 13. ?Zoova i su like benin yɛ wafa nga Zezi nin i sɔnnzɔnfuɛ’m be nantili’n, ɔ kle e ɔ?
12 Wafa kun ekun mɔ Zezi yoli maan sran’m be sili i Si’n, yɛle wafa nga ɔ nin i sɔnnzɔnfuɛ’m be trannin’n. Cɛn kwlaa i sɔnnzɔnfuɛ’m be si akplowa. Be waan bé wún be nun sran nga ɔ ti dan tra be kwlaa’n. (Mar. 9:33-35; 10:43; Lik 9:46) Kusu’n, i nun nga Zezi nin i Si be o ɲanmiɛn su lɔ’n, ɔ wunnin i kɛ Zoova kloman be wun dandan yolɛ’n mlɔnmlɔn. (2 Sam. 22:28; Jue. 138:6) Asa ekun’n, ɔ wunnin i kɛ nzuɛn tɛ sɔ’n o mmusu’m be si Satan’n i nun wie. I bɔbɔ ngunmin i wun akunndan yɛ ɔ bu ɔ. Like nga i ɲin o i sin kpa’n, yɛle sran dan yolɛ ɔ nin dunman kunndɛlɛ’n. I sɔ’n ti’n, kɛ Zezi wunnin i kɛ i bɔbɔ i sɔnnzɔnfuɛ nga ɔ kleli be like’n, be kunndɛ dunman wie’n, ɔ yoli i ya kpa. Akoto’m be bɔbɔ be kunndɛli kɛ bé yó sran dan wie. Lele mɔ Zezi fá kɔ́ ɲanmiɛn su’n, be te kunndɛ sran nga ɔ ti be nun sran dan’n. (Lik 22:24-27) Ɔ nin i sɔ ngba’n, Zezi trɛli i awlɛn ɔ ukali be. Ɔ lafili su kɛ cɛn wie lele’n, bé yó be wun aenvuɛfuɛ kɛ i sa.—Fil. 2:5-8.
13 E si weiin kɛ wafa nga Zezi trɛli i awlɛn i sɔnnzɔnfuɛ’m be wun’n, m’ɔ ukali be blɛblɛblɛ naan b’a wla be nzuɛn tɛ’n i ase’n, ɔ niannin Zoova i liɛ’n su yɛ ɔ yoli ɔ. Asa ekun’n, ninnge nga Zezi yoli’n ɔ nin ndɛ nga ɔ kannin’n maan e si e Si Ɲanmiɛn kpa. I kwlaa sɔ’n kle e kɛ kannzɛ é tɔ́ sɛ, sanngɛ ɔ su yiman e ase le. Ɔ maan sɛ e yoli sa wie’n, srɛ kunman e. E kwla srɛ i kɛ ɔ yaci e sa tɛ’n cɛ e.
BA’N KLOLI KƐ Ɔ́ FƐ́ I SI KLÉ SRAN MUN
14. ?Wafa sɛ yɛ Zezi kleli kɛ ɔ klo kɛ sran’m be si i Si ɔ?
14 Mɛn siefuɛ sunman be fa ndɛ cinnjin nga ɔ fata kɛ sran nga be sie be’n be si i’n, be fia be wun. I liɛ’n, like kwlaa nga be se sran’m be kɛ be yo’n, bé yó. Sanngɛ Zezi liɛ’n, w’a yoman sɔ. Ɔ kloli kɛ ɔ́ fɛ́ i Si’n klé sran mun. (An kanngan Matie 11:27 nun.) Asa ekun’n, Zezi ‘kleli [i sɔnnzɔnfuɛ’m be] ngwlɛlɛ naan [b’a] si Nanwlɛfuɛ’n’ mɔ yɛle Zoova’n. (1 Zan 5:20) ?Wafa sɛ yɛ ɔ yoli sɔ ɔ? Yɛle kɛ ɔ tikeli i sɔnnzɔnfuɛ’m be ɲin naan b’a wun e Si i su ndɛ ng’ɔ kan kleli be’n, i wlɛ. Sanngɛ ndɛ kɛ Ɲanmiɛn ti atre nsan m’ɔ ti sukusuku kpa’n, w’a faman ndɛ kɛ ngalɛ’n sa w’a fa sannganman be akunndan’n.
15. ?Ngue ti yɛ Zezi w’a kaman lɛ w’a kanman i Si’n i su ndɛ kwlaa ng’ɔ si i’n, w’a kleman i sɔnnzɔnfuɛ mun ɔn?
15 ?Zezi i Si’n i su ndɛ kwlaa nga ɔ si i’n yɛ ɔ fa kleli i sɔnnzɔnfuɛ mun ɔn? Cɛcɛ. I lɛ nun’n, ɔ fali akunndan nantili. Yɛle kɛ ndɛ wie’m be o lɛ’n, w’a fa kleman be. (An kanngan Zan 16:12 nun.) ?Ngue ti yɛ ɔ yoli sɔ ɔ? Ɔ yoli sɔ afin be “ti nin a kwlá sɔn-mɛn i bo.” Sanngɛ ɔ seli kɛ, kɛ Ɲanmiɛn fɛ́ i wawɛ’n mán be’n, ‘ɔ́ klé be sa ng’ɔ ti nanwlɛ’n i kwlaa.’ (Zan 16:13) Siɛ nin niɛn’m be si kɛ, kɛ ba’m be te yo kanngan’n, ndɛ wie’m be o lɛ’n, be kwlá wunmɛn i wlɛ. Ɔ maan, be minndɛ kɛ ba’m be ɲin kan naan b’a kwla kan ndɛ sɔ’m b’a kle be. I kunngba’n, Zezi minndɛli kɛ i sɔnnzɔnfuɛ’m be ɲin ti naan be wun ninnge wie’m be wlɛ, kwlaa naan w’a kan e Si Ɲanmiɛn’n i su ndɛ wie mun w’a kle be. Nanwlɛ, i sɔ mɔ Zezi yoli’n kle kɛ ɔ buli i sɔnnzɔnfuɛ’m be sran.
KƐ ZEZI SA’N, MAAN E UKA SRAN UFLƐ NAAN Ɔ SI ZOOVA
16, 17. ?Ngue ti yɛ e kwla fa like nga e si i e Si’n su’n, e kle sran uflɛ ɔ?
16 Sɛ e nin sran kun e nanti naan kɛ ɔ́ kɔ́ i ɲrun’n, e wun i kɛ i nzuɛn ti kpa’n, e kunndɛ kɛ é kán sran sɔ’n i ndɛ klé sran uflɛ. I kunngba’n yɛ Zezi yoli ɔ. Kɛ ɔ bali asiɛ’n su wa’n, ɔ kannin i Si i ndɛ kleli sran mun. (Zan 17:25, 26) ?Wafa sɛ yɛ e kwla yo kɛ Zezi sa ɔ?
17 E wunnin i kɛ Zezi si i Si tra sran kwlaa. Sanngɛ w’a faman i Si’n i su like ng’ɔ si i’n, w’a fiaman sran’m be wun. I wun bliblili i kɛ ɔ́ kɛ́n i sɔ ndɛ klé sran mun. I kpa’n, ɔ kleli i sɔnnzɔnfuɛ’m be ngwlɛlɛ naan b’a si Ɲanmiɛn kpa. E kusu, e si Ɲanmiɛn kpa tra sran kpanngban andɛ. Zezi yɛ ɔ ukali e naan y’a kwla si Ɲanmiɛn sɔ ɔ. Ninnge nga ɔ kleli’n, ɔ nin wafa nga ɔ nin sran’m be nantili’n, yɛ ɔ fa ukali e sɔ ɔ. Nanwlɛ, e wla kwlá fiman like nga ɔ yoli naan y’a si Ɲanmiɛn’n i su le! Ɔ maan, e kwla fa silɛ mɔ e si Ɲanmiɛn’n, e di e nuan bɔbɔ! (Zer. 9:23; 1 Kor. 1:31) Kɛ mɔ e fali e wun e mantannin Zoova’n, i kusu fɛli i wun mantannin e wie. (Zak 4:8) Ɔ maan, e kwla kan like nga e si i’n, i ndɛ e kle sran uflɛ. ?Wafa sɛ yɛ e kwla yo sɔ ɔ?
18, 19. ?Wafa sɛ yɛ e kwla yo naan y’a fa e Si’n y’a kle e wiengu mun ɔn?
18 Maan e yo kɛ Zezi sa naan ndɛ nga e kan’n ɔ nin ninnge nga e yo’n, be yo maan sran’m be si e Si Ɲanmiɛn’n. Nán maan e wla fi su kɛ sran nga e to be jasin bowlɛ nun lɔ’n, be siman Ɲanmiɛn. Afin ndɛ nga sran’m be kan kleli be’n, ɔ ti ato ngunmin kokoko. Maan e fa Biblu’n e kle be Ɲanmiɛn i dunman’n yɛ e kan like nga Ɲanmiɛn waan ɔ́ yó mán sran mun’n i ndɛ e kle be wie. Asa ekun’n, maan e fa be ɲin e sie i sran’n i wafa nga Ɲanmiɛn ti’n i su wie. Asa kusu’n, Biblu’n nun ndɛ nga be ukeli e ɲin naan y’a si Ɲanmiɛn kpa’n, maan e nin e niaan Klistfuɛ mun e koko su yalɛ. I sɔ’n wá úka be wie.
19 Maan e ayeliɛ’n ɔ uka sran mun naan be si e Si Ɲanmiɛn kɛ nga Zezi fa yoli’n sa. Sɛ sran’m be wun i kɛ e ti sran klofuɛ kɛ Klist sa’n, bé kúnndɛ kɛ bé fá be wun mántan Zoova nin Zezi. (Efɛ. 5:1, 2) Akoto Pɔlu waan kɛ mɔ ‘ɔ nian like nga Krist yo’n su ɔ yo’n, e kusu e nian nga ɔ yo’n su, e yo.’ (1 Kor. 11:1) Wafa nga e fa nanti’n, ɔ uka sran mun naan b’a si Zoova kpa. Nanwlɛ, i sɔ’n ti e cenjele dan! I sɔ’n ti’n, maan e kwlaa e yo kɛ Zezi sa naan e fa e Si’n e kle e wiengu mun.
[Kosan mun]
