Be kunndɛ kɛ bé sí i su nanwlɛ’n
Be kunndɛ kɛ bé sí i su nanwlɛ’n
“Be flɛ i kɛ sran kwlaa le [Zezi] i su ndɛ kun m’ɔ kwla kan ɔn. Kannzɛ e Ɲanmiɛn sulafilɛ’n ti sɛ ti sɛ’n, annzɛ e lafiman Ɲanmiɛn su o, e kwlaa e usa e wun kɛ: ‘?Wan yɛle bian sɔ’n?’”—STAN GUTHRIE, Ɔ TI FLUWA KLƐFUƐ.
SRAN’M be kunndɛ kɛ bé sí Zezi i su nanwlɛ’n. Ɔ maan i su fluwa nga be yili’n, be toli be kpa. Yɛ i su flimu nga be yi be’n b’a tru kpa liɛ su. Ɔ nin i sɔ ngba’n sran’m be te kpɛ Zezi i silɛ’n i sin atin. Yɛ i sran wafa ng’ɔ ti’n i su akunndan nga be bu’n ti fanunfanun.
Ɔ nin a diman afuɛ kpanngban, zronali klɛfuɛ nɲɔn be klɛli kosan kun be sieli i ɛntɛnɛti su, yɛ be yiali sran’m be kɛ be tɛ su. Kosan sɔ’n yɛ: “?Wan yɛle Zezi?” Wafa nga sran’m be tɛli su’n, be nun wie yɛ:
● “Kɛ e niɛn i sa’n, e kwla se kɛ ɔ ti Rabi kun m’ɔ sili sran’m be annvuɛ kpa ɔ. (Rabi’n i bo yɛlɛ ninnge klefuɛ.)”
● “Ɔ ti sran kɛ e sa sanngɛ i liɛ’n, i nantilɛ wafa’n yoli i liɛ ngunmin.”
● “Like fi kleman kɛ sran kun mɔ be flɛ i Zezi’n ɔ trannin asiɛ’n su wa.”
● “Zezi ti Ɲanmiɛn i Wa. Be wuli i, ɔ wa wuli, kpɛkun be cɛnnin i naan w’a de e sa tɛ’n i sa nun. Kɛ é sé yɛ’n, ɔ o nguan nun yɛ ɔ́ sɛ́ i sin asiɛ’n su wa ekun.”
● “N lafi su kɛ Ɲanmiɛn i wa kunngba cɛ’n yɛle Zezi Klist. I kunngba’n ti klɔ sran yɛ i kunngba’n ti Ɲanmiɛn.”
● “Be nga be bu bakan akunndan’n, yɛ be lafi Zezi i su ndɛ nga sran’m be kan’n su ɔ.”
Nanwlɛ, Zezi i su ndɛ fanunfanun nga sran’m be kɛn i yɛ’n i ngba’n kwlá yoman su. ?Ɔ maan, Zezi i su kosan nga e fa usa e wun’n, ɔ le like kpa kun sa m’ɔ kwla kle e be su tɛlɛ’n niɔn? Fluwa ng’ɔ o yɛ’n, i klɛfuɛ’m be lafi su kɛ Biblu’n ti Ɲanmiɛn i nuan ndɛ naan i ngunmin cɛ yɛ ɔ di Zezi i su nanwlɛ kle e ɔ. *—2 Timote 3:16.
Zezi i su kosan wie mɔ sran’m be usa be titi’n, wafa nga Biblu’n tɛ be su’n, é wá wún i ndɛ ng’ɔ́ bá lɛ’n nun. I bɔbɔ seli kɛ “sran kwlaa ng’ɔ lafi i su’n,” ɔ́ fíte nun. (Zan 3:16) É yía amun kɛ amun nian wafa nga be tɛli kosan sɔ’m be su’n. Kpɛkun, sɛ ɔ ti mɔ amun suan Zezi bɔbɔ i su like ekun, yɛ sɛ ɔ ti mɔ amun suan wafa nga amun kwla lafi i su kpa’n i su like wie’n, amún wún i.
[Ja ngua lɛ ndɛ’n]
^ Sɛ amun kunndɛ kɛ amún sí nun ekun’n, amun kwla nian fluwa ?Ngue like yɛ Biblu’n kle i sakpasakpa ɔ? i ndɛ tre 2 nun. I flɛlɛ’n yɛle “Biblu’n fin Ɲanmiɛn.” Zoova i Lalofuɛ mun yɛ be yili ɔ.
