?Amun yi Zoova i aɲrunɲan’n i nglo?

‘E ti kɛ niannun sa, e yi Zoova i aɲrunɲan’n i nglo.’​—2 KOR. 3:18, NW.

?AMÚN TƐ́ SU SƐ?

?Kannzɛ e nin sa tɛ yolɛ’n e fin e nin klun’n, ngue yɛ maan e kwla yi Zoova i aɲrunɲan’n i nglo ɔ?

?Wafa sɛ Ɲanmiɛn srɛlɛ’n nin aɲia’m be bo kɔlɛ’n uka e naan y’a yi Ɲanmiɛn i aɲrunɲan’n i nglo ɔ?

?Ngue yɛ ɔ kwla uka e naan y’a manman Zoova tititi ɔ?

1, 2. ?Ngue ti yɛ klɔ sran’m be nian Ɲanmiɛn’n i aeliɛ’n su’n, ɔ yo ye ɔ?

 KƐ E wo sa’n, ɔ le like kun mɔ i nun’n, e fa e si annzɛ e nin ɔn. Atrɛkpa’n, b’a se ba yasua kaan kun e ɲrun le kɛ: “A ti kɛ ɔ si sa cɛ.” Annzɛ b’a se ba bla kun e ɲrun le kɛ: “A yo maan min ɲin kpɛnkpɛn ɔ nin su.” Asa kusu’n, blɛ sunman nun’n ba kanngan’m be nian ninnge nga be si nin be nin’m be yo’n su be yo wie. ?Yɛ e li? ?E kwla sɔnnzɔn e Si Zoova m’ɔ o ɲanmiɛn su lɔ’n? Kannzɛ e nin a wunmɛn i le’n, sanngɛ kɛ e nian ninnge ng’ɔ yili be’n, e kwla wun i ninnge yolɛ wafa m’ɔ yo ɲɛnmɛn’n. Asa kusu’n, sɛ e suan Biblu’n i nun like’n, naan e bu i nun ndɛ’m be su akunndan’n é sí Ɲanmiɛn i nzuɛn’n. I li sɛ e bu ndɛ nga Ɲanmiɛn i Wa Zezi Klist kannin be’n, ɔ nin ninnge ng’ɔ yoli’n be’n be su akunndan’n, yɛ é sí i sran wafa’n i kpa bɔbɔ ɔ. (Zan 1:18; Rɔm. 1:20) I kwlaa sɔ’n kle kɛ e kwla nian Zoova i ninnge yolɛ wafa’n su e yo wie naan i sɔ’n nun’n y’a yi i aɲrunɲan’n i nglo.

² Ka naan Ɲanmiɛn w’a yi Adam nin Ɛvu’n, ɔ si weiin kɛ klɔ sran’m bé kwlá yó i klun sa’n, naan bé níɛn i aeliɛ’n su’n, yɛ bé mɛ́nmɛ́n i. (An kanngan Bo Bolɛ 1:26, 27 nun.) Kɛ mɔ e ti Klistfuɛ’n ti’n, e kunndɛ kɛ é nían e Ɲanmiɛn’n i aeliɛ’n su. Sɛ e yo sɔ’n, é yí Ɲanmiɛn i aɲrunɲan’n i nglo. I sɔ liɛ’n kusu ti e cenjele like dan. Kannzɛ e finwlɛ’n ti sɛ ti sɛ’n, sɛ e si fluwa o annzɛ e siman fluwa o, e ngba e kwla yi Ɲanmiɛn i aɲrunɲan’n i nglo. ?Ngue ti ɔ? Afin “Nyanmiɛn liɛ’n, ɔ kpa-man sran nun, sanngɛ nvle kwlaa nun’n, sran ng’ɔ sro i b’ɔ yo i klun sa’n, i klun jɔ i wun.”​—Yol. 10:34, 35.

3. ?Kɛ e su Zoova’n, wafa sɛ yɛ e wun yo e ɔ?

³ Klistfuɛ nga be kpali be sieli be ngunmin’n be yi Zoova i aɲrunɲan’n i nglo. Akoto Pɔlu m’ɔ ti be nun kun’n, ɔ klɛli i kɛ: “E kwlaa nga Ɲanmiɛn w’a yi e ɲrun tannin ng’ɔ kata e ɲrun’n, e ti kɛ niannun sa, e yi Zoova i  aɲrunɲan’n i nglo. E kaci kɛ i sa tititi lelele e fɛ i kpa.” (2 Kor. 3:18, NW) Kɛ Ɲanmiɛn nuan ijɔfuɛ Moizi fín Sinai oka’n su lɔ jrá’n mɔ yɛbuɛ paplaapla nɲɔn mɔ mmla blu’n wo be su’n, be o i sa nun’n, i ɲrun’n ti ɲanɲanɲan. Afin ɔ nin Zoova be ijɔli. (Tul. 34:29, 30) Like ng’ɔ juli Moizi su’n, w’a juman Klistfuɛ’m be su wie naan se kɛ, be ɲrun’n yó ɲanɲanɲan kɛ kannin sa. Sanngɛ kɛ bé kán Zoova i ndɛ, mɔ bé kán sran i wafa ng’ɔ ti’n ɔ nin ninnge ɲɛnmɛn nga i waan ɔ́ yó be mán klɔ sran mun’n be ndɛ’n, sran’m be wun aklunjuɛ nga be di’n. Ɔ maan kɛ niannun sa’n, be nga be kpali be sieli be ngunmin’n ɔ nin be wiengu junman difuɛ nga bé trán asiɛ’n su wa’n, be yi Zoova i aɲrunɲan’n i nglo be nantilɛ’n nun ɔ nin jasin fɛ’n i bolɛ’n nun. (2 Kor. 4:1) ?Amun nzuɛn’n yi Zoova i aɲrunɲan’n i nglo? ?Yɛ amun bo jasin fɛ’n i titi be fa yi Zoova i aɲrunɲan’n i nglo?

E KLO KƐ É YÍ ƝANMIƐN I AƝRUNƝAN’N I NGLO

4, 5. (a) ?Kɛ Pɔlu sa’n, e nin like benin yɛ e kun ɔn? (b) ?Abɔlɛ benin yɛ sa tɛ’n yo e ɔ?

⁴ E mɔ e ti Zoova i sufuɛ’n, e kunndɛ kɛ like kwlaa nga é yó’n ɔ man Zoova kɔmin su. Sanngɛ kpɛ sunman’n, nán like nga e sunnzun’n yɛ e yo ɔ. I sɔ sa liɛ’n juli Pɔlu su wie. (An kanngan Rɔmfuɛ Mun 7:21-25 nun.) Sa nga ti yɛ akunndan tɛ kun o e nun mɔ e nin i e kun’n, ɔ kɛnnin i ndɛ weinwein. Ɔ klɛli i kɛ: “Sran’m be kwlaa be yoli sa tɛ, ɔ maan anyrunnyan nga Nyanmiɛn waan ɔ́ mán be’n, ɔ to fuannin be.” (Rɔm. 3:23) Kɛ mɔ Adam yoli sa tɛ’n ti’n, be wu e nin sa tɛ’n, yɛ e ti i kanga. Ɔ maan sa tɛ’n ti kɛ famiɛn klunwifuɛ kun yɛ ɔ sie e sa ɔ.​—Rɔm. 5:12; 6:12.

⁵ ?Ngue yɛ be flɛ i sa tɛ’n niɔn? Sa tɛ’n yɛle like kwlaa ng’ɔ nin Zoova i nzuɛn’n, yɛ i mmla mun nin i klun sa’n ɔ nin ninnge ng’ɔ klo be’n, be kɔman likawlɛ’n. Sa tɛ’n saci sran nin Ɲanmiɛn be afiɛn. Kɛ nga like kun kwla tanndan ta tofuɛ kun i ɲrun naan i ta mma’n w’a ɲanman like ng’ɔ to i wun ta’n sa’n, sa tɛ’n tanndan e ɲrun naan y’a kwlá yiman Ɲanmiɛn i aɲrunɲan’n i nglo. Wie liɛ’n, e bɔbɔ e ɲinfu yɛ e yo sa tɛ’n niɔn. Wie liɛ kusu’n nán e ɲinfu ɔ. (Kal. 15:27-31) Sa tɛ’n tin e su kpa, yɛ ɔ ti kɛ talɛ kun m’ɔ ja e nin e Yifuɛ’n e afiɛn sa ɔ. (Jue. 51:7; Eza. 59:2; Kol. 1:21) Sran sunman be nantilɛ wafa’n yo maan be nin Ɲanmiɛn be afiɛn ti nun mlɔnmlɔnmlɔn. I ti’n, Ɲanmiɛn i aɲrunɲan i nglo yilɛ’n m’ɔ ti cenjele like dan’n, ɔ to fuan be. Nanwlɛ, like uflɛ fi yoman sran’m be abɔlɛ kɛ nga sa tɛ’n fa yo be ju’n sa.

6. ?Kannzɛ e nin sa tɛ yolɛ’n e fin e nin klun’n, ngue yɛ maan e kwla yi Ɲanmiɛn i aɲrunɲan’n i nglo ɔ?

⁶ Kannzɛ e nin sa tɛ yolɛ’n e fin e nin klun’n, Zoova i fanngan nun’n, e wla o like kun su. (Rɔm. 15:13) Ɔ fali Zezi Klist yili e ti kpɔlɛ tɛ. I ti’n, e kwla ɲan e ti mlɔnmlɔn sa tɛ’n i sa nun. Kɛ e lafi tɛ sɔ’n su’n, ‘sa tɛtɛ’n yoman e nzuɛn kun.’ Yɛ e kwla yi Zoova i aɲrunɲan’n i nglo. (Rɔm. 5:19; 6:6; Zan 3:16) Sɛ e yo Ɲanmiɛn i janvuɛ titi’n, e kwla lafi su kɛ ɔ́ yrá e su ikisa. Kpɛkun e ɲrun lɔ’n, ɔ́ yó maan fɔ su tranman e nun kun yɛ ɔ́ mán e anannganman nguan. E te yo sa tɛ. Sanngɛ Ɲanmiɛn bu e sran mɔ be kwla yi i aɲrunɲan’n i nglo ɔ. Nanwlɛ, i sɔ’n ti e sran bulɛ dan!

LIKE NG’Ɔ́ ÚKA E NAAN Y’A YI ƝANMIƐN I AƝRUNƝAN’N I NGLO’N

7. ?E wun sa benin yɛ ɔ fata kɛ e wun i wlɛ naan y’a kwla yi Ɲanmiɛn i aɲrunɲan’n i nglo ɔ?

⁷ Kɛ ɔ ko yo naan y’a kwla yi Ɲanmiɛn i aɲrunɲan i nglo’n, ɔ fata kɛ e si kɛ e nin sa tɛ yolɛ’n fin e nin klun. (2 Nyo. 6:36) Ɔ fataman kɛ e ɲin kpɛ i sɔ’n su. Sɛ e nin nzuɛn tɛ nga be o e nun’n e kun titi’n, yɛ é kwlá yí Ɲanmiɛn i aɲrunɲan’n i nglo ɔ. Sɛ wie nun ɔn, e nian bian nin bla nna nga be fa fite nzra nun’n, ɔ fata kɛ e di e wun nanwlɛ kɛ ɔ ti cinnjin man e kɛ asɔnun kpɛnngbɛn’m be uka e. Yɛ maan e ko wun be wun. (Zak 5:14, 15) Sɛ e kunndɛ kɛ é mánmán Ɲanmiɛn  sakpasakpa’n, like klikli ng’ɔ fata e yo’n yɛ ɔ o lɛ ɔ. Ɔ fata kɛ blɛ kwlaa nun’n, e bu e klun lɔ e nian, sɛ e di Zoova i mmla’m be su sakpa o. (Nya. 28:18; 1 Kor. 10:12) Maan i li nzuɛn tɛ nga be kle e yalɛ’n, be yo sɛ be yo sɛ, ɔ fata kɛ e nin be e kun titi naan y’a kwla yi Ɲanmiɛn i aɲrunɲan’n i nglo.

8. ?Kannzɛ bɔbɔ fɔ o e nun’n, ngue yɛ ɔ fata kɛ e yo ɔ?

⁸ Sran kunngba cenje ng’ɔ trannin asiɛ’n su wa lele fa wuli m’ɔ yoli Ɲanmiɛn i klun sa titi’n, m’ɔ yili Ɲanmiɛn i aɲrunɲan’n i nglo titi’n yɛle Zezi. E timan kɛ Zezi mɔ fɔ w’a trɛnmɛn i nun’n sa. Sanngɛ e kwla mian e ɲin e fɛ i ajalɛ’n su. I sɔ bɔbɔ yɛ ɔ fata kɛ e yo ɔ. (1 Piɛ. 2:21) Kɛ e yo kpa e kɔ e ɲrun’n, Zoova sie i nzɔliɛ. Sanngɛ kusu’n, ɔ sie e ɲin mɔ e mian naan y’a kwla mɛnmɛn i’n i nzɔliɛ wie. Kpɛkun ɔ yra i sɔ liɛ’n su.

9. ?Wafa sɛ yɛ Biblu’n uka e naan y’a kwla yi Ɲanmiɛn i aɲrunɲan’n i nglo kpa ɔ?

⁹ Zoova i nuan ndɛ nga be klɛli’n, ɔ kwla uka e naan y’a si wafa nga e kwla yi Ɲanmiɛn i aɲrunɲan’n i nglo kpa’n. Ɔ ti cinnjin kɛ e wla e wun ase e suan Biblu’n i nun like kpa naan kusu’n e bu i nun ndɛ’m be su akunndan. (Jue. 1:1-3) Kɛ e kanngan Biblu’n nun aliɛ ba kwlaa nun’n, e wun ninnge nga be nun’n, ɔ fata kɛ e kaci e sa naan y’a yo kpa y’a wɔ e ɲrun’n. (An kanngan Zak 1:22-25 nun.) Like nga e suɛn i Biblu’n nun’n, ɔ wla e Ɲanmiɛn sulafilɛ’n i bo ase. Asa kusu’n, ɔ man e wunmiɛn ekun naan e ɲin w’a ci sa nga be ti tɛ kpa’n be yolɛ naan y’a yo ninnge nga mɔ maan Zoova i klun jɔ́ e wun’n.​—Jue. 119:11, 47, 48.

10. ?Wafa sɛ yɛ Ɲanmiɛn srɛlɛ’n kwla uka e naan y’a su Zoova kpa ekun ɔn?

¹⁰ Sɛ e waan é yí Ɲanmiɛn i aɲrunɲan’n i nglo’n ɔ nin i fata wie kɛ e nin ‘Nyanmiɛn e koko yalɛ titi.’ (Rɔm. 12:12) Ɔ fata kɛ e srɛ Zoova kɛ ɔ uka e naan e su i kɛ ng’ɔ fa klo’n sa. I lɛ’n nun’n, e kwla srɛ i kɛ ɔ fɛ i wawɛ’n man e, yɛ ɔ yo maan e lafi i su kpa ekun, yɛ ɔ man e wunmiɛn naan e jran sa tɛ’n i ɲrun kekle. Asa kusu’n, e kwla srɛ i kɛ ɔ uka e naan e si Biblu’n nun ndɛ’n i kle kpa. (2 Tim. 2:15; Mat. 6:13; Lik 11:13; 17:5) Kɛ nga ba kaan kun lafi su kɛ i si níɛn i lika’n sa’n, ɔ fata kɛ e kusu e lafi su kɛ e Si Zoova m’ɔ o ɲanmiɛn su lɔ’n, ɔ́ nían e lika. Sɛ e srɛ i kɛ ɔ uka e naan e su i kpa ekun’n, e kwla lafi su kɛ ɔ́ úka e. Nán e bu i le kɛ srɛlɛ nga e srɛ i’n, ɔ kwla flɛn i. Sanngɛ i li maan e srɛ i. Kɛ é srɛ́ i’n, maan e mɛnmɛn i, e lɛ i ase, yɛ e se i naan ɔ kle e atin ng’ɔ ti mɔ e fa su’n. Kɛ kekle o e su’n, yɛ ɔ fata kɛ e yo i sɔ kpa ɔ. Asa kusu’n, maan e srɛ i naan ɔ uka e naan wafa nga e su i’n, ɔ yo maan i dunman’n fu.​—Jue. 86:12; Zak 1:5-7.

11. ?Wafa sɛ yɛ asɔnun aɲia’m be uka e naan y’a yi Ɲanmiɛn i aɲrunɲan’n i nglo ɔ?

¹¹ Ɲanmiɛn fɛli i bua’m mɔ be ndɛ ti i cinnjin kpa’n, be lika nianlɛ’n wlali “sran kpa nanwlɛfuɛ b’ɔ si ngwlɛlɛ’n,” i sa nun. (Mat. 24:45-47; Jue. 100:3) Ɔ o sran kpa nanwlɛfuɛ m’ɔ si ngwlɛlɛ’n i klun kpa kɛ ɔ́ úka e kwlakwla naan e yi Zoova i aɲrunɲan’n i nglo. Ninnge ng’ɔ sin be lika uka e’n be nun kun yɛle e aɲia mun. Tralɛ kpafuɛ kun kwla siesie e tralɛ kun i ye naan kɛ e wlɛ i siɛn’n, e ɲrun w’a ba ɲan. I wafa kunngba’n, e aɲia’m be yo maan e yi nzuɛn nga be nin Klistfuɛ mun fata’n be nglo kpa. (Ebr. 10:24, 25) I ti’n, maan e ju aɲia’m be bo lɔ dɔ su. Sɛ y’a yomɛn i sɔ’n, ninnge nga be siesieli be kɛ bé fá yó naan e yo kpa ekun’n, be nun wie tó fúan e.

MAAN E NIAN LIKE NGA ƝANMIƐN YO’N SU E YO

12. ?Wafa sɛ yɛ e kwla nian like nga Ɲanmiɛn yo’n su e yo ɔ?

¹² Sɛ e waan é yí Zoova i aɲrunɲan’n i nglo’n, ɔ fata kɛ e ‘nian like ng’ɔ yo’n su, e yo.’ (Efɛ. 5:1) Wafa nga e kwla yo i sɔ’n i kun yɛle kɛ e bu sa’m be kɛ ng’ɔ fa bu be’n sa. Kɛ e kunndɛ kɛ é yó ninnge mun kɛ nga e bɔbɔ e klo’n sa’n, ɔ mɛnmɛnmɛn i, kpɛkun e yo e bɔbɔ e wun abɔlɛ. Satan yɛ i sa o mɛn nga e wo nun yɛ’n i su ɔ. I ti’n, ɔ fata kɛ e kplin e ɲin kpa naan y’a kwla kpɔ ninnge nga  Zoova kpɔ be’n, naan kusu y’a klo ng’ɔ klo be’n be kpa. (Jue. 97:10; 1 Zan 5:19) Ɔ fata kɛ e lafi su kpa kɛ wafa kunngba cɛ ng’ɔ ti mɔ e su Ɲanmiɛn’n, yɛle kɛ e yo like kwlaa nga e yo ɔ, Ɲanmiɛn ɲán ɲrun’n.​—An kanngan 1 Korɛntfuɛ Mun 10:31 nun.

13. ?Ngue ti yɛ ɔ fata kɛ e kpɔ sa tɛ’n niɔn? ?Yɛ ngue yɛ i sɔ’n sú e bo maan é yó ɔ?

¹³ Zoova kpɔ sa tɛ’n. I sɔ wie kusu yɛ ɔ fata kɛ e yo ɔ. I ti’n, nán maan e kunndɛ kɛ é wúnnge sa tɛ’n i wun koko mlɔnmlɔn. I wie yɛle kɛ ɔ fata kɛ e nian e wun su kpa naan y’a jasoman Ɲanmiɛn wun. Be nga be jaso Ɲanmiɛn wun’n, be mɛnmɛnmɛn i. (Mml. 13:7-10) I ti’n, ɔ fata kɛ e sin be nga b’a jaso Ɲanmiɛn wun’n, be wun mmuammua kpa. Sran kwlaa nga i waan ɔ ti e niaan mɔ sanngɛ i aeliɛ’n saci Ɲanmiɛn i dunman’n, kannzɛ bɔbɔ ɔ ti e osufuɛ’n, ɔ fata kɛ e sin i wun mmuammua kpa. (1 Kor. 5:11) Ndɛ nga be nga be nin Ɲanmiɛn b’a bu’n, ɔ nin be nga be kan Zoova i anuannzɛ’n i wun ndɛ tɛ’n be kan’n, nán e kunndɛ kɛ é klé kɛ ɔ timan nanwlɛ. I sɔ yolɛ’n yoman sa fi ye. I kpa bɔbɔ’n, be ndɛ nga be kan’n, maan ɔ yo fluwa su o, annzɛ ɛntɛnɛti su o, ɔ fataman kɛ e se kɛ é sí nun. Afin i sɔ’n kwla saci e nin Zoova e afiɛn.​—An kanngan Ezai 5:20 nin Matie 7:6 nun.

14. ?Sɛ e waan é sɔ́nnzɔn Zoova’n, like cinnjin kpa benin yɛ ɔ fata kɛ e yo ɔ? ?Yɛ ngue ti ɔ?

¹⁴ Sɛ e waan é sɔ́nnzɔn e Si m’ɔ o ɲanmiɛn su lɔ’n, like cinnjin kpa kun m’ɔ fata kɛ e yo’n, yɛle sran klolɛ. (1 Zan 4:16-19) I li bɔbɔ’n, klolɛ m’ɔ o e afiɛn’n yɛ maan be wun kɛ e ti Zezi i sɔnnzɔnfuɛ naan e ti Zoova i sufuɛ ɔ. (Zan 13:34, 35) Kannzɛ ɔ ju wie’n,  fɔ m’ɔ o e nun’n ɔ tanndan e ɲrun’n, sanngɛ e kwla kpalo i naan y’a klo e wiengu mun titi. E ɲin mɔ e mian naan y’a yi sran klolɛ’n nin Klistfuɛ nzuɛn uflɛ’m be nglo’n, ɔ uka e naan y’a yoman sa tɛ naan kusu y’a yoman e wiengu’m be tɛ.​—2 Piɛ. 1:5-7.

15. ?Wafa sɛ yɛ klolɛ’n yo maan e nin sran mun e nanti ɔ?

¹⁵ Sran klolɛ’n maan e kunndɛ kɛ é yó like kpa é mán sran. (Rɔm. 13:8-10) I wie yɛle kɛ sɛ sran kun nin i yi be klo be wun’n, be su kunndɛman be wiengu bo bla annzɛ bian le. Asa kusu sɛ e klo asɔnun kpɛnngbɛn mun’n naan e ɲin yi be junman’n, é ló e wun é fá atin nga be kle e’n su yɛ e ɲin yí be. Ba ng’ɔ klo i si nin i nin’n, i ɲin yi be, ɔ bu be sran yɛ ɔ kanman be wun ndɛ tɛ. Sɛ e klo e wiengu mun’n, e su bumɛn i kɛ e kpa tra be, yɛ kɛ é kán ndɛ é klé be’n, é kɛ́n i aɲinyiɛ su. (Zak 3:9) Asa ekun’n, asɔnun kpɛnngbɛn nga be klo Ɲanmiɛn i bua mun’n, be nian be lika klolɛ su.​—Yol. 20:28, 29.

16. ?Wafa sɛ yɛ klolɛ’n uka e jasin fɛ’n i bolɛ’n nun ɔn?

¹⁶ Jasin fɛ’n i bolɛ nun’n, ɔ fata kɛ e kle kɛ e klo Ɲanmiɛn nin sran. Klolɛ mɔ e klo Zoova kpa’n ti’n, kɛ sran’m be kan e ndɛ tɛ’n, annzɛ be tieman e ndɛ’n, e sa sin bubuman e. Sanngɛ e liɛ nga e si i’n, yɛle jasin fɛ’n i bolɛ. Asa kusu’n, klolɛ’n maan e siesie e wun kpa naan y’a ɔ jasin fɛ’n i bolɛ. Yɛ ɔ yo maan e mian e ɲin naan y’a yo like klefuɛ kpa. Sɛ e klo Ɲanmiɛn nin sran sakpa’n, Ɲanmiɛn Sielɛ’n i jasin fɛ’n i bolɛ su yoman e ɲrun kɛ trɔ sa. Sanngɛ é bú i aɲrunɲan junman yɛ é dí i aklunjuɛ su.​—Mat. 10:7.

MAAN E MANMAN ZOOVA TITI

17. ?Kɛ mɔ e si kɛ sa tɛ’n tanndan e ɲrun naan y’a kwlá yiman Ɲanmiɛn i aɲrunɲan’n i nglo’n ti’n, ngue yɛ ɔ fata kɛ e yo ɔ?

¹⁷ Sran kpanngban be bumɛn i kɛ sa tɛ yolɛ’n ti like tɛ kpa. Sanngɛ e liɛ’n, e bu i like tɛ kpa. I sɔ’n ti’n, e si kɛ ɔ fata kɛ e mian e ɲin naan e nin sa tɛ’n e kun titi. Kɛ mɔ fɔ o e nun’n ti’n, e si kɛ ɔ fata kɛ e yo naan e akunndan’n tran sa kpa’n i yolɛ’n su. I liɛ’n, sɛ e anwlɛn’n su e bo kɛ e yo like tɛ wie’n e su yoman. (Rɔm. 7:22, 23) Sakpa, e leman wunmiɛn. Sanngɛ Ɲanmiɛn kwla man e wunmiɛn naan sa kwlaa nun’n y’a yo like ng’ɔ ti kpa’n.​—2 Kor. 12:10.

18, 19. (a) ?Ngue yɛ ɔ uka e naan y’a kwla Satan nin i mmusu mun ɔn? (b) ?Ngue yɛ ɔ fata kɛ e fua kɛ é yó ɔ?

¹⁸ Sɛ e waan é yó naan Zoova ɲan ɲrun’n, ɔ fata kɛ e nin Satan nin i mmusu mun e kun. Alɛ ninnge nga Ɲanmiɛn mannin e’n, be kwla uka e naan y’a kwla be. (Efɛ. 6:11-13) Manmanlɛ ng’ɔ fata kɛ be manman Zoova kunngba cɛ’n, Satan waan saan fii ɔ le. Asa kusu’n, mmusu’m be si Satan te wlɛ i wun ase naan w’a saci e nin Zoova e afiɛn. Sanngɛ e sran akpinngbin kpanngban mɔ fɔ o e nun’n, i yasua o, i bla o, i bakan o, e kwlaa sɔ’n e nin Ɲanmiɛn e nanti klanman titi yɛ e mɛnmɛn i. I sɔ mɔ e yo’n, ɔ ti kɛ y’a tɛ Satan i ti ase naan y’a kwlɛ i sa. I sɔ’n ti’n, maan e manman Zoova titi kɛ nga ɲanmiɛn su lɔfuɛ wie’m be fa yoli i yɛ’n sa. Be seli kɛ: “E Min Nyanmiɛn, kɛ bé yí wɔ ayɛ bé mánmán wɔ bɔ be se kɛ a kwla sa’n kwlaa yo’n i su-ɔ, afin wɔ yɛ a yili like’n kwlaa-a, a klo kɛ á yí be ti yɛ a yili be-ɔ, yɛ ɔ ti yɛ be o lɛ-ɔ.”​—Ngl. 4:11.

¹⁹ Maan e fua kɛ sɛ bé lú i o, bé bló i o, é mánmán Zoova titi. Kɛ ɔ wun i sufuɛ kpanngban kpa mɔ be kplin be ɲin kpa be yo like ng’ɔ yo’n wie’n, mɔ be yi i aɲrunɲan’n i nglo’n, nanwlɛ ɔ di aklunjuɛ kpa. (Nya. 27:11) Maan e wun yo e kɛ Davidi m’ɔ kannin ndɛ yɛ’n sa. Ɔ seli kɛ: “Min Min, min Nyanmiɛn ń tú min klun ḿ mánmán wɔ. Ḿ bó ń flɛ́ wɔ cɛn kwlakwla.” (Jue. 86:12) Nanwlɛ, ɔ ka e ngunmin’n, cɛn nga é kwlá yí Zoova i aɲrunɲan’n i nglo kpa sa’n, mɔ é mɛ́nmɛ́n i tititi’n, w’a ju! Aklunjuɛ dilɛ blɛ sɔ’n ɔ́ tó be nga be ɲin yi Ɲanmiɛn’n. ?Kɛ é sé yɛ’n, amun yi Ɲanmiɛn Zoova i aɲrunɲan’n i nglo, yɛ amun sunnzun kɛ amún yó i sɔ anannganman?

[Kosan mun]

[Foto mun, bue 31]

?Ninnge nga’m be nun’n, amun yi Zoova i aɲrunɲan’n i nglo?