“An fa min ndɛ nga n kan’n su”

“Sɛ an fa min ndɛ nga n kan’n su sakpa, wuun an ti n sɔnnzɔnfuɛ sakpa, wuun amún sí ndɛ ng’ɔ ti nanwlɛ’n, yɛ ndɛ nanwlɛ sɔ’n ti amún nyán amun ti.”​—ZAN 8:31, 32.

?Ndɛ sɔ’n i bo’n yɛle benin? Zezi i “ndɛ’n” yɛle ninnge nga ɔ kleli sran mun’n. Ninnge sɔ’m be fin i Si m’ɔ o nglo lɔ’n. I sɔ’n ti’n, Zezi seli kɛ: “Ndɛ nga n kan’n, n kpɛ-man n ti nun yɛ n kan-an, sanngɛ n Si b’ɔ sunmannin min’n, i bɔbɔ yɛ ɔ kleli min ndɛ nga n kan’n nin ninnge wafa nga n kle nin-ɔn.” (Zan 12:49) Asa kusu’n, kɛ Zezi klé sran’m be like’n, ɔ boli Ɲanmiɛn ndɛ nga be klɛli’n su kpɛ sunman. Afin ɔ si kɛ Ɲanmiɛn Ndɛ’n ti nanwlɛ. I ti’n, ɔ srɛli i Si Ɲanmiɛn Zoova m’ɔ o ɲanmiɛn su lɔ’n seli kɛ: “Ɔ ndɛ’n ti nanwlɛ.” (Zan 17:17; Matie 4:4, 7, 10) I sɔ’n ti’n, Klistfuɛ kpa’m be ‘fa ndɛ nga Zezi kan’n su.’ Ɲanmiɛn Ndɛ’n mɔ yɛle Biblu’n, be bu i “nanwlɛ.” Ɔ maan ninnge nga be lafi su’n, ɔ fin Biblu’n nun. Yɛ be fa Biblu’n nun mmla’n su be nanti.

Like nga klistfuɛ klikli’m be yoli’n: Akoto Pɔlu kleli kɛ ɔ bu Ɲanmiɛn Ndɛ’n i like dan kɛ Zezi sa. Ɔ seli kɛ: “Nyanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli-ɔ. Be fa kle like, be fa kle sran mun lele be wun nanwlɛ’n, be fa tu be fɔ, be fa kle be sa nga be yo-ɔ ɔ ti kpa’n.” (2 Timote 3:16) I sɔ ti’n, asɔnun’n nun’n, ɔ fata kɛ yasua nga be kle asɔnunfuɛ’m be like’n, be ‘lafi ndɛ nanwlɛ [yɛle kɛ Ɲanmiɛn Ndɛ’n] nga be kleli be’n su kpa.’ (Tit 1:7, 9) Asa kusu’n, be wlali Klistfuɛ klikli’m be su nun kɛ nian be wun su naan ‘nán maan sran fi fɛ i sa ng’ɔ si i’n nin sa ngbɛn wie fa laka be naan ɔ nyan be. Sa sɔ’m be fin lalafuɛ’m be nzuɛn’n, nin ninnge nga be nannan’m be kle’n, be fin-man Krist.’​—Kolɔsfuɛ Mun 2:8.

?Wan yɛ ɔ yo i sɔ wie andɛ ɔ? Katoliki’m be fluwa kun seli kɛ: “Ninnge nga [Katoliki] asɔnun’n lafi su’n, nɛ́n i ngba yɛ ɔ fin Ɲanmiɛn ndɛ’n nun ɔn. Sanngɛ, e nannan’m be nzuɛn mɔ e bu i kɛ ɔ ti cinnjin kpa wie’n, be o nun wie. Ɔ maan e lafi ndɛ sɔ’m be su kɛ e fa lafi Ɲanmiɛn Ndɛ’n su sa.” (Catéchisme de l’Église catholique) Ndɛ kun mɔ Kanada lɔ klɔ nga be flɛ i Torɔnto’n i su lɔ bla kun m’ɔ kan Ɲanmiɛn ndɛ’n ɔ kannin’n, be klɛli i fluwa kun nun. Ɔ seli kɛ: “?Ɲanmiɛn Ndɛ mɔ be klɛli i afuɛ 2000 tra su yɛ’n, ɔ nin Zezi i ndɛ m’ɔ ti lalafuɛ like’n, be liɛ ekun tre? ?E bɔbɔ e siman ngwlɛlɛ ti ɔ? Nanwlɛ, Zezi nin Ɲanmiɛn be ndɛ nga be klɛli’n, be su falɛ’n kle yalɛ.”

Zoova i Lalofuɛ’m be liɛ’n, Katoliki’m be fluwa dan kun kan be ndɛ se kɛ: “Biblu’n kunngba cɛ yɛ ɔ kle be atin’n, ɔ nin ninnge nga be lafi su’n niɔn.” Koko nun wa’n, Kanada lɔ’n, kɛ Zoova i Lalofuɛ bla kun bó jasin fɛ’n mɔ i waan ɔ́ sé bian ng’ɔ toli i’n kɛ ɔ ti Zoova i Lalofuɛ’n, bian’n kpɛli i nuan ndɛ. Ɔ fɛli i sa’n tinndinnin bla’n i Biblu’n wun yɛ ɔ seli i kɛ: “Kɛ n wunnin kɛ Biblu’n o ɔ sa nun’n, n si kɛ a ti Zoova i Lalofuɛ. Ɔ maan ɔ leman kɛ á úke ɔ nuan sé min sɔ.”