“Bé wá kán Nyanmiɛn sielɛ’n i jasin fɛ nga”

“Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.”​—MATIE 24:14.

?Ndɛ sɔ’n i bo’n yɛle benin? Liki kannin kɛ: “Jésus [...] ɔli klɔ dandan nin kanngan’n kwlaa be su, ɔ kannin Nyanmiɛn ndɛ, ɔ boli Nyanmiɛn sielɛ jasin fɛ’n.” (Lik 8:1) Zezi kannin like nga ti yɛ ɔ yoli sɔ’n i ndɛ. I waan: “Nyanmiɛn sielɛ’n i ndɛ kanlɛ klɔ uflɛ wie’m be su’n ɔ ti [n] cinnjin, i sɔ’n ti yɛ Nyanmiɛn sunmannin min-ɔn.” (Lik 4:43) Ɔ fali junman sɔ’n wlali i sɔnnzɔnfuɛ’m be sa nun wie. Ɔ sunmannin be klɔ dandan nin klɔ kanngan’m be su kɛ be ko bo jasin fɛ’n. Yɛ kasiɛn su’n, ɔ seli be kɛ: “Án wá kán min ndɛ [...] lele fá jú asiɛ’n i awieliɛ.”​—Sa Nga Be Yoli’n 1:8; Lik 10:1.

Like nga klistfuɛ klikli’m be yoli’n: Zezi i sɔnnzɔnfuɛ’m b’a sisiman be bo naan b’a yo like nga Zezi seli be kɛ be yo’n. Biblu’n se kɛ: “Cɛn kwlaa be yaci-man Jésus-Krist jasin fɛ’n i bolɛ nin i klelɛ Nyanmiɛn i sua’n nun nin awlo’m be nun.” (Sa Nga Be Yoli’n 5:42) Asa kusu’n, be kwlakwla be boli jasin fɛ’n. I sɔ’n yɛ bian kun m’ɔ suan laa sa’m be su like mɔ be flɛ i Neander ɔ kannin ɔn. I waan Klistfuɛ’m be kpɔfuɛ kun mɔ be flɛ i Celsus ɔ kannin be wun ndɛ tɛ seli kɛ: “Be nga be siman fluwa bɔbɔ ngbɛn’n, mɔ sɛ a wun be ɔ, a su buman be sran’n, be kwlakwla be dili junman sɔ’n juejue su. I be nga be fa bua ndrɛ be fa wu tralɛ’n nin o, i ngbabua yofuɛ mun o, i kplo junman difuɛ mun o, be dili junman sɔ’n wie.” Bian kun ekun mɔ be flɛ i Jean Bernadi’n seli kɛ: “[Klistfuɛ’m] be kannin Ɲanmiɛn ndɛ’n lika kwlakwla. Klɔ’n i atin’m be su o, klɔ’n i mmuɛ’m be nun o, klɔ’n gua’m be su o, awloawlo’m be nun o, sran kwlakwla nga be to be lika sɔ’m be nun’n, be kan Ɲanmiɛn ndɛ’n be kle be. Sɛ sran’m be tie annzɛ be tieman o, be liɛ nga be si i’n, yɛle kɛ bé bó jasin’n lele [...] fá jú asiɛ’n i awieliɛ.”​—Les Premiers Siècles de L’Église.

?Wan yɛ ɔ yo i sɔ wie andɛ ɔ? Mɔnpɛli kun mɔ be flɛ i David Watson’n, ɔ klɛli i fluwa kun nun kɛ: “Sa nga ti yɛ andɛ Ɲanmiɛn sulɛ’n timan  sran’m be cinnjin’n, yɛle kɛ e asɔnun’m be boman jasin, yɛ e kleman sran’m be like kɛ ɔ nin i fata’n sa.” Bian kun ekun mɔ be flɛ i Luis Perez Guadalupe’n, ɔ klɛli evanzeliki nin advantisti ɔ nin asɔnun uflɛ wie mun ekun be su ndɛ. I waan: “Asɔnun sɔ’m be nunfuɛ mun be kɔman awloawlo’m be nun be ko kanman Ɲanmiɛn ndɛ’n.” Sanngɛ, ɔ seli kɛ Zoova i Lalofuɛ’m be liɛ’n, “awloawlo’m be nun jasin fɛ’n i bolɛ’n, ɔ ti be nzuɛn.”​—Why Are the Catholics Leaving?

Bian kun m’ɔ suan Jonathan Turley ɔ kannin Zoova i Lalofuɛ’m be ndɛ weiin fluwa kun nun kɛ: “Sran’m be dan lika be si kɛ Zoova i Lalofuɛ mun yɛle be nga be kɔ sran’m be awlo’m be nun be ko kan Ɲanmiɛn ndɛ’n kle be’n. I yo, ɔ ti su kɛ i sɔ mɔ be yo’n ti’n, sran’m be si ninnge nga be lafi su’n. Sanngɛ nɛ́n i sɔ ngunmin ɔn. Jasin’n i bolɛ’n mɔ be bo’n, ɔ yo maan be tinuntinun be Ɲanmiɛn sulafilɛ’n i bo’n wla ase kpa wie.”​—Cato Supreme Court Review, 2001-2002.

[Kuku, bue 9]

?Amun a wun be nga be ti Klistfuɛ kpa’n be wlɛ siɛn’n?

Kɛ y’a yiyi ndɛ’n nga Ɲanmiɛn Ndɛ’n kan’n i nun lele mɔ y’a fa ju yɛ’n, amun klun’n, “?Ngue yɛ be fa sie Klistfuɛ kpa’m be nzɔliɛ ɔ?” Nanwlɛ, asɔnun’m b’a sɔn. Sanngɛ, nán amun wla fi Zezi i ndɛ nga su. Ɔ seli kɛ: “Nán sran’m be kwlaa bɔ be flɛ min be Min’n be ngba yɛ Nyanmiɛn síe be sakpa-a, saan sran ng’ɔ yo min Si b’ɔ o nyanmiɛn su lɔ’n i klun sa’n, i yɛ ɔ́ síe be sakpa-a.” (Matie 7:21) Be nga be yo Ɲanmiɛn i klun sa’n, be yɛ be ti Klistfuɛ sakpa ɔ. Ɔ maan sɛ amun wun sran sɔ’m be wlɛ’n, naan amun fa amun wun mantan be’n, i sɔ’n kwla yo maan amún ɲán suyralɛ kpanngban. Kpɛkun be nga Ɲanmiɛn síe be asiɛ’n su wa’n, amún trán be nun wie. Zoova i Lalofuɛ nga be fali fluwa nga mannin amun’n, é wlá amun fanngan kɛ amun usa be naan be kan Ɲanmiɛn Sielɛ’n, ɔ nin ninnge kpakpa nga ɔ́ wá mán sran mun’n be ndɛ kle amun.​—Lik 4:43.