Maan e lafi Zoova m’ɔ sie ‘blɛ nin sa nga be ju’n’ i su

“I yɛ ɔ kaci blɛ’n nin sa nga be ju mun-ɔn, i yɛ ɔ yi famiɛn mun bia’n su ɔ, i yɛ ɔ fa famiɛn mun sie bia’n su-ɔ.”​—DAN. 2:21.

?AMÚN TƐ́ SU SƐ?

?Wafa sɛ yɛ ninnge nga Ɲanmiɛn yili be’n, ɔ nin Ɲanmiɛn nuan ndɛ nga b’a kpɛn su’n, be kle kɛ Zoova kwla yo maan i klun sa’n kpɛn su blɛ ng’ɔ sunnzunnin’n su ɔ?

?Kɛ mɔ e si kɛ Zoova ti Ɲanmiɛn m’ɔ ‘kaci blɛ’n nin sa nga be ju’n’ ti’n, ngue yɛ é yó ɔ?

?Sa nga be ju mɛn’n nun’n, ɔ nin ajalɛ nga klɔ sran’m be fa’n, ngue ti yɛ be kwlá yoman naan blɛ nga Zoova sieli kɛ sa kun ju’n, ɔ sɛn i wun ɔn?

1, 2. ?Ngue ti yɛ e kwla se kɛ Zoova si like nga be flɛ i blɛ’n i kpa ɔ?

 LAA kpa lele ka naan Ɲanmiɛn Zoova w’a yi klɔ sran’n, ɔ yoli naan y’a kwla si blɛ’m be ka. Kɛ ɔ boli mɛn’n i yilɛ bo’n, i cɛn nnan su’n, ɔ seli kɛ: “Maan like wie’m be tran nglo lɔ be kpaja naan ngbaciɛ tran wia nun’n nin kɔnguɛ’n be afiɛn. Maan like sɔ’m be yo cɛn ɔ nin blɛ, ɔ nin afuɛ’m be nzɔliɛ.” (Bob. 1:14, 19, 26) Kɛ nga Zoova fa kannin sa’n, i sɔ sɛsɛsɛ yɛ ɔ yoli ɔ.

² Lele nin andɛ’n, fluwa sifuɛ dandan’m be kwlá yiyiman wafa nga blɛ’n fa ti’n i nun weinwein sa. Fluwa kun seli kɛ: “Sran fi sa kwlá yiyiman nun.” Sanngɛ Zoova liɛ’n, ɔ si like nga be flɛ i blɛ’n i kpa. Afin i yɛ ɔ “yili nglo’n” niɔn. Kpɛkun i yɛ “ɔ siesieli asiɛ’n i wafa’n” niɔn. Asa ekun’n, ɔ ‘dun mmua bo sa’m be su lele yɛ be ju-ɔ. Sa nga be nian juman’n, ɔ dun mmua kan be ndɛ lele.’ (Eza. 45:18; 46:10) Siɛn’n, é wá fá e ɲin é síe i ninnge nɲɔn be su. Be yɛle ninnge nga Ɲanmiɛn yili be’n ɔ nin i nuan ndɛ nga b’a kpɛn su’n. Ninnge sɔ’m bé klé kɛ ndɛ nga Zoova kan’n, kɛ i blɛ ng’ɔ kleli’n ko ju’n ɔ yiɛ i nuan. I sɔ’n yó maan é láfi Ɲanmiɛn nin Biblu’n be su kpa ekun.

NINNGE NGA ƝANMIƐN YILI BE’N BE YO MAAN E LAFI I SU KPA

3. ?Ninnge nga Zoova yili be’n mɔ be le be ninnge yolɛ blɛ’n, be nun wie mun yɛle benin?

³ Ninnge nga Zoova yili be’n, be le be ninnge yolɛ blɛ. Ninnge kɛ wia, nzraama annzɛ asiɛ’n sa’n, sɛ bé tú be wun bo annzɛ bé kpɛ́ be wun’n, i kwlaa sɔ’n le i yolɛ blɛ nin i yolɛ nuan. I sɔ’n ukali sran mun naan b’a si blɛ nga be o nun’n, naan kusu kɛ bé tú ajalɛ’n b’a wun lika ng’ɔ fata kɛ be sin’n. Zoova m’ɔ yili i sɔ ninnge’n kwlaa’n ‘i wunmiɛn’n [ti] dan.’ Ɔ maan ɔ nin manmanlɛ fata.​—An kanngan Ezai 40:26 nun.

4. Ninnge nga nguan o be nun’n be yo ninnge mun dɔ su. ?Wafa sɛ yɛ i sɔ liɛ’n ɔ yi Zoova i ngwlɛlɛ’n i nglo ɔ?

 ⁴ Ninnge nga nguan o be nun’n be le be ninnge yolɛ blɛ. Waka nin nnɛn sunman be niɛn i sɔ blɛ’n su yɛ be yo ninnge mun ɔn. I sɔ’n ti yɛ anunman kpanngban be si blɛ ng’ɔ fata kɛ be ɔ lika uflɛ’n niɔn. (Zer. 8:7) Klɔ sran’m be kusu’n, be wunnɛn’n nanti dɔ su. I wie yɛle kɛ sɛ aliɛ cɛn annzɛ ɔ san’n, e wunnɛn’n nun’n e wun i sɔ liɛ’n i wlɛ. Sɛ e fa alapla e kɔ asiɛ’n i bue uflɛ mɔ lɔ dɔ’n nin e nvle’n nun wa liɛ’n be afiɛn ti nun kpa’n, saan ɔ́ dí le nɲɔn kun naan lɔ dɔ liɛ’n w’a si e wun. Nanwlɛ, ninnge nga Zoova yili be’n, be nun kpanngban be kle kɛ i yɛ ɔ ti Ɲanmiɛn m’ɔ “kaci blɛ’n nin sa nga be ju mun-ɔn.” Yɛ be kle kɛ i tinmin’n cɛnnin, naan kusu ɔ si ngwlɛlɛ dan. (An kanngan Jue Mun 104:24 nun.) Asa ekun’n, kɛ mɔ Zoova i ngwlɛlɛ’n nin i kwlalɛ’n be leman awieliɛ’n ti’n, e kwla lafi su kɛ ɔ kwla yo naan like ng’ɔ sunnzunnin’n w’a kpɛn su.

ƝANMIƐN NUAN NDƐ’N MƆ BE KPƐN SU SƐSƐSƐ’N MAAN E LAFI I SU

5. (a) ?Like kunngba cɛ nga e kwla yo naan y’a si klɔ sran’m be ɲrun lɔ sa mun’n yɛle benin? (b) ?Ngue ti yɛ Zoova kwla kan e ɲrun lɔ sa mun ɔ nin blɛ nga bé jú’n, be ndɛ ɔ?

⁵ Ninnge nga Zoova yili be’n, be yi Ɲanmiɛn mɔ ‘sran nyinma wun-mɛn’ i’n, i nzuɛn’n i nglo. Sanngɛ be kwlá yoman naan y’a wun kosan cinnjin wie’m be su tɛwlɛ. Kosan sɔ’m be nun kun yɛ: ?Ainman klɔ sran’m be liɛ’n yó sɛ? (Rɔm. 1:20) Like kunngba nga e kwla yo naan y’a wun kosan sɔ’n i su tɛlɛ’n yɛle Biblu’n m’ɔ ti Ɲanmiɛn nuan ndɛ’n i nun like suanlɛ. Kɛ e yo sɔ’n, e wun Ɲanmiɛn nuan ijɔfuɛ’m be ndɛ nga be kannin’n mɔ be kpɛnnin su sɛsɛsɛ’n. Zoova kwla kan sa nga bé wá jú e ɲrun lɔ’n i ndɛ, afin ɔ si e ɲrun lɔ sa mun weiin. Asa ekun’n, like nga ti yɛ ndɛ nga Biblu’n kan’n ɔ kpɛn su’n, yɛle kɛ Ɲanmiɛn Zoova kwla yo naan sa’m be ju blɛ ng’ɔ fa sunnzunnin’n nun.

6. ?Ngue yɛ maan e si kɛ Zoova kunndɛ kɛ e wun Biblu’n nun kasiɛ’m be wlɛ ɔ?

⁶ Zoova kunndɛ kɛ i sufuɛ’m be wun kasiɛ nga be o Biblu’n nun’n be wlɛ naan be ɲan su ye. Wafa nga Ɲanmiɛn fa ka blɛ mun’n ɔ nin e liɛ’n timan kun. Sanngɛ kɛ ɔ́ kán blɛ nga sa kun jú’n i ndɛ’n, wafa nga e kwla wun i wlɛ’n i su yɛ ɔ nian kan ɔn. (An kanngan Jue Mun 90:4 nun.) I wie yɛle kɛ Sa Nglo Yilɛ fluwa’n kannin “anz nnan” mɔ “be sieli be lɛ kɛ be minndɛ dɔ, nin cɛn, nin anglo, ɔ nin afuɛ nga be kleli be’n,” be ndɛ. E klɔ sran mun’n, e si like nga be flɛ i dɔ, nin cɛn nin anglo ɔ nin afuɛ’n. (Ngl. 9:14, 15) Kɛ e wun wafa nga Ɲanmiɛn nuan ijɔfuɛ’m be ndɛ’m be kpɛnnin su be blɛ su sɛsɛsɛ’n, e lafi Ɲanmiɛn m’ɔ ‘kaci blɛ’n nin sa nga be ju’n,’ i su kpa ekun. Yɛ e lafi i Ndɛ’n i su kpa ekun. Siɛn’n, maan e nian ndɛ nga be kpɛnnin su sɔ’n be nun wie mun.

7. ?Wafa sɛ yɛ Zerizalɛmu nin Zida be su ndɛ nga Zeremi kannin’n be su kpɛnlɛ’n, ɔ kle kɛ titi’n Zoova yo i klun sa’n blɛ ng’ɔ sieli’n su ɔ?

⁷ Maan e dun mmua e nian sa kun m’ɔ juli afuɛ ko ju ya nso ka naan b’a wu Zezi’n. ‘Zozias b’ɔ ti Zida famiɛn’n i wa Zozakim i sielɛ’n i afuɛ nnan’n su’n,’ Zoova kannin “Zida nvle’n i wun ndɛ” kleli Zeremi. (Zer. 25:1) Zoova seli kɛ Babilɔnifuɛ’m bé wá sáci Zerizalɛmu klɔ’n, naan bé tú Zuifu mun Zida lɛ kɔ́ Babilɔni. Ɔ maan “bé sú Babilɔni famiɛn’n afuɛ ableso.” Afuɛ nga be flɛ i 607 ka naan b’a wu Zezi’n i nun’n, Babilɔni sonja’m be bubuli Zerizalɛmu klɔ’n yɛ be fali Zuifu nga be o Zida’n be ɔli Babilɔni. ?Sanngɛ kɛ afuɛ 70 ko sin’n, ngue sa yɛ ɔ́ jú ɔ? Zeremi seli kɛ: “Ndɛ nga Anannganman’n kɛn i ekun’n yɛ: ‘Kɛ Babilɔni’n i sielɛ’n i afuɛ ableso ko ju’n [“Kɛ amun ko di afuɛ ableso Babilɔni lɔ’n,” NW], ń wá jrán amun sin. Kpɛkuun amun wun ndɛ nga n kannin’n, ń yíɛ i nuan: Ń fá amun ḿ bá lika nga nun wa ekun.’” (Zer. 25:11, 12; 29:10) Ndɛ sɔ’n kpɛnnin su i blɛ’n su sɛsɛsɛ. Yɛle kɛ ka naan b’a wu Zezi’n, afuɛ nga be flɛ  i 537 nun’n, Medifuɛ nin Pɛrsifuɛ’m be yacili Zuifu’m be nun maan be jasoli Babilɔni lɔ be sali be sin be klɔ.

8, 9. ?Wafa sɛ yɛ Ɲanmiɛn nuan ijɔfuɛ Daniɛli i ndɛ’n yi i nglo kɛ Zoova ti Ɲanmiɛn kun m’ɔ yo i klun sa’n ‘blɛ ng’ɔ sieli’n’ i su ɔ?

⁸ Maan e nian laa Ɲanmiɛn i nvlefuɛ’m be su ndɛ kun ekun. Afuɛ nɲɔn ka naan Zuifu’m b’a jaso Babilɔni lɔ’n, Ɲanmiɛn sinnin i nuan ijɔfuɛ Daniɛli i lika seli kɛ, kɛ be ko man Izraɛlifuɛ’m be atin kɛ be ko kplan Zerizalɛmu klɔ’n ekun’n, lele m’ɔ́ fá dí afuɛ 483, Mɛsi’n bá. Daniɛli seli kɛ: “Kɛ ɔ fɛ i cɛn mɔ be kannin Zerizalɛmufuɛ’m be sin salɛ ndɛ’n, ɔ nin Zerizalɛmu klɔ’n i uflɛ kplanlɛ ndɛ’n lele m’ɔ́ fá jú blɛ nga Mɛsi m’ɔ kle atin’n ɔ́ bá’n, ɔ ti blɛ nso ɔ nin blɛ ablesiɛn nin nɲɔn.” Afuɛ nga be flɛ i 455 ka naan b’a wu Zezi’n i nun yɛ famiɛn ng’ɔ sie Medifuɛ nin Pɛrsifuɛ mun’n, ɔ mannin be atin sɔ’n niɔn. Kɛ ɔ dili afuɛ 483 sɛsɛsɛ’n, yɛle kɛ afuɛ 29 nun’n yɛ be yoli Zezi m’ɔ fin Nazarɛti’n i batɛmu ɔ. Blɛ sɔ’n nun kusu yɛ Ɲanmiɛn fɛli i wawɛ’n kpɛli i sieli i ngunmin yɛ ɔ kacili Mɛsi’n niɔn. *​—Nee. 2:1, 5-8; Dan. 9:24, 25, NW; Lik 3:1, 2, 21, 22.

⁹ Siɛn’n, maan e nian Ɲanmiɛn Sielɛ’n i su ndɛ nga Biblu’n kannin’n. Biblu’n kle kɛ afuɛ nga be flɛ i 1914 nun’n, bé síe Klist i famiɛn ɲanmiɛn su lɔ. Ɲanmiɛn Ndɛ’n waan afuɛ sɔ’n nun’n nvlenvle’m “be blɛ liɛ’n” wíe’n, naan Klist bó famiɛn dilɛ bo ɲanmiɛn su lɔ. (Lik 21:24; Dan. 4:10-17) * Kɛ nga Daniɛli fa kannin’n sa cɛ’n, afuɛ nga be flɛ i 1914 nun sɛsɛsɛ yɛ “nzɔliɛ” nga Biblu’n waan ɔ́ klé kɛ Zezi w’a ba’n, i su sa’m be boli su kpɛnlɛ bo o. Yɛ kɛ mɔ be kannin Satan bo ɲanmiɛn su lɔ be guɛli i asiɛ’n su wa’n ti’n, blɛ kun nun’n asiɛ’n sufuɛ’m be wunnin ɲrɛnnɛn dan kpa.​—Mat. 24:3-14; Ngl. 12:9, 12.

10. ?Sa benin mun yɛ e si kpa kɛ bé jú ɔ?

¹⁰ Ɔ ka kaan sa’n, ‘nyrɛnnɛn dan’n’ mɔ Zezi kɛnnin i ndɛ’n ɔ́ jú. Kɛ sa sɔ’n ko ju’n, Zezi wá dí famiɛn afuɛ akpi. E si kpa kɛ ninnge sɔ’m be kwlaa be nuan yialɛ blɛ’n su sɛnmɛn i wun kaan sa. I nun mɔ Zezi o asiɛ’n su wa’n, nn Zoova w’a dun mmua w’a sie “cɛn sɔ’n nin dɔ’n” lalaa.​—Mat. 24:21, 36; Ngl. 20:6.

AMUN FA AMUN BLƐ’N YO LIKE KPA

11. ?Kɛ mɔ e si kɛ e o mɛn’n i awieliɛ blɛ’n nun’n ti’n, ngue yɛ ɔ fata kɛ e yo ɔ?

¹¹ ?Kɛ mɔ e si kɛ Klist w’a yo Famiɛn’n naan e o mɛn’n i “awieliɛ blɛ’n” nun’n ti’n, ngue yɛ ɔ fata kɛ e yo ɔ? (Dan. 12:4) Sran kpanngban be wun i wlɛ jrɛiin kɛ mɛn’n yo tɛ kɔ i ɲrun, sanngɛ be bumɛn i kɛ mɛn’n i awieliɛ’n i su ndɛ nga Biblu’n kannin’n yɛ ɔ su kpɛn su ɔ. Wie’m be se be wun kɛ cɛn kun’n mɛn’n ɔ́ wíe sáci mlɔnmlɔn. Wie’m be kusu’n be bu i kɛ klɔ sran’m bé kwlá yó naan sran’m be ‘nyan be ti, be di alaje.’ (1 Tɛs. 5:3) ?Yɛ e li? ?E wun i wlɛ kɛ Satan i  mɛn tɛ nga e o nun yɛ’n i awieliɛ’n w’a mantan koko kpa? Sɛ e wun i wlɛ sɔ’n, é fá e blɛ’n é sú Zoova yɛ é úka sran mun naan be si i. (2 Tim. 3:1) Ɔ fata kɛ like nga é fá e blɛ’n é yó’n, ɔ yo like kpa.​—An kanngan Efɛzfuɛ Mun 5:15-17 nun.

12. ?Ngue yɛ Nowe i blɛ liɛ’n i su ndɛ nga Zezi kannin’n, ɔ kle e ɔ?

¹² Kɛ ɔ ko yo naan y’a fa e blɛ’n y’a yo “like ng’ɔ yo sa ye’n,” ɔ timan pɔpɔ. Afin mɛn’n nga nun’n ninnge nga be kwla yo naan y’a faman e ɲin y’a sieman ninnge cinnjin’m be su’n be sɔnnin. Zezi seli kɛ: “Kɛ m bɔ n kacili Sran’n ń wá bá’n, sran’m bé yó kɛ Noe i blɛ su’n sa.” ?Nowe i blɛ sufuɛ’m be yoli sɛ? Laa mɛn liɛ nga Nowe o nun’n, Ɲanmiɛn seli kɛ ɔ́ núnnún i. Nzue dan kun m’ɔ́ wá tɔ́’n, ɔ́ núnnún klunwifuɛ mun asiɛ’n wunmuan’n su. Kɛ mɔ Nowe ti sran “b’ɔ bo sa nga be yo-ɔ ɔ ti su’n i ndolo’n” ti’n, ɔ niannin nun kannin Ɲanmiɛn i ndɛ’n kleli i blɛ sufuɛ mun. (Mat. 24:37; 2 Piɛ. 2:5) Sanngɛ be liɛ’n, “be di like, be nɔn nzan, be ja bla nin bian [...]. B’a bu-man like fi akunndan lele nzue dan’n ɔ wa fa be kwlaa ɔli.” I sɔ’n ti’n, Zezi wlɛli i sɔnnzɔnfuɛ’m be su nun kɛ: “An buabua amun wun sie, afin m bɔ n kacili Sran’n ḿ bá dɔ nga an bu-man min akunndan’n su.” (Mat. 24:38, 39, 44) Ɔ fataman kɛ e yo kɛ Nowe i blɛ sufuɛ’m be sa, sanngɛ maan e yo kɛ Nowe bɔbɔ sa. ?Ngue yɛ ɔ́ úka e naan y’a buabua e wun y’a sie ɔ?

13, 14. ?Kɛ é mínndɛ Zezi m’ɔ kacili sran’n i balɛ’n, Zoova i su like benin yɛ sɛ ɔ tran e klun titi’n ɔ́ úka e naan y’a su i titi ɔ?

¹³ Kannzɛ Zezi m’ɔ kacili sran’n, ɔ́ bá dɔ nga e bumɛn i akunndan’n i su’n, sanngɛ maan ɔ tran e klun titi kɛ Zoova yo i klun sa’n blɛ ng’ɔ sieli’n su. Sa nga be ju mɛn’n nun’n, ɔ nin ajalɛ nga klɔ sran’m be fa’n, be kwlá yoman naan blɛ nga Zoova sieli kɛ sa kun ju’n, ɔ sɛn i wun. Zoova kacikaci blɛ’n nin sa mun naan i klun sa’n w’a kpɛn su. (An kanngan Daniɛl 2:21 nun.) Nyanndra Mun 21:1 se e kɛ: “Famiɛn’n i klun akunndan’n, ɔ ti kɛ nzue ba sa. Kan Anannganman tinndin i sa’n lɛ’n, lɛ yɛ ɔ kɔ-ɔ.”

¹⁴ Zoova kwla kacikaci sa mun naan i klun sa’n w’a kpɛn su blɛ ng’ɔ sieli’n nun. Sa ngblingbli nga be juli mɛn’n nun’n, be nun sunman be agualiɛ’m be yoli Biblu’n nun ndɛ’m be nuan yialɛ like. Like nga sa sɔ’m be yoli i nuan yialɛ like kpa’n yɛle Ɲanmiɛn Sielɛ’n i jasin fɛ’n mɔ Biblu’n waan bé bó i asiɛ wunmuan’n su’n. Maan e bu Union soviétique i tɔlɛ m’ɔ tɔli’n ɔ nin i sin sa mun be akunndan kan e nian. Sran sunman b’a bumɛn i kɛ i sɔ sa liɛ’n kwla ju ndɛndɛ sɔ. Kɛ ɔ tɔli sɔ’n awa sunman be wa kacili ajalɛ nga be fa be’n. Ɔ maan nvle nga laa be tanninnin jasin fɛ’n i bolɛ lɔ’n, siɛn’n be kwla bo jasin fɛ’n be nun sunman be nun. I ti’n, maan tititi e nian nun kpa e fa e blɛ’n e su Zoova m’ɔ ‘kaci blɛ’n nin sa nga be ju’n.’

MAAN E LAFI SU KƐ NDƐ NGA ZOOVA KAN’N KƐ I BLƐ’N JU’N Ɔ YIƐ I NUAN

15. ?Kɛ Zoova i anuannzɛ’n kacikaci ninnge wie mun’n, wafa sɛ yɛ e kwla yi e Ɲanmiɛn sulafilɛ’n i nglo ɔ?

¹⁵ Sɛ e waan é kwlá bó jasin fɛ’n titi mɛn’n i awieliɛ blɛ nga nun’n, ɔ fata kɛ e lafi su kɛ blɛ nga Zoova sieli i kɛ ɔ́ yó sa kun’n, ɔ sɛnmɛn i wun. Kɛ mɔ mɛn’n kacikaci’n ti’n, ɔ ju wie’n ɔ fata kɛ e kaci wafa nga e fa bo jasin fɛ’n. Kɛ ɔ ko yo naan Zoova i anuannzɛ’n w’a uka e naan y’a bo jasin fɛ’n i kpa’n ti’n, ɔ ju wie’n ɔ kwla kacikaci ninnge wie mun. Kɛ e niɛn i sɔ ajalɛ’m be su mɔ e lo e wun e man Ɲanmiɛn i Wa’n m’ɔ ti “Asɔnun i su kpɛn’n” kɛ ɔ kle e atin’n, yɛ e kle kɛ e lafi Ɲanmiɛn m’ɔ ‘kaci blɛ’n nin sa nga be ju’n’ i su ɔ.​—Efɛ. 5:23

16. ?Ngue ti yɛ e kwla lafi su kɛ blɛ nga e sa mian’n, Zoova úka e ɔ?

¹⁶ Zoova kunndɛ kɛ e srɛ i blɛ kwlaa nun naan e lafi su kpa kɛ “blɛ nga e sa mian’n,” ɔ́ úka e. (Ebr. 4:16) I sɔ liɛ’n yi wafa nga e  tinuntinun’n ɔ klo e’n ɔ nin wafa nga e ndɛ lo i’n, i nglo. (Mat. 6:8; 10:29-31) Kɛ e srɛ Zoova titi kɛ ɔ uka e mɔ e yo e srɛlɛ’n i nuan su sa’n, mɔ e fa atin ng’ɔ kle e’n su’n, yɛ e kle kɛ e lafi i su ɔ. Asa ekun’n, e srɛlɛ nun’n, e wla fiman e niaan Klistfuɛ mun.

17, 18. (a) ?Ngue yɛ ɔ ka kaan sa’n Zoova wá fá yó i kpɔfuɛ mun ɔn? (b) ?Akunndan benin yɛ ɔ fata kɛ e nian e wun i lika ɔ?

¹⁷ Dɔ nga su’n, ɔ fataman kɛ Ɲanmiɛn sulɛ’n nun’n e ‘akunndan’n yo nnyɔn-nnyɔn.’ Ɔ fata kɛ e Ɲanmiɛn sulafilɛ’n i bo’n wla ase kpa. (Rɔm. 4:20) Satan nin i minniɛn mɔ be ti Ɲanmiɛn i kpɔfuɛ’n, be kunndɛ kɛ bé jrán junman nga Zezi seli e kɛ e di’n. (Mat. 28:19, 20) Kannzɛ Satan kle e yalɛ’n, e si kɛ e kwla fa e wla gua Zoova m’ɔ ti “Nyanmiɛn b’ɔ lafi-man, b’ɔ ti sran’m be kwlaa be Defuɛ’n i su, sanngɛ be nga be lafi i su’n, be liɛ yɛlɛ delɛ sɔ’n i bo’n.” Ɔ “kwla de be nga be sro i bɔ sa tɔ be su’n.”—1 Tim. 4:10; 2 Piɛ. 2:9.

¹⁸ Ɔ ka kaan sa’n, Zoova núnnún mɛn tɛ nga. E siman wafa nin blɛ ng’ɔ́ yó i sɔ’n, sanngɛ e si kɛ kɛ i blɛ’n ko ju’n Klist núnnún Ɲanmiɛn i kpɔfuɛ mun. Kɛ ɔ ko yo sɔ’n, sran ngba sí kɛ Zoova le atin sie nglo nin asiɛ’n. I sɔ’n ti’n, sɛ y’a wunman “blɛ nin cɛn” nga e o nun yɛ’n i wlɛ’n, ɔ́ yó tɛ́ kpa mán e. Maan e nian e wun naan y’a bumɛn i kɛ “kɛ ɔ fin lalaa’n bɔ e nannan’m be wuli’n, like nga Nyanmiɛn yili be’n, be kwlaa be tɛ o be osu’n nun.”​—1 Tɛs. 5:1; 2 Piɛ. 3:3, 4.

MAAN ZOOVA ‘NYRUN YƐ E NYIN TA-A’

19, 20. ?Ngue ti yɛ ɔ fata kɛ e ɲin ta Zoova ɲrun ɔn?

¹⁹ Kɛ Ɲanmiɛn Zoova boli klɔ sran mun’n, ɔ kunndɛli kɛ be tran nguan nun tititi naan b’a kwla suan i bɔbɔ nin ninnge ɲɛnmɛn ng’ɔ yili be’n be su like. Akunndanfuɛ’n 3:11 kan Zoova i ndɛ se kɛ: “Sa kun ng’ɔ o sa’n, sɛ i blɛ ko ju’n, Nyanmiɛn nian su yo i sɛsɛsɛ. Nyanmiɛn bɔbɔ yɛ maan e si like ng’ɔ lɛ-man bo bolɛ nin awieliɛ nin-ɔn. Sanngɛ sa nga Nyanmiɛn yo’n, kɛ ɔ fin i bo bolɛ’n nun lele b’ɔ́ fá jú i awieliɛ’n, sran si-mɛn i bo.”

²⁰ Zoova w’a kaciman like ng’ɔ sunnzunnin i klɔ sran’n i lika’n. Nanwlɛ, i sɔ liɛ’n yo e fɛ dan! (Mal. 3:6) Biblu’n waan Ɲanmiɛn “kpɛ-mɛn i wun kɛ lolɛ b’ɔ kpɛ i wun’n sa.” (Zak 1:17) Nán ninnge kɛ asiɛ’n m’ɔ kpɛ i wun sa’n mɔ i su yɛ klɔ sran’m be nian be ka blɛ’n, i su yɛ Zoova nian yo ninnge mun ɔn. Zoova ti “Famiɛn b’ɔ ti anannganman’n.” (1 Tim. 1:17) I sɔ’n ti’n, maan Zoova ‘nyrun yɛ e nyin ta-a. Nyanmiɛn b’ɔ de e’n i su yɛ e lafi-ɔ.’ (Mis. 7:7) Kpɛkun kɛ nga Biblu’n fa kan sa’n, maan ‘e bɔ e wla’n wo Anannganman su’n, e jran kekle, yɛ e tra e anwlɛn!’​—Jue. 31:25.

[Ja ngua lɛ ndɛ mun]

[Kosan mun]

[Foto, bue 25]

Daniɛli lafili su kɛ ndɛ ng’ɔ fin Ɲanmiɛn’n ɔ́ kpɛ́n su.

[Foto, bue 27]

?Amun fa amun blɛ’n yo Zoova i klun sa’n?