Maan e suan Ɲanmiɛn Ndɛ’n nun like

?Wafa sɛ yɛ ɔ fata kɛ e wla kpɛn Zezi i wie’n su ɔ?

Kosan wie mɔ amun fa usa amun wun’n, ɔ nin wafa nga amun kwla wun be su tɛlɛ’n amun Biblu’n nun’n, fluwa nga nun’n, é wá kán be ndɛ. Sɛ Zoova i Lalofuɛ’m be nin amun kwla koko su yalɛ’n, ɔ́ yó be fɛ.

1. ?Ajalɛ benin yɛ ɔ fata kɛ e fa naan e wla w’a kpɛn Zezi i wie’n su ɔ?

Zezi seli i sɔnnzɔnfuɛ’m be kɛ be fa nzɔliɛ ninnge mun kɛ kpaun nin divɛn sa be di like, naan be wla kpɛn i wie cɛn’n su. Kpaun’n ti Zezi i wunnɛn’n i nzɔliɛ, yɛ divɛn’n ti i mmoja’n i nzɔliɛ.​—An kanngan Lik 22:19, 20 nun.

Kpaun ayre nunman kpaun nga Zezi fali’n nun. Biblu’n nun’n, kpɛ sunman’n, kpaun ayre’n ti fɔ’n i nzɔliɛ. Ɔ maan sɛ kpaun nga kpaun ayre nunman nun’n, yɛ ɔ ti Zezi i wunnɛn’n mɔ fɔ nunman nun’n, i nzɔliɛ’n, ɔ ti su. Zezi i wunnɛn’n m’ɔ fa yili tɛ’n ti’n, be faman nnɛn be yiman tɛ kun kɛ nga Moizi i mmla’n fa kle’n sa. (Ebre Mun 10:5, 9, 10) Zezi i mmoja’n m’ɔ ti like nanndoliɛ’n, mɔ e sa tɛ’m be ti’n, ɔ guɛli i ase’n, divɛn’n ti i nzɔliɛ.​—An kanngan 1 Piɛr 1:19; 2:24; 3:18 nun.

2. ?Blɛ benin nun yɛ ɔ fata kɛ e yo aɲia kun m’ɔ kle kɛ e wla kpɛn Zezi i wie’n su ɔ?

Nisan anglo’n i le 14 su’n, kɛ bé dí delɛ cɛn’n, yɛ Zezi wuli ɔ. Zuifu’m be lɔ’n, wia atɔliɛ’n su yɛ cɛn kun bo i bo ɔ. Nnɔsua kasiɛn ka naan Zezi w’a wu’n, ɔ nin i akoto mun be dili Delɛ cɛn’n. Kpɛkun, i sin’n Zezi wa kpɛli be wla kpɛnlɛ cɛn kun ekun ba, naan be wla kpɛn i wie cɛn’n su.​—An kanngan Lik 22:14, 15 nun.

Like nga Zoova sinnin Zezi i lika yoli naan klɔ sran’m b’a kwla ɲan be ti sa tɛ’n nin wie’n be sa nun’n, andɛ Ɲanmiɛn i nvle nunfuɛ’m be wla kpɛn su. (Ezipt Lɔ Tulɛ 12:5-7, 13, 17) Wafa kunngba nga laa afuɛ nuan kun nun’n, be dili Delɛ cɛn’n i kpɛ kunngba’n, i su yɛ be nian be yo be wla kpɛnlɛ aɲia’n niɔn. Be yo i kpɛ kunngba afuɛ kwlaa nun, Nisan i le 14 su, kɛ sɛnzɛ ko tɔ’n.​—An kanngan Zan 1:29 nun.

  3. ?Wan yɛ ɔ kwla di kpaun’n m’ɔ kwla nɔn nzan’n niɔn?

Kɛ Zezi fá divɛn mɛ́n i sɔnnzɔnfuɛ mun’n, ɔ seli kɛ: “Like ng’ɔ o klowa nga nun’n ɔ ti [...] aenguɛ uflɛ nga Nyanmiɛn waan ɔ nin amun trá i nzɔliɛ.” (1 Korɛntfuɛ Mun 11:25) Aenguɛ uflɛ sɔ’n, ɔ kacili laa liɛ nga Ɲanmiɛn nin Izraɛlifuɛ’m be trali m’ɔ taka Moizi i mmla’n su’n. Sɛ ɔ ti kɛ Izraɛlifuɛ’m be nantili Ɲanmiɛn i mmla’n su sɛsɛsɛ’n, nn be yoli i liɛ klonglo. (Ezipt Lɔ Tulɛ 19:5, 6) Sanngɛ Izraɛlifuɛ’m be ɲin w’a yiman Ɲanmiɛn. Ɔ maan Zoova kpɛli aenguɛ uflɛ i ba.​—An kanngan Zeremi 31:31 nun.

Zoova sin aenguɛ uflɛ nga ɔ nin sran akpasua kaan kun be trali’n i lika, ɔ yra sran kpanngban be su. Sran akpasua kaan sɔ’n i nunfuɛ’m be ti sran 144.000 cɛ. Zoova sín be lika ɔ́ yrá sran akpinngbin mɔ be fin nvlenvle kwlaa nun’n be su, naan be ɲan anannganman nguan mɛn klanman’n nun asiɛ’n su wa. Be nga be o aenguɛ uflɛ sɔ’n nun’n, kɛ é sé yɛ’n, be nun wie’m be su Zoova asiɛ’n su wa. Be ngunmin cɛ yɛ be kwla di kpaun’n mɔ be kwla nɔn nzan’n niɔn. Afin like ng’ɔ o klowa’n nun’n, ɔ ti Zezi i mmoja m’ɔ ti ‘aenguɛ uflɛ nga Nyanmiɛn waan ɔ nin be trá i nzɔliɛ.’​—An kanngan Lik 12:32 nin Sa Nglo Yilɛ 14:1, 3 nun.

4. ?Wafa sɛ yɛ e ɲan e wla kpɛnlɛ cɛn’n i su ye ɔ?

E wla kpɛnlɛ cɛn’n yo maan klolɛ dan nga Zoova klo e’n, e si su ye kpa tra laa’n. Ɔ sunmɛnnin i Wa’n kɛ ɔ wa wu e sa tɛ’m be ti. Ɔ maan kɛ e ti e wla kpɛnlɛ cɛn aɲia’n i bo’n, like nga Zezi i wie’n yo man e’n, ɔ fata kɛ e fa e ɲin sie su kpa. Like nga Zoova nin Zezi be yoli mannin e’n ti’n, wafa nga e kwla yi e ye silɛ i nglo be lika’n, ɔ fata kɛ e bu i akunndan kpa.​—An kanngan Zan 3:16 nin 2 Korɛntfuɛ Mun 5:14, 15 nun.

Sɛ amun kunndɛ kɛ amún sí nun ekun’n, an nian fluwa nga i bue 206-208 nun. Zoova i Lalofuɛ mun yɛ be yili ɔ.