Ɲanmiɛn sufuɛ kpa nin e nvle’n nun sran kpa Wafa nga e kwla yo i nɲɔn’n

?NINNGE nga be kwla fa sie Ɲanmiɛn junman nga Zezi dili’n i nzɔliɛ’n, be nun nɲɔn yɛle benin? I kun yɛle kɛ nán politikifuɛ’m be ninnge siesielɛ wafa’n i kacilɛ yɛ Zezi kunndɛli ɔ, sanngɛ sran be awlɛn’n i kacilɛ yɛ ɔ kunndɛli ɔ. Oka kun su’n, kɛ Zezi kán Ɲanmiɛn ndɛ’n, amun nian like ng’ɔ fali sran’m be ɲin sieli su’n. Ka naan w’a kle i sɔnnzɔnfuɛ’m be kɛ ɔ ti cinnjin kɛ be yo kɛ njin nin kannin sa’n, ɔ dun mmua seli i ndɛ tiefuɛ’m be kɛ be nga “be si kɛ be di Nyanmiɛn ninnge’m be yalɛ’n” be yɛ be liɛ yó ye kpa sa ɔ. Ɔ ukali su kɛ: “Be nga be ti wɛtɛɛfuɛ’n [...], be nga sa tɛ fi nun-man be anwlɛn’n nun’n [...], be nga be ti ndɛ siesiefuɛ’n, be liɛ su ti ye.” (Matie 5:1-11) Zezi kleli i sɔnnzɔnfuɛ’m be like nga ti yɛ ɔ ti kpa kɛ sa kpa nin sa tɛ be su akunndan nga be bu’n ɔ nin Ɲanmiɛn liɛ be yo kun’n. Yɛ kɛ sa kun tɔ’n wafa nga be wun fa yo be’n, like nga ti yɛ ɔ ti kpa kɛ ɔ yo kɛ Ɲanmiɛn fa klo sa’n, ɔ kleli be wie. Asa’n, ɔ ukali be naan b’a wun sa nga ti yɛ ɔ ti cinnjin kɛ be fa be awlɛn kwlaa be su Ɲanmiɛn’n.

I nɲɔn su’n yɛle kɛ kɛ Zezi wunnin sran’m be su afɛ’n, aunnvuɛ m’ɔ si sran’n ti’n, ɔ yoli maan be su afɛ’n yoli sɔsɔ. Sanngɛ w’a seman kɛ junman ng’ɔ́ dí’n, yɛle kɛ ɔ́ yí sran’m be su afɛ ngba’n. (Matie 20:30-34) Ɔ yoli tukpacifuɛ’m be juejue sanngɛ tukpacɛ’n w’a wieman asiɛ’n su. (Lik 6:17-19) Ɔ yoli maan be nga be mianmian be’n be wun fali be feke, sanngɛ sran lufle bulɛ’n w’a wieman. Ɔ mannin sran’m be like be dili, sanngɛ awe’n w’a yaciman kpɛnlɛ.​—Mark 6:41-44.

Sran’m be awlɛn’n i kacilɛ ɔ nin be su afɛ’n i su kpɛlɛ

?Ngue ti yɛ Zezi w’a kunndɛman kɛ ɔ́ káci politikifuɛ’m be ninnge siesielɛ wafa’n mɔ sran’m be awlɛn’n i kacilɛ’n yɛ ɔ yoli i cinnjin ɔn? ?Asa kusu’n, ngue ti yɛ Zezi w’a kunndɛman kɛ ɔ́ yí afɛ kwlaa ng’ɔ sran’m be su’n mɔ afɛ sɔ’m be su kpɛlɛ’n yɛ kunndɛli ɔ? Zezi si kɛ Ɲanmiɛn sunnzunnin kɛ cɛn wie lele’n, ɔ́ sín i bɔbɔ Ɲanmiɛn i Famiɛn diwlɛ’n i lika ɔ́ núnnún awa mun nin sa kwlaa nga be ti yɛ sran’m be wun be ɲrun’n. (Lik 4:43; 8:1) I sɔ’n ti’n, kɛ cɛn kun i sɔnnzɔnfuɛ’m be wlɛli i fanngan kɛ ɔ fa blɛ kpanngban kpa ekun yo sran’m be juejue’n, ɔ seli be kɛ: “An maan e wɔ klɔ nga be mantan-mantan wa’n be su naan n kan ndɛ lɔ wie, afin i sɔ’n ti yɛ m bali-ɔ.” (Mark 1:32-38) Zezi yoli maan sran kpanngban be kplo nun afɛ’n kpɛli su sanngɛ Ɲanmiɛn ndɛ’n i kanlɛ’n ɔ nin i klelɛ’n yɛ ɔ fa sieli i like kwlaa ɲrun ɔn.

Andɛ kusu’n, kɛ Zoova i Lalofuɛ’m bé bó jasin fɛ’n, be mian be ɲin be sɔnnzɔn Zezi. Be ti be nga be sa ti mianwa’n be wun ɲanman nun naan be su afɛ’n w’a kan ase. Sanngɛ be seman kɛ bé mían be ɲin bé yó naan sran lufle bulɛ’n wie mɛn’n nun. Be lafi su kɛ Ɲanmiɛn Sielɛ’n wá núnnún ninnge nga ti yɛ sran’m be fɛ’n i sekeseke. (Matie 6:10) Kɛ Zezi sa’n, nán politikifuɛ’m be ninnge siesielɛ wafa’n yɛ be mian be ɲin kɛ bé káci i ɔ, sanngɛ be mian be ɲin naan sran’m be awlɛn’n kaci. I sɔ mɔ be yo’n yɛ ɔ kwla uka sran mun ɔn. Afin nán politiki bɔbɔ ba sa’n ti yɛ sran’m be fɛ ɔ. Sanngɛ like bɔbɔ ba nga ti yɛ be fɛ’n yɛle be akunndan bulɛ wafa’n.

Nvle’n nun sran kpa

Zoova i Lalofuɛ’m be lafi su wie kɛ be Klistfuɛ junman’n i kun yɛle kɛ be yo naan nvle nga be o nun’n, i nun tranlɛ’n yo fɛ. Ɔ maan, be di ndɛ nga awa kan’n su. Be fluwa mun nin jasin fɛ nga be bo’n nun’n, be wla sran’m be fanngan naan be nanti mmla nga awa kpɛ be’n su. Sanngɛ sɛ awa’n se Zoova i Lalofuɛ’m be kɛ be yo like wie mɔ Ɲanmiɛn mmla’n bu i fɔ’n, be yoman. Be “nyin yi  Nyanmiɛn tra sran.”​—Sa Nga Be Yoli’n 5:29; Rɔmfuɛ Mun 13:1-7.

Zoova i Lalofuɛ’m be ko wun be tranfuɛ’m be wun kɛ bé klé be Biblu’n nun like. Be seman be kɛbe tuɛ i ti kalɛ. Like sɔ mɔ be kle sran mun’n ti’n sran akpinngbin kpanngban be awlɛn’n w’a kaci. Afuɛ kwlaa nun’n, be uka sran akpiakpi ya ko yo wie maan be yaci nzuɛn tɛ wie mun. Nzuɛn sɔ’m be nun wie yɛle siklɛti nin drɔgi nɔnlɛ’n, nin nzanbɔɛ’n, nin sika nun mma tolɛ’n yɛ bian nin bla kunndɛlɛ sukusuku’n. Kɛ mɔ sran’m be suannin Biblu’n nun mmla’m be su nantilɛ’n ti’n, be yo sa kpa yɛ be kaci be nvle’n nun sran kpa.​—Amun nian blɔfuɛ nun Sasafuɛ Tranwlɛ’n afuɛ 2012, Mɛ 1 i bue 18 su ndɛ nga be flɛ i kɛ “ La Bible transforme des vies ”.

Asa kusu’n, like nga awlobo kun nunfuɛ’m be suɛn i Biblu’n nun’n, ɔ uka be naan be ɲin w’a yi be wiengu kpa. Yɛ ɔ yo maan yasua kun nin i yi yɛ siɛ nin niɛn nin ba mun kpɛkun ba’m be ngunminngunmin be afiɛn’n, yalɛ kokolɛ’n yo pɔpɔ. I sɔ ninnge mun yɛ be yo maan awlobofuɛ’m be afiɛn sɛ kpa’n niɔn. Kusu’n, kɛ lika kun nun’n, awloboawlobo’m be nun sran’m be bo ti kun’n, lika sɔ’n nunfuɛ’m be ti be wun aniɛn kpa.

?Kɛ amun kanngannin ndɛ nga be sinnin lɔ’n nun lele mɔ w’a fa ju yɛ’n, wafa sɛ amún tɛ́ kosan nga su ɔ? ?Be nga be waan ɔ ti kpa kɛ be fa Ɲanmiɛn i sulɛ’n be sanngan politiki nun’n, be akunndan sɔ’n nin Biblu’n nun mmla’m be kɔ likawlɛ? Ɔ ti weiin, be kɔman likawlɛ. ?Sanngɛ yoo, ɔ fata kɛ Klistfuɛ’m be yo naan nvle nga be o nun’n, i nun tranlɛ’n yo fɛ? Ɛɛn. ?Yɛ wafa sɛ bé yó i sɔ liɛ’n niɔn? Yɛle kɛ maan be yo kɛ njin nin kannin sa kɛ nga be Zezi fa kan kleli be’n sa.

Sran nga be mian be ɲin be fa ndɛ weinwein nga Klist kannin be lɛ’n be su’n, be bɔbɔ ba’n yɛ be awlofuɛ’m bé ɲán i su ye. Kpɛkun lika nga be tran lɛ’n i nunfuɛ’m bé ɲán ye wie. Ɔ o amun tranwlɛ’n nun lɔ Zoova i Lalofuɛ’m be klun kɛ bé kán Biblu’n nun like nga be kle sran mun amun asa’n su’n, i su ndɛ ekun bé klé amun. *

[Ja ngua lɛ ndɛ’n]

[Ndɛ kwle, bue 7]

Nán politikifuɛ’m be ninnge siesielɛ wafa’n i kacilɛ yɛ Zezi kunndɛli ɔ, sran be awlɛn’n i kacilɛ yɛ ɔ kunndɛli ɔ.

[Ndɛ kwle, bue 8]

Zoova i Lalofuɛ’m be lafi su kɛ be Klistfuɛ junman’n i kun yɛle kɛ be yo naan nvle nga be o nun’n, i nun tranlɛ’n yo fɛ.