Ɔ kwla uka e andɛ

“Ɔ ndɛ’n ɔ ti kɛ kannin sa, ɔ kpaja min bo. Ɔ kpaja min nyrun atin’n su weiin.”​—JUE MUN 119:105.

?NGUE NUN YƐ BIBLU’N TI I LIƐ NGUNMIN KUN ƆN? Fluwa wie’m be kwla yo kpa dan sanngɛ be kwlá kleman e atin. Yɛ andɛ afɔtuɛ fluwa nga be klɛ be’n, ɔ ju wie’n ɔ fata kɛ be kacikaci be nun ndɛ mun. Sanngɛ Biblu’n i liɛ’n be kacikacimɛn i nun ndɛ mun. I bɔbɔ se kɛ i nun “ndɛ nga be klɛli be laa’n, be klɛli i kwlaa sɔ’n kɛ bé fá klé e ngwlɛlɛ.”​—Rɔmfuɛ Mun 15:4.

LIKE NGA BE KLE SƆ’N BE NUN KUN YƐ: Kannzɛ Biblu’n timan dɔɔtrɔ fluwa’n sanngɛ e akunndan nin e wunnɛn’n nun juejue yolɛ’n be su afɔtuɛ ng’ɔ man’n, be yo e wun sa ye. I wie yɛle ndɛ yɛ m’ɔ kannin’n. I waan: “Be wla b’ɔ gua ase’n ɔ yo maan be yo juejue.” (Nyanndra Mun 14:30) Biblu’n kan ekun kɛ: “Sran nga bɔ i bɔbɔ i wun akunndan yɛ ɔ bu’n, ɔ fɛ-mɛn i wun mantan-man sran. Sɛ be se kɛ bé úkɛ i naan ɔ yo like wie’n, ɔ yo-mɛn i fɛ.” (Nyanndra Mun 18:1) Asa kusu’n, ɔ se kɛ “sɛ a cɛ sran like’n, ɔ ti kpa tra kɛ be cɛ wɔ like’n.”​—Sa Nga Be Yoli’n 20:35.

NDƐ NGA BE NGA BE KUNNDƐ SA’M BE SU LIKE’N BE KAN’N: Be wla m’ɔ gua ase’n, ɔ nin janvuɛ tralɛ’n, yɛ sran ye yolɛ’n be kwla yo maan amun yo juejue. Be klɛli i zronali kun m’ɔ kan juejue yolɛ ndɛ’n i nun kɛ: “Yasua nga be fa ya dandan ngboko’n, be ti nun miɛn nun tukpacɛ kwla tɔ be su ndɛndɛ tra be nga be faman ya ndɛndɛ’n.” (The Journal of the American Medical Association) Nvle nga be flɛ i Ɔstrali’n i nun lɔ’n, be fali be ɲin sieli i sran kpɛnngbɛn wie’m be su lele afuɛ blu. Be wunnin i kɛ be nun nga “be le janvuɛ mɔ be kwla kan be klun ndɛ be kle be titi’n,” be cɛ tra be nga mun. Kpɛkun afuɛ nga be flɛ i 2008 nun’n, sran wie mɔ be kunndɛ sa’m be su like’n mɔ be fin Amlɛnkɛn’m be mɛn’n nun lɔ’n nin Kanada lɔ’n, be wunnin i kɛ “sɛ sran kun fɛ i sika yo sran ye’n ɔ di aklunjuɛ tra kɛ ɔ fa yo i bɔbɔ i wun sa ye’n.”

?AMUN BU I SƐ? ?Juejue yolɛ’n i su afɔtuɛ nga fluwa wie mɔ be klɛli w’a di afuɛ kɔe 2.000 ɔ man’n, amun kwla fa su? ?Annzɛ Biblu’n ti i liɛ ngunmin?

[Ndɛ kwle, bue 8]

“N klo Biblu’n i dan [...] afin ɔ ti ayre kpa.”​—HOWARD KELLY, Ɔ TI AMLƐNKƐN’M BE LƆ INIVƐRSITE NGA BE FLƐ I JOHNS HOPKINS UNIVERSITY SCHOOL OF MEDICINE I NUN SRAN DAN KUN.