Amun yaci Zoova nun naan ɔ yo maan amun ɲan amun ti sakpa
Amun yaci Zoova nun naan ɔ yo maan amun ɲan amun ti sakpa
“Mmla’n b’ɔ ti niannun kpa’n, b’ɔ maan sran’m be nyan be ti’n, [...] nian nun.”—ZAK 1:25.
?AMUN KWLA YIYI NUN?
?Mmla benin yɛ i su falɛ’n maan sran’m bé ɲán be ti kpa sa ɔ? ?Yɛ wan mun yɛ be ɲan mmla sɔ’n su ye ɔ?
?Ngue yɛ ɔ fata kɛ e yo naan y’a ɲan e ti sakpa ɔ?
?Be nga be ɲin yi Zoova titi’n be ti ɲanlɛ wafa benin yɛ ɔ o be ɲrun lɔ ɔ?
1, 2. (a) ?Andɛ mɛn’n nun’n, sran’m be ti ɲanlɛ’n ti sɛ? ?Yɛ ngue ti ɔ? (b) ?Be ti ɲanlɛ benin yɛ Zoova i sufuɛ’m be minndɛ i ɔ?
BLƐ nga e o nun yɛ’n, sran’m be klo aɲinkpli, be diman mmla’m be su yɛ be yo nzaje sa. Kɛ aliɛ’n cɛ́n m’ɔ́ sán’n nn i sɔ’n yó tɛ kɔ́. (2 Tim. 3:1-5) I sɔ’n ti’n, awa’m be kpɛ mmla kaka. Be uka be lɔ polisie’m be ninnge nga be fa di junman’n be su, yɛ be fa kamera be sasa lika wie mun. Nvle wie’m be nun’n, sran wie’m be bɔbɔ be fa ninnge wie’m be sasa be wun kpa ekun. Be awlo’m be nun’n be sie like wie, kpɛkun kɛ sran kɛn i’n, ɔ su tɛ. Be wlawla anuan’m be nun gboklo, yɛ wie liɛ bɔbɔ’n be fa blalɛ ɲanman be sin yia awlo’n yɛ be wla nun kolan. Sran wie’m be liɛ’n srɛ m’ɔ kun be’n ti’n be fiteman kɔnguɛ annzɛ be kplinman su kɛ be mma’m be ngunmin be kan ngowa gua su. Nanwlɛ, sran’m be ɲanman be ti be yoman be klunklo like kun, yɛ kɛ e niɛn i sa kusu’n, e bumɛn i kɛ e ɲrun lɔ’n lika’n yó kpa.
2 Laa Edɛni fie’n nun lɔ’n, Satan seli kɛ sɛ klɔ sran’m bé ɲán be ti’n nn b’a kpɔci Zoova. Sa nga kɛ ɔ fɛ i lɛ’n be ju’n, be kle kɛ ɔ buali ato dan! Kɛ sran’m bé yó ɲin kekle Ɲanmiɛn su mɔ bé yó be klunklo ninnge mun kpa bé kɔ́’n nn afɛ’n kusu tín klɔ sran’m be kwlaa be su kɔ́. E mɔ e ti Zoova i sufuɛ’n, sran’m be aeliɛ sɔ’n kle e yalɛ wie. Sanngɛ e lafi su kɛ cɛn kun’n klɔ sran’m bé ɲán be ti sa tɛ’n i sa nun yɛ be su saciman kun. Bé ɲán be ti kɛ nga Biblu’n waan ‘Nyanmiɛn mma’m bé nyán be ti’n’ sa. (Rɔm. 8:21) I kpa bɔbɔ’n, kɛ é sé yɛ’n Zoova su siesie i sufuɛ mun naan b’a kwla ɲan be ti. ?Wafa sɛ yɛ ɔ yo i sɔ liɛ’n niɔn?
3. ?Mmla benin yɛ Zoova fa mannin Klist i sɔnnzɔnfuɛ mun ɔn? ?Yɛ kosan benin yɛ é wá tɛ́ be su ɔ?
3 Kɛ ɔ ko yo naan y’a kwla ɲan e ti sɔ’n, Zoova mannin e like kun. Zaki flɛli i kɛ ‘mmla b’ɔ maan sran’m be nyan be ti’n.’ (An kanngan Zak 1:25 nun.) Biblu kun nun’n, be kacili ndɛ sɔ’n kɛ “ti kpɔlɛ mmla.” (Anuãsɛ Fuflɛ) Titi’n sran’m be bumɛn i kɛ mmla’m be ti be ti ɲanlɛ like, sanngɛ be bu i kɛ be ti’n be kwlá yoman be klunklo like. ?Ɔ maan ngue yɛle ‘mmla b’ɔ maan sran’m be nyan be ti’n’? ?Yɛ wafa sɛ yɛ mmla sɔ’n yo maan e ɲan e ti ɔ?
MMLA MƆ MAAN E ƝAN E TI’N
4. ?Ngue yɛle ‘mmla b’ɔ maan sran’m be nyan be ti’n’? ?Yɛ wan mun yɛ be ɲan mmla sɔ’n i su ye ɔ?
4 ‘Mmla b’ɔ maan sran’m be nyan be ti’n,’ nɛ́n i yɛle Moizi Mmla’n. Afin like nga ti yɛ Zoova mannin Izraɛlifuɛ’m be mmla sɔ’n yɛle kɛ i waan be wun kɛ be ti sa tɛ yofuɛ. Kusu Klist yiali mmla’n sɔ’n i nuan. (Mat. 5:17; Gal. 3:19) ?Ɔ maan mmla benin yɛ Zaki kɛn i ndɛ ɔ? Mmla ng’ɔ kɛn i ndɛ’n yɛle “Krist mmla’n.” (Gal. 6:2) Ɔ maan ‘mmla b’ɔ maan sran’m be nyan be ti’n,’ yɛle like kwlaa nga Zoova kunndɛ kɛ e yo’n. I Klistfuɛ nga be kpali be sieli be ngunmin nin o, i “bua’m be wie” mun o, be kwlaa be ɲan mmla sɔ’n i su ye.—Zan 10:16.
5. ?Ngue ti yɛ mmla mɔ maan be ɲan be ti’n, i su nantilɛ timan kekle ɔ?
5 ‘Mmla b’ɔ maan sran’m be nyan be ti’n,’ ɔ timan kɛ nvle sunman be mmla’m be sa. I nun ndɛ’m be wlɛ wunlɛ’n ɔ nin be su nantilɛ’n timan kekle. (1 Zan 5:3) Zezi seli kɛ: “N kɔmin su waka’n i sualɛ yo fɛ, yɛ n trɔ’n yo-man nɔnnin.” (Mat. 11:29, 30) Asa kusu’n, b’a klɛman mmla sɔ’n i nun like ng’ɔ fata kɛ be yo’n annzɛ nán be yo’n i wlɛlɛlɛ b’a guɛmɛn i lɔ. Afin ɔ taka klolɛ’n su, yɛ sran’m be akunndan’n nin be awlɛn’n nun yɛ be klɛli i ɔ. B’a klɛmɛn i yɛbuɛ su.—An kanngan Ebre Mun 8:6, 10 nun.
WAFA NGA ‘MMLA’N’ YO MAAN E ƝAN E TI’N
6, 7. ?Ngue ti yɛ Zoova man e mmla ɔ? ?Yɛ ngue yɛ mmla mɔ maan be ɲan be ti’n ɔ man e atin kɛ e yo ɔ?
6 Klɔ sran’m be bɔbɔ be kpa yolɛ ɔ nin be sasalɛ ti yɛ Zoova kpɛli mmla mannin be ɔ. Amun bu ninnge wie mɔ be ti kɛ mmla sa’n be akunndan be nian. I kun yɛle kɛ sɛ sran kun fu waka kun su naan ɔ tu kpɛn asiɛ’n wun wa’n, ɔ kwla bu i lika wie annzɛ ɔ kun i wun bɔbɔ. Sran’m be fɛfɛman kɛ i sɔ ninnge mɔ be ti kɛ mmla sa’n be ti’n be kwlá yoman be ninnge mun. I kpa’n i sɔ’n yo be fɛ afin be wun i wlɛ kɛ i sɔ’n ti be kpa yolɛ like. I wafa kunngba’n, like nga Zoova kunndɛ kɛ e yo’n m’ɔ o Klist i ‘mmla b’ɔ maan sran’m be nyan be ti’n’ i nun’n, ɔ ti e kpa yolɛ like.
7 Mmla mɔ maan be ɲan be ti’n, ɔ sasa e. Asa ekun’n, mmla sɔ’n yo maan e yo ninnge nga e klo be’n mɔ kusu be ti kpa’n. Kɛ e yo sɔ kusu’n e yoman e bɔbɔ annzɛ e wiengu i tɛ. Ɔ maan sɛ e klo kɛ é ɲán e ti sakpa’n yɛle kɛ sɛ e waan é kwlá yó e klunklo like’n, ɔ fata kɛ ninnge nga be ti kpa’n yɛ e klo be ɔ. Yɛle kɛ like nga Zoova klo i’n, ɔ nin ng’ɔ klo kɛ e yo’n yɛ ɔ fata kɛ e awlɛn tran su kɛ é yó ɔ. Ɔ fata kɛ e suan ninnge nga Zoova klo be’n be klolɛ yɛ e kpɔ ninnge ng’ɔ kpɔ be’n. Mmla mɔ maan be ɲan be ti’n, ɔ uka e naan y’a yo i sɔ liɛ’n.—Amɔ. 5:15.
8, 9. ?Be nga be fa mmla mɔ maan be ɲan be ti’n su’n, ye benin yɛ be ɲɛn i ɔ? An fa sa kun yiyi nun.
8 Fɔ m’ɔ o e nun’n ti’n, e kpli kpa naan y’a kwla wla konvi tɛ’n i ase. Sanngɛ, sɛ e mian e ɲin e nanti mmla mɔ maan e ɲan e ti’n su’n, kɛ é sé yɛ bɔbɔ’n e kwla di alaje. Bian kun m’ɔ suan Je i su ndɛ’n ɔ yi i sɔ liɛ’n i nglo. Ka naan w’a bo Biblu’n nun like suanlɛ bo’n, ɔ nɔn siklɛti. Kɛ ɔ sili kɛ Ɲanmiɛn klomɛn i aeliɛ sɔ’n, ɔ wunnin i wlɛ kɛ ɔ fata kɛ ɔ fa ajalɛ. Yɛle kɛ: ?Siklɛti nɔnlɛ m’ɔ ti klɔ sran nzuɛn’n yɛ ɔ́ ló i yɛ, annzɛ Zoova i klun sa’n i yolɛ’n niɔn? Kannzɛ bɔbɔ siklɛti nɔnlɛ’n i yacilɛ’n yoli kekle kpa mɛnnin i’n, sanngɛ ngwlɛlɛ su ɔ fali ajalɛ kɛ ɔ́ sú Ɲanmiɛn. ?Kɛ ɔ yacili i aeliɛ sɔ’n, wafa sɛ yɛ i wun yoli i ɔ? I waan: “N ɲannin min ti klanman yɛ aklunjuɛ’n kunnin min kpo!”
9 Kɛ mɛn’n nunfuɛ’m be waan b’a ɲan be ti’n, yɛle kɛ be kwla yo like kwlaa nga be awlɛn’n su be bo kɛ be yo’n. Sanngɛ kɛ nga Je fa wunnin i’n sa’n, i agualiɛ’n yɛle kɛ be kaci sa tɛ’n i kanga. Be nga be fa Ɲanmiɛn i mmla mɔ maan be ɲan be ti’n i su’n, be kplin su kɛ Ɲanmiɛn i wawɛ’n sie be. Yɛ i sɔ’n yo maan be ɲan be ti, kpɛkun be kwla ɲan “nguan nin alaje.” (Rɔm. 8:5, 6) ?Nin yɛ Je ɲannin ukalɛ naan w’a kwla yaci i nzuɛn tɛ’n niɔn? Nɛ́n i bɔbɔ i wue kekle ti yɛ ɔ kwla yacili i nzuɛn sɔ’n niɔn. Sanngɛ Ɲanmiɛn yɛ ɔ ukɛli i ɔ. Je seli kɛ: “N suannin Biblu’n nun like titi, n srɛli Ɲanmiɛn kɛ ɔ fɛ i wawɛ’n man min, yɛ n sɔli ukalɛ nga asɔnun’n nun aniaan’m be ukali min klolɛ’n su’n i nun.” Ninnge sɔ mɔ be ukali Je’n, be kwla uka e wie naan e ti ɲanlɛ kpafuɛ mɔ e kunndɛ’n, y’a ɲɛn i. Maan e nian wafa nga ninnge sɔ’m be kwla uka e’n.
MAAN E NIAN ƝANMIƐN NDƐ’N NUN
10. ?Kɛ be se kɛ sran kun “nian” Ɲanmiɛn mmla’n nun’n, i bo’n yɛle benin?
10 Be klɛli i Zak 1:25 nun kɛ: ‘Nyanmiɛn mmla’n b’ɔ ti niannun kpa’n, b’ɔ maan sran’m be nyan be ti’n, sran ng’ɔ nian nun’n, b’ɔ nian nun tititi’n, [...] Nyanmiɛn maan like ng’ɔ yo’n ɔ́ yó ye [‘ɔ́ wá ɲán suyralɛ i yolɛ’n nun,’ Anuãsɛ Fuflɛ].’ Glɛki nun ndɛ mma nga be kacili i Wawle nun kɛ “nian nun’n,” i bo’n yɛle kɛ “be kan be wun ase be nian like kun siin kpa.” Ɔ fata kɛ be mian be ɲin naan b’a kwla yo i sɔ liɛ’n. Ɔ maan sɛ e kunndɛ kɛ mmla mɔ maan be ɲan be ti’n ɔ sie e awlɛn’n nin e akunndan’n, ɔ fata kɛ e mian e ɲin e suan Biblu’n nun like. Maan e bo e ɲin ase e yo sɔ titi. Kpɛkun maan e bu ndɛ nga e kanngan’n i su akunndan kpa.—1 Tim. 4:15.
11, 12. (a) ?Ndɛ benin yɛ Zezi kannin m’ɔ kle kɛ ɔ ti cinnjin kɛ ndɛ nanwlɛ’n i su falɛ’n kaci e nzuɛn ɔn? (b) ?Kɛ nga e fa wunnin i aniaan bla’n i su ndɛ’n nun’n sa’n, aeliɛ benin yɛ i li sɛ e ti gbanflɛn annzɛ talua’n, ɔ fata kɛ e nian e wun i lika ɔ?
11 Kɛ é yó sɔ kusu’n, ɔ fata kɛ e tra e awlɛn e nian Ɲanmiɛn Ndɛ’n su e nanti ‘tititi.’ Ɔ fata kɛ ndɛ nanwlɛ’n i su falɛ’n kaci e nzuɛn. Zezi kannin ndɛ wafa kunngba sɔ’n wie kleli sran wie mɔ be lafili i su’n. Ɔ seli be kɛ: ‘Sɛ an fa min ndɛ nga n kan’n su sakpa, wuun an ti n sɔnnzɔnfuɛ sakpa, wuun amún sí ndɛ ng’ɔ ti nanwlɛ’n, yɛ ndɛ nanwlɛ sɔ’n ti amún nyán amun ti.’ (Zan 8:31, 32) Fluwa kun waan like ‘silɛ’ nga be kɛn i ndɛ wa’n i wie yɛle kɛ sran ng’ɔ si like’n ɔ wun wafa nga like sɔ’n i silɛ’n ti cinnjin mɛn i’n i wlɛ. I sɔ’n ti’n, sɛ ndɛ nanwlɛ’n i su falɛ’n kaci e nzuɛn’n, yɛ e kwla se kɛ e “si” i kpa ɔ. Kɛ ɔ ko yo sɔ’n, “Nyanmiɛn ndɛ” nga e tilli’n ɔ ‘yo e wun sa ye.’ Ɔ uka e naan y’a kaci e nzuɛn tititi naan e nzuɛn’n w’a fa e Si m’ɔ o ɲanmiɛn su lɔ’n i liɛ’n i kpa w’a tra laa’n.—1 Tɛs. 2:13.
12 Maan e usa e wun kɛ: ‘?N si ndɛ nanwlɛ’n sakpa? ?I su falɛ’n w’a kaci min nzuɛn? ?Annzɛ ninnge nga mɛn nunfuɛ mɔ be waan b’a ɲan be ti’n be yo’n, n konvi te sɔ be nun wie mun?’ Aniaan bla kun mɔ i si nin i nin be ti Klistfuɛ’n, ɔ kannin sa ng’ɔ juli i su i nun m’ɔ te yo talua kan’n i ndɛ. Ɔ klɛli i kɛ: “Kɛ be kle wɔ ndɛ nanwlɛ’n ɔ kaan nun’n, a si kɛ Zoova o lɛ. Sanngɛ min liɛ’n, kɛ be se kɛ be si Zoova kpa sa’n, m’an kwlá simɛn i sɔ. M’an suanman ninnge nga Zoova klo be’n be klolɛ ɔ nin ng’ɔ kpɔ be’n be kpɔlɛ le. M’an bumɛn i le kɛ like nga n yo’n ti i cinnjin. Yɛ kɛ kekle tɔ sran kun su’n wafa ng’ɔ fata kɛ ɔ fɛ i wun mantan Ɲanmiɛn’n, m’an suɛnmɛn i sɔ yolɛ le. N lafili min bɔbɔ min akunndan’n su. Andɛ’n n wun kɛ sinnzin yɛ n dili ɔ, afin blɛ sɔ’n nun’n n siman like fi.” Ɲanmiɛn sa, kɛ ɔ́ kɔ́ i ɲrun’n aniaan bla’n wa wunnin i wlɛ kɛ i akunndan bulɛ wafa’n timan kpa mlɔnmlɔn. Yɛ ɔ wa kacili i nzuɛn’n. Ɔ wa boli titi atin bolɛ junman’n i dilɛ bo bɔbɔ.
ƝANMIƐN WAWƐ’N KWLA UKA E NAAN Y’A ƝAN E TI
13. ?Wafa sɛ yɛ Ɲanmiɛn wawɛ’n uka e naan y’a ɲan e ti ɔ?
13 E kɛnngɛn i 2 Korɛntfuɛ Mun 3:17 nun kɛ: “Lika kwlaa nga e Min’n i Wawɛ’n wo lɛ’n, be di alaje.” ?Wafa sɛ yɛ Ɲanmiɛn wawɛ’n yo maan e di alaje, yɛle kɛ e ɲan e ti ɔ? Ɲanmiɛn wawɛ’n uka e maan e yi nzuɛn kpa wie’m be nglo. Yɛle kɛ ‘e klo Nyanmiɛn nin sran, e klun jɔ, e wla gua ase, e tra e anwlɛn, e yo sran ye, e yo aklunye, e di nanwlɛ, e yo wɛtɛɛ, yɛ e yo sa i nuan su.’ (Gal. 5:22, 23) Sɛ sran’m be yimɛn i sɔ nzuɛn’m be nglo’n, i li sɛ be kloman Ɲanmiɛn nin sran’n, be kwlá ɲanman be ti kpa sa. E wun i sɔ liɛ’n andɛ mɛn nga nun. Kɛ akoto Pɔlu kannin ninnge nga Ɲanmiɛn wawɛ’n maan sran yo’n be ndɛ’n, ɔ kan guali su kɛ: “B’a sie-man ninnge sɔ’m be su mmla fi.” ?Ndɛ sɔ’n i bo’n yɛle benin? Yɛle kɛ b’a sieman ninnge nga Ɲanmiɛn wawɛ’n maan sran yo’n be awɛ. Be su kpɛman mmla kun sa le be seman kɛ nán sran kun yi nzuɛn sɔ’m be nglo wɔ i ɲrun kun. (Gal. 5:18) ?Yɛ ngue ti li yɛ bé kpɛ́ i sɔ mmla ɔ? Zoova klo kɛ e yi i sɔ nzuɛn’m be nglo e wɔ e ɲun titi naan e yo i sɔ anannganman.
14. ?Wafa sɛ yɛ be nga mɔ akunndan nga mɛn’n nunfuɛ’m be bu’n yɛ ɔ sie be’n be kaci kanga ɔ?
14 Be nga akunndan nga mɛn’n nunfuɛ’m be bu’n yɛ ɔ sie be’n, ɔ nin be nga be yo like kwlaa nga be konvi o su’n, be kwla bu i kɛ b’a ɲan be ti. (An kanngan 2 Piɛr 2:18, 19 nun.) Sanngɛ be siman kɛ be ti kanga. Kɛ ɔ ko yo naan sran’m b’a yoman be klunklo ninnge tɛtɛ mun’n, nvlenvle’m be nun’n, awa’m be kpɛ mmla kpanngban kpa. Pɔlu seli kɛ “nán be nga be ti sran kpa’n be ti yɛ be sieli mmla nin-ɔn. Sanngɛ be sie mannin be nga be ti-man kpa’n, nin nyin keklefuɛ mun.” (1 Tim. 1:9, 10) Asa ekun’n, sran sɔ’m be ti like ng’ɔ yo be fɛ’n i kanga afin ‘like kwlaa ng’ɔ yo be fɛ’n yɛ be yo ɔ.’ Be konvi tɛ sɔ’n kusu sie be tɛ kpa. (Efɛ. 2:1-3) Sran sɔ’m be ti kɛ kakaa wie mɔ be ko tɔ zɔgɔda nzue’n nun kɛ bé táfi mɔ i agualiɛ su’n, be ka nun be wu’n sa.—Zak 1:14, 15.
E DI ALAJE ASƆNUN’N NUN
15, 16. ?Kɛ ɔ fin cɛn mɔ e bali asɔnun’n nun’n, ngue yɛ e ɲɛnnin i ɔ? ?Yɛ alaje benin yɛ e di ɔ?
15 Asɔnun’n timan kɛ anuanzɛ wie mɔ sran kun bɔbɔ jaso ɔ ko wlu nun’n sa. Sɛ e o asɔnun’n nun’n, ɔ fin Zoova bɔbɔ m’ɔ flɛli e’n. (Zan 6:44) ?Ngue ti yɛ ɔ flɛli e ɔ? ?Ɔ wunnin kɛ e ti sran sɛsɛfuɛ naan e sro i ti ɔ? E kwla tɛ su kɛ “nɛ́n i sɔ ti ɔ!” ?Ɔ maan ngue yɛ Ɲanmiɛn wunnin i e lika ɔ? Ɔ wunnin e awlɛn’n nun kɛ é kplín su kɛ é fɛ́ i mmla’m be su naan é nánti atin ng’ɔ kle e’n su. Kɛ ɔ fin cɛn mɔ e bali asɔnun’n nun’n, Zoova fɛli i mmla m’ɔ o i Ndɛ’n nun’n ɔ niannin e lika titi. Ɔ yoli maan ato ndɛ nga be kle be Ɲanmiɛn sulɛ wafawafa’m be nun’n, ɔ nin ninnge ngbɛnngbɛn nga be lafi su’n e faman be su kun. Yɛ ɔ kleli e wafa nga e kwla fa nzuɛn ng’ɔ nin Klistfuɛ fata’n. (An kanngan Efɛzfuɛ Mun 4:22-24 nun.) I kwlaa sɔ’n ti’n, be nga be ngunmin cɛ yɛ asiɛ’n wunmuan’n su’n b’a ‘nyan be ti’ sakpa’n, e o be nun wie.—Zak 2:12.
16 Maan e bu ndɛ nga i akunndan e nian. ?Kɛ e nin sran nga be klo Zoova kpa’n e o’n, srɛ kun e? ?Kɛ e nin e niaan mun é kókó yalɛ asɔnun lɔ’n, e tra e ninnge’m be kpa afin e bu i kɛ sran wie su wa wua e? Ɔ timan sɔ mlɔnmlɔn! E ɲin kan ase yɛ e wun e wun fɛ. ?Sɛ e nin be nga be suman Zoova e o’n, e wun kwla yo e sɔ wie? Cɛcɛ, e wun kwlá yoman e sɔ! Sanngɛ, alaje nga andɛ e di i Ɲanmiɛn i nvle’n nun’n, ɔ juman nga é wá dí i e ɲrun lɔ’n nun kaan sa.
‘NYANMIƐN MMA’M BE TI NYANLƐ’N’
17. ?Wafa sɛ yɛ ‘Nyanmiɛn i mma’m be nglo yilɛ’n’ ɔ́ yó maan klɔ sran’m bé ɲán be ti ɔ?
17 Pɔlu klɛli Zoova i nvle’n i ti nga Zoova maan ɔ́ ɲɛ́n i asiɛ’n su wa’n i su ndɛ seli kɛ: “Like nga Nyanmiɛn yili be’n, be kwlaa be wun blibli be, yɛ be minndɛ cɛn nga Nyanmiɛn wá yí i mma’m be nglo’n.” Kpɛkun ɔ kan guali su kɛ: “Cɛn kun like sɔ’m be kwlaa bé nyán be ti, be su saci-man kun, yɛ nyrun nga Nyanmiɛn mma’m bé nyɛ́n i cɛn nga bé nyán alaje’n, be dunman’n tɛ́ nun wie.” (Rɔm. 8:19-21) Be nga be flɛ be “like nga Nyanmiɛn yili be’n,” be yɛle klɔ sran nga be lafi su kɛ bé trán asiɛ’n su wa tititi’n mɔ kɛ “Nyanmiɛn wá yí” i mma m’ɔ kpali be sieli be ngunmin’n be nglo’n, bé dí ye’n. Blɛ mɔ be nga be kpali be sieli be ngunmin’n be nin Klist bé núnnún sa tɛ yofuɛ mun mɔ bé fá “sran kpanngban kpa” mun bé wlú mɛn uflɛ’n nun’n, i nun yɛ “Nyanmiɛn mma’m” be nglo yilɛ sɔ’n, ɔ́ bó i bo ɔ.—Ngl. 7:9, 14.
18. ?Wafa sɛ yɛ klɔ sran nga be ɲin yi Ɲamiɛn’n be ti ɲanlɛ’n wá yó dan ɔn? ?Yɛ be ti ɲanlɛ i wafa benin yɛ i agualiɛ su’n bé ɲɛ́n i ɔ?
18 Blɛ sɔ’n nun’n, klɔ sran’m be ti nga bé ɲɛ́n i’n, ɔ su ɲanman wunsu. Bé ɲán be ti Satan nin mmusu’m be sa nun mlɔnmlɔn. (Ngl. 20:1-3) Nanwlɛ, bé dí alaje dan! Kɛ ɔ fɛ i lɛ’n, sran 144.000 nga be nin Klist bé dí famiɛn yɛ bé yó Ɲanmiɛn ɲrun jranfuɛ’n, bé jrán Zezi i tɛ m’ɔ yili’n su bé yó maan sran’m bé ɲán be ti mlɔnmlɔn sa tɛ’n nin fɔ’n be sa nun. (Ngl. 5:9, 10) Kɛ be sa nianlɛ kasiɛn’n ko sin’n, be nga b’a kpɔciman Ɲanmiɛn’n, bé ɲán be ti kɛ nga i bo bolɛ nun Zoova kunndɛli kɛ sran’m be ɲan be ti’n sa. Be ti ɲanlɛ sɔ’n yɛ be flɛ i ‘Nyanmiɛn i mma’m be ti nyanlɛ’n’ niɔn. Maan e bu i sin e nian! Like nga Ɲanmiɛn kunndɛ kɛ e yo’n i yolɛ su yoman kekle kun. Afin fɔ su tranman e wunnɛn’n i lika wie fi sa nun kun. Asa kusu é kwlá nían Ɲanmiɛn i nzuɛn’n su sɛsɛsɛ.
19. ?Ngue yɛ ɔ fata kɛ e yo i titi naan y’a ka atin nga be sin nun’n be ɲan be ti’n i su ɔ?
19 ?Amun kunndɛ kɛ be ti ɲanlɛ nga be flɛ i ‘Nyanmiɛn i mma’m be ti nyanlɛ’n,’ amún ɲán wie? Sɛ ɔ ti sɔ’n, amun lo amun wun naan ‘mmla b’ɔ maan sran’m be nyan be ti’n,’ ɔ sie amun awlɛn nin amun akunndan’n. Maan amun bo amun ɲin ase be suan Biblu’n nun like titi. Yɛ maan ndɛ nanwlɛ’n i su falɛ’n kaci amun nzuɛn. Amun srɛ Ɲanmiɛn maan ɔ fɛ i wawɛ’n man amun. Amun wɔ asɔnun aɲia’m be bo titi yɛ like kwlaa nga Zoova fa man e naan e nin i e afiɛn w’a sɛ titi’n, amun fa yo amun wun sa ye. Nán amun man Satan i atin naan ɔ laka amun kɛ Ɛvu sa, naan amun bu i kɛ like nga Ɲanmiɛn waan e yo’n ɔ ti kekle. Maan e di e wun nanwlɛ, Satan si ngwlɛlɛ kpa. Sanngɛ e kwlɛ i ɔ ɔ yo ye. “Afin e si i nzuɛn’n.” I sɔ liɛ’n yɛ like suanlɛ ng’ɔ́ bá lɛ’n wá yíyí nun ɔn.—2 Kor. 2:11.
[Kosan mun]
[Foto mun, bue 14]
?Ninnge nga mɛn nunfuɛ’m mɔ be waan b’a ɲan be ti’n be yo’n, n konvi te sɔ be nun wie mun?
[Foto mun, bue 14]
?Ndɛ nanwlɛ’n i su falɛ’n w’a kaci min nzuɛn?
