?Fluwa ngbɛn wie ɔ?

“Nyanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli-ɔ. [...] Naan Nyanmiɛn sran’n ɔ nyan like b’ɔ kwla fa di junman kwlaa ng’ɔ ti kpa’n.”​—2 TIMOTE 3:16, 17.

 NÁN sran ngba yɛ ɔ bu i kɛ Biblu’n nun ndɛ’n kwla uka sran kun naan w’a kwla di junman kwlaa ng’ɔ ti kpa’n niɔn. ?Yɛ ɔ li, a bu i sɛ? É wá bóbó ndɛ wie’m be su. ?Ndɛ sɔ’m be nun’n, beninfuɛ’n yɛ ɔ yi wafa nga a bu Biblu’n i nglo kpa ɔ?

• Fluwa nga be sili be klɛ kpa’n, be nun kun ɔn.

• Ɲanmiɛn sulɛ fluwa nga be ti sran’m be cinnjin’n be nun kun ɔn.

• Ngua fluwa kun m’ɔ kle sran’m be ayeliɛ kpa ɔ.

• Ɲanmiɛn nuan ndɛ ɔ.

Kosan kun m’ɔ nin ndɛ sɔ’m be kɔ likawlɛ’n yɛle kɛ: ?Wafa nga a bu Biblu’n, ɔ ti cinnjin? Biblu’n kɛnnin i bɔbɔ i wun ndɛ seli kɛ: “Ndɛ nga be klɛli be laa’n, be klɛli i kwlaa sɔ’n kɛ bé fá klé e ngwlɛlɛ naan Nyanmiɛn fɛ i ndɛ sɔ’n wla e fanngan, naan e tra ye anwlɛn e fa e wla’n guɛ i su.” (Rɔmfuɛ Mun 15:4) Biblu’n nun ndɛ sɔ’n kle kɛ be klɛli Biblu’n naan i nun ndɛ’n kle sran’m be ngwlɛlɛ, naan ɔ wla be fanngan naan kusu be fa be wla’n be guɛ i Ɲanmiɛn su.

?Yɛ yoo, sɛ ɔ ti kɛ Biblu’n ti fluwa ngbɛn wie mɔ sran’m be sili i klɛ kpa’n annzɛ ɔ ti kɛ fluwa kwlaa nga sran’m be fa su Ɲanmiɛn’n be sa’n, á láfi i nun ndɛ’n su? ?Sɛ bé sé bé sé naan ndɛ ng’ɔ o Biblu’n nun’n, ɔ nin ɔ akunndan liɛ’n be kɔman likawlɛ’n, á láfi i nun ndɛ’n su? ?Ɔ maan á súan ngwlɛlɛ ng’ɔ o nun’n, yɛ á fɛ́ i sɔ’n klé ɔ awlofuɛ mun wie? ?Annzɛ kusu sɛ ɔ ti kɛ ngua yɛ be klɛli guɛli i Biblu’n nun’n, i nun ndɛ’n wlá ɔ fanngan kpɛkun á láfi su kɛ kasiɛ nga be o nun’n, bé kpɛ́n su?

Sanngɛ, kɛ sran akpinngbin kpanngban be suannin Biblu’n nun like’n be wa lafili su kɛ Biblu’n nun kunngba cɛ yɛ Ɲanmiɛn nuan ndɛ’n o ɔ. ?Ngue ti yɛ be lafi su sɔ ɔ? ?Ngue yɛ ɔ kle kɛ Biblu’n ti fluwa kun m’ɔ ti i liɛ ngunmin ɔn? Ndɛ nga bé bá lɛ’n nun’n, wafa nga Biblu’n fa ti’n mɔ fluwa onga’m be timan sɔ wie’n, é wá bóbó be nun nnun be su. É wlá ɔ fanngan kɛ a kanngan ndɛ sɔ’m be nun.