I nun ndɛ’m be sansanman be wun

“Nyanmiɛn ndɛ nga sran’m be kannin’n, b’a kpɛ-man wie fi be ti nun yɛ be kannin-ɔn, i Wawɛ’n yɛ ɔ fa wla be nuan yɛ be kannin-ɔn.”​—2 PIƐR 1:21.

?NGUE NUN YƐ BIBLU’N TI I LIƐ NGUNMIN KUN ƆN? Ndɛ nga be klɛli be laa blɛ kunngba’n nun bɔbɔ’n, kpɛ sunman’n be nun ndɛ’m be sansan be wun. Fluwa nga be klɛfuɛ’m be ti fanunfanun mɔ nán lika kunngba’n ɔ nin blɛ kunngba’n nun yɛ be klɛli be’n, kɛ ɔ yo naan be nun ndɛ’n w’a sɛnsɛnmɛn i wun’n, ɔ ti kekle. Sanngɛ Biblu’n i liɛ’n, ɔ se kɛ i nun fluwa kanngan 66 be nun ndɛ’n kwlaa fin sran kunngba’n. Ɔ maan i ti’n, ndɛ ng’ɔ o nun’n ɔ sɛnsɛnmɛn i wun.​—2 Timote 3:16.

LIKE NGA BE KLE SƆ’N BE NUN KUN YƐ: Moizi mɔ be wuli i afuɛ nga be flɛ i 1593 ka naan b’a wu Zezi’n i nun’n, ɔ ti nnɛn tafuɛ. Ɔ klɛli i Biblu’n nun fluwa klikli’n i nun kɛ “osu” kun wá bá, naan ɔ́ dé klɔ sran mun. I sin’n, fluwa sɔ’n nun’n ɔ seli ekun kɛ Abraamu nin Izaaki yɛ Zakɔbu be osu’n nun yɛ osu sɔ’n fín bá ɔ. (Bo Bolɛ 3:15; 22:17, 18; 26:24; 28:14) Kɛ i afuɛ ko ju 500 sinnin’n, Ɲanmiɛn nuan ijɔfuɛ Natan yili i nglo kɛ osu’n ɔ́ yó Davidi i osu’n nunfuɛ nga be di famiɛn’n be nun kun. (2 Samiɛl 7:12) Kɛ ɔ dili afuɛ akpi kun ekun’n, akoto Pɔlu yiyili nun kɛ Zezi nin sran wie m’ɔ kpali be kɛ be kaci i sɔnnzɔnfuɛ’n yɛ bé yó osu sɔ’n i nunfuɛ ɔ. (Rɔmfuɛ Mun 1:1-4; Galasifuɛ Mun 3:16, 29) Kpɛkun kɛ be wuli Zezi m’ɔ́ wá dí afuɛ ya kun’n, Biblu’n i nun fluwa kasiɛn’n kannin kɛ osu’n i nunfuɛ’m bé bó Zezi i jasin fɛ’n asiɛ’n su wa. Kpɛkun kɛ be ko wu’n, bé cɛ́n be ɲanmiɛn su lɔ, yɛ be nin Zezi bé dí famiɛn afuɛ 1.000. Osu sɔ mɔ i nun sran’m be sɔnnin’n, ɔ́ núnnún Satan mlɔnmlɔn kpɛkun ɔ́ dé klɔ sran mun.​—Sa Nglo Yilɛ 12:17; 20:6-10.

NDƐ NGA BIBLU’N I SU LIKE SUANFUƐ’M BE KAN’N: Bian kun mɔ be flɛ i Louis Gaussen ɔ boli i ɲin ase kpa nianniannin Biblu’n i nun fluwa 66 be nun. I sin’n, ɔ klɛli like ng’ɔ boli i nuan’n i su ndɛ. Ɔ seli kɛ “fluwa sɔ mɔ i nun ndɛ’m be sansanman be wun’n mɔ i klɛlɛ’n dili afuɛ kɔe akpi kun ya nnun’n, i klɛfuɛ’m be sɔnnin [...] sanngɛ ndɛ cinnjin kunngba’n yɛ be ngba be yiyili nun ɔn. Be yiyili nun ɔli titi kɛ be dun mmua tili be wun aniɛn naan bé klɛ́ like kunngba’n i su ndɛ sa. Yɛle kɛ bé klɛ́ klɔ sran’m be ti kpɔlɛ mɔ Ɲanmiɛn i Wa’n kpɔ́’n i su ndɛ.”​—Théopneustie ou Inspiration Plénière des Saintes Écritures.

?AMUN BU I SƐ? ?Fluwa kun sa mɔ i klɛlɛ’n dili afuɛ 1.500 tra su’n mɔ sran fanunfanun 40 yɛ be klɛli’n, amun kwla lafi su kɛ i nun ndɛ’m be su sansanman be wun? ?Annzɛ Biblu’n ti i liɛ ngunmin?

[Ndɛ kwle, bue 7]

“Kɛ be kan ndɛ nga be klɛli be’n be bo nun’n, ɔ ti fluwa kunngba cɛ. [...] Fluwa nga be klɛli be mɛn’n nun’n, be nun wie fi timan kɛ i sa. I kpa’n be nun wie fi mɛntɛnmɛn i kaan sa bɔbɔ.”​—JAMES ORR KLƐLI NDƐ SƆ’N I FLUWA THE PROBLEM OF THE OLD TESTAMENT NUN.