Kasiɛ nga be o nun’n be kpɛn su sɛsɛsɛ
Kasiɛ nga be o nun’n be kpɛn su sɛsɛsɛ
“Kasiɛ nga Anannganman b’ɔ ti amun Nyanmiɛn’n boli amun’n, i wie fi nun-man lɛ b’ɔ kali ngbɛn-ɔn.”—ZOZIE 23:14.
?NGUE NUN YƐ BIBLU’N TI I LIƐ NGUNMIN KUN ƆN? E ɲrun lɔ sa’m be ndɛ nga laa wunnzue yifuɛ’m be kan’n, be wunmɛn i ɲrun be wunmɛn i sin. Asa kusu’n, be kwlá faman be wla guaman su. Yɛ be nga be nian nglo lɔ ninnge kɛ nzraama sa’n be fa yi wunnzue andɛ’n, be kusu kɛ be ndɛ’n ti sɔ wie ɔ. Be nga be jran andɛ sa’m be su be kan e ɲrun lɔ sa’m be ndɛ’n, sa trele nga afuɛ ya kpanngban kpa sín naan b’a ju’n, be flɛ i kɛ be boman su diman jɔlɛ. Sanngɛ Biblu’n i liɛ’n, e ɲrun lɔ sa’m be ndɛ ng’ɔ kan’n, be ti weinwein yɛ be kpɛn su titi. Kannzɛ ‘sa nga be nian ju-man’n, ɔ dun mmua kan be ndɛ lele’n,’ sanngɛ be kpɛn su sɛsɛsɛ.—Ezai 46:10.
LIKE NGA BE KLE SƆ’N BE NUN KUN YƐ: Afuɛ ko ju ya nsiɛn ka naan b’a wu Zezi’n, Ɲanmiɛn nuan ijɔfuɛ Daniɛli wunnin sa kun aolia nun. Wafa nga Glɛki famiɛn diwlɛ’n wá kwlá Medi nin Pɛrsi famiɛn diwlɛ’n ndɛndɛ’n, sa sɔ’n yili i nglo. Ɔ kleli ekun kɛ, kɛ Glɛki famiɛn’n ko ‘nyan fanngan’ cɛ’n, kpɛkun w’a tɔ. ?Wan yɛ ɔ́ sín i osu ɔ? Daniɛli klɛli i kɛ: ‘Famiɛn diwlɛ nnan bé wá sín klikli liɛ’n i osu’n nun. Sanngɛ be tinmin’n su ju-man kɛ i liɛ’n sa.’—Daniɛl 8:5-8, 20-22.
NDƐ NGA LAA SA’M BE SU LIKE SUANFUƐ’M BE KAN’N: Kɛ Daniɛli i blɛ liɛ’n sinnin m’ɔ dili afuɛ 200 tra su’n, Alɛzandri kacili Glɛki famiɛn. Lele m’ɔ́ fá dí afuɛ blu’n, Alɛzandri kwlali Medi nin Pɛrsifuɛ mun yɛ ɔ yoli maan Glɛki famiɛn diwlɛ’n trɛli lele juli nzue ba nga be flɛ i Indus i nuan lɔ. (Lika nga nzue ba sɔ’n o’n be flɛ i Pakistan andɛ.) Sanngɛ kɛ Alɛzandri ɲannin afuɛ 32 cɛ’n, ɔ kpɛ co wuli. I agualiɛ su’n, alɛ nga be kunnin i Azi Minɛli lɔ klɔ nga be flɛ i Ipsus i wun lɛ’n, ɔ yoli maan Glɛki famiɛn diwlɛ’n i nun wa bubuli. Sran nnan nga be kwlali alɛ sɔ’n nun’n, be cɛcɛli Glɛki famiɛn diwlɛ’n nun fali. Sanngɛ be nun wie fi i kwlalɛ’n w’a juman Alɛzandri i liɛ’n nun.
?AMUN BU I SƐ? ?Ɔ le fluwa uflɛ kun sa mɔ i nun ndɛ’m be kpɛnnin su sɛsɛsɛ tititi kɛ Biblu’n sa ɔ? ?Annzɛ Biblu’n ti i liɛ ngunmin?
[Ndɛ kwle, bue 4]
“Biblu’n nun kasiɛ’m be [...] sɔnnin dan ti’n, e kwlá seman kaan sa kɛ be ngba sɔ’m be kpɛnnin su sa ngbɛn.”—IRWIN H. LINTON KLƐLI NDƐ SƆ’N I FLUWA A LAWYER EXAMINES THE BIBLE NUN.
[Foto cifuɛ mun, bue 4]
© Robert Harding Picture Library/SuperStock
