Maan e suan Ɲanmiɛn Ndɛ’n nun like

?Ngue ti yɛ ɔ fata kɛ e bo Ɲanmiɛn i dunman ɔn?

Ndɛ nga tɛ kosan wie mɔ atrɛkpa’n amun fa usali amun wun’n be su. Yɛ amun Biblu’n i lika nga amun kwla kanngan nun naan amun a wun be su tɛlɛ’n ɔ kle amun. Zoova i Lalofuɛ’m be klo kɛ be nin amun kókó ndɛ sɔ’m be su yalɛ.

1. ?Ngue ti yɛ Ɲanmiɛn tɔnnin i wun dunman ɔn?

Lika sunman nun’n, sran’m be kunndɛ kɛ be fa be dunman bɔbɔ ba’n be flɛ be tra kɛ be flɛ be “yasua,” “nja bian,” “mmo bla” annzɛ “nnan.” Be fa sran i dunman’n be fa sie i nzɔliɛ. Sran’m be flɛ Ɲanmiɛn kɛ “Min,” annzɛ “Nyanmiɛn b’ɔ kwla like kwlaa yo’n,” annzɛ kusu ‘like yifuɛ.’ (Bo Bolɛ 15:2; 17:1; Akunndanfuɛ’n 12:1) Sanngɛ Ɲanmiɛn bɔbɔ tɔnnin i wun dunman kun. Dunman sɔ’n uka e naan y’a fa e wun y’a mɛntɛn i. Ɲanmiɛn i dunman bɔbɔ ba’n yɛle Zoova.​—An kanngan Ezai 42:8 nun.

Be nga be kaci Biblu’n i aniɛnaniɛn’m be nun’n, be nun kpanngban be yili Ɲanmiɛn i dunman bɔbɔ ba’n, kpɛkun lika nga i dunman’n klɛ lɛ’n, be klɛli “Ɲanmiɛn” annzɛ “Min.” Sanngɛ i klikli nun’n, Ɲanmiɛn i dunman bɔbɔ ba ng’ɔ o Biblu’n i bue nga laa be klɛli i Ebre aniɛn nun’n, ɔ fuanfuan 7.000. I sɔ’n kle weiin kɛ Ɲanmiɛn kunndɛ kɛ be si i dunman’n.​—An kanngan Ezai 12:4 nun.

2. ?Ngue ti yɛ Ɲanmiɛn i dunman’n i silɛ’n ti cinnjin ɔn?

Kɛ be se kɛ sran kun si Ɲanmiɛn i dunman’n i kpa sa’n, nɛ́n i yɛle dunman sɔ’n i bolɛ ngbɛn m’ɔ si i bo’n. Sanngɛ yɛle like nga dunman sɔ’n yi i nglo Ɲanmiɛn su’n i silɛ ɔ nin nantilɛ m’ɔ nin Ɲanmiɛn be nanti’n. Dunman Zoova’n i bo’n yɛle kɛ “ɔ kaci sran’n i wafa ng’ɔ nin i fata’n.” I sɔ’n kle kɛ saan fii Ɲanmiɛn káci like kwlaa ng’ɔ fata kɛ ɔ kaci naan i klun sa’n w’a kpɛn su’n. Ɔ maan kɛ be se kɛ sran kun si Ɲanmiɛn i dunman’n, ɔ kle kɛ ɔ lafi su kpa kɛ Ɲanmiɛn yía kasiɛ ng’ɔ boli be’n, be nuan. (Jue Mun 9:11) Be nga be si Ɲanmiɛn i dunman’n mɔ be bo dunman sɔ’n, be lafi i su lele maan be fa be wla’n kwlaa guɛ i su yɛ like kwlaa nga bé yó’n, be dun mmua bu Ɲanmiɛn i akunndan. I sɔfuɛ mun’n, Ɲanmiɛn Zoova sásá be.​—An kanngan Jue Mun 91:14 nun.

  3. ?Ngue ti yɛ Ɲanmiɛn kunndɛ kɛ sran’m be si i dunman’n niɔn?

Ɲanmiɛn kunndɛ kɛ sran’m be si i afin be ɲɛn i sɔ’n su ye. I sɔ’n maan be kaci Ɲanmiɛn i janvuɛ yɛ be lafi su kɛ bé kwlá ɲán nguan m’ɔ leman awieliɛ’n. I sɔ ti’n, kɛ Zoova kunndɛ kɛ e fɛ i dunman’n e kle sran mun’n, e wun i wlɛ.​—An kanngan Zan 17:3 nin Rɔmfuɛ Mun 10:13, 14 nun.

Zezi yoli maan sran’m be sili Ɲanmiɛn i dunman’n. I sɔ yolɛ nun’n, ɔ kleli be Ɲanmiɛn i ninnge yolɛ wafa’n, nin i mmla mun ɔ nin kasiɛ ng’ɔ boli be mun. Andɛ’n, Zezi i sɔnnzɔnfuɛ’m be te fa Ɲanmiɛn i dunman’n te kle sran mun nvlenvle kwlaa nun. Be ti ‘nvle kun bɔ Nyanmiɛn i dunman o be su ɔ.’ Ɔ maan be bo ti kun yɛ be di i sɔ junman’n niɔn.​—An kanngan Sa Nga Be Yoli’n 15:14 nin Zan 17:26 nun.

4. ?Wafa sɛ yɛ Ɲanmiɛn wá yó maan bé bó i dunman fɛ ɔ?

Ɲanmiɛn Zoova kunndɛ kɛ ɔ́ yó naan be bo i dunman fɛ afin be tɔnnin i suɛn. I wie yɛle kɛ sran wie’m be waan nguan’n finmɛn i naan kusu’n ɔ nunman nun kɛ e ɲin yi i. Wie’m be kusu be waan e ndɛ lomɛn i naan i dunman nun ti yɛ e fɛ ɔ. Be kwlaa sɔ’m be saci Ɲanmiɛn i dunman’n. Sanngɛ ɔ su yaciman be nun naan be yo sɔ tititi. Ɔ su yaciman be nga be yo i dunman’n i finfin’n be lɛ.​—An kanngan Jue Mun 83:18, 19 nun.

Zoova yó maan i dunman’n yó sanwun. Yɛle kɛ ɔ́ sín i Famiɛn diwlɛ’n i lika núnnún klɔ sran’m be famiɛn diwlɛ’n kwlaa. Kpɛkun ɔ́ yó maan sran’m bé dí fɔundi ekun yɛ sa fi wun srɛ su kunman be kun. (Daniɛl 2:44) Ɔ ka kaan sa’n, sran kwlaa wá sí kɛ Zoova yɛ ɔ ti Ɲanmiɛn Kpli’n niɔn.​—An kanngan Ezekiɛl 36:23 nin Matie 6:9 nun.

?Ngue yɛ ɔ fata kɛ amun yo ɔ? Maan amun fa amun wun mantan Ɲanmiɛn. Wafa nga amun kwla yo i sɔ’n yɛle kɛ maan amun suan Biblu’n m’ɔ ti i nuan ndɛ’n i nun like, yɛ maan amun nin be nga be klo i’n be nanti. Kɛ Zoova wá yó i dunman’n i sanwun’n, i wla kpɛ́n i sufuɛ kpa’m be su.​—Malasi 3:16.

Sɛ amun kunndɛ kɛ amún sí nun ekun’n, an nian fluwa ?Ngue like yɛ biblu’n kle i sakpasakpa ɔ? i ndɛ tre 1 nun. Zoova i Lalofuɛ mun yɛ be yili ɔ.

[Foto, bue 10]

Ndɛ nga laa be klɛli i Ebre nun’n, Ɲanmiɛn i dunman ng’ɔ o nun’n.