Amun nanti kɛ sran mɔ Ɲanmiɛn sie i’n sa!

“Sa’n kwlaa nun’n, an yo sa ng’ɔ nin [...] jasin fɛ’n ti kun’n.”​—FIL. 1:27.

?AMÚN TƐ́ SU SƐ?

?Wan mun yɛ Ɲanmiɛn sie be ɔ?

?Aniɛn nga be nga Ɲanmiɛn sie be’n be kan’n, yɛ mmla nga Ɲanmiɛn man be’n ɔ nin Ɲanmiɛn Sielɛ’n i su ndɛ mun be wun ajalɛ benin yɛ ɔ fata kɛ e fa ɔ?

?Wafa sɛ yɛ be nga Ɲanmiɛn sie be’n, be kle kɛ be klo Ɲanmiɛn i mmla mun ɔn?

1, 2. ?Ngue ti yɛ ndɛ nga Pɔlu kan kleli Filipu lɔ Klistfuɛ mun’n, ɔ yoli nanndoliɛ mannin be ɔ?

 AKOTO PƆLU wlali Filipu lɔ Klistfuɛ’m be fanngan seli kɛ: “Sa’n kwlaa nun’n, an yo sa ng’ɔ nin [...] jasin fɛ’n ti kun’n.” (An kanngan Filipfuɛ Mun 1:27 nun.) Glɛki nun ndɛ nga be kacili i wa kɛ ‘an yo’n,’ be kwla kaci i ekun kɛ “ninnge nga nvle kun nunfuɛ’m be yo’n an yo wie.” Ndɛ sɔ’n yoli nanndoliɛ mannin Klistfuɛ nga be o Filipu lɔ’n. ?Ngue ti ɔ? Afin sran’m be waan Rɔmu awa’n mannin Filipufuɛ’m be atin naan be yo Rɔmu nvle’n i nunfuɛ. I sɔ’n yoli Filipufuɛ’m be fɛ. Afin kɛ mɔ be ti Rɔmufuɛ’n be le ninnge kpanngban be yolɛ wun atin. Be blɛ liɛ’n su’n, nán sran ngba yɛ ɔ le i sɔ cenjele like’n niɔn.

² Klistfuɛ nga be o Filipu lɔ’n be liɛ’n, sa uflɛ ekun ti’n, be kwla di aklunjuɛ dan. Pɔlu kannin ndɛ kun kpɛnnin Klistfuɛ sɔ mɔ be kpali be sieli i ngunmin’n be wla. Ɔ seli kɛ: “E liɛ’n, e ti nyanmiɛn su lɔ ba mun.” (Fil. 3:20) Be liɛ’n, nán kɛ nvle kun nunfuɛ ngbɛn yɛ be ti ɔ. Be ti ɲanmiɛn su lɔ ba. I sɔ’n ti’n, Ɲanmiɛn sasa be yɛ ɔ yo maan be ɲan ninnge wie mɔ awa uflɛ fi kwlá manman be’n.​—Efɛ. 2:19-22.

3. (a) ?Sran benin mun yɛ be kwla tran be nga Ɲanmiɛn sie be’n be nun wie ɔ? (b) ?Ndɛ benin yɛ é wá kɛ́n i like suanlɛ nga nun ɔn?

³ Afɔtuɛ nga Pɔlu mɛnnin i kɛ ‘ninnge nga nvle kun nunfuɛ’m be yo’n maan be yo wie’n,’ be nga be nin Klist bé dí famiɛn ɲanmiɛn su lɔ’n, be yɛ ɔ kan ndɛ sɔ’n wɔli be trele ɔ. (Fil. 3:20) Sanngɛ ndɛ sɔ’n wɔ be nga bé trán asiɛ’n su wa’n mɔ Ɲanmiɛn síe be’n be wie. ?Ngue ti ɔ? Afin Klistfuɛ’m be kwlaa nga be fali be wun mannin Ɲanmiɛn’n, Famiɛn kunngba’n yɛ be su i ɔ. Famiɛn sɔ’n yɛle Zoova. Kpɛkun, mmla kunngba’n su yɛ be di ɔ. (Efɛ. 4:4-6) Andɛ’n sran’m be mian be ɲin kpa naan b’a kwla kaci nvle nga sika o su’n i nunfuɛ. Ɲanmiɛn i nvle’n i nunfuɛ’n mɔ sran kun kwla kaci’n, ɔ ti like nanndoliɛ tra ngalɛ’n lele. Kɛ ɔ ko yo naan y’a bu i sɔ liɛ’n i like dan y’a tra laa’n, é wá fá  ninnge wie m’ɔ fata kɛ sran kun yo naan w’a kaci nvle kun i nunfuɛ’n, é súnnzun ninnge ng’ɔ fata kɛ sran kun yo naan Ɲanmiɛn w’a sie i’n. I sin’n, like nsan m’ɔ fata kɛ e yo naan Ɲanmiɛn w’a sie e titi’n, é kán be ndɛ.

NINNGE NG’Ɔ FATA KƐ SRAN KUN YO NAAN W’A KACI NVLE KUN NUNFUƐ’N

4. ?Aniɛn benin yɛ be flɛ i aniɛn sanwun’n niɔn? ?Wafa sɛ yɛ be “kan” aniɛn sɔ’n niɔn?

⁴ Aniɛn nga be kɛn i nvle’n nun’n i suanlɛ. Nvle wie’m be siefuɛ’m be waan sran ng’ɔ kunndɛ kɛ ɔ́ káci be nvle’n i nunfuɛ’n, ɔ fata kɛ ɔ suan aniɛn nga be kɛn i be nvle sɔ nun’n. Sran wie’m be bɔbɔ’n, kɛ be kaci nvle kun i nunfuɛ’n, be fa afuɛ kpanngban be suan nvle’n i aniɛn’n naan b’a kwla si aniɛn sɔ’n i kan kpa. Ndɛndɛ kpa’n, be kwla si wafa nga be kan aniɛn’n. Sanngɛ i osu kwla la nun kpa naan be nuan w’a tɔ aniɛn’n i kanlɛ nun. I wafa kunngba’n, Ɲanmiɛn waan be kwlaa nga be kunndɛ kɛ ɔ sie be’n, be suan aniɛn uflɛ kun. Kɛ Biblu’n kán be sɔfuɛ’m be ndɛ’n, ɔ seli kɛ “ndɛ tɛ su fin-man be nuan fite-man kun [“bé kán aniɛn sanwun’n,” NW].” (An kanngan Sofoni 3:9 nun.) ?Aniɛn benin yɛ be flɛ i sɔ ɔ? Ɲanmiɛn ɔ nin ninnge ng’ɔ sunnzun kɛ ɔ́ yó be’n, be su ndɛ nanwlɛ nga Biblu’n kan’n, yɛ be flɛ i sɔ ɔ. Ɲanmiɛn i mmla’m be su falɛ’n yɛ ɔ ti aniɛn sɔ’n i kanlɛ’n niɔn. E kwlaa nga e waan Ɲanmiɛn sie e’n, e kwla suan ninnge cinnjin nga Biblu’n waan ɔ fata kɛ Ɲanmiɛn i sufuɛ kun si i’n ndɛndɛ kpa, kpɛkun be yo e batɛmu. Sanngɛ kɛ be ko yo e batɛmu’n, ɔ fata kɛ e kplin e ɲin e “kan” aniɛn uflɛ sɔ’n i kpa ɔ e ɲrun. ?Wafa sɛ? Yɛle kɛ ɔ fata kɛ e tinuntinun e kplin e ɲin kpa naan like kwlaa nga é yó’n nun’n, e nian Biblu’n i nun like nga e suan’n su e nanti.

5. ?Ngue ti yɛ ɔ fata kɛ e suan Zoova i anuannzɛ’n i su like kwlaa nga e kwla suan’n niɔn?

⁵ Nvle’n i su ndɛ’m be suanlɛ. Wie liɛ’n, sran ng’ɔ kunndɛ kɛ ɔ́ káci nvle kun i nunfuɛ’n, be se i kɛ ɔ suan nvle sɔ’n i su ndɛ wie mun. I wafa kunngba’n, be nga be waan Ɲanmiɛn sie be’n, ɔ o nun kɛ be suan Ɲanmiɛn Sielɛ’n i su like kwlaa nga be kwla suan’n. I sɔ liɛ nun’n, maan e nian ajalɛ nga Kɔre i mma mɔ laa’n Izraɛli lɔ’n, be di Ɲanmiɛn junman’n, be kle e’n. Be kloli Zerizalɛmu klɔ’n ɔ nin Ɲanmiɛn i suwlɛ ng’ɔ o lɔ’n i kpa liɛ su, yɛ be kloli klɔ’n i ndɛ kanlɛ. Nán klɔ’n i klanman m’ɔ ti’n i ngunmin ti ɔ. Sanngɛ kɛ mɔ klɔ sɔ’n ti Zoova m’ɔ ti ‘famiɛn dan’n i klɔ’n’ i ti ɔ. Asa kusu’n, Ɲanmiɛn i suwlɛ ng’ɔ o klɔ sɔ’n su lɔ’n i nun yɛ be suan Zoova i Mmla mun ɔn, kpɛkun lɔ yɛ be su i ɔ. Be nga Zerizalɛmu lɔ Famiɛn’n sie be’n be yɛle be nga Zoova i klun jɔ be wun m’ɔ klo be’n. (An kanngan Jue Mun 48:2, 3, 10, 13, 14 nun.) ?Kɛ be sa’n, amun klo Zoova i anuannzɛ’n i bue ng’ɔ o asiɛ’n su wa’n i su like suanlɛ, yɛ amun klo kɛ amún kɛ́n i su ndɛ klé sran mun? Kɛ amún súan Ɲanmiɛn i anuannzɛ’n i su like kɔ́’n mɔ amún súan wafa nga Zoova suan i sran’m be bo’n, amún wún i wlɛ kɛ Ɲanmiɛn Sielɛ’n  wo lɛ sakpasakpa. Asa kusu’n, i sɔ’n yó maan amún kló Ɲanmiɛn Sielɛ’n i jasin fɛ’n i bolɛ kpa ekun.​—Zer. 9:23; Lik 4:43.

6. ?Ngue ti yɛ sɛ Zoova se e kɛ e suɛn i mmla mun naan e fa be su e nanti’n, i su ɔ?

⁶ Nvle’n i mmla’m be silɛ. Nvle’m be famiɛn’m be se be nga be sie be’n be kɛ be suan mmla nga be di be su nvle’n nun’n naan be nanti be su. Ɔ maan sɛ Zoova kunndɛ kɛ be ng’ɔ sie be’n be suan i mmla mun naan be nanti be su’n i su ɔ. (Eza. 2:3; Zan 15:10; 1 Zan 5:3) Wie liɛ’n, mmla nga sran’m be kpɛ be’n be timan sɛsɛ. Asa kusu’n, blɛ sunman’n fɔ o be nun. Sanngɛ Zoova i mmla liɛ’n, “fiɛn kaan sa nunmɛn i wun.” (Jue. 19:8) ?Amun klo Ɲanmiɛn i mmla mun yɛ amun kɛnngɛn i Ndɛ’n nun cɛn kwlaa? (Jue. 1:1, 2) Like kunngba cɛ nga e kwla yo naan y’a si Ɲanmiɛn mmla’n yɛle i suanlɛ. Sran fi kwlá yomɛn i sɔ liɛ’n manman e.

BE NGA ƝANMIƐN SIE BE’N BE KLO ƝANMIƐN I MMLA MUN

7. ?Ngue ti yɛ be nga Ɲanmiɛn sie be’n be nanti Ɲanmiɛn i mmla’m be su ɔ?

⁷ Kɛ ɔ ko yo naan y’a yo Ɲanmiɛn i nvle’n i nunfuɛ titi’n, ɔ fata kɛ e si i mmla mun. Sanngɛ ɔ fata kɛ e klo be wie. Klɔ sran’m be nvle’m be nunfuɛ kaka be se kɛ be klun jɔ be nvle’m be nun mmla’m be su. Sanngɛ kɛ be wun kɛ mmla kun su yoman be wun sa ye’n, mɔ be wun kɛ sran wunman be’n kpɛkun b’a tɔn mmla sɔ’n. Kpɛ sunman’n, sran’m be nuan ti yɛ be nanti mmla’m be su ɔ. (Kol. 3:22) Be nga Ɲanmiɛn sie be’n be liɛ’n, ɔ le like nga ti yɛ be nanti Ɲanmiɛn i mmla’m be su’n. Yɛle kɛ be klo Zoova. I ti yɛ kannzɛ sran wunman be o, be tu be klun nanti Ɲanmiɛn i mmla’m be su’n niɔn.​—Eza. 33:23; an kanngan Lik 10:27 nun.

8, 9. ?Sɛ amun klo Ɲanmiɛn i mmla mun sakpa annzɛ amun kloman be’n, wafa sɛ yɛ amun kwla wun i wlɛ ɔ?

⁸ ?Sɛ amun klo Ɲanmiɛn i mmla mun sakpa o, annzɛ amun kloman be o, amún yó sɛ naan amun a wun i wlɛ? I kun yɛle kɛ maan amun bu wafa nga kɛ be man amun afɔtuɛ’n amun yo’n i akunndan. Wie liɛ’n like wie o lɛ’n amun bu i kɛ ɔ ti amun ngunmin amun ndɛ. Ɔ kwla yo amun wun wlawlalɛ wafa’n. Ka naan amun a suan ndɛ nanwlɛ’n, atrɛkpa’n wafa nga amun fa wlawla amun wun’n amun ndɛ nunman nun. Annzɛ wafa nga amun wlawla amun wun’n ɔ kwla yo maan sran bu akunndan tɛ. Kɛ amun Ɲanmiɛn klolɛ’n ɔ́ úka su kɔ́’n, amun wunnin i kɛ ɔ ti cinnjin kɛ amun wun wlawlalɛ’n manman Ɲanmiɛn. (1 Tim. 2:9, 10; 1 Piɛ. 3:3, 4) Ɔ maan siɛn’n, amun kwla bu i kɛ amun wun wlawlalɛ wafa’n ti i su. ?Sanngɛ sɛ asɔnun kpɛnngbɛn kun se amun kɛ amun wun wlawlalɛ wafa’n ɔ sanngan aniaan kpanngban be akunndan’n, amún yó i sɛ? ?Amun síe i wa síe i wa, annzɛ amún fá ya annzɛ kusu amún sé kɛ amun kaciman? Mmla cinnjin kun m’ɔ fata kɛ be nga Ɲanmiɛn sie be’n be nanti su’n yɛle kɛ maan be fa Zezi i ajalɛ’n su. (1 Piɛ. 2:21) Akoto Pɔlu klɛli Zezi i ajalɛ’n i su ndɛ seli kɛ: “Maan e kwlaa e yo like ng’ɔ jɔ e wiengu klun’n, i sɔ’n nun e ukɛ i maan ɔ yo kpa. Afin Krist w’a yo-man like ng’ɔ jɔ i bɔbɔ i klun’n.” (Rɔm. 15:2, 3) Kɛ ɔ ko yo naan fɔundi w’a tran asɔnun’n nun titi’n, Klistfuɛ nga w’a tin Ɲanmiɛn i sulɛ’n nun’n, like ng’ɔ ko yo naan i niaan’n w’a saciman’n yɛ ɔ yo ɔ.​—Rɔm. 14:19-21.

⁹ Maan e kan ninnge nɲɔn mɔ be ti cinnjin wie’n be ndɛ. Be yɛle wafa nga e bu bian nin bla nna’n ɔ nin aja’n. Be nga nán Ɲanmiɛn yɛ ɔ sie be’n, be kwla bu i kɛ be wiengu yasua annzɛ bla mɔ be nin i si sua’n, ɔ nin bian nin bla nna nga be fa fite nzra nun’n i nianlɛ’n, be timan like tɛ. Be kwla bu i ekun kɛ be wiengu bo bla annzɛ bian kunndɛlɛ’n nin be wiengu yralɛ’n be ti sran kun bɔbɔ i ndɛ. Sanngɛ be nga Ɲanmiɛn yɛ ɔ sie be’n, be liɛ’n sa klwaa nga bé yó’n be dun mmua bu i agualiɛ’n ɔ nin wafa ng’ɔ kan sran uflɛ’n i akunndan. Ka naan sran wie’m b’a kaci Klistfuɛ’n sa sukusuku yolɛ’n ti be nzuɛn. Sanngɛ siɛn’n be wun i wlɛ kɛ bian nin bla nna’n yɛ aja’n be ti like mɔ Ɲanmiɛn fa cɛli e ɔ. Be klo Ɲanmiɛn i mmla’n mɔ fiɛn nunmɛn  i wun’n, yɛ be lafi su kpa kɛ Ɲanmiɛn su sieman be nga be ɲin yiman bian nin bla nna’n ɔ nin aja’n i su mmla nga Ɲanmiɛn kpɛli’n. (1 Kor. 6:9-11) Kusu be wun i wlɛ weiin kɛ klɔ sran’n i klun akunndan’n ti tɛ. (Zer. 17:9) I sɔ’n ti’n, kɛ be wla be su nun kɛ be nian be wun ninnge wie’m be lika naan be nin Ɲanmiɛn b’a nanti klanman titi’n, ɔ yo be fɛ.

BE NGA ƝANMIƐN SIE BE’N BE KLO KƐ BE MAN BE AFƆTUƐ

10, 11. ?Afɔtuɛ wafa benin mun yɛ Ɲanmiɛn nian kɛ blɛ’n fa ti’n, ɔ man e ɔ? ?Wafa sɛ yɛ amun bu be ɔ?

¹⁰ Awa’m be kwla wla be nvle’n i nunfuɛ’m be su nun kɛ be nian be wun aliɛ nin ayre wie’m be lika. I yo, nán aliɛ nin ayre’m be ngba yɛ be ti tɛ ɔ. Sanngɛ sɛ be nun wie’m be kwla yo sran’m be tɛ’n, awa’n kwla se sran’m be kɛ nán be kɛn i sɔ ninnge mun. Sɛ awa’n w’a yoman i sɔ’n naan ndɛ ɲan sran wie’n i su yɛ bé fá gúa ɔ. I wafa kunngba’n, Ɲanmiɛn man e ninnge wie mɔ be kwla saci e’n, yɛ be kwla saci e nin i e afiɛn’n be su afɔtuɛ ng’ɔ nin i fata’n. I wie yɛle ɛntɛnɛti i su afɔtuɛ ng’ɔ man e’n. I yo, sɛ sran’m be waan bé kán ndɛ kle be wiengu’n ɛntɛnɛti’n uka be kpa. Asa’n, sran like klelɛ’n nin be ɲin su yiyilɛ nun’n, ɔ uka sran mun wie. Ɲanmiɛn i anuannzɛ’n fa ɛntɛnɛti’n yo ninnge kpakpa sunman. Sanngɛ ɛntɛnɛti’n i likalika kpanngban saci sran mlɔnmlɔn. Ɔ ti weiin kɛ ɛntɛnɛti’n i likalika nga be yi bian nin bla nna nglo lɔ’n, be ti tɛ kpa man be nga be kunndɛ kɛ Ɲanmiɛn sie be’n. Nán andɛ sa yɛ sran kpa nanwlɛfuɛ m’ɔ si ngwlɛlɛ’n, ɔ sɔli e selɛ kɛ e nian e wun ninnge sɔ’m be lika ɔ. Kɛ ɔ se e sɔ’n ɔ yo e fɛ dan!

¹¹ Koko nun wa’n, be kpɛli ɛntɛnɛti i su like yolɛ kun mɔ w’a tru kpa siɛn’n i ba. Yɛle kɛ sran’m be yia be koko yalɛ. Annzɛ be klɛ be bɔbɔ be su ndɛ naan sran uflɛ nian. Ɛntɛnɛti i su like yolɛ wafa sɔ’n kwla yo sran wun sa ye, sanngɛ sɛ sran kun w’a niɛnmɛn i wun kpa’n, ɔ́ yó i abɔlɛ lele kpé nun. Ɛntɛnɛti i wafa sɔ’n kwla yo maan e nin sran tɛ e san nun. (1 Kor. 15:33) I sɔ ti yɛ Ɲanmiɛn i anuannzɛ’n man e afɔtuɛ naan y’a fa ninnge sɔ mun y’a di junman kɛ ɔ nin i fata’n sa’n niɔn. * Sɛ y’a faman e ɲin y’a sieman afɔtuɛ sɔ’m be su ka naan y’a tike ɛntɛnɛti i lika sɔ’m be su’n, ɔ ti kɛ nn e su nɔn ayre wie m’ɔ le ta kpa’n kusu nn y’a usausaman wafa nga be nɔn’n i nun’n sa.

12. ?Ngue ti yɛ sɛ Ɲanmiɛn man e afɔtuɛ naan y’a faman su’n, ɔ ti sinnzin dilɛ ɔ?

¹² Sran nga be faman afɔtuɛ nga sran kpa nanwlɛfuɛ m’ɔ si ngwlɛlɛ’n man’n su’n, ɔ lemɛn i yowlɛ, be yo be bɔbɔ nin be klofuɛ’m be tɛ. Be nun wie’m be kacili bian nin bla nna nga be fa fite nzra nun’n i nianfuɛ annzɛ be tɔli sa sukusuku yolɛ’n nun, kpɛkun be lakali be wun kɛ Zoova kwlá wunman like nga be yo’n. Kɛ sran kun bu i kɛ ɔ kwla fa like kun fia Zoova wun’n, nanwlɛ ɔ ti sinnzin dilɛ dan! (Nya. 15:3; an kanngan Ebre Mun 4:13 nun.) Zoova klo kɛ ɔ́ úkɛ i sɔfuɛ mun. I ti’n, ɔ fa be ukalɛ’n wla i janunfuɛ nga be o asiɛ’n su wa’n be sa nun. (Gal. 6:1) Sanngɛ, wafa kunngba nga awa kun kwla se sran wie mɔ be yo sa tɛ’n be kɛ be timan be nvle’n i nunfuɛ kun’n, Zoova kwla tu sran ng’ɔ tɔn i mmla’n m’ɔ kunndɛman kɛ ɔ́ káci’n i nvle’n nun. * (1 Kor. 5:11-13) Sanngɛ Zoova si annvuɛ. Be nga be kaci be aeliɛ’n, Zoova i klun kwla jɔ be wun ekun kpɛkun ɔ tuman be i  nvle’n nun. (2 Kor. 2:5-8) Nanwlɛ, Famiɛn m’ɔ klo sran kɛ ngalɛ’n sa’n i sulɛ’n ti e cenjele like dan!

BE NGA ƝANMIƐN SIE BE’N BE KLO LIKE SUANLƐ

13. ?Wafa sɛ yɛ be nga Ɲanmiɛn sie be’n, be kle kɛ be klo like suanlɛ ɔ?

¹³ Awa kpanngban be mian be ɲin kpa be kle be nvle’n i nunfuɛ’m be like. Be kplan suklu mun naan sran’m be si fluwa. Be nga Ɲanmiɛn sie be’n be klo i sɔ suklu mun yɛ suklu sɔ’m be nun’n, be mian be ɲin be suan fluwa nun kannganlɛ nin fluwa klɛlɛ naan b’a kwla nian be bɔbɔ be wun lika. Sanngɛ be bu like nga Zoova sin i anuannzɛ’n i lika kle be’n i like dan tra ngalɛ’n. Asɔnun’m be nun’n, Zoova kle e kannganlɛ nin klɛlɛ. Asa kusu’n, be wla siɛ nin niɛn’m be fanngan kɛ be kanngan fluwa’m be nun kle be mma kanngan mun. Anglo kwlaa nun’n, sran kpa nanwlɛfuɛ m’ɔ si ngwlɛlɛ’n yi Sasafuɛ Tranwlɛ’n nin Réveillez-vous ! Sɛ cɛn kun e kanngan i bue wie’m be nun’n, kɛ anglo’n fá wíe’n, nn y’a wie i ngba’n nun kanngan. Sɛ e yo i sɔ titi’n, like nga Zoova kle e’n, é ɲɛ́n i su mmlusuɛ titi.

14. (a) ?Wafa sɛ yɛ be kle e like ɔ? (b) ?Awlobofuɛ’m be awlo lɔ Ɲanmiɛn sulɛ i su ajalɛ nga be kleli e’n, be nun onin yɛ amun kwla fali su ɔ?

¹⁴ Le mɔcuɛ kwlaa nun’n, be kle be nga Ɲanmiɛn sie be’n be like be asɔnun aɲia’m be bo lɔ. I wie yɛle kɛ i afuɛ 60 tra su yɛ, Ɲanmiɛn junman dilɛ suklu’n uka be naan b’a si Ɲanmiɛn Ndɛ’n i kle kpa. ?Amun a klɛ amun dunman suklu sɔ’n nun? Asa kusu’n, sran kpa nanwlɛfuɛ m’ɔ si ngwlɛlɛ’n tin su kpa kɛ le mɔcuɛ kwlaa nun’n, awlobofuɛ’m be kwlaa be yia be suan Biblu’n nun like likawlɛ. Kɛ awlobofuɛ’m be yo i sɔ’n be afiɛn mantan kpa. ?E fluwa’m be nun’n, ajalɛajalɛ nga be kleli e’n, amun fa be su? *

15. ?E cenjele like’m be nun dan kpafuɛ’m be nun kun yɛle benin?

¹⁵ Nvle wie’m be nun’n, sran’m be kunndɛ sran mun naan be w’a uka be su naan be suan politikifuɛ nga be jin i sin’n i bo. Be kɔ awloawlo’m be nun bɔbɔ. Asiɛ wunmuan’n su’n, be nga Ɲanmiɛn sie be’n, be bo jasin fɛ’n fa kle kɛ be suan Ɲanmiɛn Sielɛ’n i bo. Be bo i akpɔ’m be nuan nin awloawlo’m be nun. Kɛ nga e fa kɛnnin i like suanlɛ ng’ɔ sinnin lɛ’n nun sa’n, Sasafuɛ Tranwlɛ’n m’ɔ bo Zoova i Sielɛ Blɛ’n i jɔ’n, dɔ nga su’n, nga e fa manman sran mun asiɛ wunmuan’n su’n, ɔ tra fluwa uflɛ kwlaa. E cenjele like’m be nun dan kpafuɛ’m be nun kun yɛle Ɲanmiɛn Sielɛ’n i ndɛ mɔ e kan kle sran mun’n. ?Amun bo jasin fɛ’n i juejue su?​—Mat. 28:19, 20.

16. ?Wafa sɛ yɛ amun kwla kle kɛ amun ti Ɲanmiɛn i nvle’n i nun sran kpa ɔ?

¹⁶ Ɔ ka kaan sa’n, Ɲanmiɛn Sielɛ’n i ngunmin yɛ ɔ́ síe asiɛ’n niɔn. Ɲanmiɛn i mmla’m be ngunmin be su yɛ sran’m bé dí ɔ. ?Blɛ sɔ’n nun’n, amún yó Ɲanmiɛn i nvle’n i nun sran kpa? Bikisa yɛ ɔ fata kɛ amun kle sɔ ɔ. Aliɛ ba kwlaa nun’n, ajalɛ nga amún fá’n nun’n, maan amun yo like kwlaa i nuan su maan Zoova ɲan ɲrun yɛ amun kle kɛ amun ti sran kpa mɔ Ɲanmiɛn sie i ɔ.​—1 Kor. 10:31.

[Ja ngua lɛ ndɛ mun]

[Kosan mun]

[Ndɛ kwle, bue 21]

?Ɛntɛnɛti i su afɔtuɛ nga be jran Biblu’n su be man e’n, amun be fa su?

[Foto, bue 19]

?Amun klo Ɲanmiɛn i sulɛ kpa’n yɛ amun klo i su ndɛ mun kɛ Kɔre i mma mun sa?

[Foto, bue 22]

Amun Ɲanmiɛn sulɛ awlo lɔ’n kwla uka amun nin be nga amun klo be’n naan amun a yo Ɲanmiɛn i nvle’n i nun sran kpa.