An nian amun wun Satan i aya’m be lika!

‘Bé fló aya nga mmusu’m be si Satan suali b’ɔ trali be’n nun.’​—2 TIM. 2:26.

?AMÚN TƐ́ SU SƐ?

?Sɛ blɛ sunman nun’n, e bu e niaan’m be wun akunndan tɛ’n, ngue yɛ ɔ fata kɛ e yo ɔ?

?Afɔtuɛ benin yɛ Pilati nin Piɛli be su ndɛ’n man e naan sɛ sran’m be mianmian e’n y’a yoman sa tɛ ɔ?

?É yó sɛ naan e akunndan’n w’a buman e fɔ w’a tratraman su?

1, 2. ?Like suanlɛ nga nun’n, Satan i aya benin mun yɛ é wá kán be ndɛ ɔ?

 SATAN m’ɔ ti mmusu’m be si’n ɔ sasa Zoova i sufuɛ mun naan ɔ́ trá be. Sanngɛ nán kɛ i waan san fii ɔ́ kún be kɛ koniɛnfuɛ fa kun nnɛn sa ɔ. Like ng’ɔ ti i cinnjin kpafuɛ’n yɛle kɛ ɔ́ trá be naan be yo like ng’ɔ klo’n.​—An kanngan 2 Timote 2:24-26 nun.

² Aya suafuɛ kun kwla sua aya fanunfanun naan w’a tra nnɛn mun. Ɔ kwla yo maan nnɛn’n fin i fiawlɛ nun lɔ fite naan ɔ tɔ i aya’n nun. Annzɛ ɔ sua aya nnɛn’n i sinwlɛ nun, kpɛkun nnɛn m’ɔ siman sɔ’n kwla tɔ nun. I sɔ yɛ Satan yo naan w’a tra Ɲanmiɛn i sufuɛ’m be mɔnnɛnmɔnnɛn ɔn. Sɛ e kunndɛman kɛ Satan tra e’n, ɔ fata kɛ e ɲin tran su yɛ e fa e ɲin sie ninnge nga be kle kɛ i aya kun o lika kun’n, be su. Satan i aya’m be nun nsan m’ɔ fa tra Ɲanmiɛn i sufuɛ wie mun’n, wafa nga e kwla sasa e wun be lika’n, é wá wún i like suanlɛ nga nun. Aya sɔ mun yɛle (1) sran wun ndɛ tɛ kanlɛ’n, (2) srongble’n nin mianmianlɛ’n, (3) be akunndan m’ɔ bu be fɔ tratra su’n. Like suanlɛ ng’ɔ́ bá lɛ’n wá kán Satan i aya sɔ’m be nun nɲɔn ekun be ndɛ.

MAAN E SI E NUAN M’Ɔ TI KƐ SIN SA’N I SIE

3, 4. ?Sɛ y’a nianman e nuan nun ndɛ’n su’n, sa benin yɛ ɔ kwla ju ɔ? An fa sunnzun ase kun yiyi nun.

³ Kɛ ɔ ko yo naan nnɛn’m b’a fin be fiawlɛ nun b’a fite’n, koniɛnfuɛ kun kwla wɔ bo’n i bue kun nun. Yɛ kɛ bé bó’n kpɛkun w’a tra be. I wafa kunngba’n, Satan kunndɛ kɛ ɔ́ fá sin wlɛ́ i asɔnun’n m’ɔ ti kɛ Klistfuɛ’m be fiawlɛ sa’n i nun naan i nunfuɛ’m be fite. I liɛ’n ɔ́ kwlá trá be. ?Wafa sɛ yɛ kannzɛ e siman kɛ e su uka Satan’n, e kwla ukɛ i ɔ?

⁴ Zezi i sɔnnzɔnfuɛ Zaki seli kɛ e nuan’n ti kɛ sin sa. (An kanngan Zak 3:6-8 nun.) Sɛ y’a nianman e nuan nun ndɛ’n su’n, ɔ cɛman naan sɛ é kwlá sé’n y’a fa sin y’a yi i asɔnun’n nun. ?Wafa sɛ yɛ i sɔ liɛ’n kwla ju ɔ? Maan ɔ  yo e kɛ e o asɔnun aɲia kun bo sa. Aniaan ng’ɔ boli jasin mun’n ɔ seli kɛ aniaan bla kun w’a kaci titi atin bofuɛ. Kɛ aɲia’n wieli’n jasin bofuɛ nɲɔn be su koko jasin sɔ mɔ be boli’n i su yalɛ. Be nun kun waan ndɛ sɔ’n yo i fɛ, yɛ ɔ yrɛ i nuan kɛ atin bofuɛ’n ɔ kwla yo ajalɛ m’ɔ fali’n i nuan su sa. Kun liɛ’n, i waan kɔlɛ aɲrunɲan mɔ aniaan bla’n kunndɛ i asɔnun’n nun’n i ti yɛ ɔ kacili atin bofuɛ ɔ. ?Jasin bofuɛ nɲɔn sɔ’m be nun onin yɛ amún trɛ́ i janvuɛ ɔ? Be nun kun nga i ijɔlɛ’n nun’n, ɔ kwla fa sin yi i asɔnun’n nun’n, e wun i.

5. ?É yó sɛ naan e nuan’n m’ɔ ti kɛ sin sa’n w’a yoman abɔlɛ?

⁵ ?É yó sɛ naan e nuan’n m’ɔ ti kɛ sin sa’n w’a yoman abɔlɛ? Zezi seli kɛ: “Ndɛ kwlaa ng’ɔ o sran anwlɛn’n nun’n yɛ ɔ fite i nuan-an.” (Mat. 12:34) Ɔ maan like klikli ng’ɔ fata kɛ e yo’n yɛle kɛ e bu wafa nga e wun fa yo e’n i akunndan e nian. Sɛ akunndan tɛ wie m’ɔ kwla yo naan e kan e wiengu i wun ndɛ tɛ’n ɔ ba e klun’n, maan e kpalo i. I wie yɛle kɛ e kwla ti i kɛ aniaan kun su kplin i ɲin naan be mɛn i junman asɔnun’n nun. ?Kɛ e ti i sɔ’n, e ka lɛ e lafi su kɛ ɔ klo kɛ ɔ́ yó naan Zoova i klun jɔ ti yɛ ɔ yo sɔ ɔ? ?Annzɛ e bu i kɛ i bɔbɔ i klun sa wie yolɛ ti ɔ? Sɛ blɛ sunman nun’n e bu i kɛ like wie ɲanlɛ ti yɛ e niaan’m be su Zoova’n, maan e wla kpɛn su kɛ Satan kɛnnin i sɔ ndɛ kunngba’n Zɔbu m’ɔ ti Zoova i sufuɛ kpa’n i lika wie. (Zɔb 1:9-11) Nán maan e bu e niaan’m be wun akunndan tɛ. Like ng’ɔ fata kɛ e yo’n yɛle kɛ e kunndɛ sa nga ti yɛ e bu be wun akunndan tɛ’n. ?Like kpa kun sa su yɛ e jran e bu i sɔ akunndan liɛ’n niɔn? ?Annzɛ mɛn’n i awieliɛ blɛ nga nunfuɛ mɔ be kloman sran’n be aeliɛ’n yɛ ɔ su ɲan ta e su ɔ?​—2 Tim. 3:1-4.

6, 7. (a) ?Ninnge nga be kwla yo maan e kan e wiengu’m be wun ndɛ tɛ’n, be nun wie yɛle benin? (b) ?Sɛ be kpɛ e nzowa’n ngue yɛ ɔ fata kɛ e yo ɔ?

⁶ Maan e nian ninnge uflɛ mɔ be kwla yo maan e kan e wiengu’m be wun ndɛ tɛ’n. Be nun kun yɛle kɛ atrɛkpa’n e kunndɛ kɛ sran’m be sie ninnge nga e yo be’n be nzɔliɛ tra e wiengu’m be liɛ’n. Atrɛkpa’n e waan é klé kɛ e kpa tra be ti yɛ wie liɛ’n e kan be wun ndɛ tɛtɛ ɔ. Annzɛ ninnge wie m’ɔ fata kɛ e yo be’n mɔ y’a yoman’n, mɔ i ti e wunman e wun fɛ’n yɛ maan e kan be wun ndɛ tɛtɛ ɔ. Kannzɛ e wun tulɛ annzɛ aɲinblɔɛ annzɛ e wun su mɔ e lafiman’n ti yɛ e yo sɔ’n, i kwlaa yoli o, e aeliɛ sɔ’n ɔ saci like.

⁷ Wie liɛ’n e kwla bu i kɛ sɛ e kan e wiengu kun i wun ndɛ tɛ’n ɔ ti su. Afin atrɛkpa’n, ɔ kannin ndɛ wie m’ɔ yoli e ya ɔ. Sɛ ɔ yoli i sɔ naan e yi e mɛn i’n, i sɔ’n yoman sa fi ye. I kpa’n blɛ li yɛ e su wa saci lika’n niɔn. Yɛ i sɔ’n ti Satan i klun sa yolɛ, nán Ɲanmiɛn i klun sa yɛle i sɔ’n. (2 Tim. 2:26) Sɛ be kan e wun ndɛ tɛ’n, like kpafuɛ nga e kwla yo’n yɛle Zezi i ajalɛ’n i su falɛ. I nun mɔ sran’m be kpɛli i nzowa’n, “w’a yi-man a man-man be.” Sanngɛ “ɔ fɛ i ndɛ liɛ’n wlali Nyanmiɛn b’ɔ di ndɛ nanwlɛ’n i  sa nun.” (1 Piɛ. 2:21-23) Zezi lafili su kɛ kɛ Zoova bɔbɔ i blɛ liɛ’n ko ju’n, ɔ́ síesíe ndɛ sɔ’n kɛ i bɔbɔ Zoova fa klo’n sa. Ɔ fata kɛ e lafi Ɲanmiɛn su sɔ wie. Kɛ e kan ndɛ ng’ɔ wla e wiengu i fanngan’n, e yo maan fɔundi nin bo kun yolɛ tran asɔnun’n nun titi.​—An kanngan Efɛzfuɛ Mun 4:1-3 nun.

MAAN E JRAN SRONGBLE’N NIN MIANMIANLƐ’N BE ƝRUN KEKLE

8, 9. ?Ngue ti yɛ Pilati fali Zezi mannin kɛ be kun i ɔ?

⁸ Kɛ aya ko tra nnɛn kun’n, nnɛn sɔ’n kwlá kɔman lika ng’ɔ klo’n kun. I wafa kunngba’n sɛ sran kun i wiengu’m be wun srɛ kun i’n annzɛ be miɛnmiɛn i naan ɔ yo srongble’n, ɔ su kwlá yomɛn i klunklo ninnge wie mun. (An kanngan Nyanndra Mun 29:25 nun.) Siɛn’n maan e fa e ɲin e sie i sran nɲɔn mɔ be yoli srongble’n be su. Yɛ e nian afɔtuɛ nga be ajalɛ’n man e’n.

⁹ Rɔmufuɛ’m be kpɛn kun m’ɔ suan Pɔnsu Pilati’n ɔ wunnin i wlɛ kɛ Zezi w’a yoman sa tɛ. I ti’n w’a kunndɛman kɛ ɔ́ yó i tɛ. I kpa’n, Pilati seli kɛ Zezi w’a yoman sa “bɔ nin kunlɛ fata-a.” Ɔ nin i sɔ ngba’n, Pilati fali Zezi mannin kɛ be kun i. ?Ngue ti ɔ? Sran’m be wun srɛ m’ɔ kunnin Pilati’n i ti ɔ. (Lik 23:15, 21-25) Sran sɔ’m be kunndɛli kɛ bé mían Pilati naan ɔ yo like nga be klo’n. Ɔ maan be kpannin kɛ: “Sɛ a yaci bian nga nun’n, wuun nán Sezar janvuɛ yɛlɛ wɔ.” (Zan 19:12) Atrɛkpa’n srɛ kunnin Pilati kɛ sɛ ɔ jran Klist sin’n, i junman’n fí i sa annzɛ bé kún i bɔbɔ. Ɔ maan srongble ti’n ɔ loli i wun yoli Satan i klun sa’n.

10. ?Ngue ti yɛ Piɛli seli kɛ ɔ siman Klist ɔ?

¹⁰ Akoto Piɛli ti Zezi i janvuɛ kpa’m be nun kun. Ɔ kɛnnin i sran’m be ɲrun kɛ Zezi yɛ ɔ ti Mɛsi’n niɔn. (Mat. 16:16) Blɛ kun nun’n Zezi kannin ndɛ kun mɔ i sɔnnzɔnfuɛ’m b’a wunmɛn i wlɛ ɔ. Ɔ maan be nun wie’m b’a sumɛn i su kun. Sanngɛ Piɛli w’a yoman sɔ wie. (Zan 6:65-69) Asa ekun’n, kɛ Zezi i kpɔfuɛ’m be bɛli i tralɛ’n, Piɛli fali tokofi naan ɔ́ fá kplí Zezi i ti. (Zan 18:10, 11) Sanngɛ i sin’n, sran’m be wun srɛ ti’n Piɛli seli bɔbɔ kɛ ɔ siman Zezi Klist. Blɛ kpe kan sɔ’n nun’n, sran’m be wun srɛ’n m’ɔ ti kɛ aya sa’n Piɛli tɔli nun. Ɔ maan w’a kwlá faman ajalɛ yakpa su.​—Mat. 26:74, 75.

11. ?Ninnge benin wie mun yɛ sran’m be kwla mian e kɛ e yo ɔ?

¹¹ E mɔ e ti Klistfuɛ’n, kɛ be mian e kɛ e yo like nga Ɲanmiɛn klomɛn i’n, ɔ fata kɛ e jran kekle. E junman su min’n annzɛ sran wie’m be kwla mian e kɛ e di ndrunmun annzɛ e nin sran wie e la. Suklu ba nga be ti Klistfuɛ’n be wiengu’m be kwla mian be kɛ be nian bian nin bla nna nga be fa fite nzra nun’n, annzɛ be nɔn siklɛti annzɛ drɔgi, annzɛ kɛ bé bó be ta’n be di ndrunmun. Wie liɛ kusu be kwla se be kɛ be nɔn nzan annzɛ be kunndɛ bla annzɛ bian. Sran’m be wun srɛ’n ɔ nin mianlɛ nga be mian e kɛ e yo like nga Zoova klomɛn i’n, be ti kɛ aya sa. ?Ngue yɛ é yó naan y’a tɔman i sɔ’n aya’m be nun ɔn?

12. ?Ngue ti yɛ Pilati nin Piɛli be yoli srongble ɔ?

¹² Maan e nian like nga ti yɛ Pilati nin Piɛli be yoli srongble’n. Pilati siman Klist kpa. Kannzɛ ɔ ti sɔ’n, ɔ wunnin kɛ Zezi w’a yoman sa tɛ, yɛ ɔ timan kɛ sran kun nga’m be sa. Sanngɛ Pilati w’a yoman wun ase kanfuɛ yɛ w’a kloman Ɲanmiɛn Kpli. Ɔ maan mmusu’m be si Satan trɛli i sa blɛlɛlɛ. Piɛli liɛ’n, ɔ kloli Ɲanmiɛn yɛ ɔ sili Ɲanmiɛn nin Klist Zezi be su ndɛ nanwlɛ’n kpa. Sanngɛ blɛ wie nun’n, ɔ lafili i wun su tratrali su, sran wun srɛ kunnin i yɛ ɔ tɔli srongble’n nun. Ka naan b’a tra Zezi’n, Piɛli dili i nuan seli kɛ: “Kannzɛ be kwlaa be ti nun sáci’n, n liɛ’n su saci-man wie.” (Mar. 14:29) Sɛ ɔ ti kɛ Piɛli lafili Ɲanmiɛn su kɛ jue tofuɛ’n sa’n, nn ɔ kwla jrannin sa nga be wa tɔli i su kasiɛn’n be ɲrun kekle. Jue tofuɛ sɔ’n i jue nun’n ɔ seli kɛ: “Anannganman jin min sin, n sro-man like fi. ?Kɛ nguɛ like sa yɛ sran’m be kwla yo min-ɔn?” (Jue. 118:6) Kɔnguɛ kasiɛn ka naan b’a kun Zezi’n, Zezi fali Piɛli nin i akoto’m be nun nɲɔn ekun ɔli lika kun mɔ be flɛ i Zɛtsemane’n i nun lɔ. Kɛ ɔ yo naan Piɛli nin i wiengu sɔ’m be ɲin  tran su’n, lafilɛ yɛ be lafili ɔ. Zezi tinngeli be yɛ ɔ seli be kɛ: “Maan amun nyin tran su, yɛ amun nin Nyanmiɛn an koko yalɛ naan lakafuɛ’n w’a laka-man amun.” (Mar. 14:38) Sanngɛ Piɛli lafili ekun, ɔ maan i sin’n ɔ yoli srongble.

13. ?Ngue yɛ ɔ fata kɛ e yo naan sɛ sran’m be mianmian e’n y’a yoman sa tɛ ɔ?

¹³ Pilati nin Piɛli be su ndɛ’n kle e kɛ, kɛ sran’m be mianmian e’n sɛ e waan é jrán kekle’n, ɔ fata kɛ e si ndɛ nanwlɛ’n i kpa, e kan e wun ase, nán e lafi e wun su tratra su, e klo Ɲanmiɛn yɛ e sro Zoova, nán e sro klɔ sran mun. Kusu’n, ɔ fataman kɛ e yo ninnge sɔ’m be nun wie naan e yaci wie. Sɛ ndɛ nanwlɛ’n i silɛ kpa mɔ e si i’n yɛ maan e lafi Ɲanmiɛn su’n, é kwlá kán ninnge nga e lafi su’n be ndɛ é klé sran mun yakpa su. Yɛ i sɔ’n úka e naan kɛ be mian e kɛ e yo like wie’n, y’a jran kekle naan y’a yoman srongble. Ɔ nin i fataman kɛ e lafi e wun su ngboko. Sanngɛ maan aenvuɛ su e di e wun nanwlɛ kɛ ɔ fata kɛ Ɲanmiɛn man e fanngan naan y’a kwla jran mianmianlɛ’n i ɲrun kekle. Ɔ fata kɛ e srɛ Zoova kɛ ɔ fɛ i wawɛ’n man e. Kpɛkun maan klolɛ m’ɔ e klo i’n ɔ su e bo naan e nanti i mmla’m be su, yɛ maan ɔ uka e naan e aeliɛ’n w’a sacimɛn i dunman. Asa ekun’n, maan e dun mmua e buabua e wun e sie naan sɛ be mian e kɛ e yo like wie’n y’a kwla jran kekle. I wie yɛle kɛ ɔ fata kɛ siɛ nin niɛn’m be nin be mma’m be srɛ Ɲanmiɛn. Kpɛkun be uka be naan sɛ be wiengu’m be mian be kɛ be yo like tɛ wie’n, b’a si ajalɛ ng’ɔ fata kɛ be fa’n.​—2 Kor. 13:7. *

NÁN E AKUNNDAN’N BU E FƆ KPE NUN

14. ?Sa tɛ nga e yoli be’n, be wun akunndan benin yɛ mmusu’m be si Satan kunndɛ kɛ e bu ɔ?

¹⁴ Aya kun o lɛ’n, kɛ bé súa’n, be fa waka losin annzɛ yɛbuɛ nɔnninnɔnnin kun be sende i nglo kan nnɛn’m be sin lɛ titi’n. Kpɛkun i janvlɛ’n o be atin bɔbɔ ba’n nun. Kɛ nnɛn ng’ɔ niɛnmɛn i wun’n ɔ kpalo janvlɛ sɔ’n, kpɛkun waka’n annzɛ yɛbuɛ’n w’a flo w’a tɔ i su. Sɛ e yoli sa tɛ dan wie naan e akunndan’n bu e fɔ tratra su’n, ɔ kwla yo e kɛ waka annzɛ yɛbuɛ nɔnninnɔnnin wie yɛ ɔ su tin e su sa ɔ. Kɛ e bu sa tɛ wie mɔ e yoli i laa’n i akunndan’n, wie liɛ’n i sɔ’n yo maan e “bubu mlɔnmlɔnmlɔn.” (An kanngan Jue Mun 38:4-6, 9 nun.) Satan kunndɛ kɛ e bu i kɛ e ti sa tɛ yofuɛ dan ti’n, Zoova kwlá siman e aunnvuɛ naan e kwlá fɛmɛn i mmla’m be su guɛmɛn i ti nin i bo.

15, 16. ?É yó sɛ naan sɛ e yoli sa tɛ dan wie’n, e akunndan’n w’a buman e fɔ w’a tratraman su?

¹⁵ ?É yó sɛ naan sɛ e yoli sa tɛ dan wie’n, e akunndan’n w’a buman e fɔ w’a tratraman su? Sɛ e yoli sa tɛ dan wie’n, maan e fa ajalɛ ndɛndɛ kpa naan e siesie e nin Zoova e afiɛn. Maan e se asɔnun kpɛnngbɛn’m be kɛ be uka e. (Zak 5:14-16) Maan e yo like kwlaa nga e kwla yo’n naan e siesie like nga e sacili i’n. (Mat. 3:8) Sɛ be tu e fɔ’n, nán maan e sa sin bubu e. Fɔ mɔ be tu e’n, ɔ kle kɛ Zoova klo e. (Ebr. 12:6) Maan e ta nda kɛ e su yoman ninnge nga e yoli be mɔ maan e tɔli sa tɛ’n nun’n be kun. Yɛ maan e yo nda sɔ’n i nuan su sa. Kɛ e aeliɛ’n ko yo e nsisɔ mɔ e ko kaci e sa’n, maan e lafi su kɛ e ti kpɔlɛ tɛ nga Zezi Klist yili’n ti’n, Ɲanmiɛn kwla yaci e sa tɛ mun cɛ e.​—1 Zan 4:9, 14.

¹⁶ Sran wie’m be liɛ’n, kannzɛ be yacili be sa tɛ’n cɛli be’n, sanngɛ be akunndan’n te bu be fɔ. Sɛ ɔ yo amun sɔ wie’n, maan amun wla kpɛn sa nga’m be su. Yɛle kɛ blɛ mɔ Ɲanmiɛn i Wa m’ɔ klo i kpa’n ɔ le Piɛli nin akoto onga’m be awuliɛ kpa’n, be yacili i be wanndili. Sanngɛ Zoova yacili sa tɛ sɔ’n cɛli be. Korɛnti asɔnun’n nun lɔ’n, ɲannzuɛn sa tɛ kpa mɔ bian kun yoli’n ti’n, be tuli i asɔnun’n nun. Sanngɛ kɛ ɔ kacili i nzuɛn’n Zoova yacili i sa tɛ’n cɛli i. (1 Kor. 5:1-5; 2 Kor. 2:6-8) Ɲanmiɛn Ndɛ’n nun’n, be kannin sran wie mɔ be yoli sa tɛ dan’n mɔ i sin be kacili  be sa yɛ Ɲanmiɛn yacili be sa tɛ’n cɛli be’n be ndɛ.​—2 Nyo. 33:2, 10-13; 1 Kor. 6:9-11.

17. ?Wafa sɛ yɛ e ti kpɔlɛ tɛ’n i su lafilɛ’n kwla uka amun ɔn?

¹⁷ Sɛ amun yoli sa tɛ naan amun kacili amun nzuɛn’n sakpa’n, yɛ sɛ amun lafi su kɛ Zoova si amun aunnvuɛ’n, ɔ́ yáci amun sa tɛ’n cɛ́ amun. Yɛ ɔ su boman su diman jɔlɛ kun. Nán maan ɔ yo amun le kɛ tɛ nga Zezi yili’n ɔ kwlá nunnunman sa tɛ nga amun yoli’n. Sɛ amun bu i sɔ’n, nn amun a tɔ Satan i aya kun ekun nun. Satan kunndɛ kɛ amun bu i kɛ Zoova kwlá jranman e ti kpɔlɛ tɛ’n su yaciman sa tɛ wafa’n kwlaa cɛman. Sanngɛ sɛ be nga be yoli sa tɛ’n be kaci be nzuɛn’n sakpa’n, Zoova kwla yaci be wun sa’n cɛ be weiin. (Nya. 24:16) E ti kpɔlɛ tɛ’n i su lafilɛ’n kwla uka amun naan amun akunndan’n w’a buman amun fɔ w’a tratraman su kun. Yɛ ɔ kwla uka amun naan amun a ɲan wunmiɛn b’a su Ɲanmiɛn, naan i sɔ yolɛ’n nun’n, amun a fa amun wla’n kwlaa b’a guɛ i su, naan kusu’n amun akunndan’n kwlaa w’a trɛn i su.​—Mat. 22:37.

E SI LIKE NGA SATAN KUNNDƐ’N

18. ?Ngue yɛ e kwla yo naan y’a tɔman Satan i aya’m be nun ɔn?

¹⁸ Satan liɛ’n aya ng’ɔ ko fa ko tra e’n nɛ́n i yɛ ɔ ti i cinnjin ɔn. I liɛ’n ng’ɔ ti i cinnjin’n yɛle e tralɛ. Kɛ mɔ e si like nga Satan kunndɛ’n ti’n, e kwla nian e wun su naan w’a ɲanman e. (2 Kor. 2:10, 11) Sɛ e srɛ Ɲanmiɛn kɛ ɔ man e ngwlɛlɛ naan blɛ kekle’n nun’n y’a si nanti’n, e su tɔmɛn i aya’m be nun. Zaki klɛli i kɛ: “Sɛ ngwlɛlɛ’n w’a ti-man amun nun wie kpa’n, maan ɔ kan kle Nyanmiɛn bɔ i sa ti-man tankaan’n, b’ɔ fa like man sran’m be kwlaa ɔ ijɔ-mɛn i sin’n. Ɔ maan sran sɔ’n ɔ́ wún sa wlɛ.” (Zak 1:5) Ɔ fata kɛ e yo e srɛlɛ’n i nuan su sa. Yɛle kɛ e suan Biblu’n nun like titi yɛ e nian ndɛ nga e suan’n su e nanti. Biblu’n i akua nga sran kpa nanwlɛfuɛ m’ɔ si ngwlɛlɛ’n yi be’n be kle e Satan i aya mun, yɛ be kle e like ng’ɔ fata kɛ e yo naan y’a tɔman be nun’n.

19, 20. ?Ngue ti yɛ ɔ fata kɛ e kpɔ like ng’ɔ ti tɛ’n niɔn?

¹⁹ Ɲanmiɛn srɛlɛ’n nin Biblu’n nun like suanlɛ’n be yo maan e klo sa kpa’n i yolɛ. Kusu’n, ɔ ti cinnjin kpa ekun kɛ e suan sa tɛ’n i kpɔlɛ. (Jue. 97:10) Kɛ e bu sa tɛ nga e konvi sɔ be’n be bo nzuɛn’n i akunndan’n, i sɔ’n uka e naan y’a yomɛn i sɔ sa mun. (Zak 1:14, 15) Kɛ e suan sa tɛ’n i kpɔlɛ’n mɔ e klo sa kpa’n, like nga Satan fa sua e aya’n, ɔ yo e kain bɔbɔ. E konvi sɔmɛn i kaan sa.

²⁰ Ukalɛ nga Ɲanmiɛn uka e naan y’a tɔman Satan i aya’m be nun’n, ɔ yo e fɛ dan! Zoova fɛ i wawɛ’n nin i Ndɛ’n yɛ i anuannzɛ’n fa “de ye [Satan] sa nun.” (Mat. 6:13) Satan i aya nɲɔn ekun m’ɔ fa tra Ɲanmiɛn i sufuɛ mun’n, like suanlɛ ng’ɔ́ bá lɛ’n nun’n é wá wún like ng’ɔ fata kɛ e yo naan y’a tɔman be nun wie’n.

[Ja ngua lɛ ndɛ’n]

[Kosan mun]

[Foto, bue 24]

Sran wun ndɛ tɛ kanlɛ’n kwla fa sin yi i asɔnun’n nun.

[Foto, bue 27]

E akunndan’n m’ɔ bu e fɔ tratra su’n m’ɔ ti kɛ trɔ nɔnninnɔnnin wie sa’n e kwla yi i ase.