Maan amun mantan sran ng’ɔ tie e srɛlɛ mun’n

BE NGA be waan be lafi Ɲanmiɛn su’n, be nun kaka be kwlá kleman like nga ti yɛ be lafi i su’n. Asa kusu sa nga ti yɛ blɛ sunman nun’n, Ɲanmiɛn sulɛ wafa’m be sa o sa tɛ yolɛ nun’n, yɛ like nga ti yɛ Ɲanmiɛn yaci sran mun maan be fɛ’n, be kwlá yiyiman nun. Sɛ be waan b’a yo wie dan’n, yɛle Ɲanmiɛn kun mɔ be wunmɛn i ninnge yolɛ wafa’n i wlɛ’n i srɛlɛ.

Sanngɛ amun liɛ’n amun kwla fa amun wun mantan Ɲanmiɛn tra ngalɛ’n. Ɔ fata kɛ amun Ɲanmiɛn sulafilɛ’n taka Ɲanmiɛn i silɛ’n su. I silɛ sɔ’n maan amún kló i yɛ i ndɛ yó amun cinnjin. Ɲanmiɛn sulafilɛ kpafuɛ’n, ɔ taka ninnge wie mɔ e wun be weiin’n su. (Ebre Mun 11:1) Sɛ amun suan Ɲanmiɛn i su nanwlɛ’n, amun kwla si i yɛ ɔ kwla kaci amun janvuɛ mɔ amún kán ndɛ klé i ɔ. Sran wie mun’n, laa be srɛ Ɲanmiɛn, kusu nn be lafiman su kpa kɛ ɔ o lɛ sakpa. Amun nian be su ndɛ wie mun.

◼ Patrisia mɔ e kɛnnin i ndɛ fluwa nga i nun ndɛ klikli’n nun’n, ɔ seli kɛ: “Cɛn kun’n, min nin min janvuɛ kɔe blu e o lɛ kpɛkun be boli Ɲanmiɛn sulɛ ndɛ kanlɛ bo. Yɛ n seli be kɛ Zoova i Lalofuɛ kun toli e awlo lɔ naan ɔ nin min si m’ɔ lafiman Ɲanmiɛn su’n be su koko yalɛ. Naan kɛ ɔ ko yo naan m’an tranman yalɛ nga be su koko’n i bo’n i ti yɛ n fiteli ɔ. Kɛ ɔ yoli sɔ’n, min janvuɛ’m be nun kun seli: ‘Atrɛkpa’n Zoova i Lalofuɛ’m be di nanwlɛ.’

“Be nun kun ekun seli kɛ: ‘?Y’a ɔman be aɲia’m be nun kun bo y’a nianman?’ I sɔ yɛ e yoli ɔ. Kannzɛ y’a faman e wla y’a guaman ndɛ nga be kannin’n su’n, sanngɛ Zoova i Lalofuɛ’m be wun m’ɔ yo fɛ’n ti’n, e nun wie mun y’a yaciman be aɲia’m be bo kɔlɛ.

“Mɔnnɛn cɛn kun’n, ndɛ nga n tili’n, ɔ kacili min akunndan’n. Nzra nun ijɔfuɛ’n yiyili sa nga ti yɛ afɛ’n wo sran’m be su’n i nun. Blɛ sɔ’n nun’n, n siman kɛ kɛ be yili sran’n fɔ nunmɛn i nun. Naan sa tɛ yolɛ’n nin wie’n be boli be bo sran kun su, yɛ kasiɛn su’n be sali klɔ sran’m be kwlaa ɔ. Sa nga ti yɛ ɔ nin i fatali kɛ Zezi wu naan sran’m b’a kwla ɲan like ng’ɔ fili klɔ sran klikli’n i sa’n, nzra nun ijɔfuɛ’n yiyili nun wie. * (Rɔmfuɛ Mun 5:12, 18, 19) E ja nun lɛ’n, n wa wunnin ninnge’m be wlɛ weiin. Min klun lɔ’n, n seli kɛ: ‘Kannzu Ɲanmiɛn kun o lɛ sakpasakpa, yɛ e ndɛ lo i.’ N suannin Biblu’n nun like n wɔli min ɲrun titi. W’a cɛman naan m’an wun i kɛ n kwla srɛ sran kun m’ɔ o lɛ sakpasakpa ɔ. Kɛ be wuli min lele’n blɛ sɔ’n nun yɛ n wunnin i sɔ liɛ’n i wlɛ ɔ.”

◼ Allan mɔ e kɛnnin i ndɛ wie fluwa nga i nun ndɛ klikli’n nun’n, ɔ seli kɛ: “Cɛn kun’n, Zoova i Lalofuɛ’m be boboli e anuan. Be kannin anannganman nguan nun tranlɛ asiɛ’n nga su wa’n i ndɛ. I sɔ’n yoli min yi’n i fɛ. I ti’n, ɔ sɔli be nun. Min klun w’a jɔman i sɔ’n su. Ɔ maan n flɛli min yi gbo nun lɔ, yɛ n seli i kɛ: ‘Nán di sinnzin! ?Ngue ti yɛ á kó fá ndɛ kɛ ngalɛ sa’m be su yɛ?’

 “Ɔ tɛli min su kɛ: ‘Yoo, to be lɔ naan kle be kɛ ndɛ nga be kan’n timan nanwlɛ.’

“Nanwlɛ, m’an kwlɛmɛn i sɔ liɛ’n i yo. I kpa’n be wun yoli fɛ yɛ be kɔlɛ su’n, be mannin min fluwa kun m’ɔ kan wafa nga nguan’n boli i bo’n i ndɛ’n. Sɛ sran kun yɛ ɔ yili ninnge nga nguan o be nun’n kwlaa o annzɛ be boli nun sa ngbɛn o, fluwa sɔ’n yiyi nun. Fluwa’n i nun ndɛ’m be ti weinwein yɛ be sasa su klanman cɛ. I sɔ’n ti’n, n fali ajalɛ kɛ ń súan Ɲanmiɛn i su like ekun. Ɔ maan min nin Zoova i Lalofuɛ mun e boli Biblu’n nun like suanlɛ bo. Ndɛndɛ kpa’n, n wunnin i wlɛ kɛ akunndan kwlaa nga m buli i Ɲanmiɛn sulɛ’n su’n, wie fi nin Biblu’n nun ndɛ’n be kɔman likawlɛ. Kɛ ń súan Zoova i su like ń kɔ́’n, siɛn’n min srɛlɛ nun’n ndɛ ng’ɔ o min klun’n yɛ n kɛn i trele n kle i ɔ. N srɛli i kɛ ɔ uka min naan n wla min nzuɛn wie mɔ be timan kpa’n be ase. N lafi su kpa kɛ Zoova tɛli min srɛlɛ’m be su.”

◼ Ndɛ mɔ Andre m’ɔ tran Angle’m be mɛn’n nun lɔ’n, ɔ kan’n yɛ: “Kannzɛ laa’n kɛ n kan ndɛ kun’n n jran su kpa’n, naan siansi’n ti min nnanna’n, sanngɛ sa nga ti yɛ n lafili su kɛ klɔ sran fin ndo’n yɛle kɛ sran’m be waan ninnge wie’m be kle sɔ sakpa. Ninnge tɛtɛ nga e wun be asiɛ’n su ti’n m’an lafiman Ɲanmiɛn su.

 “Sanngɛ cɛn kunngun n se min klun lɔ kɛ: ‘Sɛ Ɲanmiɛn kun o nglo lɔ sakpa’n, nn nanwlɛ n kunndɛ kɛ ń sí sa nga ti yɛ e o asiɛ’n su’n, ɔ nin like nga ti yɛ sa tɛtɛ yolɛ nin alɛ’n b’a sɔn sɔ’n.’ Cɛn wie’n, kɛ kekle o min su’n, n srɛ sanngɛ n siman sran nga n o lɛ ń kán ndɛ ń klé i’n.

“Cɛn kun’n, sran kun fali Zoova i Lalofuɛ’m be fluwa nɲa kun mannin min yi. Fluwa’n suan ?Mɛn ng’ɔ o yɛ’n ɔ́ fíte nun? I sɔ bɔbɔ yɛ blɛ sunman nun’n, n usali min wun ɔn. Fluwa nɲa sɔ’n ti’n n wa buli Biblu’n i su akunndan. N usali min wun kɛ: ‘?Ɔ nin i fata kɛ be lafi Biblu’n i nun ndɛ’n su?’ Kɛ i osu lali nun kan’n, mɔ n fali blɛ naan ń ló wunmiɛn’n, sran kun mannin min fluwa kun. Be klɛli su kɛ La Bible : Parole de Dieu ou des hommes ? Kɛ n wunnin i kɛ Biblu’n nun ndɛ’n nin siansifuɛ nga be di nanwlɛ’n be ndɛ’m be sansanman be wun’n, n seli min klun lɔ kɛ ɔ fata kɛ n suan Biblu’n i su like kpa ekun. Ɔ maan kɛ Zoova i Lalofuɛ kun seli min kɛ ɔ́ klé min Biblu’n nun like’n, n kplinnin su. Kɛ n wunnin like nga Zoova waan ɔ́ yó’n i wlɛ’n, n wunnin i wlɛ kɛ ɔ ti aolia nun sran m’ɔ o lɛ sakpa ɔ, naan n kwla kan min klun ndɛ n kle i srɛlɛ nun.”

◼ Zani mɔ be tɛli i Plotɛstan asɔnun’n nun’n Lɔndri lɔ’n waan: “Gblɛ mɔ Ɲanmiɛn sufuɛ’m be kpɛ’n ɔ nin ɲrɛnnɛn mɔ w’a yo dan lika’n nun’n ti’n, n yacili Ɲanmiɛn sulɛ. N jrannin inivɛsite kɔlɛ’n yɛ m boli jue tolɛ nin gita bolɛ bo naan ń fá kúnndɛ sika. Blɛ sɔ nun yɛ e nin yasua kun m’ɔ suan Pat e sannin nun ɔn. Be tɛli i katoliki nun yɛ i kusu yacili Ɲanmiɛn i su lafilɛ kɛ min sa.

“E nin sran wie’m mɔ be kusu be jrannin suklu’n, e trannin sua nvuɛn kun nun. Be liɛ’n Azifuɛ’m be Ɲanmiɛn sulɛ wafa mun yɛ be ti be cinnjin ɔn. Blɛ wie’m be nun’n, like nga ti yɛ e o mɛn’n nun’n e si su akplowa kɔnguɛ e cɛ kpa. Kannzɛ blɛ sɔ’n nun’n, e nin Pat e lafiman Ɲanmiɛn su’n, sanngɛ e lafi su kɛ saan ‘wunmiɛn kun cɛ yɛ ɔ yili ninnge kwlaa nga be o nguan nun mun ɔn.’

“Kɛ e ɔli jue tolɛ junman kunndɛlɛ Angle’m be mɛn i nglo lɔ lika’n nun’n, yɛ e wuli e wa’n niɔn. Cɛn kun’n, ɔ tɔli tukpacɛ kɔnguɛ. Min ɲin mɔ ḿ bó i bla ɔ, n su srɛ Ɲanmiɛn mɔ n lafimɛn i su’n. Sa sɔ’n i osu w’a cɛman, e nin Pat e afiɛn wa sacili. N fali ba’n yɛ e tuli awlo’n nun ɔn. N wa srɛli ekun. N seli min wun kɛ, ‘nja sɛ sran kun o lɛ m’ɔ́ tɛ́ su mán min o!’ Kannzu i kunngba’n wie yɛ Pat yoli ɔ.

“Cɛn kunngba sɔ’n nun’n, Zoova i Lalofuɛ’m be nun nɲɔn be boboli Pat i anuan. Be kleli i Biblu’n nun afɔtuɛ wie mun. Pat flɛli min telefɔnu nun yɛ ɔ usali min sɛ ń kplín su kɛ e nin i nin Zoova i Lalofuɛ mun e suan Biblu’n nun like o. W’a cɛman, e wa sili kɛ sɛ e waan Ɲanmiɛn i klun jɔ e wun’n, ɔ fata kɛ e ko ja awa ja su. Ɔ yoli min kɛ i sɔ liɛ’n wá yó kekle kpa afin blɛ sɔ’n nun’n, e nin Pat e afiɛn sɛman kpa.

“E kunndɛli kɛ é sí Biblu’n nun kasiɛ’m be su kpɛnlɛ’n, ɔ nin sa nga ti yɛ sran’m be wun ɲrɛnnɛn’n, i su ndɛ kpa ekun. Asa kusu’n, e kunndɛli kɛ be kle e like nga be flɛ i Ɲanmiɛn Sielɛ’n. Blɛblɛblɛ, e wa wunnin i wlɛ kɛ e ndɛ lo Ɲanmiɛn sakpa. Yɛ e sunnzunnin kɛ é yó like ng’ɔ se e kɛ e yo’n. I ti’n, e ko jali awa ja su. E mma nsan’m be talɛ’n nun’n, ngwlɛlɛ ng’ɔ o Ɲanmiɛn Ndɛ’n nun’n, ɔ ukali e. E lafi su kpa kɛ Zoova tieli e srɛlɛ mun.”

Maan amun bɔbɔ amun kpɛ i bo be nian

Kɛ sran akpinngbin wie’m be fa yoli’n sa’n, be nga e kannin be ndɛ ndɛ nga nun’n, b’a yaciman be wun lɛ naan Ɲanmiɛn sulɛ wafa ng’ɔ timan su’n w’a laka be. Asa kusu’n, be wa sili sa nga ti yɛ Ɲanmiɛn yaci sran mun lɛ mɔ be wun ɲrɛnnɛn’n. ?Amun sieli i nzɔliɛ kɛ be kwlaa nga e kannin be ndɛ lɛ’n, Biblu’n i nun ndɛ’n mɔ be wunnin i wlɛ kpa’n, yɛ maan be lafili su kɛ Zoova tie e srɛlɛ mun ɔn?

?Amun kunndɛ kɛ amún sí ninnge nga be kle kɛ Ɲanmiɛn o lɛ sakpa’n? Zoova i Lalofuɛ’m be klo kɛ bé úka amun naan amun si Zoova i su nanwlɛ’n, naan kusu’n amun si wafa nga amun kwla fa amun wun mantan sran mɔ be ‘srɛ i-ɔ ɔ ti’n.’​—Jue Mun 65:3.

[Ja ngua lɛ ndɛ mun]

Zoova i Lalofuɛ mun yɛ be yili ɔ.

[Ndɛ kwle, bue 10]

“Kɛ n wunnin like nga Zoova waan ɔ́ yó’n i wlɛ’n, n wunnin i wlɛ kɛ ɔ ti aolia nun sran m’ɔ o lɛ sakpa ɔ, naan n kwla kan min klun ndɛ n kle i srɛlɛ nun.”

[Foto, bue 9]

Ɲanmiɛn sulafilɛ kpafuɛ’n, ɔ taka ninnge wie mɔ e wun be weiin’n, ɔ nin Ɲanmiɛn i su nanwlɛ’n i silɛ’n su.