“Min nin amun e o”
“Min nin amun e o”
“Sran kpanngban kpa bé kánngan nun, yɛ be silɛ’n ɔ́ úka su.”—DAN. 12:4.
?AMÚN TƐ́ SU SƐ?
?E blɛ liɛ’n nun’n, ngue yɛ maan sran’m be wa ‘sili’ Ɲanmiɛn Ndɛ’n i kpa ɔ?
?Ngue yɛ maan sran “kpanngban” be sɔ ndɛ nanwlɛ’n nun ɔn?
?Wafa sɛ yɛ Ɲanmiɛn i silɛ kpafuɛ’n ɔ ‘ukali’ su ɔ?
1, 2. (a) ?Wafa sɛ yɛ e si kɛ Zezi nin i sɔnnzɔnfuɛ’m be o andɛ naan ɔ nin bé ká sɔ tititi ɔ? (b) ?Kɛ nga Daniɛl 12:4 fa kannin sa’n, kɛ sran’m bé bó be ɲin ase bé súan Ɲanmiɛn Ndɛ’n nun like’n, i bo’n gúa sɛ?
MAAN ɔ yo amun kɛ amun o mɛn uflɛ’n nun sa. Kɛ amun jaso nglɛmun’n, amun si kɛ amun lafili kpa yɛ amun wun blibli amun kɛ amun yo amun ninnge mun. Amun lika wie fi yoman amun ya. Amun wun tukpacɛ’m be kwlaa b’a wie. Amun wun ase kpa, amun ti sa kpa, amun ti nvan kpa, sɛ be kan amun’n annzɛ amun kan like’n amun wun i wlɛ, yɛ amun nuan nun yo amun fɛ. Wunmiɛn o amun nun kpa, amun klo junman nga amun di’n, amun le janvuɛ kpanngban yɛ amun kokoman like fi su kun. Ɲanmiɛn Sielɛ’n i bo’n, amún sí i sɔ liɛ’n kwlaa. Zezi Klist mɔ Ɲanmiɛn kpɛli i kɛ ɔ yo Famiɛn’n, ɔ́ yrá klɔ sran’m be su yɛ ɔ́ yó maan bé sí Zoova.
2 Blɛ sɔ nun’n, Zoova nin i Wa’n bé úka Zoova i sufuɛ mun naan be kle sran mun Zoova i su like. Zoova nin Zezi be ukali Klistfuɛ kpa mun titi naan be kɛn i su ndɛ be kle sran mun. Ka naan Zezi w’a ɔ ɲanmiɛn su’n, ɔ seli i sɔnnzɔnfuɛ’m be kɛ: “Min nin amun e o.” I sɔ’n kle kɛ ɔ su yaciman be ukalɛ le. (An kanngan Matie 28:19, 20 nun.) Kɛ ɔ ko yo naan y’a fa e wla y’a guɛ i ndɛ sɔ’n su kpa’n, é wá fá e ɲin síe i ndɛ kun mɔ Ɲanmiɛn maan Daniɛli klɛli i Babilɔni lɔ i afuɛ 2.500 tra su yɛ’n su. Kɛ ɔ́ kán mɛn’n i “awieliɛ blɛ’n” mɔ i nun yɛ e o yɛ’n i ndɛ’n, ɔ seli kɛ: “Sran kpanngban kpa bé kánngan [Nyanmiɛn Ndɛ’n] nun, yɛ be silɛ’n ɔ́ úka su.” (Dan. 12:4) Ebre aniɛn nun’n ndɛ nga be kacili i Wawle nun kɛ “kanngan nun’n” ɔ kle kɛ be bo be ɲin ase kpa be suan like. I sɔ liɛ mɔ bé yó’n, nanwlɛ, ɔ́ yó sran kpanngban ye dan! Be nga be bo be ɲin ase be suan Ɲanmiɛn nuan ndɛ’n bé sí nanwlɛ’n m’ɔ o Ɲanmiɛn Ndɛ’n nun’n. Daniɛli kannin ekun kɛ like ‘silɛ’ kpafuɛ’n ɔ́ úka su. Be nga bé sɔ́ i sɔ like silɛ’n nun’n bé fá klé sran uflɛ mun. Asa kusu’n, lika kwlaa nun’n, sran kwlaa nga i waan ɔ́ súɛn i sɔ like’n, ɔ́ kwlá súan. Siɛn’n, é wá wún wafa nga ndɛ sɔ’n kpɛnnin su’n. I sɔ’n yó maan é láfi su kpa ekun kɛ Zezi nin i sɔnnzɔnfuɛ’m be o andɛ, naan ndɛ nga Zoova kannin’n ɔ́ yó i nuan su sa.
KLISTFUƐ KPA’M BE WA SILI ƝANMIƐN NDƐ’N I ‘SILƐ’ KPA
3. ?Kɛ akoto’m be wieli wu’n, sa benin yɛ ɔ juli ɔ?
3 Kɛ akoto’m be ngba be wuli’n, akoto Pɔlu i ndɛ ng’ɔ kɛnnin i kɛ sran wie’m bé wá jáso Ɲanmiɛn wun’n, ɔ kpɛnnin su. Yɛ be ndɛ’n truli ndɛndɛ kpa kɛ sin yɛ ɔ su di lika sa ɔ. (Yol. 20:28-30; 2 Tɛs. 2:1-3) Kɛ ɔ́ dí afuɛ ya ko ju wie’n, be nga be waan be ti Klistfuɛ bɔbɔ’n b’a ‘siman’ Ɲanmiɛn ndɛ’n. Ɲanmiɛn sulɛ wafa’m be su kpɛn’m be waan be lafi Ɲanmiɛn Ndɛ’n su, sanngɛ ‘like nga mmusu’m be kle’n’ yɛ be fa kle sran mun ɔn. I sɔ ato ndɛ’n sacili Ɲanmiɛn wun. (1 Tim. 4:1) I sɔ’n ti’n sran’m be sunman lika b’a siman Ɲanmiɛn i su nanwlɛ ndɛ’n. Ninnge nga be mɔ be jasoli Ɲanmiɛn wun’n be kle’n i wie yɛle kɛ Ɲanmiɛn ti atre nsan, naan kɛ sran wu’n ɔ le i sin like kun m’ɔ wuman ɔn, naan be yra klunwifuɛ mun sin fɛtɛ kun nun trilili.
4. ?Wafa sɛ yɛ afuɛ 1870 nin 1880 be afiɛn’n nun lɛ’n, Klistfuɛ akpasua kun boli Biblu’n nun nanwlɛ’n i kunndɛlɛ bo ɔ?
4 Sanngɛ afuɛ kɔe ablanan ka naan mɛn’n i “awieliɛ blɛ’n” w’a bo i bo’n, lika’n wa kacili. Blɛ sɔ’n nun’n, Amlɛnkɛn’m be mɛn’n nun lɔ lika nga be flɛ i Pɛnsilvani lɔ Klistfuɛ kpa akpasua kaan kun i nunfuɛ’m be wa yiali, be boli be ɲin ase be suannin Biblu’n nun like, be kunndɛli kɛ bé sí nanwlɛ ndɛ ng’ɔ o Biblu’n nun’n. (2 Tim. 3:1) Be tɔnnin be wun dunman kɛ Biblu’n nun like suanfuɛ. Nán be yɛle “ngwlɛlɛfuɛ nin be bɔ be si sa’n” mɔ Zezi seli kɛ Ɲanmiɛn fá Ɲanmiɛn i su sa silɛ’n fía be wun’n. (Mat. 11:25) Be liɛ’n, be ti aenvuɛfuɛ, yɛ be kunndɛli kpa kɛ bé yó Ɲanmiɛn i klun sa’n. Be boli be ɲin ase be kanngannin Biblu’n nun, be srɛli i su Ɲanmiɛn tankaan kpa, kpɛkun be kokoli i su yalɛ yɛ be buli i su akunndan kpa. Asa ekun’n, be fali Biblu’n nun ndɛ mma wie’m be sunnzunnin Biblu’n nun ndɛ mma uflɛ wie mun yɛ be niannin ndɛ nga sran uflɛ mɔ be kunndɛli ninnge kunngba sɔ’n wie’n be klɛli’n. Blɛblɛblɛ, Biblu’n nun like suanfuɛ sɔ’m be wa wunnin Biblu’n nun ndɛ nanwlɛ m’ɔ kali bui bo afuɛ ya kpanngban’n.
5. ?Ngue ti yɛ be yili fluwa nɲa mɔ be flɛ be “Ɲanmiɛn i su ndɛ laa’n” mun ɔn?
5 Ninnge nga Biblu’n nun like suanfuɛ’m be wunnin be’n ti’n be wun bliblili be kpa. Sanngɛ b’a fɛmɛn i sɔ’n b’a tuman be wun. Afin be si kɛ i sɔ ndɛ nanwlɛ’n o Biblu’n nun titi. I ti’n b’a seman kɛ b’a wun like uflɛuflɛ kun. (1 Kor. 8:1) I li bɔbɔ’n, be yili fluwa nɲa mun yɛ be flɛli be kɛ The Old Theology (Ɲanmiɛn i su ndɛ laa’n). Be yili be naan sran’m be si ndɛ nanwlɛ ng’ɔ o Biblu’n nun’n. Fluwa nɲa sɔ’m be nun klikli’m be ukali sran mun naan be suan Biblu’n nun ndɛ’n. I liɛ’n bé kwlá kpálo “ato ndɛ ng’ɔ kacili sran’m be nzuɛn’n” yɛ bé sɔ́ ndɛ nanwlɛ nga Zezi nin i akoto’m be kle’n yɛle kɛ “Ɲanmiɛn i su ndɛ laa’n” nun.—The Old Theology, No. 1, Avrili 1889, bue 32.
6, 7. (a) ?Kɛ ɔ fɛ i afuɛ nga be flɛ i 1870 lele andɛ’n, ndɛ nanwlɛ benin yɛ Zoova i Lalofuɛ’m be sili be ɔ? (b) ?Ndɛ nanwlɛ benin yɛ amun bɔbɔ amun suannin m’ɔ yo amun fɛ ɔ?
6 Kɛ ɔ fɛ i afuɛ nga be flɛ i 1870 lele andɛ’n, ndɛ nanwlɛ fɛfɛ nga Zoova i Lalofuɛ’m b’a si be’n be sɔnnin kpa! * Kɛ e suan nanwlɛ ndɛ sɔ mun’n, nán sa nga be ju’n be su like ngbɛn sa yɛ e suan ɔn. Sanngɛ ninnge nga e suan’n, be uka e naan e nantilɛ’n w’a yo kpa w’a tra laa’n. Asa kusu’n, be yo maan e di aklunjuɛ yɛ e le like kun mɔ e fa e wla e gua su ɔ. Yɛ be uka e naan y’a kwla si e Zoova m’ɔ klo e’n, naan y’a wun i klun sa’n i wlɛ. Ninnge sɔ’m be yo maan e si Zezi yɛ like nga ti yɛ ɔ bali asiɛ’n su wa’n m’ɔ wuli’n, ɔ nin like ng’ɔ yo i andɛ’n e si be wie. Ndɛ nanwlɛ cinnjin sɔ’m be kle e like nga ti yɛ Ɲanmiɛn yaci sran’m be lɛ mɔ be wun ɲrɛnnɛn’n, ɔ nin like nga ti yɛ e wu’n. Be kle e wafa ng’ɔ fata kɛ e srɛ Ɲanmiɛn’n, ɔ nin like nga e ko yo naan y’a di aklunjuɛ sakpa’n.
7 Ɲanmiɛn ndɛ nga be kannin be mɔ be yoli “fiawa” lelele’n, mɔ be su kpɛn su mɛn i awieliɛ blɛ nga nun yɛ’n, siɛn’n e wun be wlɛ. (Dan. 12:9) Ndɛ sɔ’m be dan lika be o fluwa nga Matie nin Mark nin Lik yɛ Zan be klɛli’n ɔ nin Sa Nglo Yilɛ fluwa’n nun. Zoova yoli maan sa nga e ɲinma kwlá wunman be bɔbɔ’n e wun be wlɛ. Be nun wie yɛle Zezi i famiɛn bia i su sielɛ’n, ɔ nin alɛ ng’ɔ tɔli ɲanmiɛn su lɔ’n yɛ Satan i bo mɔ be kɛnnin i ɲanmiɛn su lɔ be yili i asiɛ’n su wa’n. (Ngl. 12:7-12) Asa ekun’n, Ɲanmiɛn yoli maan sa nga be ju mɔ e kwla wun be’n, e wun be wlɛ wie. Sa kɛ alɛ nin asiɛ m’ɔ keje’n nin tukpacɛ mun yɛ awe m’ɔ kpɛn’n sa’n, ɔ nin like nga ti yɛ sran’m be yo sa tɛtɛ mɔ i ti’n ‘lika’n w’a yo kekle’n,’ e wun be wlɛ.—2 Tim. 3:1-5; Lik 21:10, 11.
8. ?Sɛ e kwla wun ninnge mun naan e kwla ti ndɛ mun kɛ nga Zezi fa kannin’n sa’n, i sɔ’n fin wan?
8 Ndɛ nga Zezi kan kleli i sɔnnzɔnfuɛ mun’n, e wun kɛ ɔ ti e liɛ wie. Ɔ seli be kɛ: “Be nga be wun like nga an wun be yɛ’n, be liɛ su ti ye! Afin an nian, Nyanmiɛn nuan ijɔfuɛ nin famiɛn kpanngban be klo kɛ bé wún like nga an wun be yɛ’n, sanngɛ b’a wun-mɛn i, yɛ be klo kɛ bé tí ndɛ nga an ti be yɛ’n, sanngɛ b’a ti-man.” (Lik 10:23, 24) Ɲanmiɛn Zoova yɛ ɔ yo maan e kwla wun ninnge sɔ mun yɛ e kwla ti ndɛ sɔ mun ɔn. Kɛ Ɲanmiɛn fɛ i wawɛ’n uka e naan y’a wun ndɛ nanwlɛ’n i wlɛ’n, i sɔ’n yo e fɛ dan. (An kanngan Zan 16:7, 13 nun.) Maan ndɛ nanwlɛ’n ɔ yo e like nanndoliɛ tititi yɛ maan e uka e wiengu mun naan be si i wie!
“SRAN KPANNGBAN KPA” BE SƆ LIKE “SILƐ” KPAFUƐ’N NUN
9. ?Afuɛ 1881 nun’n, ngue yɛ Sasafuɛ Tranwlɛ’n nga be yili i Avrili nun’n, ɔ yiali sran’m be kɛ be yo ɔ?
9 Afuɛ nga be flɛ i 1881 nun’n, be yili Sasafuɛ Tranwlɛ’n kun. I nun’n, be flɛli ndɛ akpasua kun kɛ: “E kunndɛ jasin bofuɛ 1.000.” Kɛ ɔ́ yó sɔ’n nn be boli fluwa sɔ’n i yilɛ bo ɔ nin a diman afuɛ nɲɔn. Ndɛ sɔ’n nun’n be seli kɛ: “Be nga be kwla fa be blɛ’n i bue annzɛ i kpanngban kpa be fa di e Min’n i junman’n, e waan é klé be ajalɛ kun. [...] Yɛlɛ kɛ, kɛ amun sa kwla ju lɛ’n, amun ɔ klɔ kanngan nin klɔ dandan’m be su naan amun ko yo blɛ kwlaa nun jasin bofuɛ yɛle kɛ blɛ kwlaa nun Ɲanmiɛn ndɛ kanfuɛ. Lika kwlaa nun’n, amun kunndɛ Klistfuɛ nga Ɲanmiɛn ndɛ’n lo be’n, mɔ Ɲanmiɛn sulɛ’n ti be cinnjin kpa’n mɔ sanngɛ be siman nanwlɛ ndɛ’n. I sɔfuɛ mun’n, amun yo maan be si e Si Ɲanmiɛn i aklunye dan’n ɔ nin i ndɛ’n m’ɔ yo ɲɛnmɛn’n.”
10. ?Kɛ be yiali sran’m be kɛ be w’a kaci blɛ kwlaa nun jasin fɛ bofuɛ’n, ngue yɛ sran kpanngban be yoli ɔ?
10 Yialɛ sɔ mɔ Biblu’n nun like suanfuɛ’m be yiali sran mun’n, ɔ kle kɛ be si kɛ junman cinnjin kun m’ɔ fata kɛ Klistfuɛ kpa’m be di’n yɛle jasin fɛ’n i bolɛ’n. Kusu sran lele 1.000 m’ɔ́ bé yía be’n, ɔ sɔnnin dan. Afin blɛ sɔ nun’n, kɛ be yo be aɲia mun’n i bo tranfuɛ mun’n be fuanfuanman akpi kaan sa. Sanngɛ, be nga be kanngannin fluwa nɲa annzɛ Sasafuɛ Tranwlɛ’n nun’n be nun kpanngban be wunnin kɛ i nun ndɛ’n ti nanwlɛ yɛ be kplinnin yialɛ mɔ be yiali be’n su. I wie yɛle bian kun m’ɔ tran Angle’m be mɛn nun lɔ klɔ nga be flɛ i Lɔndri su’n i liɛ’n. Kɛ ɔ kanngannin Sasafuɛ Tranwlɛ’n kun nin fluwa pɛplɛpɛ kaan kun nun’n, afuɛ nga be flɛ i 1882 nun’n, ɔ klɛli i kɛ: “An yaci, amun kle min ndɛ nga n ko kɛn i jasin fɛ’n i bolɛ’n nun’n ɔ nin wafa nga n ko bo jasin’n, naan n kwla di Ɲanmiɛn i junman kpa sɔ’n kɛ ɔ fa klo’n sa.”
11, 12. (a) ?Ngue yɛ blɛ kwlaa nun jasin bofuɛ’m be kunndɛli ɔ? (b) ?Wafa sɛ yɛ blɛ kwlaa nun jasin bofuɛ’m be takali asɔnun uflɛ mun ɔn?
11 Afuɛ nga be flɛ i 1885 nun’n, Biblu’n nun like suanfuɛ nga be ti blɛ kwlaa nun jasin bofuɛ’n be ti sran kɔe 300. Like kunngba nga ti yɛ e bo jasin fɛ’n andɛ’n, i kunngba’n ti yɛ be yoli blɛ kwlaa nun jasin bofuɛ ɔ. Yɛle kɛ be kunndɛli kɛ bé yó naan sran’m be kaci Zezi Klist i sɔnnzɔnfuɛ. Sanngɛ wafa nga be dili be junman’n ɔ nin andɛ liɛ’n timan kun. Andɛ’n, e nin sran’m be tinuntinun yɛ e suan Biblu’n nun like ɔ. I sin e se be kɛ be bla aɲia’m be bo. Kɛ ɔ́ yó sɔ’n nn b’a dun mmua taka asɔnun mun. Laa liɛ’n, blɛ kwlaa nun jasin bofuɛ’m be fa fluwa man sran mun kpɛkun be yia be nga Ɲanmiɛn Ndɛ’n lo be’n be kwlaa likawlɛ yɛ be kle be Biblu’n nun like ɔ. I sɔfuɛ’m be kaci asɔnun bo kun. Laa’n be flɛ asɔnun sɔ’m be kɛ “klasi.”
12 I wie yɛle kɛ afuɛ nga be flɛ i 1907 nun’n, klɔ kun su’n, blɛ kwlaa nun jasin bofuɛ wie’m be kunndɛli be kwlaa nga be le fluwa L’Aurore du Millénium *. Sasafuɛ Tranwlɛ’n seli kɛ: “Be yiali be kwlaa nga [Ɲanmiɛn ndɛ’n lo be’n], be nun kun i awlo lɔ, Mɔnnɛn cɛn kun. Cɛn sɔ’n nun’n, blɛ kwlaa nun jasin bofuɛ kun ijɔli nzra nun. Ɔ kannin like nga Ɲanmiɛn sunnzunnin i klɔ sran’m be lika’n i ndɛ. Yɛ Mɔnnɛn cɛn ng’ɔ́ bɛ́ i sin’n, ɔ wlali be fanngan kɛ be yo aɲia sɔ’n titi.” Afuɛ nga be flɛ i 1911 nun’n, aniaan’m be kacili jasin fɛ’n i bolɛ’n i wun ajalɛ’n. Aniaan ablenun nin mɔcuɛ be tuli ajalɛ be ɔli Amlɛnkɛn mɛn’n nin Kanada mɛn’n be likalika wie’m be nun be ko ijɔli nzra nun. Sran kwlaa nga be trannin aɲia sɔ’m be bo mɔ ndɛ’n loli be’n, be klɛli be dunman nin be adrɛsi mun. I sin’n, be siesieli be akpasuaakpasua yɛ be yiali awlo wie’m be nun. I sɔ yɛ be yoli naan b’a taka asɔnun uflɛ mun ɔn. Afuɛ nga be flɛ i 1914 nun’n, Biblu’n nun like suanfuɛ’m be asɔnun nga be o mɛn wunmuan’n nun’n, be ti 1.200.
13. ?Ngue ti yɛ wafa nga jasin fɛ’n w’a tru’n ɔ ti abonuan ɔn?
13 Andɛ mɛn wunmuan nun’n, asɔnun’m be ti kɔe 109.400 yɛ aniaan nga be di atin bolɛ junman’n be ju 895.800. Be nga b’a sɔ like ‘silɛ’ kpafuɛ’n nun’n mɔ be nian su be nanti’n be fuanfuan akpinngbin mɔcuɛ. (An kanngan Ezai 60:22 nun.) * I sɔ liɛ’n ti abonuan, afin Zezi seli kɛ i dunman nun ti’n “sran’m bé kpɔ́” i sɔnnzɔnfuɛ mun. Ɔ kan guali su kɛ bé klé be yalɛ, bé wlá be bisua, naan bé kún be bɔbɔ. (Lik 21:12-17) Kannzɛ bɔbɔ Satan nin i mmusu mun yɛ sran kpanngban be kunndɛli kɛ Zoova i sufuɛ’m be yaci be junman’n i dilɛ’n, sanngɛ be te uka sran mun naan be kaci Zezi i sɔnnzɔnfuɛ yɛ be junman’n te kɔ i ɲrun titi. Andɛ’n, be bo jasin fɛ’n “mɛn wunmuan’n nun.” Maan ɔ yo lika ng’ɔ lo fiaan’n nun o, annzɛ ng’ɔ jɔ kɛ laglasi sa’n nun o, okaoka lika’m be nun o, aawlɛ flɛnnɛn’n nun o, klɔ dandan’m be su nin nanmue’m be nun o, be bo jasin fɛ’n. (Mat. 24:14) Sɛ ɔ ti kɛ Zoova nunman be sin’n nn be su kwlá dimɛn i sɔ junman’n.
ƝANMIƐN NDƐ’N I SIFUƐ’M B’A ‘UKA SU’
14. ?Wafa sɛ yɛ fluwa’m be yo maan sran kpanngban kpa be si Ɲanmiɛn ndɛ’n niɔn?
14 Like nga ti yɛ Ɲanmiɛn Ndɛ’n i sifuɛ’m b’a uka su’n yɛle jasin fɛ’n i bofuɛ mɔ b’a sɔn’n ɔ nin fluwa nga be yi be’n mɔ b’a uka su’n. Afuɛ nga be flɛ i 1879 Zuie anglo nun’n, Biblu’n nun like suanfuɛ’m be yili fluwa ng’ɔ o yɛ’n i klikli’n. Blɛ sɔ’n nun’n, be flɛ i kɛ Le Phare de la Tour de Sion et Messager de la Présence de Christ. Biblu’n nun like suanfuɛ’m be tuali fluwa yifuɛ wie’m be kalɛ yɛ be yili fluwa sɔ’n Angle aniɛn’n nun ɔn. Be yili fluwa 6.000. Charles Taze Russell m’ɔ le afuɛ 27 blɛ sɔ’n nun’n yɛ be sieli i kɛ ndɛ nga bé fíte fluwa nga bé yí be’n nun’n, ɔ kpa be ɔ. Aniaan nnun mɔ b’a tin Ɲanmiɛn sulɛ’n nun kpa’n be klɛli i nun ndɛ’n wie titi. Andɛ’n Sasafuɛ Tranwlɛ’n fite aniɛn 195 nun. Asiɛ wunmuan’n su’n wafa nga w’a tru’n i wunsu fluwa uflɛ fi jumɛn i nun. Anglo kwlaa nun’n be yi 42.182.000. Fluwa uflɛ ng’ɔ mɛntɛn i’n yɛle Réveillez-vous ! Be yi 41.042.000 anglo kwlaa nun aniɛn 84 nun. Asa kusu’n, be yi Biblu nin fluwa uflɛ ko ju akpinngbin 100 afuɛ nuan kwlaa.
15. ?Sika nga e fa yi e fluwa mun’n, nin yɛ e ɲɛn i ɔ?
15 Sran’m be klunklo sika nga be man’n yɛ e fa di junman dan sɔ’n niɔn. (An kanngan Matie 10:8 nun.) Sran uflɛ nga be yi fluwa wie’n mɔ be si mannzin nin fluwa yilɛ wun ninnge’m be gua’n, i sɔ liɛ’n bo be nuan. Betɛlifuɛ kun m’ɔ ko toto fluwa yilɛ i wun ninnge man Betɛli’n, ɔ seli kɛ: “Aata difuɛ dandan nga be w’a nian e junman’n, kɛ be wun ajulisu mannzin kpakpa nga e le be’n mɔ be kwla yi fluwa kpanngban ndɛndɛ kpa’n, mɔ be wun kɛ sran’m be klunklo sika yɛ e fa di junman’n, ɔ bo be nuan. Ng’ɔ bo be nuan ekun’n yɛle kɛ junman difuɛ’m be ti gbanflɛn nin talua yɛ be di junman aklunjuɛ nun’n.”
ASIƐ’N WUNMUAN’N SU SRAN’M BÉ SÍ ƝANMIƐN LELELE
16. ?Ngue ti yɛ sran kpanngban b’a ‘si’ Ɲanmiɛn i kpa ɔ?
16 Sɛ sran kpanngban b’a ‘si’ Ɲanmiɛn i kpa’n, ɔ le bo. Yɛle kɛ Ɲanmiɛn “klo kɛ ɔ́ dé sran’m be kwlaa naan be wun sa ng’ɔ ti nanwlɛ’n i wlɛ kpa.” (1 Tim. 2:3, 4) Zoova klo kɛ sran’m be si ndɛ nanwlɛ’n naan be su i kɛ ɔ nin fata’n sa naan ɔ yra be su. Jasin fɛ’n mɔ Zoova maan e bo’n ti’n, Zoova yia Klistfuɛ nanwlɛfuɛ nga be kpali be sieli i ngunmin’n be onga’m be nuan. Asa ekun’n, ɔ su yiayia “sran kpanngban kpa” be nuan wie. “Sran sɔ’m be fin mɛnmɛn’n kwlaa nin nvle-nvle’n kwlaa nun, sran wafa-wafa’n kwlaa o be nun, be ijɔ aniɛn wafa-wafa’n kwlaa.” Be wla o su kɛ bé trán anannganman nguan nun asiɛ’n su wa.—Ngl. 7:9.
17. ?Ngue yɛ Ɲanmiɛn i sufuɛ kpa’m be sɔnlɛ mɔ b’a sɔn’n, ɔ yi i nglo ɔ?
17 Zoova i sufuɛ nga be o asiɛ’n wunmuan’n su’n b’a uka su kpa afuɛ 130 nga’m be nun. Sɔnlɛ mɔ b’a sɔn sɔ’n, ɔ yi i nglo weiin kɛ Ɲanmiɛn nin Zezi Klist m’ɔ kpɛli i kɛ ɔ yo Famiɛn’n, be nin Zoova i sufuɛ’m be o nun naan be kle be atin, be sasa be, be siesie be junman’n, yɛ be kle be like. Sɔnlɛ mɔ b’a sɔn sɔ’n, ɔ yi i nglo ekun kɛ kasiɛ nga Zoova boli be’n, saan bé kpɛ́n su. I wie yɛle kɛ ‘kɛ jenvie’n i nzue’n ɔ kata i bo lɔ’n su’n ju’ sa’n “asiɛ’n wunmuan’n su sran’m bé sí Anannganman lelele.” (Eza. 11:9) Kɛ ɔ ko yo sɔ’n, alaje nga sran’m bé dí’n amun bu i sin kan be nian!
[Ja ngua lɛ ndɛ mun]
^ Sɛ amun nian DVD nga mun’n, amún sí sa sɔ’m be nun kpa ekun. Be yɛ: Les Témoins de Jéhovah — la foi en action, 1re partie : la sortie des ténèbres ɔ nin Les Témoins de Jéhovah — la foi en action, 2e partie : que brille la lumière !
^ I sin’n be wa flɛli i kɛ Études des Écritures.
^ Amun nian fluwa La prophétie d’Isaïe, lumière pour tous les humains II i bue 320 nun.
[Kosan mun]
[Foto, bue 14]
Biblu’n nun like suanfuɛ klikli’m be yoli aenvuɛfuɛ yɛ be kloli kpa kɛ bé yó Ɲanmiɛn i klun sa’n.
[Foto, bue 15]
E ɲin nga e mian naan sran kpanngban b’a ‘si’ Ɲanmiɛn i kpa’n, Zoova klun jɔ su.
