?Sran kun o lɛ m’ɔ tie e srɛlɛ mun ɔn?
?Sran kun o lɛ m’ɔ tie e srɛlɛ mun ɔn?
“Laa n lafiman su kpa kɛ Ɲanmiɛn o lɛ. Sanngɛ, nja, ɔ ju wie’n n srɛ Ɲanmiɛn. Sɛ ɔ o lɛ sakpa naan ɔ tie o, annzɛ ɔ tieman o, n wunmɛn i wlɛ. Kusu maan n di min wun nanwlɛ. Kɛ ń srɛ́’n, n yra min nuan kɛ sran wie tie. Blɛ sɔ’n nun’n, n diman aklunjuɛ yɛ n wunman sa ti mɔ n wo asiɛ’n su ɔ. Ɲanmiɛn i su lafilɛ’n kunnin min srɛ afin n seli min wun kɛ be nga be kwlaman be wun uka’n be yɛ be lafi Ɲanmiɛn su ɔ.”—PATRISIA, * Ɔ FIN IRLANDI NVLE’N NUN.
?AMUN wun yo amun kɛ Patrisia sa? ?Amun lafiman su kpa kɛ Ɲanmiɛn o lɛ, sanngɛ amun blu su be srɛ i? Sɛ ɔ ti sɔ’n, maan amun si kɛ nán amun ngunmin yɛ amun wun yo amun sɔ ɔ. Amun fa amun ɲin sie sa nga’m be su be nian.
◼ Angle’m be lɔ’n, be usali sran 2.200 be kosan. Be nun 484 cɛ yɛ be lafi su kɛ Ɲanmiɛn kun o lɛ naan ɔ boli mɛn’n yɛ ɔ tie e srɛlɛ mun ɔn. Sanngɛ be nga be usali be kosan sɔ’n, be nun 1.210 be srɛ Ɲanmiɛn. Sɛ be yoman sɔ titi’n sanngɛ cɛn kunngun be yo sɔ.
◼ Be usali sran 10.000 be kosan wie. Be kpali be nvlenvle fanunfanun nun. Be nunfuɛ nga be waan be lafiman Ɲanmiɛn su mlɔnmlɔn’n, sɛ e bu be nun akpasua ya’n, be nun akpasua kɔe 30 be srɛ Ɲanmiɛn.
?Ngue ti yɛ be akunndan’n ti nɲɔnnɲɔn ɔn?
Angle bian kun m’ɔ suan Allan kannin kɛ: “Laa’n, n kɛn i titi kɛ n lafiman Ɲanmiɛn su afin m bu i kɛ sran’m be sielɛ nin sika kunndɛlɛ ti yɛ be kpɛli Ɲanmiɛn sulɛ ba ɔ. Yɛ n seli min wun kɛ sɛ Ɲanmiɛn kun o lɛ’n nn sran lufle bulɛ’n su sɔnman ngboko sa. Sanngɛ ɔ nin i sɔ ngba’n, ɔ ju wie’n, n tran diin n kan ndɛ n kle like wie. Yɛ n usa min wun kɛ: ‘?Ɔ yo sɛ yɛ n wo mɛn’n nun ɔn?’”
Be nga be wun yo be sɔ’n, ɔ le be nun kun nin i like liɛ nga ti yɛ ɔ lafiman su kpa kɛ sran kun o lɛ m’ɔ tɛ e srɛlɛ’m be su’n. Sanngɛ blɛ sunman nun’n, ɔ fin kosan wie mɔ b’a kwlá wunman be su tɛwlɛ’n. Kosan sɔ’m be nun wie mun yɛ:
◼ ?Sran kun yɛ ɔ yili like kwlaa ɔ?
◼ ?Ngue ti yɛ Ɲanmiɛn sulɛ wafa’m be kpɛ sa tɛ yolɛ ba ngboko sɔ ɔ?
◼ ?Ngue ti yɛ Ɲanmiɛn yaci sran’m be lɛ maan be wun ɲrɛnnɛn ɔn?
?Sɛ amun kwla si kosan sɔ’m be su tɛlɛ’n, amún kwlá láfi su kɛ siɛn’n, sran kun tie amun srɛlɛ’n?
[Ja ngua lɛ ndɛ’n]
^ Ndɛ nga nin nga bé bɛ́ i sin lɔ’n be nun’n, be kacili dunman wie mun.
