Maan e suan Ɲanmiɛn Ndɛ’n nun like

?Wafa sɛ yɛ aolia nun sran’m be sa o ninnge nga e yo’n nun ɔn?

Ndɛ nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle amun bɔbɔ amun Biblu’n i lika nga amun kwla kanngan nun naan amun a wun be su tɛlɛ’n. Zoova i Lalofuɛ’m be klo kɛ be nin amun kókó ndɛ sɔ’m be su yalɛ.

1. ?Wan yɛle anzi mun?

Anzi’m be ti aolia nun sran. Be tran ɲanmiɛn su lɔ. Be le ɲrun tra klɔ sran mun. Ɲanmiɛn Kpli bɔbɔ m’ɔ ti aolia nun sran wie’n, ɔ yili anzi mun lele naan w’a yi asiɛ’n. (Zɔb 38:4, 7; Matie 18:10) Zoova yoli maan anzi ndɛnmanfuɛ akpinngbin kpanngban be sin yiɛ i kukuku.​—An kanngan Jue Mun 103:20, 21 nin Sa Nglo Yilɛ 5:11 nun.

2. ?Anzi’m be uka klɔ sran mun?

Anzi’m be ukali Lɔtu m’ɔ ti sran kpa’n. Klɔ nga Lɔtu tran su’n i sufuɛ’m be sa tɛtɛ yolɛ’n ti’n, Ɲanmiɛn fali ajalɛ kɛ ɔ́ núnnún i. Anzi nɲɔn be seli Lɔtu nin i awlobofuɛ’m be kɛ be wanndi. Sran wie’m be buli anzi’m be ndɛ’n i aɔwi, ɔ maan b’a faman su. Sanngɛ Lɔtu nin i mma mmla mun be fiteli nun, afin be fali ndɛ nga Ɲanmiɛn sunmɛnnin i anzi’m be kɛ be w’a kan’n su.​—An kanngan Bo Bolɛ 19:1, 13-17, 26 nun.

Biblu’n kle kɛ andɛ’n anzi’m be uka sran mun wie. Yɛle kɛ be nga be nian nun be bo Ɲanmiɛn Sielɛ’n i jasin fɛ’n, anzi’m be bo be ɲrun atin. (Matie 24:14) Jasin fɛ nga e bo’n, ɔ ti sran’m be su nun wlalɛ wie. Ndɛ nga anzi’m be kan kleli Lɔtu’n w’a yoman aɔwi dilɛ ndɛ. I kunngba’n, jasin fɛ’n nga e bo’n ɔ timan aɔwi dilɛ. Ɲanmiɛn yɛ ɔ sin anzi’m be lika tike ndɛ sɔ’m be su ɔ.​—An kanngan Sa Nglo Yilɛ 1:1 nin Ng 14:6, 7 nun.

Blɛ kekle nun’n, Ɲanmiɛn kwla sunmɛn i anzi mun naan be wla e fanngan. Ɔ sunmɛnnin i anzi kun maan ɔ wa wlali Zezi i fanngan.​—An kanngan Lik 22:41-43 nun.

Ɔ ka kaan sa’n, Ɲanmiɛn wá súnmɛn i anzi mun naan be w’a di junman wafa uflɛ kun. Yɛle kɛ ɔ́ súnman be naan be w’a nunnun klunwifuɛ nga be fa ɲrɛnnɛn yi i sran’m be su’n. I sɔ’n yó maan klɔ sran’m bé dí alaje.—An kanngan 2 Tɛsalonikfuɛ Mun 1:6-8 nun.

  3. ?Wafa sɛ yɛ mmusu’m be sa o ninnge nga e yo’n nun ɔn?

Asiɛ’n sufuɛ kpanngban be ɲin w’a yiman Ɲanmiɛn. Be yoli sa tɛtɛ. I kunngba’n wie yɛ anzi kpanngban be yoli ɔ. Be yoli ɲin kekle Ɲanmiɛn su. (2 Piɛr 2:4) Be flɛ anzi ɲin keklefuɛ’m be kɛ mmusu. Be si’n yɛle Satan. Satan nin i mmusu’m be laka klɔ sran mun.​—An kanngan Sa Nglo Yilɛ 12:9 nun.

Satan sin aata dilɛ ng’ɔ timan kpa’n, ɔ nin klɔ sran’m be awa mun yɛ Ɲanmiɛn sulɛ wafa nga be timan su’n be lika naan sran’m be kaci be sin be si Ɲanmiɛn. Ɔ maan sran lufle bulɛ nin nzaje sa mun yɛ ɲrɛnnɛn nga ɔ o klɔ sran’m be su’n, be fin Satan.​—An kanngan 1 Zan 5:19 nun.

4. ?Wafa sɛ yɛ mmusu’m be laka sran mun ɔn?

Satan lakali sran kpanngban kɛ kɛ sran’m be wu’n be kaci aolia nun sran naan be nin be kwla ijɔ. Biblu’n i liɛ’n i waan be nga be wuli’n be kwlá yoman like fi. (Akunndanfuɛ’n 9:5) Sanngɛ kpɛ sunman’n mmusu’m be sɔnnzɔn sran’m be awlɛn su sran nga be wuli’n be nnɛn’n. Be yo sɔ fa laka be. (Ezai 8:19) Be sin wunnzue yifuɛ nin be nga be waan be nin wunmiɛn mun ijɔ’n, ɔ nin be nga be nian nglo lɔ ninnge mun be fa kan ndɛ’n, be lika be laka sran wie mun. Ɲanmiɛn Ndɛ’n wla e su nun kɛ nán e yo i sɔ ninnge mun. Ɔ maan sɛ e le like wie mɔ mmusu’m be sa o nun’n maan e yi i blo.​—An kanngan Mmla’n 18:10, 11 ɔ nin Sa Nga Be Yoli’n 19:19 nun.

Sɛ e klo Zoova’n, ɔ nunman nun kɛ srɛ kun e mmusu’m be wun. Kɛ e suan Ɲanmiɛn Ndɛ’n nun like mɔ e yo like nga i waan e yo’n, nn e su jran mmusu’m be si Satan ɲrun kekle yɛ e su mantan Ɲanmiɛn. Zoova i tinmin’n tra mmusu’m be liɛ’n fatifati. Sɛ e mian ukalɛ wun’n, Ɲanmiɛn i anzi mɔ be nin i nanti ndɛnman su’n, be kwla wla e fanngan.​—An kanngan Jue Mun 34:8 nin Zak 4:7, 8 nun.

Sɛ amun kunndɛ kɛ amún sí nun ekun’n, an nian fluwa ?Ngue like yɛ biblu’n kle i sakpasakpa ɔ? i ndɛ tre 10 nun. Zoova i Lalofuɛ mun yɛ be yili ɔ.