“Kle min ɔ klun sa’n i yolɛ’n”
“Kle min ɔ klun sa’n i yolɛ’n”
“Kle min ɔ klun sa’n i yolɛ’n. Wɔ yɛ a ti min Nyanmiɛn nin-ɔn.”—JUE. 143:10.
DƐ CINNJIN MUN
?Sa benin mun yɛ be kle kɛ Davidi kunndɛli kɛ Zoova yɛ ɔ kle i atin ɔn?
?Ngue yɛ ɔ ukali Davidi naan w’a wun Ɲanmiɛn i klun sa’n i wlɛ ɔ?
?Ngue yɛ é yó naan Ɲanmiɛn i klun w’a jɔ e wun titi ɔ?
1, 2. ?Ka naan y’a fa ajalɛ’n, ngue ti yɛ ɔ ti kpa man e kɛ e dun mmua bu Ɲanmiɛn i akunndan ɔn? ?I lɛ’n nun’n, wafa sɛ yɛ Famiɛn Davidi i ajalɛ’n kwla uka e ɔ?
WIENUN ɔn, e o okaoka lika kun nun e su kɔ lika, kpɛkun y’a ju anngɔnda kun su. ?Atin beninfuɛ’n yɛ é fá ɔ? Sɛ e waan é wún atin nga é fá’n, e kwla fu yɛbuɛ tanda kun su naan y’a wun kan atin nɲɔn sɔ’m be kɔ’n. I kunngba’n, sɛ e wo ajalɛ cinnjin kpa wie’m be falɛ su’n, e kwla yo sɔ wie. Yɛle kɛ sɛ e wun ninnge mun kɛ Zoova m’ɔ o nglo lɔ’n wun be sa’n, i sɔ’n úka e naan atin nga ɔ kunndɛ kɛ e fa’n ‘y’a fa su.’—Eza. 30:21.
2 Kɛ bé yó like mɔ be bu Ɲanmiɛn i akunndan’n, i lɛ nun’n laa Izraɛli Famiɛn Davidi kleli e ajalɛ kpa. Sɛ é kwlá sé’n, ajalɛ kwlaa ng’ɔ fali’n nun’n, ɔ dun mmua buli Ɲanmiɛn i akunndan ka. Davidi i Ɲanmiɛn Zoova klolɛ’n w’a yoman kun nin bue. Siɛn’n, maan e fa e ɲin e sie i sa wie mɔ be tɔli i su mɔ e kwla fa tu e wun fɔ’n be su.—1 Fam. 11:4.
DAVIDI BULI ZOOVA I DUNMAN’N LIKE DAN
3, 4. (a) ?Ngue yɛ ɔ suli Davidi bo m’ɔ nin Goliati be ko kunnin ɔn? (b) ?Wafa sɛ yɛ ɔ buli Ɲanmiɛn i dunman’n niɔn?
3 Amun e fa e ɲin e sie blɛ nga Davidi jasoli kɛ ɔ nin Filistifuɛ’m be safuɲrɛn’n m’ɔ suan Goliati’n bé kó kún’n, i su. ?Ngue su yɛ ɔ lafi mɔ i ti yɛ i waan ɔ nin blamiɛn mɔ i tɛnndɛn fuanfuan mɛtri nsan’n, mɔ alɛ ninnge wo i sa nun’n, bé kó kún’n niɔn? (1 Sam. 17:4) ?I awlɛn m’ɔ sɔ’n ti ɔ? ?Annzɛ Ɲanmiɛn m’ɔ lafi i su’n ti ɔ? I yo, sa sɔ’n i yolɛ’n nun’n, Davidi i awlɛn m’ɔ sɔ’n, ɔ nin i Ɲanmiɛn sulafilɛ’n be yoli cinnjin sɔ. Sanngɛ i ɲin m’ɔ yili Zoova’n nin i dunman m’ɔ buli i like dan’n be yɛ be suli i bo maan ɔ nin blamiɛn sɔ’n be ko blali nun’n niɔn. I ti yɛ Davidi fa ya usali kɛ: “?Nzu sran yɛlɛ Filistifuɛ bɔ b’a wlɛ-mɛn i klɛn’n b’ɔ jaso kpɛ Nyanmiɛn Kpli b’ɔ lafi-man’n i alɛ kunfuɛ’m be nzowa sɔ ɔ?”—1 Sam. 17:26.
4 Blɛ sɔ nun’n nn Davidi ti gbanflɛn kan. Kɛ ɔ nin Goliati be yiali nun’n, ɔ seli i kɛ: “A nin min bá kunlɛ-ɔ, tokofi nin cua, ɔ nin ta yɛ a fa ba-a. N liɛ’n, Anannganman b’ɔ sie mɛn wunmuan’n, i dunman’n yɛ n fa ba-a. Anannganman b’ɔ ti Izraɛl’n i ti alɛ kunfuɛ’n bɔ a kpɛli i nzowa’n, i dunman’n yɛ n fa ba-a.” (1 Sam. 17:45) Ɲanmiɛn mɔ Davidi lafili i su ti’n, i yɛbuɛ kunngba cɛ m’ɔ toli’n, ɔ ko kunnin Filistifuɛ’m be safuɲrɛn’n. Nán sa kunngba sɔ’n nun yɛ Davidi kleli kɛ ɔ lafi Zoova su naan ɔ bu i dunman’n i like dan ɔn. Sanngɛ ɔ yoli sɔ blɛ kwlaa nun. I sɔ’n ti’n, ɔ tinnin su kpa seli i niaan Izraɛlifuɛ mun kɛ be fa Ɲanmiɛn dunman’n be ‘fa di be nuan.’—An kanngan 1 Be Nyoliɛ 16:8-10 nun.
5. ?Sa benin yɛ ɔ kwla kle e yalɛ kɛ finfin yolɛ mɔ Goliati yoli Izraɛlifuɛ mun sa’n niɔn?
5 ?Yɛ e li? ?E fa e Ɲanmiɛn Zoova e di e nuan? (Zer. 9:23) ?Kɛ e mantanfuɛ mun, annzɛ be nga e nin be e di junman’n, annzɛ e wiengu suklu ba mun, annzɛ e osufuɛ’m bé kán Zoova i wun ndɛ tɛ annzɛ bé yó i lalofuɛ’m be finfin’n, ngue yɛ e yo ɔ? ?Kɛ bé sáci Zoova i dunman’n, e lafi i su yɛ e jrɛn i sin? I yo, ɔ ti su kɛ “ɔ lɛ blɛ kun bɔ be fa muan be nuan-an,” sanngɛ ɔ nin i fataman kɛ Zoova i Lalofuɛ nin Zezi i sɔnnzɔnfuɛ mɔ e ti’n, be yo e ɲannzuɛn. (Aku. 3:1, 7; Mar. 8:38) Sɛ i li bɔbɔ ɔ fata kɛ e ɲin yi be nga be kpalo e nuan’n naan e nin be ijɔ amanniɛn su’n, sanngɛ nán e yo kɛ Izraɛlifuɛ mɔ kɛ be tili Goliati i ndɛ’n ‘be usuli, be wieli wu mlɔnmlɔnmlɔn’n’ sa. (1 Sam. 17:11) I ti’n, like nga e ko yo naan sran’m b’a yoman Zoova i dunman’n i finfin kun’n, maan e jaso waka e yo. E kunndɛ kɛ é úka sran mun naan be si Zoova i su nanwlɛ ndɛ’n. I sɔ ti’n, maan e mian e ɲin e fɛ i Ndɛ mɔ be klɛli mannin e’n, e fa uka be naan b’a wun i wlɛ kɛ Ɲanmiɛn mantanlɛ’n ti cinnjin.—Zak 4:8.
6. ?Like nga ti yɛ Davidi fali ajalɛ kɛ ɔ nin Goliati bé kó kún’n, yɛle benin? ?Yɛ ngue yɛ ɔ fata kɛ ɔ yo e cinnjin tra like kwlaa ɔ?
6 Davidi nin Goliati be ndɛ sɔ’n man e afɔtuɛ cinnjin kpa kun ekun. Kɛ Davidi wanndi ɔli alɛ kunwlɛ lɔ’n, ɔ usali kɛ: “?Amun waan sran ng’ɔ kun Filistifuɛ sɔ’n naan ɔ yi nzowa ng’ɔ kpɛli Izraɛl’n mɛn i’n, bé mɛ́n i ngue?” Be nga be jin lɛ’n be kannin ndɛ kunngba nga be dun mmua kannin’n flannin nun seli kɛ: “Sran ng’ɔ kun [Goliati’n], famiɛn’n maan ɔ́ nyɛ́n i wun, ɔ́ fɛ́ i wa bla’n mɛ́n i kɛ ɔ jɛ i.” (1 Sam. 17:25-27) Sanngɛ nán Davidi i wun ɲanlɛ’n yɛ ɔ ti i cinnjin ɔn. Like cinnjin kpa kun yɛ ɔ kunndɛ kɛ ɔ́ yó ɔ. Ɔ kunndɛ kɛ ɔ́ mánmán Ɲanmiɛn Kpli. (An kanngan 1 Samiɛl 17:46, 47 nun.) ?Yɛ e li? ?Like nga e kunndɛ’n yɛle e wun ɲanlɛ, nin mɛn nga nun sran dan yolɛ naan y’a ɲan dunman dan? Davidi i ajalɛ’n su yɛ ɔ fata kɛ e fa ɔ. Ɔ toli jue seli kɛ: “Amun uka min maan e manman Anannganman. Amun maan e bo yo kun naan e yi i ayɛ.” (Jue. 34:4) I sɔ’n ti’n, maan e lafi Ɲanmiɛn su, e bu i dunman’n like dan yɛ e fa dun mmua e bɔbɔ e dunman liɛ’n i ɲrun.—Zan 12:28.
7. ?Ngue yɛ ɔ́ úka e naan y’a lafi Ɲanmiɛn su kpa naan y’a kwla bo jasin fɛ’n y’a kle be nga be kpalo e nuan’n niɔn?
7 Sɛ Davidi mɔ blɛ sɔ’n nun’n ɔ ti gbanflɛn kan’n w’a lafiman Zoova su kpa’n, nn w’a kwlá trɛmɛn i awlɛn naan ɔ nin Goliati b’a ko jran b’a kun. Like kun nga ɔ ukali Davidi naan w’a lafi Ɲanmiɛn su kpa’n yɛle kɛ, kɛ ɔ́ tɛ́ i bua mun’n, Ɲanmiɛn su yɛ ɔ fɛ i wla’n guali ɔ. (1 Sam. 17:34-37) E kusu, ɔ fata kɛ e lafi Ɲanmiɛn su kpa. I liɛ’n, sɛ be kpalo e nuan bɔbɔ’n, e kwla bo jasin fɛ’n e kɔ e ɲrun titi. Sɛ e ninnge nga e yo be aliɛ ba kwlaa nun’n be nun’n, e fa e wla e gua Ɲanmiɛn su’n, yɛ e Ɲanmiɛn sulafilɛ’n ɔ́ kwlá táka kpa ɔ. I wie yɛle kɛ sɛ e o loto wie nun e su kɔ lika’n, e kwla bo jasin fɛ’n e kle be nga be ti e wun lɛ’n. ?Yɛ kɛ e bo awloawlo’m be nun jasin fɛ’n mɔ e nin sran wie mun e yia atin’n nun’n nin? ?Sɛ e bo jasin fɛ’n e kle be wie’n, ɔ timan kpa?—Yol. 20:20, 21.
DAVIDI I ƝIN TRANNIN ZOOVA SIN
8, 9. ?Davidi nin Famiɛn Saili be nantilɛ’n nun’n, wafa sɛ yɛ ɔ kleli kɛ ɔ bu Zoova klun sa’n i akunndan ɔn?
8 Like nga ɔ kle ekun kɛ Davidi lafili Zoova su’n, yɛle wafa nga ɔ buli Saili m’ɔ ti Izraɛli famiɛn klikli’n i sran’n. Amun bɔbɔ an nian. Saili i ɲin cili Davidi. Ɔ maan i waan ɔ́ kún i. Ɔ toli Davidi i wun cua naan ɔ sɛn i bo nun fiti talɛ’n. Ɔ yoli i sɔ kpɛ nsan. Sanngɛ Davidi ciɛli i wun naan cua’n w’a sin w’a ko kplan talɛ’n nun bi. I kwlaa sɔ’n, Davidi w’a kunndɛman kɛ ɔ́ yí mɛ́n i. I agualiɛ su’n, ɔ wanndili Saili. (1 Sam. 18:7-11; 19:10) Kɛ ɔ yoli sɔ’n, Saili fali Izraɛli sonja kpakpa’m be nun 3.000. Yɛ ɔ nin be ɔli Davidi i kunndɛlɛ aawlɛ flɛnnɛn’n nun lɔ ɔ. (1 Sam. 24:3) Be kunndɛli i lele. Kpɛkun cɛn kun’n, Saili w’a ko wlu yɛbuɛ buɛ kun nun. Sanngɛ nn ɔ siman kɛ i nun lɔ yɛ Davidi nin i sran’m be fia ɔ. I lɛ nun’n, sɛ Davidi waan ɔ́ kún i kpɔfuɛ sɔ’n lɛ’n, nn ɔ kunnin i. ?Afin Ɲanmiɛn bɔbɔ w’a seman kɛ i yɛ ɔ́ sín Saili i osu Izraɛli famiɛn bia’n su ɔ? (1 Sam. 16:1, 13) Kɛ ɔ yoli sɔ’n, sɛ Davidi fali i sran’m be ndɛ’n su’n nn ɔ kunnin famiɛn’n. Sanngɛ ɔ seli kɛ: “?Anannganman i sran b’ɔ sieli i’n b’ɔ ti min min’n yɛ m bɔbɔ ń kún i ɔ? N sa su kan-man Anannganman i sran’n mlɔnmlɔn.” (An kanngan 1 Samiɛl 24:4-7 nun.) Yɛle kɛ Saili te yo famiɛn. Yɛ Ɲanmiɛn yɛ ɔ sieli i sɔ ɔ. Ɔ maan kɛ mɔ Zoova bɔbɔ nin a yimɛn i lɛ’n, Davidi kunndɛman kɛ ɔ́ dé famiɛn bia’n Saili i sa nun. Kɛ cɛn sɔ nun’n, Davidi kpɛli Saili tralɛ’n i nuan njɔlɛ’n m’ɔ w’a kunmɛn i’n, ɔ yili i nglo kɛ ɔ kunndɛman kɛ ɔ́ yó Saili i tɛ.—1 Sam. 24:12.
9 Blɛ kun ekun nun’n, Davidi kleli kɛ i ɲin yi Ɲanmiɛn i sran m’ɔ sieli i famiɛn’n. Blɛ sɔ nun’n, Davidi nin Abisai be ɔli Saili i ngblaliɛ’n nun lɔ. Bé jú lɔ ɔ, Saili su lafi. Abisai seli Davidi kɛ Ɲanmiɛn w’a fɛ i kpɔfuɛ’n w’a wlɛ i sa nun. Yɛ ɔ srɛli Davidi kɛ ɔ mɛn i atin naan ɔ fɛ i cua’n fa kplan Saili i ti’n nun kpɛ kunngba cɛ naan ɔ wie. Sanngɛ Davidi w’a kplinman su. Kɛ ɔ yoli sɔ’n, Davidi nin Saili b’a yiaman nun kun. (1 Sam. 26:8-11) Kɛ mɔ Davidi kunndɛli titi kɛ Ɲanmiɛn yɛ ɔ kle i atin’n ti’n, kɛ Abisai suli i bo kɛ ɔ yo sa tɛ’n, i akunndan’n w’a yoman nɲɔnnɲɔn. Ɔ jrannin kekle yoli Zoova klun sa.
10. ?Sa benin yɛ ɔ kwla yo kekle man e ɔ? ?Yɛ wafa sɛ yɛ é kwlá jrɛ́n i ɲrun kpa ɔ?
10 E kusu sa wie nun’n, kɛ ɔ yo naan e wiengu’m be jran e sin Zoova klun sa yolɛ’n nun’n, be su e bo kɛ e bu akunndan nga be bu’n wie. Wie liɛ bɔbɔ’n, kɛ Abisai fa yoli’n sa’n, ajalɛ nga Ɲanmiɛn waan e fa’n, be kunndɛman kɛ e bu i lifuɛ’n i akunndan. Sanngɛ like nga be se e kɛ e yo’n, yɛ be kunndɛ kɛ e ka lɛ e yo ɔ. Kɛ ɔ ko yo naan y’a kwla jran kekle’n, ɔ ti cinnjin kɛ e wun wafa nga Zoova bu sa’m be wlɛ weiin. Kpɛkun maan e jran su kpa kɛ é nánti i atin’n su.
11. Ɲanmiɛn i klun sa yolɛ’n yoli Davidi i cinnjin kpa. ?Wafa sɛ yɛ e kwla niɛn i liɛ’n su ɔ?
11 Davidi srɛli Ɲanmiɛn Zoova seli kɛ: “Kle min ɔ klun sa’n i yolɛ’n.” (An kanngan Jue Mun 143:5, 8, 10 nun.) Davidi w’a lafiman i bɔbɔ i akunndan liɛ’n su, yɛ w’a faman sran uflɛ ndɛ liɛ’n su. Sanngɛ ɔ yoli i cinnjin kɛ Ɲanmiɛn kle i atin. Ɔ ‘buli sa nga Zoova yoli be’n be akunndan, ɔ buli be akunndan kpa.’ E kusu, sɛ e fa e ti e wlɛ i Ɲanmiɛn Ndɛ’n i suanlɛ nun’n, yɛ i nun sa kpanngban nga be yi wafa nga Zoova nin klɔ sran’m be nantili’n i nglo’n, sɛ e bu be su akunndan’n, é kwlá wún Ɲanmiɛn i klun sa’n i wlɛ wie.
DAVIDI WUNNIN MOIZI MMLA’N I WLƐ KPA
12, 13. ?Ngue ti yɛ Davidi guali nzue mɔ i sonja nsan mun be ko sa blɛli i’n i ase ɔ?
12 Wafa nga Davidi fa wunnin Moizi Mmla’n i wlɛ kpa’n, ɔ nin wafa nga i su falɛ’n loli i’n, be yo ɲɛnmɛn. Ɔ fata kɛ e nian su wie. Kɛ Davidi seli kɛ ɔ́ nɔ́n “nzue gbo ng’ɔ o Bɛtleɛm anuan’n nun lɔ’n nun nzue’n,” amun nian sa nga ɔ juli’n. Kɛ ɔ́ yó sɔ’n, nn Filistifuɛ’m b’a utu Bɛtleɛmu klɔ’n. Sanngɛ Davidi i sonja kpakpa nsan be fali wue kekle wluli lɔ ko sali gbo’n nun nzue’n blɛli i. Sanngɛ “David waan ɔ nɔn-man. Ɔ guɛli i ase mannin Anannganman.” ?Ngue ti ɔ? Davidi yiyili nun. I waan: “Min Nyanmiɛn’n ti n yo sa nga-a, ɔ yo-man ye. Sɛ n nɔn nzue nga’n, wuun ɔ ti kɛ be nga be ko sali’n be mmoja’n yɛ m’an nɔn-ɔn, afin be klɛnnin be wun mannin wie’n yɛ be ko sa blɛli min-ɔn.”—1 Nyo. 11:15-19.
13 Davidi si kɛ Moizi Mmla’n nun’n, ɔ nin i fata kɛ be gua mmoja’n i ase be man Zoova naan nán be di. Sa nga ti yɛ be yo sɔ’n, ɔ wunnin i wlɛ wie. Davidi si kɛ ‘mmoja’n nun yɛ nguan’n wo ɔ.’ Sanngɛ nzue yɛ be mɛnnin i ɔ, nán mmoja ɔ. ?Ɔ maan, ngue ti yɛ Davidi waan ɔ nɔnman ɔn? Ɔ wunnin ndɛ nga Moizi Mmla’n kannin’n i wlɛ ti ɔ. Davidi ɲrun’n, nzue sɔ’n ti kɛ sran nsan nga be ko sali’n be mmoja’n sa. Ɔ maan, ɔ nɔn nzue sɔ’n, ɔ yoman ye. Naan w’a guɛ i ase, afin ɔ nin ase gualɛ fata.—Sau. 17:11; Mml. 12:23, 24.
14. ?Ngue yɛ ɔ ukali Davidi naan w’a wun ninnge mun kɛ Zoova sa ɔ?
14 Kɛ Davidi ko yo naan Ɲanmiɛn i mmla’n w’a lo i kpa’n, yɛ ɔ miannin i ɲin yoli ɔ. Ɔ to jue seli kɛ: “Min Nyanmiɛn, min waan ń yó ɔ klun sa. Ɔ mmla’n ɔ o min klun.” (Jue. 40:9) Davidi suannin Ɲanmiɛn i mmla’n kpɛkun ɔ buli su akunndan kpa. Ɔ lafili su kɛ Zoova i mmla’m be ti su. I sɔ’n ti’n, nán mmla ng’ɔ kanngan nun sa’n i su ngunmin yɛ ɔ nanti ɔ, sanngɛ mmla’n m’ɔ wun i wlɛ’n i su yɛ ɔ nanti wie ɔ. Maan e fa ngwlɛlɛ e suan Biblu’n nun like. Yɛle kɛ, like nga e suannin’n, e bu su akunndan kpɛkun e fa sie e klun. I liɛ’n, sɛ sa wie to e’n, é kwlá sí like nga Zoova kunndɛ kɛ e yo’n.
15. ?Wafa sɛ yɛ Salomɔn yili Ɲanmiɛn i mmla’n i ase ɔ?
15 Ɲanmiɛn Zoova yrali Davidi i wa Salomɔn su kpa. Sanngɛ kɛ ɔ́ kɔ́ i ɲrun’n, Salomɔn fɔnnin Ɲanmiɛn i mmla’n. W’a faman Zoova i mmla m’ɔ se kɛ ‘nán [Izraɛli famiɛn’m be] ja bla kaka’n’ su. (Mml. 17:17) Ɔ maan, ɔ jali nvle uflɛ nun bla kaka. Kɛ ɔ yoli kpɛnngbɛn’n, “i yi’m be cuɛnnin i kɛ ɔ sɔ ninnge mun.” Like ti m’ɔ yoli sɔ’n, i kunngba yɛ ɔ si i ɔ. Sanngɛ kɛ ɔ yoli sɔ’n “Salomɔn yoli sa nga Anannganman klo-mɛn i’n. I nyin w’a yi-mɛn i kɛ i si David yoli’n sa.” (1 Fam. 11:1-6) Ɔ maan nanwlɛ, mmla nga be o Ɲanmiɛn Ndɛ’n nun’n ɔ nin akunndan nga mmla sɔ’m be taka su’n, nán maan e fa di aɔwi, sanngɛ e fa be su e nanti. Be nga be waan bé já bla, annzɛ bian’n, maan ndɛ sɔ’n yo be cinnjin kpa.
16. ?Sɛ be nga be kunndɛ kɛ bé já bla annzɛ bian’n be wun mmla ng’ɔ se kɛ ‘aja’n yo e Min’n i klun su’n’ i wlɛ’n, ngue yɛ be su yoman ɔn?
16 ?Sɛ sran kun m’ɔ suman Zoova’n se e kɛ ɔ klo e’n, é sé i sɛ? ?É yó kɛ Davidi sa, annzɛ é yó kɛ Salomɔn sa? Ɲanmiɛn Ndɛ’n waan ɔ fata kɛ Ɲanmiɛn sufuɛ’m be ‘aja’n yo e Min’n i klun su.’ (1 Kor. 7:39) Sɛ Klistfuɛ kun waan ɔ́ já bla, annzɛ bian’n, ɔ fata kɛ ɔ yo i wiengu Klistfuɛ kun. Sran ng’ɔ wun mmla sɔ’n i wlɛ’n, nán bla annzɛ yasua ng’ɔ timan Zoova sufuɛ’n i jalɛ ngunmin akunndan yɛ ɔ su buman ɔn. Sanngɛ ɔ su wumɛn i ti wie.
17. ?Ngue yɛ ɔ kwla uka e naan y’a tɔman bla nin bian nna nga be fa fite nzra nun’n i aya’n nun ɔn?
17 Davidi kunndɛli kpa kɛ Ɲanmiɛn kle i atin. Sɛ e yo sɔ wie’n, é kwlá kpálo bla nin bian nna nga be fa fite gua su’n. Maan e kanngan Biblu’n nun ndɛ mma nga be lɔngɔ yɛ’n be nun. Yɛ e kunndɛ be bo naan e bu su akunndan. Kpɛkun, maan e mian e ɲin e wun wafa nga Zoova bu bla nin bian nna nga be fa fite nzra nun’n ɔ nin like nga ɔ kunndɛ kɛ e yo’n. (An kanngan Jue Mun 119:37 ɔ nin Matie 5:28, 29 ɔ nin Kolɔsfuɛ Mun 3:5 be nun.) Sɛ e bu Zoova i mmla m’ɔ fiɛn kaan sa nunman be sin’n be su akunndan’n, ɔ́ úka e naan y’a tɔman bla nin bian nna nga be fa fite nzra nun’n i aya’n nun.
MAAN ƝANMIƐN I AKUNNDAN’N TINNGƐ E BLƐ KWLAA NUN
18, 19. (a) ?Kannzɛ fɔ o Davidi nun’n, ngue ti yɛ Ɲanmiɛn klun jɔli i wun ɔn? (b) ?Ngue yɛ amun a fua kɛ amún yó ɔ?
18 Sɛ i li bɔɔ Davidi nin Ɲanmiɛn be nantili klanman’n, sanngɛ ɔ fɔnnin tɛtɛ kpa wie. (2 Sam. 11:2-4, 14, 15, 22-27; 1 Nyo. 21:1, 7) Sanngɛ i nguan cɛn’n nun’n, Davidi yili i nglo kɛ i sa tɛ sɔ’m be yo i nsisɔ. Ɔ yoli “sran nanwlɛfuɛ.” (1 Fam. 9:4). ?Ngue ti yɛ e kwla kan sɔ ɔ? E kwla kan sɔ afin Davidi miannin i ɲin yoli ninnge mun kɛ Zoova klo’n sa.
19 Kannzɛ bɔɔ fɔ wo e nun’n, Zoova klun kwla jɔ e wun. Kɛ ɔ ko yo naan w’a yo sɔ’n, maan e suan Ɲanmiɛn Ndɛ’n nun like kpa, yɛ like nga e suan’n, maan e bu su akunndan kpa, kpɛkun ndɛ nga e fa sieli e klun’n e jran su e fa ajalɛ nga ɔ fata kɛ e fa’n. Kɛ e yo sɔ’n, ɔ ti kɛ e su srɛ Zoova kɛ ɔ ‘kle e i klun sa’n i yolɛ’ kɛ jue tofuɛ’n kɛnnin i wun ase fa srɛli i’n sa.
[Kosan mun]
[Foto, bue 10]
?Kɛ Davidi ɲannin Saili i kunlɛ wun atin’n, ngue ti yɛ w’a kunmɛn i ɔ?
[Foto, bue 11]
?Ajalɛ benin yɛ nzue nga Davidi i sran’m be fa blɛli i mɔ w’a nɔnman’n, ɔ kle e ɔ?
