?Mɛn nga nun’n, e kwla yo sa ng’ɔ ti kpa’n?

“Sa’n kwlaa nun e klo kɛ é yó sa ng’ɔ ti kpa’n.”​—EBRE MUN 13:18.

NÁN kɛ sa tɛ’n wo e nun’n, mɔ mɛn’n w’a saci’n, annzɛ mmusu’m be si Satan wlawla sran mun’n, i ti yɛ e liɛ’n wieli ɔ. ?Yɛle kɛ benin sa? Yɛle kɛ sɛ e fa e wun e mantan Ɲanmiɛn’n, naan mmla nga be wo Biblu’n m’ɔ ti Ɲanmiɛn Ndɛ’n nun’n, e fa be su’n, e kwla yo sa kpa. Kɛ ɔ fɛ i laa lele m’ɔ́ fá jú andɛ’n, mmla sɔ’m be te yo sran’m be ye. Maan e fa sran wie’m be ndɛ’n e yiyi nun e nian.

BIBLU’N NUN MMLA’N: “Nán an yo kɛ sran mun bɔ be o lɛ ndɛ’n be sa.”​—Rɔmfuɛ Mun 12:2.

Wafa nga sran kun fali mmla sɔ’n su’n: Bian kun suan Gilɛmɛ. Ɔ fin blɔfuɛ’m be lɔ nvle nga be flɛ i Brezili’n. I aata ng’ɔ di’n nanti kpa. Ɔ dili i nanwlɛ kɛ, kɛ sran kun di aata’n, kɛ ɔ́ yó naan w’a diman ndrunmun’n, ɔ kwla yo kekle. Ɔ seli kɛ: “Wafa nga a ko di wɔ aata’n, naan ɔ ninnge’m b’a nanti kpa kɛ nga a fa siesieli’n sa’n, ɔ timan blɛblɛ. Asa kusu, kɛ mɔ nán ɔ kunngba yɛ a di aata’n, ɔ fata kɛ a kpli ɔ ti. Sran’m be wunman kɛ adi ninnge manlɛ nin be nun sɔlɛ’n ti like tɛ. Kusu, kɛ mɔ ɔ su kalɛ’n cɛnnin’n, saan á trá wɔ awlɛn naan w’a diman ndrunmun.”

Ɔ nin i sɔ ngba’n, Gilɛmɛ w’a fɛmɛn i wun w’a wlaman sa sukusuku yolɛ’n nun. I waan: “Kannzɛ aata difuɛ nga’m be nantiman mmla fi su’n, e liɛ’n, e yo sa kpa ɔ, ɔ yo ye. Kɛ ɔ ko yo naan w’a yo sɔ’n, ɔ fata kɛ nzuɛn kpa tra ndin kpa e awlɛn’n nun. Biblu’n kleli min kɛ sran ng’ɔ nanti seiin’n, ɔ ɲan su mmlusuɛ. Yɛle kɛ i klun titimɛn i, i wla gua ase, yɛ ɔ yomɛn i wun finfin. I nzuɛn kpa’n ti’n, be ng’ɔ nin be di junman’n, be kwla kaci.”

BIBLU’N NUN MMLA’N: “Be nga be klo kɛ bé nyán be wun’n, lakafuɛ’n láka be. Ninnge ngbɛn-ngbɛn bɔ be konvi sɔ be’n nin be nyin b’ɔ blo ninnge tɛtɛ kpanngban b’ɔ saci sran b’ɔ maan be agualiɛ’n ɔ gua-man be kpa be wu’n, bé káci kɛ aya sa, bé tɔ́ nun ɔ́ trá be.”​—1 Timote 6:9, 10.

Wafa nga sran kun fali mmla sɔ’n su’n: Be flɛ bian kun kɛ Andre. Ɔ le i bɔbɔ susute. Be yɛ be fa sran nin ninnge’m be sasalɛ mannzin mun siesie likalika’m be nun ɔn. Ɔ di junman man balɔn tolɛ anuannzɛ dan kun. Kɛ cɛn kun be wieli be balɔn dan kpa kun to’n, Andre ɔli be su kpɛn’m be biolo’n nun, i akatua’n i falɛ. Kɛ ɔ́ yó sɔ’n nn lika’n w’a san, yɛ be ɲin w’a blo kpa, afin be su ka sika nga be ɲɛnnin i biye kpɛlɛ’n nun’n. Ɔ maan ndɛndɛ, sika kafuɛ’m be su kpɛn’n fali junman difuɛ’m be sika’n wlali be sa nun. Kpɛkun ɔ fali Andre liɛ’n mɛnnin i wie.

Andre waan: “Kɛ ń sá min sin awlo’n, ń nían sika’n niɔn, ɔ tra. Ɔ maan, m buli bian ng’ɔ fa sika’n mannin min’n i akunndan. Afin n si kɛ ɔ́ wá yó i ti su kalɛ. Yɛle kɛ i bɔbɔ kwlá siman sran nga ɔ fɔnnin mɛnnin i sika tratrali su’n. I ti’n, n sali n sin kɛ  ń fá sika’n kó mán be. Kɛ ń jú lɔ’n nn, balɔn tofuɛ’m be sin jranfuɛ’m be tianman lɔ aɔwi. Naan m’an wluwlu be nun m’an bo nun lɔ, naan m’an fa sika’n m’an man bian’n. I fɛ dan m’ɔ yoli i’n ti’n, w’a siman wie se. Afin, sran fi nin a yomɛn i sɔ le.”

Andre kan gua su kɛ: “Sa nga n yoli i lɛ’n ti’n, bian sɔ’n i ɲin wa yili min kpa. Sa sɔ’n w’a cɛ sɔ, sanngɛ andɛ nin andɛ min susute’n i kunngba yɛ ɔ di junman man be ɔ. Afin be nin sran onga nga be di junman man be’n, be buli. Biblu’n nun mmla’m mɔ n fali be su’n ti’n, mɔ i ti’n be bo min dunman kpa’n, ɔ yo min fɛ.”

Kannzɛ bɔbɔ sran’m b’a saci’n, Ɲanmiɛn dunman nun’n, e kwla kpalo be nzuɛn tɛ’n e yo sa kpa. Sanngɛ, klɔ sran ngunmin kwlá yoman naan adi ninnge manlɛ ɔ nin be nun sɔlɛ’n nin ndrunmun dilɛ ɔ nin sran lufle dilɛ’n, be osu w’a wie mlɔnmlɔn. Afin like ng’ɔ nin i sɔ’n ba’n, ɔ tra e kpɛn. ?Ɔ maan, é ká sa sɔ’m be nun sa trilili? Biblu’n tɛ kosan sɔ’n su klanman. I yɛ é wá wún i ndɛ akpasua kasiɛn’n nun ɔn.