Zezi kleli e e wun ase kanlɛ
Zezi kleli e e wun ase kanlɛ
“N yoli i sɔ kleli amun naan amun kusu an nian nga n yoli amun’n su yo.”—ZAN 13:15.
?AMÚN TƐ́ SU SƐ?
?Kɛ Zezi wo ɲanmiɛn su lɔ’n, ngue yɛ ɔ kle kɛ ɔ kɛnnin i wun ase ɔ?
?Kɛ Zezi bali asiɛ’n su wa’n, wafa sɛ yɛ ɔ kɛnnin i wun ase ɔ?
?Zezi i wun ase kanlɛ’n ti’n, ye benin yɛ sran’m be ɲɛnnin i ɔ? ?Yɛ ye benin yɛ bé ɲɛ́n i ɔ?
1, 2. ?Kɔnguɛ kasiɛn nga Zezi dili i asiɛ’n su wa’n ka naan w’a wu’n, ngwlɛlɛ benin yɛ ɔ kleli i akoto mun ɔn?
KƆNGUƐ kasiɛn nga Zezi dili i asiɛ’n su wa’n ka naan w’a wu’n, ɔ nin i akoto’m be yiali nglo sua kun nun Zerizalɛmu lɔ. Kɛ bé dí like’n, Zezi jaoli aliɛ’n sin, ɔ yili i tralɛ dan’n, yɛ ɔ fali wunnzinnun kun cili i afiɛn. I sin’n, ɔ guali nzue kpongbo kun nun, yɛ ɔ tɔli i sɔnnzɔnfuɛ’m be ja wunnzinlɛ su ɔ. Wunnzinnun’n m’ɔ fa cili i afiɛn’n, ɔ fa nunnunnin. Kɛ ɔ wieli be ja nunnun’n, ɔ wlɛli i tralɛ’n. ?Ngue ti yɛ Zezi kɛnnin i wun ase sɔ ɔ?—Zan 13:3-5.
2 Zezi bɔbɔ yiyili nun. Ɔ seli kɛ: “‘?An wun like nga n yoli amun’n i wlɛ?’ [...] Sɛ m bɔ n ti amun like klefuɛ nin amun min’n, n wunnzinnin amun ja’n, amun kusu an wunnzin amun wiengu ja. N yoli i sɔ kleli amun naan amun kusu an nian nga n yoli amun’n su yo.” (Zan 13:12-15) Ɔ maan, Zezi yoli sɔ naan ɔ́ klé be ngwlɛlɛ naan be kusu b’a yo wun ase kanfuɛ wie. Wafa ng’ɔ fa yoli’n kusu’n, be wla kwlá fiman su.
3. (a) ?Wafa sɛ yɛ Zezi kleli ekun kɛ wun ase kanlɛ’n ti cinnjin ɔn? (b) ?Ngue yɛ é kɛ́n i ndɛ like suanlɛ nga nun ɔn?
3 Nán cɛn sɔ’n nun yɛ Zezi boli i akoto’m be wun ase kanlɛ i cinnjin m’ɔ ti’n be kan klelɛ bo ɔ. Cɛn kun’n, akplowa tɔli i akoto wie’m be afiɛn kɛ bé wún be nun sran ng’ɔ ti sran dan’n. Kɛ ɔ yoli sɔ’n, Zezi fali ba kaan kun trɛnnin i ase i wun lɛ naan w’a se be kɛ: “Sran ng’ɔ sɔ bakan nga nun n dunman nun’n, wuun m bɔbɔ min yɛ w’a sɔ min nun-ɔn, yɛ sran ng’ɔ sɔ min nun’n, wuun sran b’ɔ sunmannin min’n i nun yɛ w’a sɔ-ɔ. Afin sran ng’ɔ ti amun kwlaa amun nun kaan’n, i sɔfuɛ’n yɛ ɔ ti dan-an.” (Lik 9:46-48) I sin’n, kɛ Zezi dí i Ɲanmiɛn junman’n m’ɔ wunnin kɛ Farizifuɛ’m be kunndɛ kɛ bé fá be wun klé’n, ɔ seli kɛ: “Sran kwlaa ng’ɔ yo i wun dandan’n, Nyanmiɛn gúɛ i nyin ase, sanngɛ sran ng’ɔ tu-mɛn i wun’n, Nyanmiɛn maan ɔ́ nyán nyrun.” (Lik 14:11) I sɔ’n kle wein kɛ Zezi kunndɛman kɛ i sɔnnzɔnfuɛ wie fi tu i wun annzɛ ɔ ɲinmɛnɲinmɛn i wun. Sanngɛ, ɔ kunndɛ kɛ be kwlaa be yo wun ase kanfuɛ. Ɔ maan, é wá yíyí wafa nga Zezi kɛnnin i wun ase’n i nun kpa naan e kusu y’a kwla nian su. Kpɛkun, ye nga wun ase kanfuɛ’m be bɔbɔ be di’n, ɔ nin nga sran uflɛ ɲɛn i be wun ase kanlɛ sɔ’n ti’n, é kɛ́n i ndɛ wie.
“M’AN WANNDI-MAN”
4. ?I nun mɔ Ɲanmiɛn i Wa kunngba cɛ’n te o nglo lɔ’n, wafa sɛ yɛ ɔ kɛnnin i wun ase ɔ?
4 Zezi nin i Si Ɲanmiɛn be o nglo lɔ cɛli kpa lelee ka naan w’a ba asiɛ’n su wa. Kɛ ɔ o lɔ’n, ɔ kɛn i wun ase wie. Blɛ sɔ’n nun’n, ɔ nin i Si be afiɛn m’ɔ mantannin kpa’n Ezai fluwa’n kɛn i ndɛ se kɛ: “Anannganman Nyanmiɛn’n ɔ yo maan n si ijɔ kɛ be nga be suan like’n be fa ijɔ’n sa, i waan ɔ́ yó naan m’an si ndɛ ng’ɔ fata kɛ n kan naan m’an fa uka be nga b’a fɛ mun’n ti. Nglɛmun kwlaa, ɔ tinnge min, yɛ ɔ kle min wafa nga ń fá n su ń síe ndɛ nga be kan’n i bo’n kɛ be nga be suan like’n be fa yo’n sa’n. Anannganman Nyanmiɛn’n ɔ tikeli min su’n, yɛ m’an yo-man ɲin kekle, m’an wanndi-man.” (Eza. 50:4, 5) E wun kɛ Ɲanmiɛn Wa’n kɛnnin i wun ase tieli ndɛ kwlaa nga Zoova kan kleli i’n. Ɔ klo kɛ Zoova tinngɛ i. Ɔ wunnin wafa nga Ɲanmiɛn Kpli bɔbɔ kɛnnin i wun ase naan w’a si klɔ sran’m be aunnvuɛ’n. E si kɛ ɔ fɛli i ɲin sieli Zoova i ajalɛ’n sɔ’n su kpa!
5. ?I nun mɔ Zezi o nglo lɔ m’ɔ ti anzi’m be su kpɛn’n, kɛ ɔ nin mmusu’m be si Satan be sili akplowa’n, wafa sɛ yɛ ɔ kɛnnin i wun ase ɔ?
5 Anzi nga be o nglo lɔ’n, be ngba b’a kanman be wun ase kɛ Ɲanmiɛn i Wa kunngba cɛ’n fa yoli’n sa. Anzi nga be wa tɔnnin i dunman kɛ mmusu’m be si Satan’n w’a lomɛn i wun w’a manman Zoova. Ɔ yoli i wun kpakpa, ɔ tuli i wun yɛ ɔ jasoli Zoova wun. Zezi liɛ’n, kwlalɛ nga Ɲanmiɛn mɛnnin i nglo lɔ’n, ɔ juli i, w’a yoman aɲinkpli, w’a fa yoman abɔlɛ like. Kɛ ɔ o nglo lɔ m’ɔ sie anzi’m be kwlaa’n, dunman nga be fa flɛ i’n yɛle Misɛli. Sanngɛ, kɛ ɔ “nin mmusu’m be si Satan bé kplí Moiz fuɛn’n” mɔ bé sí akplowa’n w’a tumɛn i wun. Ɔ kɛnnin i wun ase. Ɔ yacili i Zoova sa nun. Yɛle kɛ, i yɛ ɔ di nglo lɔ nin asiɛ sufuɛ’m be kwlaa be jɔlɛ ɔ. Blɛ nga ɔ ko di Satan i jɔlɛ’n, ɔ nin jɔlɛ nga ɔ́ dí i’n, i bɔbɔ yɛ ɔ si i ɔ.—An kanngan Zid 9 nun.
6. ?Kɛ Zezi bali asiɛ’n su wa’n, ngue ti yɛ i sɔ’n kle kɛ ɔ ti wun ase kanfuɛ ɔ?
6 I nun nga Zezi o nglo lɔ mɔ Ɲanmiɛn klé i like’n, ninnge nga kɛ ɔ́ káci Mɛsi’n ɔ́ wá yó be asiɛ’n su wa’n, ɔ kan kleli i wie. Ɔ maan, afɛ ng’ɔ́ tɔ́ i su’n, ɔ dun mmua si nun kwlaa. Ɔ nin i sɔ ngba’n, kɛ Ɲanmiɛn sunmɛnnin i kɛ ɔ bla asiɛ’n su wa’n naan be kun i’n, w’a wanndiman. ?Ngue ti yɛ ɔ kplinnin su ɔ? Akoto Pɔlu kannin Ɲanmiɛn i Wa kunngba cɛ’n i wun ase m’ɔ kannin i ndɛ seli kɛ: “I b’ɔ nin Nyanmiɛn be ti kun’n [yɛle kɛ ɔ ti aolia nun sran kɛ Ɲanmiɛn sa’n], w’a kunndɛ-man kɛ ɔ́ fɛ́ i wun súnnzun i. W’a bu-mɛn i sɔ’n like fi, ɔ yoli i wun kanga, ɔ yoli i wun kɛ klɔ sran sa.”—Fil. 2:6, 7.
KƐ Ɔ KACILI SRAN’N, “Ɔ YOLI I WUN AENVUƐ”
7, 8. ?Zezi i bakan nun o, ɔ nin i jasin fɛ’n bolɛ nun o, wafa sɛ yɛ ɔ kleli kɛ ɔ ti wun ase kanfuɛ ɔ?
7 Pɔlu klɛli i kɛ: ‘Kɛ [Zezi] kacili sran’n, ɔ yoli i wun aenvuɛ, ɔ yoli anyiyiɛfuɛ lele ɔ fa wuli, waka’n su yɛ ɔ wuli-ɔ.’ (Fil. 2:8) Kɛ ɔ́ fɛ́ i Zezi i kaan nun’n, ɔ kleli e wun ase kanlɛ. Kannzɛ Zozɛfu nin Mali mɔ be tɛli i’n, fɔ o be nun’n, sanngɛ ‘i nyin yili be.’ (Lik 2: 51) I lɛ’n ti ajalɛ kpa man gbanflɛn nin talua mun. Yɛle kɛ, sɛ be lo be wun man be si nin be nin’n, Ɲanmiɛn i wla su fiman be!
8 Kɛ Zezi yoli sran kaklaka’n, ɔ yoli wun ase kanfuɛ ekun. Afin, Zoova klun sa yolɛ’n yɛ ɔ yoli i cinnjin trali i bɔbɔ i klunklo like yolɛ ɔ. (Zan 4:34) Jasin fɛ’n bolɛ’n nun’n, Zezi Klist boli Ɲanmiɛn dunman yɛ ɔ ukali sran nanwlɛfuɛ mun naan b’a si Zoova ɔ nin ninnge ng’ɔ gugu kɛ ɔ́ yó mán klɔ sran’m be kpa. Asa ekun’n, Zoova i ndɛ ng’ɔ kan kleli sran mun’n, i bɔbɔ nantili su. Ɲanmiɛn srɛlɛ ng’ɔ kleli sran mun nun’n, like klikli ng’ɔ dun mmua boli su’n yɛ: ‘E Si bɔ a wo nyanmiɛn su lɔ, maan wɔ dunman ɔ yo saun.’ (Mat. 6:9, Anuãsɛ Fuflɛ) Ɔ maan, Zoova i dunman m’ɔ fata kɛ ɔ yo sanwun yɛ Zezi seli i sɔnnzɔnfuɛ’m be kɛ ɔ dun mmua yo be nanndoliɛ kpa ɔ. Zezi i nantilɛ nun kusu’n, i sɔ’n yoli i nanndoliɛ kpa. Kɛ i wulɛ cɛn’n ɔ́ mántan’n, ɔ srɛli Zoova seli i kɛ: ‘N fa ɔ dunman kleli [akoto mun] yɛ ń fá klé be.’ (Zan 17:26, Anuãsɛ Fuflɛ) Asa kusu’n, like kwlaa ng’ɔ yoli i asiɛ’n su’n, ɔ seli kɛ Zoova dunman nun yɛ ɔ yoli ɔ.—Zan 5:19.
9. ?Ndɛ benin yɛ Ɲanmiɛn nuan ijɔfuɛ Zakari kɛnnin i Mɛsi’n su ɔ? ?Yɛ wafa sɛ yɛ ndɛ sɔ’n kpɛnnin su ɔ?
9 Ɲanmiɛn maan i nuan ijɔfuɛ Zakari kannin Mɛsi’n i ndɛ. Ɔ klɛli i kɛ: “Siɔnfuɛ mun, maan amun wun blibli amun, amun tu kpɛn! Zerizalɛmfuɛ mun, amun bo sro. Amun nian, amun famiɛn’n su ba amun wun. Ɔ ti sran kpa, ɔ kwla, ɔ ti wɛtɛfuɛ. W’a fu aflunmun bɔ w’a kpɛ cro kun su. Aflunmun sɔ’n ɔ ti aflunmun bla kun wa.” (Zkr. 9:9) Afuɛ nga be flɛ i 33 nun’n, kɛ Zezi wluli Zerizalɛmu klɔ’n nun lɔ’n yɛ ndɛ sɔ’n kpɛnnin su ɔ. Blɛ sɔ’n nun’n, nn Zuifu’m be nin a diman Delɛ cɛn’n. Kɛ ɔ wluli lɔ’n, sran’m be sɛsɛli be tannin mun atin’n nun, yɛ wie’m be kusu be bubuli nɲa guɛguɛli i atin’n nun. Zezi mɔ be wunnin i’n ti’n, klɔ wunmuan’n kejeli. Sran’m be yili i ayɛ kɛ Famiɛn sa, sanngɛ ɔ nin i sɔ ngba’n w’a tumɛn i wun.—Mat. 21:4-11.
10. ?Ngue yɛ Zezi i seiin nantilɛ m’ɔ nantili lele guɛli i bo’n, ɔ kleli ɔ?
10 Zezi Klist yoli wun ase kanfuɛ yɛ ɔ loli i wun mannin Zoova lele ɔ fa wuli waka’n su. I sɔ m’ɔ yoli’n maan ɔ kwla kleli kɛ kannzɛ ɲrɛnnɛn’n tin klɔ sran kun su’n, sanngɛ ɔ kwla nanti seiin lele guɛ i ti nin i bo. Kpɛkun ɔ kleli ekun kɛ, kɛ Satan se kɛ klɔ sran’m be bɔbɔ be like ɲanlɛ ti yɛ be su Zoova’n, i sɔ’n ti ato. (Zɔb 1:9-11) Asa ekun’n, Klist i seiin nantilɛ’n kleli weiin kpa kɛ Zoova yɛ ɔ fata kɛ ɔ sie nglo nin asiɛ’n niɔn. Naan i sielɛ’n ti kpa. Zoova i Wa’n m’ɔ kɛn i wun ase’n, m’ɔ jrannin kekle lele fa wuli ti’n, Zoova klun jɔli.—An kanngan Nyanndra Mun 27:11 nun.
11. ?Zezi Klist i wie’n ti’n, ngue yɛ sran kpa’m bé ɲɛ́n i ɔ?
11 Zezi fɛli i nguan’n toli klɔ sran’m be ti. (Mat. 20:28) Kɛ ɔ ko yo naan klɔ sran’m b’a fin sa tɛ nun b’a fite’n, ɔ fata kɛ sran kun wu. Asa’n, i wie sɔ’n ti’n, be nga be nanti kpa’n, bé kwlá ɲán anannganman nguan. I sɔ’n ti yɛ akoto Pɔlu klɛli i kɛ: “Sran kunngba [...] i sa kpa ng’ɔ yoli’n ɔ maan Nyanmiɛn bu sran’m be kwlaa be sran kpa, ɔ maan bé nyán nguan.” (Rɔm. 5:18) Zezi i wie’n ti’n, Klistfuɛ nga be kpali be sieli be ngunmin’n, bé ɲán anannganman nguan ɲanmiɛn su lɔ. Yɛ ‘bua’m be wie’m’ be liɛ’n, bé ɲán anannganman nguan asiɛ’n su wa.—Zan 10:16; Rɔm. 8:16, 17.
“MIN ANWLƐN’N TI FLƆLƆ”
12. ?Zezi nin klɔ sran’m be nantilɛ nun’n, wafa sɛ yɛ ɔ kleli kɛ ɔ ti sran wɛtɛɛfuɛ nin wun ase kanfuɛ ɔ?
12 Zezi seli be ‘kwlaa mɔ be sua trɔ mɔ b’a fɛ’n,’ be kɛ be blɛ i sin. Ɔ seli be kɛ: “An fa amun ti wla n kɔmin su waka’n bo, yɛ an fa min nzuɛn’n su, afin n ti sran wɛtɛɛ yɛ min anwlɛn’n ti flɔlɔ. Yɛ amun wla wá gúa ase.” (Mat. 11:28, 29) Ndɛ sɔ’n kle kɛ, Zezi i wun ase kanlɛ’n ɔ nin i wɛtɛɛ yolɛ’n maan ɔ yoli sran’m be kpa, yɛ w’a kpaman be nun. Ɔ nin i sɔnnzɔnfuɛ’m be nantilɛ nun’n, ɔ kleli kɛ ɔ ti sran wɛtɛɛfuɛ. Ɔ wlali be fanngan yɛ sɛ be yo like wie m’ɔ ti kpa’n, ɔ yo be mo. Kɛ be nin i wo’n, b’a bumɛn i le kɛ be liɛ’n, be siman like fi yo. Asa ekun’n, Zezi timan sran mɔ i like yolɛ yo ya m’ɔ tin i wiengu’m be su ɔ. Ɔ maan, i sɔnnzɔnfuɛ’m be wunnin i wlɛ kɛ, kɛ nga i bɔbɔ fa kannin’n sa’n, sɛ be fa be wun mɛntɛn i’n, naan ndɛ ng’ɔ kan kle be’n, be nanti su’n, bé wun jɔ́ be fɔuun. Afin i kɔmin su waka’n i sualɛ yo fɛ, yɛ i trɔ’n yoman nɔnnin. Sran’m be kwlaa, i yasua o, i bla o, i bakan o, i kpɛnngbɛn o, be kloli kɛ bé mɛ́ntɛn i.—Mat. 11:30.
13. ?Wafa sɛ yɛ Zezi sili be nga be leman wie’n be aunnvuɛ ɔ?
13 Zezi i blɛ sufuɛ Izraɛlifuɛ nga be leman wie’n, be yoli i annvɔ. I sɔ’n ti’n, ɔ yoli be ye. Cɛn kun’n, kɛ Zezi tú i bo Zeriko lɛ’n, ɔ wunnin aɲinsifuɛ nɲɔn. Kun suan Bartime, kunfuɛ’n b’a bomɛn i dunman. Be kpan flɛli Zezi kɛ ɔ yo be juejue. Sanngɛ sran’m be kpan be su kɛ be muan be nuan. Kɛ bé kpán be su’n nn be kusu bé kpán kekle kpa kɛ Zezi uka be. Sɛ Zezi waan ɔ́ nían sran nga be bo sin yiɛ i’n nn w’a tɛman aɲinsifuɛ nɲɔn sɔ’m be su. Sanngɛ, kɛ mɔ be yo i annvɔ’n ti’n, ɔ seli kɛ be flɛ be naan be bla, naan w’a yo be juejue. Nanwlɛ, Zezi i wun ase kanlɛ nun’n, ɔ nin yalɛfuɛ’m be aunnvuɛ silɛ nun’n, ɔ sɔnnzɔnnin i Si Zoova klanman kpa.—Mat. 20:29-34; Mar. 10:46-52.
“SRAN NG’Ɔ TU-MƐN I WUN’N, NYANMIƐN MAAN Ɔ́ NYÁN NYRUN”
14. ?Zezi i wun ase kanlɛ’n ti’n, ye benin yɛ sran’m be ɲɛnnin i ɔ? ?Yɛ ye benin yɛ bé ɲɛ́n i ɔ?
14 Zezi Klist i wun ase kanlɛ’n yo sran’m be ye, yɛ ɔ ti aklunjuɛ like. Kɛ Zoova i Wa’n kɛnnin i wun ase yoli i klun sa’n, Zoova i klun jɔli dan. Asa kusu’n, Zezi i wɛtɛɛ yolɛ’n ti’n, i akoto mun nin i sɔnnzɔnfuɛ’m be wun kpajali be. Wafa ng’ɔ fa nantili’n, ɔ nin ninnge ng’ɔ kleli be’n, ɔ nin fanngan m’ɔ wlali be’n ti’n, be kunndɛli kɛ bé kɔ́ be ɲrun Ɲanmiɛn i sulɛ’n nun. Sran onga’m be kusu, Zezi i wun ase kanlɛ’n yoli be ye wie. Afin, ɔ ukali be, ɔ kleli be like, yɛ ɔ wlali be fanngan. Sanngɛ nán be ngunmin ɔn. Yɛle kɛ, be kwlaa nga be lafi i su’n, bé wá dí e ti kpɔlɛ tɛ’n mɔ Zezi yili’n i su ye.
15. ?Ye benin yɛ Zezi bɔbɔ ɲɛnnin i i wun ase kanlɛ’n nun ɔn?
15 ?Yɛ Zezi bɔbɔ li? ?Ɔ ɲannin i wun ase kanlɛ’n i su ye? Ɛɛn. Afin, i bɔbɔ kan kleli i sɔnnzɔnfuɛ’m be kɛ: “Sran ng’ɔ tu-mɛn i wun’n, Nyanmiɛn maan ɔ́ nyán nyrun.” (Mat. 23:12) Ndɛ sɔ’n kpɛnnin su i lika. I sɔ’n yɛ Pɔlu yiyili nun ɔn. Ɔ seli kɛ: ‘Nyanmiɛn fali [Zezi] sieli like’n kwlaa su [...] i dunman’n fu trali dunman’n kwlaa, naan kɛ like nga be o nyanmiɛn su lɔ’n, nin asiɛ’n su wa’n, nin asiɛ’n i bo lɔ’n, be kwlaa be ti i dunman Jésus’n, be koto i bo, yɛ ɔ fite be kwlaa be nuan kɛ Jésus-Krist ti be Min, naan e Si Nyanmiɛn’n nyan nyrun.’ Kɛ mɔ Zezi kɛnnin i wun ase’n, m’ɔ nantili ndɛnman su’n ti’n, i Si Zoova fɛli i sieli i like kwlaa su. Yɛle kɛ, ɔ mɛnnin i kwlalɛ kɛ ɔ sie nglo lɔ nin asiɛ’n su wa ninnge’n kwlaa.—Fil. 2:9-11.
ZEZI “KUN BE BƆ BE TI YALƐFUƐ BƆ BE BU BE LUFLE’N BE TI ALƐ”
16. ?Ngue yɛ ɔ kle kɛ Ɲanmiɛn i Wa’n, ɔ́ kɛ́n i wun ase titi ɔ?
16 Ɲanmiɛn i Wa Zezi’n, ɔ́ kɛ́n i wun ase titi. Kɛ ɔ o nglo lɔ mɔ i ɲrun ti ɲanɲan’n ɔ́ bá i kpɔfuɛ’m be nunkunlɛ’n, like nga ɔ́ wá yó’n, jue tofuɛ’n dun mmua boli su. Ɔ seli kɛ: “Cuɛn ɔ ta’n nun, á wá yó kwlafuɛ. Fu ɔ kakaklolo’n nun naan ko kun sa kpa’n i ti alɛ. Ko kun be bɔ be ti yalɛfuɛ bɔ be bu be lufle’n be ti alɛ.” (Jue. 45:5) Armagedɔn alɛ nun’n, Zezi Klist ɔ́ kún sa kpa’n i ti alɛ. Yɛ ɔ́ kún yalɛfuɛ mɔ be bu be lufle’n, yɛle kɛ wun ase kanfuɛ’m be ti alɛ wie. Kpɛkun Famiɛn Zezi ɔ́ síe asiɛ’n lele afuɛ akpi. Kɛ blɛ sɔ’n fá wíe’n nn “w’a tu mmusu nin kpɛnngbɛn’m be kwlaa nin bae’n.” ?I sin’n, ngue yɛ ɔ́ yó ɔ? ?Zezi kɛ́n i wun ase ekun? Ɛɛn, afin “ɔ́ fá bia’n mɛ́n i Si Nyanmiɛn.”—An kanngan 1 Korɛntfuɛ Mun 15:24-28 nun.
17, 18. (a) ?Ngue ti yɛ ɔ ti cinnjin kɛ Zoova i sufuɛ’m be yo wun ase kanfuɛ kɛ Zezi sa ɔ? (b) ?Kosan benin mun yɛ é wá tɛ́ be su like suanlɛ ng’ɔ́ bá lɛ’n nun ɔn?
17 ?Yɛ e li? ?É kán e wun ase titi kɛ Zezi sa? ?Armagedɔn alɛ nun’n, kɛ Famiɛn Zezi bá sran’m be jɔlɛ dilɛ’n, e liɛ’n yó sɛ? Zezi ɔ́ bá sa kpa’n nin yalɛfuɛ mun be ti alɛ kunlɛ. Ɔ maan, be nga be ti sran kpa’n, mɔ be kan be wun ase’n, be ngunmin yɛ bé fíte nun ɔn. I sɔ’n ti’n, maan e suan e wun ase kanlɛ. Sanngɛ, ikisa bɔbɔ’n, kɛ Zezi Klist fa yoli’n sa’n, sɛ e kan e wun ase’n, e bɔbɔ nin e wiengu mun é ɲán su ye kpanngban.
18 ?Ngue yɛ ɔ kwla uka e naan y’a kan e wun ase kɛ Zezi sa ɔ? Ninnge wie’m be kwla yo maan e wun ase kanlɛ’n kwla yo kekle e sa nun. ?Sanngɛ, wafa sɛ yɛ e kwla mian e ɲin e kan e wun ase ɔ? Like suanlɛ ng’ɔ́ bá lɛ’n nun’n, é wá tɛ́ kosan sɔ’m be su.
[Kosan mun]
[Foto mun, bue 15]
?Wafa sɛ yɛ e kwla nian Zezi i wun ase kanlɛ’n su ɔ?
[Foto, bue 16]
Zezi i sran annvuɛ silɛ’n yo ɲɛnmɛn.
