Kosan 1: ?Ngue ti yɛ n wo asiɛ’n su ɔ?

BE FLƐ bla kun kɛ Rozalini. Angle’m be nvle nun lɔ yɛ ɔ ɲinnin ɔn. Ɔ klo fluwa kpa. Yɛ ɔ kunndɛ kɛ ɔ́ úka sran mun wie. Kɛ ɔ ɲɛnnin i diplɔmu’n, ɔ dili junman dan kun. Yɛle kɛ ɔ niannin be nga be leman lawlɛ’n ɔ nin be nga mɔ tukpaciɛ ti’n be kwlaman be wun kan’n, ɔ nin be nga fluwa suanlɛ’n ti kekle man be’n, be lika wie. Ɔ maan ɔ ɲɛnnin i wun. Sanngɛ ɔ nin i sɔ ngba’n, i klun w’a jɔman. Ɔ se kɛ: “N usali min wun kɛ ‘?Ngue ti yɛ klɔ sran’m be wo asiɛ’n su ɔ?’ N usali min wun sɔ cɛli kpa.”

?Ngue ti yɛ sran’m be usa kosan sɔ’n niɔn? Afin klɔ sran’m be liɛ’n be bu akunndan. Be timan kɛ nnɛn mun sa. Be bu sa nga be yoli be laa’n be su akunndan, yɛ be fa tu be wun fɔ nun. Asa’n, ninnge nga be sunnzun kɛ bé yó be’n be bu be akunndan sie. Asa kusu’n, be kunndɛ like nga be ko yo naan b’a di aklunjuɛ’n.

?Wafa sɛ yɛ sran wie’m be tɛ kosan sɔ’n su ɔ? Sran kpanngban be waan aɲanbeun ninnge mun annzɛ dunman dan kunndɛlɛ ti yɛ klɔ sran’m be o asiɛ’n su ɔ. Naan ninnge sɔ mun yɛ be man aklunjuɛ ɔ.

?Wafa nga be tɛ kosan sɔ’n su’n, ɔ kle sɛ? Ɔ kle kɛ be buman Ɲanmiɛn i klun sa’n i like. Naan be bɔbɔ be klun sa liɛ’n yɛ ɔ ti be cinnjin tra ɔ.

?Wafa sɛ yɛ Biblu’n tɛ kosan sɔ’n su ɔ? Famiɛn Salomɔn tiantiannin aɲanbeun ninnge’m be nuan, yɛ kusu ɔ dili fɛ. Sanngɛ ɔ wunnin i kɛ nán ninnge sɔ mun be kunndɛlɛ ti yɛ e o asiɛ’n su ɔ, naan kusu be manman aklunjuɛ sakpa. I ndɛ nga ɔ klɛli’n i nun’n, ɔ kleli like nga ti yɛ klɔ sran’m be o asiɛ’n su’n m’ɔ kwla man be aklunjuɛ’n. I waan: “E sie e su e tie ndɛ’n kwlaa ng’ɔ o lɛ’m be atabo’n: maan ɔ nyin yi Nyanmiɛn, yɛ nanti i mmla’m be su. Like ng’ɔ fata kɛ klɔ sran kwlakwla yo’n yɛ ɔ o lɛ-ɔ.”  (Akunndanfuɛ’n 12:13) ?Ɲanmiɛn i mmla’m be su nantilɛ’n kwla man aklunjuɛ sakpa?

Ɲanmiɛn i mmla’m be su nantilɛ’n kwla man aklunjuɛ sakpa afin like nga Ɲanmiɛn kunndɛ i klɔ sran’m be lika’n i kun yɛle kɛ be mɛn dilɛ’n yo fɛ. Salomɔn klɛli i kɛ: “Like ng’ɔ ti kpa man sran’n, yɛlɛ aliɛ dilɛ nin nzan nɔnlɛ, ɔ nin junman bɔ be di’n i nuan like nyanlɛ. N wunnin kɛ like kpa sɔ’n kusu Nyanmiɛn yɛ ɔ man-an.”​—Akunndanfuɛ’n 2:24.

Like nga Ɲanmiɛn kunndɛ kɛ klɔ sran’m be yo i ekun’n, yɛle kɛ be klo be awlobofuɛ mun naan be nian be lika. Mmla kpakpa nga ɔ man awlobofuɛ’m be kwlaa’n, be wie mun yɛ:

“Yasua mun, an klo amun yi mun kɛ an fa klo amun bɔbɔ amun wun’n sa.”​—Efɛzfuɛ Mun 5:28.

“Maan mmla’m be kusu be bu be wun’m be sran.”​—Efɛzfuɛ Mun 5:33.

“Ba kanngan mun, maan amun nyin yi amun si nin amun nin.”​—Efɛzfuɛ Mun 6:1.

Sɛ e nanti Biblu’n nun mmla sɔ’m be su’n, e kwla di aklunjuɛ. Sanngɛ like cinnjin kpa nga ɔ fata kɛ e yo’n, yɛle kɛ e suan e Yifuɛ’n i su like kwlaa nga e kwla suan’n yɛ e nin i e mantan naan e tra janvuɛ. Biblu’n bɔbɔ se e kɛ e “fa [e] wun mantan Nyanmiɛn.” Yɛ ɔ kan gua su wie kɛ i “kusu fɛ́ i wun mántan [e].” (Zak 4:8) Sɛ a fa ndɛ sɔ’n su’n, ɔ mɛn dilɛ’n su yoman ngbɛn.

Sɛ a kunndɛ kɛ á sí like nga a kwla yo i ekun naan ɔ mɛn dilɛ’n w’a jɔ Ɲanmiɛn klun’n, nian fluwa ?Ngue like yɛ Biblu’n kle i sakpasakpa ɔ? i ndɛ tre 12 nun. A kwla ko fɛ i ɛntɛnɛti lika nga nun lɔ: www.pr418.com

[Kuku, bue 5]

Zezi kleli e like nga ti yɛ e o asiɛ’n su’n

Zezi sili sa nga ti yɛ ɔ bali asiɛ’n su wa’n i weiin. Afin ɔ seli kɛ: “Sa ti bɔ be wu min’n, sa ti bɔ m bali mɛn’n nun’n yɛ: m bali kɛ ń kán ndɛ ng’ɔ ti nanwlɛ’n klé sran mun.” (Zan 18:37) Ɔ maan blɛ kwlaa nga Zezi dili asiɛ’n su wa’n, ɔ kleli sran mun Ɲanmiɛn i su ndɛ nanwlɛ’n ɔ nin ninnge nga Ɲanmiɛn sunnzun kɛ ɔ́ yó be’n.

Sɛ e kusu e fa Zezi i ajalɛ’n su’n, ɔ su yoman e kɛ e o mɛn’n nun ngbɛn. I li bɔɔ ɔ se e kɛ fɛ i nzuɛn’n su. (Matie 11:29) Ninnge nga e kwla yo naan y’a fɛ i ajalɛ’n sɔ’n su’n be nun nɲɔn yɛ:

Zezi seli kɛ sɛ e waan é dí aklunjuɛ’n, ɔ fata kɛ e ‘si kɛ e di Nyanmiɛn ninnge’m be yalɛ.’ (Matie 5:3) Sɛ e wun i wlɛ kɛ ‘e di Nyanmiɛn ninnge’m be yalɛ’n,’ yɛle kɛ sɛ e kunndɛ kɛ e nin Ɲanmiɛn e afiɛn’n mantan’n, ɔ fata kɛ e suan ‘i mɔ i kunngba cɛ yɛ ɔ ti Nyanmiɛn’n nin Jésus-Krist m’ɔ sunmɛnnin i’n,’ be su like.​—Zan 17:3.

Zezi seli i sɔnnzɔnfuɛ’m be kɛ like nga ɔ kleli be’n, be kle be wiengu mun wie. Ɔ seli be kɛ: “I sɔ’n ti, an wɔ ko kle nvle-nvle’n kwlaa be like maan be kaci n sɔnnzɔnfuɛ, yɛ an yo be batɛm e Si Nyanmiɛn, nin i Wa’n, ɔ nin i Wawɛ’n be dunman nun. Yɛ like kwlaa nga n kleli amun’n, amun kusu an kle be maan be fa su.”​—Matie 28:19, 20.

Sran nga be suan Biblu’n nun like mɔ be fa like nga be suan’n su’n, be wun i kɛ be mɛn dilɛ’n kaci yo kpa tra laa’n. Yɛ kɛ sran sɔ’m be kan Ɲanmiɛn ndɛ’n kle be wiengu’n, be wun i wlɛ kpa kɛ kannzu nán ngbɛn ti yɛ be o asiɛ’n su ɔ.