Kosan 3: ?Ngue ti yɛ Ɲanmiɛn yaci min lɛ mɔ n wun ɲrɛnnɛn ɔn?

BE FLƐ bian kun kɛ Yani. I si’n ti nzannunmunfuɛ. Yani i si’n niɛnnin i lika, ɔ maan w’a mianman ninnge kɛ aliɛ nin tralɛ sa’n be wun. Sanngɛ i si’n w’a klomɛn i kɛ ɔ nin fata’n sa. Yani seli kɛ: “Baba i nzan nɔnlɛ’n nin i sa kekleekle m’ɔ yo min nin’n ti’n, m’an klomɛn i sa.” Kɛ Yani yoli kaklaka’n, ɔ usɛli i wun kɛ: “?Sɛ Ɲanmiɛn o lɛ sakpasakpa’n, nn ngue ti yɛ ɔ yaci sran’m be lɛ mɔ be wun ɲrɛnnɛn ɔn?”

?Ngue ti yɛ sran’m be usa kosan sɔ’n niɔn? Sɛ i li bɔbɔ ɲrɛnnɛn nunman sran kun su dan’n, sanngɛ kɛ ɔ wun kɛ sran uflɛ su fɛ’n, ɔ yo i ya. Ɔ maan ɔ usɛ i wun kɛ: “?Ngue ti yɛ Ɲanmiɛn yaci sran’m be lɛ mɔ be wun ɲrɛnnɛn ɔn?” I li sɛ kɛ Yani sa’n, i bɔbɔ ɔ su wun ɲrɛnnɛn kpa’n annzɛ tukpacɛ su kle i awlɛn su sran wie nun’n annzɛ i awlɛn su sran wie sinnin wie nun’n, yɛ ɔ usɛ i wun kosan sɔ’n kpa ɔ.

?Wafa sɛ yɛ sran wie’m be tɛ kosan sɔ’n su ɔ? Sran wie’m be bu i kɛ Ɲanmiɛn yaci e nun naan e wun ɲrɛnnɛn naan e si ngwlɛlɛ. Asa’n, ɔ yo sɔ naan e kan e wun ase. Asa ekun’n, be bu i kɛ ɔ yo sɔ naan e si aunnvuɛ. Wie’m be liɛ’n, ɔ yo be kɛ sran’m be wun ɲrɛnnɛn mɛn nga nun afin be yoli sa tɛ laa mɛn kun nun.

?Wafa nga be tɛ kosan sɔ’n su’n, ɔ kle sɛ? Sran sɔ’m be su se kɛ klɔ sran’m be ndɛ loman Ɲanmiɛn. Ɔ maan ɔ ti kekle man klɔ sran mun kɛ be klo i. Be ndɛ sɔ’n kle ekun kɛ Ɲanmiɛn siman aunnvuɛ.

?Wafa sɛ yɛ Biblu’n tɛ kosan sɔ’n su ɔ? Biblu’n kle weiin kɛ nán Ɲanmiɛn yɛ ɔ yo maan klɔ sran’m be wun ɲrɛnnɛn ɔn. Ɔ kan kɛ: “Sɛ be laka sran kun’n, nán maan ɔ se kɛ, Nyanmiɛn yɛ ɔ lɛkɛ i-ɔ. Afin be kwlá laka-man Nyanmiɛn sa fi nun, yɛ i bɔbɔ laka-man sran fi.” (Zak 1:13) I kpa bɔbɔ’n, kɛ sran’m be se kɛ Ɲanmiɛn yɛ ɔ yo maan klɔ sran’m be wun ɲrɛnnɛn’n, i sɔ’n ɔ nin wafa nga Biblu’n kan Ɲanmiɛn i ndɛ’n be kɔman likawlɛ. ?Ngue ndɛ yɛ Biblu’n kan ɔn?

Ɲanmiɛn ti sran klofuɛ dan. (1 Zan 4:8) I sɔ ti’n, Biblu’n fɛ i sunnzun bla ta. Biblu’n nun’n Ɲanmiɛn usa kɛ: “?Bla ta kun wla fi i wa’n su? ?Ɔ si-mɛn i bɔbɔ i klun ba’n i aunnvuɛ?” I sin’n, Ɲanmiɛn kannin ekun kɛ: “Kannzɛ i wla fi i wa’n su bɔbɔ’n, sanngɛ min  liɛ’n, min wla su fi-man amun su le.” (Ezai 49:15) Bla ta kun ɲinfu su yoman i wa kan’n i abɔlɛ. I kpa’n, sɛ ba’n su fɛ’n, ɔ́ yó naan i afɛ’n jaso i su. I kunngba’n yɛle Ɲanmiɛn liɛ’n. Ɔ faman ɲrɛnnɛn yiman sran’m be su.​—Bo Bolɛ 18:25.

Sanngɛ sran kpa’m be te wun ɲrɛnnɛn. Atrɛkpa’n a usa ɔ wun kɛ: ‘?Sɛ Ɲanmiɛn nian e lika’n naan like fi nunmɛn i sin’n, ngue ti yɛ ɔ yiman ninnge nga be kle e ɲrɛnnɛn’n be lɛ ɔ?’

Ninnge wie’m be ti yɛ Ɲanmiɛn nin a nunnunman ɲrɛnnɛn’n niɔn. É wá kán be nun kunngba cɛ ndɛ. Yɛle kɛ klɔ sran’m be bɔbɔ yɛ be kle be wiengu’m be ɲrɛnnɛn ɔn. Yɛ sran tɛ sɔ’m be nun kpanngban be kunndɛ kaciman be nzuɛn tɛ’n. Ɔ maan sɛ Ɲanmiɛn waan ɔ́ núnnún ɲrɛnnɛn’n, ɔ fata kɛ ɔ dun mmua nunnun sran tɛ sɔ mun ka.

Like kun ti yɛ Ɲanmiɛn nin a nunnunman sran tɛ sɔ mun ɔn. Akoto Piɛli kannin like sɔ’n i ndɛ. Ɔ klɛli i kɛ: “Like nga e Min’n se kɛ ɔ́ yó, ɔ cuɛn-cuɛn-mɛn i ase kɛ sran’m be bu i’n sa. Sanngɛ ɔ trɛ i anwlɛn amun wun, ɔ klo-man kɛ sran kun sa mlin, ɔ klo kɛ sran’m be kwlaa be kaci be nzuɛn’n.” (2 Piɛr 3:9) Ɲanmiɛn Zoova trɛ i awlɛn sran’m be wun. I sɔ’n kle kɛ ɔ klo sran naan i klun ti ufue.

Sanngɛ ɔ ka kaan’n, sran nga be kunndɛ kaciman’n, Ɲanmiɛn Zoova su trɛmɛn i awlɛn be lika kun. Ɔ su wa ‘kle be nga be kle [be wiengu] nyrɛnnɛn’n be nyrɛnnɛn wie.’ Yɛ “fɔ ng’ɔ́ fá tú be’n yɛlɛ kɛ be awieliɛ’n wíe be tɛ, bé ká nun sɔ mlɔnmlɔn.”​—2 Tɛsalonikfuɛ Mun 1:6-9.

Sɛ a kunndɛ kɛ á sí sa nga ti yɛ Ɲanmiɛn yaci sran’m be lɛ mɔ be wun ɲrɛnnɛn’n, ɔ nin like nga ɔ́ wá yó naan sran’m be su afɛ’n w’a wie’n be su ndɛ ekun’n, nian fluwa ?Ngue like yɛ Biblu’n kle i sakpasakpa ɔ? i ndɛ tre 11 nun. A kwla ko fɛ i ɛntɛnɛti lika nga nun lɔ: www.pr418.com

[Kuku, bue 9]

Ndɛ nga Zezi kɛnnin i ɲrɛnnɛn’n i su’n

Zezi w’a seman le kɛ Ɲanmiɛn ti yɛ e wun ɲrɛnnɛn ɔn. Sanngɛ ɲrɛnnɛn’n i su ndɛ nga ɔ kannin’n yɛ:

Zezi kleli kɛ Ɲanmiɛn kleman klɔ sran’m be ɲrɛnnɛn. Zezi yoli tukpacifuɛ mun, nin cɛcɛwafuɛ mun, nin aɲinsifuɛ’m be juejue. (Matie 15:30) Abonuan sa sɔ m’ɔ yoli be’n be kle e sa cinnjin nɲɔn. I klikli’n yɛle kɛ Zezi fali tinmin nga Ɲanmiɛn mɛnnin i’n fa yili sran’m be su ɲrɛnnɛn’n. Sanngɛ w’a fa kleman be ɲrɛnnɛn. I nɲɔn su’n, ɔ kle e kɛ nán tinmin mɔ Zezi le i’n i ngunmin ti yɛ ɔ yoli sran’m be juejue ɔ. Sanngɛ “be yoli [i] annvɔ” ti ɔ. (Matie 20:29-34) Zezi i ijɔlɛ’n ɔ nin i ayeliɛ’n be kleli kɛ kɛ sran’m be wun ɲrɛnnɛn’n ɔ yo i Si i ya. I lɛ’n kle kɛ Ɲanmiɛn i ɲin kpaman ɲrɛnnɛn nga klɔ sran’m be wun i’n su naan ɔ kunndɛ kɛ ɔ́ núnnún i kwlaa kpan!​—Zan 14:7, 9.

Zezi seli kɛ mmusu’m be si Satan ti yɛ sran’m be wun ɲrɛnnɛn ɔn. Ɔ seli kɛ: “Kɛ ɔ fin i bo bolɛ nun’n, [Satan] ti sran kunfuɛ.” (Zan 8:44) Zezi seli ekun kɛ “sran ng’ɔ sie mɛn nga’n” yɛle mmusu’m be si Satan naan “i yɛ ɔ laka mɛn wunmuan nunfuɛ’m be kwlaa nin-ɔn.”​—Zan 12:31; Sa Nglo Yilɛ 12:9.

Zezi gua e awlɛn su nzue kɛ ɲrɛnnɛn kwlaa wíe. Ɔ seli i sɔnnzɔnfuɛ’m be kɛ be srɛ Ɲanmiɛn se kɛ: “E si bɔ a o nyanmiɛn su lɔ’n, [...] maan ɔ sielɛ blɛ’n ju, maan e bɔ e wo asiɛ’n su wa’n e yo ɔ klun sa kɛ be bɔ be o nyanmiɛn su lɔ’n be yo’n sa.” (Matie 6:9, 10) Kɛ Ɲanmiɛn i Sielɛ’n ɔ́ wá síe klɔ sran mun’n, asiɛ’n su wa’n ɔ́ yó kɛ ɲanmiɛn su lɔ’n sa. Yɛle kɛ ɲrɛnnɛn su tranman asiɛ’n su wa kun.

Sa nga Zezi yili i nglo kleli akoto Zan i nun’n, ɔ kleli wafa nga kɛ Ɲanmiɛn i Sielɛ’n wá síe asiɛ’n, mɛn’n wá yó’n. Blɛ sɔ’n nun’n, Ɲanmiɛn “ɔ́ núnnún [sran’m] be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”​—Sa Nglo Yilɛ 1:1; 21:3, 4.